मत्ती 27 - बारेली पावरी

पिलातोन सामने येसु

¹ हिमी जेतार सोंदारे होय गोयो ती प्रधान पुजारू एने माणसो मायला डाहला पुढारी माणसे जे येसु काजे मारनेण छोमचू कोऱ्या.

² जे तीना काजे बांद्या एने लीजायीन पिलात सुभेदारोन हातोमा सोप देदा.

यहुदा इस्कारीयोतन आत्महत्या

³ जेतार सोंदारे धोरावने वावू यहुदा देख्यू कि चू गुणावू ठेराय गोयलु छे, चू पोस्तायु एने चे तीस चांदीन सिक्का प्रधान पुजारू एने पुढारी इंदरे सामने पोछु लाव्यू.

⁴ एने कोयू, “मे बेगुना काजे बिगर गुणावावा काजे लुय वोयाळनेन कोरता धोरावीन पाप कोरलु छे,” चे कोया “आमुक काय? तू जाणे.”

⁵ तेत्यार चू तीनु शिक्का काजे मंदीरमा नाखदिन जात रोयू एने जायीन आपसुत फासी लागाळीन मोर गोयू.

⁶ प्रधान पुजारू तीना शिक्का काजे लीन कोयू, “इनाक भोंडारमा मेकने वारू नी होय काहाकि यो लुयोन किमोत छे.”

⁷ आखरी चे छोमचू कोरीन तिना चांदीन सिक्कान परदेशा काजे गाळनेन कोरता कुमायडान खेत मुले ली लेदा.

⁸ इनान वोजेसी चो खेत आज तोक लुयोन खेत कोवायतेलो छे.

⁹ तेत्यार यो वचन यीर्मया भविष्य कोरतान लारे कोवाय गोयलो होतो चो पुरो होयो “चे तीस चांदीन सिक्का मतलब तिना ठेरावला किमोत काजे (जीनाक इस्राईलोन पुऱ्यामा गोथो कोतरा जोना ठेरावला होता) ली लेदा,

¹⁰ एने जोसू प्रभू मेसेक आग्या आपलु होतु तोसुच तीनुक कुमायडान खेतोक पोयशापोर आप देदु.”

पिलातुसोन येसु काजे सवाल

¹¹ जेतार येसु सुभेदारोन सामने उभू होतु ती सुभेदार हिनाक पुछु, “काय तू यहुदिन राजा छे?” येसु तिना काजे कोयू, “तू खुदुत कोयने बाज रोयू.”

¹² जेतार प्रधान पुजारू एने डायला पोर गुणू लागाळ रोया होता, ती चू काय जोवाब नी आप्यू.

¹³ तिना पोरसी पिलात तीना काजे कोयू, “काय तू नी सोमवतू कि ये तारा खिलापमा कोतरा गोवाया आपने बाज रोया?”

¹⁴ बाकीन चू तीना काजे एक वातोन बी जोवाब नी आप्यू, न्या तोक कि सुभेदार काजे मोटी नोवलाय लागी.

येसु काजे छुळनेमा असफल

¹⁵ सुभेदारोन जी नोवली रिती होती कि तिना वोलांडोनोन तीहीवारोमा माणसोन कोरता काहना एक बोंदी वावा काजे जीनाक जू जुवे तीनाक छुळ देतला.

¹⁶ तिने टेमे तेरेनचा बरब्बा नावोन एक बोंदी होतु.

¹⁷ आखरी जेतार चे एखठा होया, ती पिलात तीनु काजे कोयू, “तुमु काजे कून जुवे कि मे तूमरेन कोरीन छुळ दोम? बरब्बा काजे, नीती येसु काजे जू मसिह कोवायतलु छे?”

¹⁸ काहाकि चू जानतू होतु कि चे हिनाक दोगासी धोरावला छे.

