मत्ती 4 - बारेली पावरी

येसुन पारख

¹ तेत्यार परमेश्वरोन आत्मा येसु काजे बोयळामा लीगोयू काहाकि भुतडासी तेरी पारख होये.

² चू चावीस दाहळा, एने चावीस रात चू उपास्यू होतु काय नि खादु, ती तीना काजे भूक लागी.

³ ती पारखने वावू तेरे साते आवीन तीना काजे कोयू, “ओगर तू परमेश्वरोन पुऱ्यु होय, ती कोय दे, कि यु दोगळू रुटा बोन जाय.”

⁴ येसु जोवाब आप्यू, “लिखलो छे, माणूस निस्तु रुटासी नि, बाकीन हर एक वचनोसी यो परमेश्वरोन मुखोसी निकोवतलो छे, जीवता रोयसे.”

⁵ तेत्यार भुतडू तीनाक चुखला सोहोरोमा लीगोयू एने मंदीरोन काठोपोर उभू कोऱ्यु,

⁶ एने तीना काजे कोयू, “कोदि तू परमेश्वरोन पुऱ्यु छे, ती आपना खुदो काजे नेचू पाळ दे; काहाकि लिखलो छे चू तारा बारामा आपना सोरोग दूत काजे आग्या आपसे, एने चे तुसे काजे हातोमा झेल लेसे; कोदि ओसो नी होये कि तारा पायोमा दोगळान झोट लागे.”

⁷ येसु तीना काजे कोयू, “यो बी लिखलो छे तू प्रभू आपना परमेश्वरोन पारख मा कोरे.”

⁸ ओवतेन भुतडू तीनाक घोना सोवटा उचला बोयळा पोर लीगोयू एने आखा जोगोन राज एने तेरो कला देखाळीन

⁹ तीना काजे कोयू, “कोदि तू वाकु वोवीन मेसे काजे नोमोन कोरे, ती मे यो आखो काय तुसेक आपदिस.”

¹⁰ तेत्यार येसु तीना काजे कोयू, “हे भुतडा नांबे होय जा, काहाकि लिखलो छे, तू प्रभू आपना परमेश्वर काजे नमस्कार कोर, एने निस्तु तेरीत आराधना कोर.”

¹¹ तेत्यार भुतडू तेरे साते गोथू जात रोयू, एने देखू, सोरग दूत आवीन हेरी सेवा कोरणे बाज गोया.

येसुन सेवकाईन सुरुवात

¹² जेतार चू यो सोमव्यू कि योहान बोंदी होय गोयलु छे, ती चू गलीलमा जात रोयू.

¹³ एने चू नासरेथ काजे छुळीन कफर्णहुमोन सोहोरमा, जो दोरीयान काठे जबुलून एने नफताली भाग मा छे, जायीन रोयने बाज गोयू;

¹⁴ काहाकि जू यशयाह भविष्य कोरतान लारे कोवाय गोयलो होतो, चो पुरो होये.

¹⁵ “जबुलून एने नफताली देस, दोरीयान वाटेसी यरदनोन नोंदीन पार, दिसरा जात्यान गलील.

¹⁶ जे माणसे आंदारलामा बोसला होता, चे घोनो मोटो विजावो देख्या; एने जे मोरोनोन भाग एने साहवामा बोठला होता, तिंदरे पोर विजावो चोमक्यो.”

¹⁷ तिनी टेमे गोथू येसु प्रचार कोरणे एने यो कोयने सुरवात कोऱ्यु, “मोन फिरावू काहाकि सोरगोन राज साते आव रोया”.

पेहेला चेला काजे बुलावनो

¹⁸ गलीलोन दोरीयान काठे फिरतला येसु दुय भाशोक मतलब शिमोन काजे जू पतरस कोवायतू होतु, एने तेरु भाश अन्द्रियास काजे दोरीयामा जाव नाखतलु देख्यू; काहाकि चे माछल्या होता.

¹⁹ येसु तीनु काजे कोयू, “मारे पोछोव आत रोवू, ती मी तुमु काजे माणसोक धोरणे वावा बोनावीस.”

²⁰ चे तेतारुत जावी काजे छुळीन तेरे पोछोव आत रोया.

²¹ चा गोथा ओगा जायीन, येसु एने दुय भाशोक मतलब जब्दिन पुऱ्यु याकुब एने तेरु भाश योहान काजे देख्यू चे आपनु बास जब्दि पुठी ढोंड्यो पोर आपनी जावी सुधारता होता तीनु काजे बी बुलाव्यू.

²² चे तेतारुत ढोंड्यो एने आपना बासो काजे छुळीन तेरे पोछोव आत रोया.

येसुन मांदला माणसोक वारू कोरनो

²³ “येसु आखा गलीलमा फिरतू जायीन तिंदरे प्रार्थना घोरोमा प्रचार कोरतू, एने राज्यान वारली खोबर प्रचार कोरतू जायीन, एने माणसोन होर भातीन बिमारी एने कोमजुर काजे वारू कोरतू गोयू.

²⁴ एने आखा सिरीया देसोमा तेरो काम पोसरी गोयो, एने माणसे आखा बिमारी वावा काजे, जी भाती भातीन बिमारी, एने दुखोमा घेरायला होता, एने जीनामा भुंडली आत्मा बी होता, एने फेपरा वावा एने लखवा बिमारी वावा काजे येसुनचा लाव्या एने तीनु काजे येसु वारू कोऱ्यु.

²⁵ गलील एने दिकापुलीस, यरुशलेम, यहुदिया एने यरदन नोंदीन पोरले धोळे गोरदी पोछोव आव लागी.”