¹⁹ जेतार चू नियावोन गादीपोर बोसलु होतु ती हेरी लाडी हिनाक कोय मुकली, “तू हीना धोरमीन मामलामा हात झुन घालतू, काहाकि मे आज सोपनामा हेरे लारे जादा दुख उठावली छे”?

²⁰ प्रधान पुजारू एने डाह-डाहा माणसो काजे जोताळ्या कि चे बरब्बा काजे मांग लेये, एने येसुन नास कोरावे.

²¹ सुभेदार तीनु काजे पुछु, “इनू दुयुमा गोथू कून जुवे कि मे तुमरेन कोरता छुळ दोम?” चे कोया, “बरब्बा काजे.”

²² पिलात तीनु काजे पुछु, “ती येसु काजे जू मसिह कोवायतलु छे, काय कोरो?” आखा तीना काजे कोया, “चू ख्रुस पोर चडवाय जाय”

²³ सुबेदार कोयू, “काहा, होयू काय बुराई कोर रोयू?” बाकीन चे एने बी आयळी आयळीन कोयने बाज गोया, “हिनाक ख्रुस पोर चढावू”.

²⁴ जेतार पिलात देख्यू कि काहीन होयतो नी बाकीन एरेन उलटोत भोडकनेपोर छे, ती चू पाणी लीन गोरदीन सामने खुद हात धुवीन कोयू, “मे इना धोरमीन लुयसी बिना गुणावावू छे; तुमुत जाणे.”

²⁵ आखा माणसे जोवाब आप्या, “एरू लुय आमरेपोर एने आमरा पुऱ्या पोर होये”

²⁶ इनापोरसी चू बरब्बा काजे छुळ देदु, एने येसु काजे चाबका दिन सोप देदू, कि ख्रुस पोर चोळाव देये.

सिपायळान लारे येसुन अपमान

²⁷ ती सुभेदारोन सिपायळा येसु काजे किल्लामा लीजायीन आखी पोलटोन हेरे चारू धोळे एखठा कोऱ्या,

²⁸ एने तेरा छिंदरा निकावीन तीनाक लाल रोंगोन झोगु पेहेराव्या,

²⁹ एने झाडक्यान मुकुट गुथीन हेरा मुंडका पोर मेक्या, एने तेरा जेवळे हातोमा लाकळो आप्या एने हेरे ओगोव मांडा टेकिन हेरी मोजाक उळावने बाज गोया एने कोया, “हे यहुदिन राजा, नमस्कार”

³⁰ एने हेरे पोर थूक्या, एने चो लाकळो लीन हेरा मुंडका पोर देने बाज गोया.

³¹ जेतार चे हेरी मोजाक उळाव लेदला होता, ती हेरु झोगु हेर पोर गोथो निकावीन पोछा हिनाक हेरा छिंदरा हिनाक पेहेराव्या, एने ख्रुस पोर चोळावने कोरीन लीगोया.

येसुक ख्रुस पोर चोळावनो

³² बारथे जाता जायीन हिनुक शिमोन नावोन कुरेनी माणूस भेटायु चे हिनाक बिना कामोन धोऱ्या कि हेरु ख्रुस हाकलीन ली चाले.

³³ तिना ठीकानापोर जो गुलगुता मतलब खोपडीन ठीकान कोवायतो होतो,

³⁴ चे पित्त भेसकलो आंगुरोन रोस हिनाक पिणे कोरीन आप्या, बाकीन चू चाखीन पिणे नी हिंड्यू.

³⁵ तेत्यार चे तीनाक ख्रुस पोर चोळाव्या एने चिठ्या नाखीन हेरे छिंदरा वाट लेदा,

³⁶ एने चे बोसीन हेरु पेहरू देणे बाज गोया.

³⁷ एने तेरो गुणान पोतरो तेरा मुनकान उपोर लागाळ्या कि “यु यहुदिन राजा येसु छे.”

³⁸ तेत्यार हेरे साते दुय डाखू एक जेवळे एने एक डाखरे, ख्रुस पोर चोळाय गोया.

³⁹ आवने-जाणे वावा मुंडको हालवीन-हालवीन हेरी बुराई कोरता होता,

⁴⁰ एने जे कोयता होता, “हे मंदीर काजे ढावने वावू एने तीन दाहळामा बोनावने वावू, आपना खुदो काजे ते वाचाड! ओगर तू परमेश्वरोन पुऱ्यु छे, ती ख्रुस पोर गोथू उतोर जा.”

⁴¹ इना रितीसी प्रधान पुजारू भी शास्त्री एने डाह-डाहा साते मोजाक कोर कोरीन कोयता होता,

⁴² “यु दिसरा काजे वाचाडयु, एने आपना खुदो काजे नी वाचाड सोकतू यु ते इस्राईलोन राजा छे हिमी ख्रुस पोर गोथू उतरी जाय ती आमु हिनापोर भुरसू कोरजे.

⁴³ चू परमेश्वर पोर भुरसू मेकलु छे; ओगर चू इनाक जुवे, ती हिमी छुळाव लेये काहाकि यु कोयलु होतु, ‘मे परमेश्वरोन पुऱ्यु छे.’”

⁴⁴ इना रितीसी डाखू बी जू हेरे साते ख्रुस पोर चोळावला होता, येरी बुराई कोरता होता.

येसुन जीव निकोवनो

⁴⁵ दिसू गोथा लीन तिसरे टेम तोक आखा देसोमा आंदारो छावायला रोयो.

⁴⁶ तिसरे प्रोहोरोन साते येसु मोटला बुलोसी आयळीन कोयू, “एली, एली, लमाशबक्तनी”? मतलब “हे मारा परमेश्वर, हे मारा परमेश्वर, तू मेसेक काहा छुळ देदु?”

⁴⁷ जे चा उबरोयला होता, हिनामा गोथा कोतरा जोना यो सोमवीन कोया, “यु ते एलिया काजे आयळी रोयू.”

⁴⁸ तीनामा गोथू एक तेतारुत दोवळीन आव्यु एने स्पंच लीन आंबोमा डूबाडयु, एने लाकळापोर मेकीन हिनाक चूसाड्यू.

⁴⁹ दिसरा कोया, “रोय जावू, देखसु एलिया हिनाक वाचाडने आवे कि नी.”

⁵⁰ ती येसु पोछु मोटला बुलोसी आयळीन जीव छुळ देदु.

⁵¹ एने देखू, मंदीरोन पोडदु उपोर गोथो नेचू तोक फाटीन दुय तूकडा होय गोया एने धोरती हाल गोयी बोयळा तोडकि गोया,

⁵² एने मोळवाट्या उगळी गोया एने मोरला चुखला माणसोन जादा धोळे जीव उठ्या,

⁵³ एने हेरा जीव उठनेन ओवतेन चे मोळवाट्यामा गोथा निकवीन चुखला नोगोरमा गोया एने जादा जोना काजे देखाय पोळ्या.

⁵⁴ तेत्यार सुभेदार एने जे हिंदरे साते येसुन पेहरु दि रोया होता, भूकंप एने जो काय होयलो होतो तीनाक देखीन जादा बिह गोया एने कोया, “छाचलीन यु परमेश्वरोन पुऱ्यु होतु”

⁵⁵ चा घोणा सोवटा बायरा जे गलीलसी येसुन सेवा कोरता जायीन हेरे साते आवला होता, नांबे गोथा यो देख रोया होता.

⁵⁶ तीनामा मरीयम मगदलीनी, एने याकुब एने योसेफोन आया मरीयम, एने जब्दिन पुऱ्यान आया होती.

येसुक गाळनो

⁵⁷ जेतार सांतो होयो ती युसूफ नावोन अरिमतियाह एक मालदार माणूस जू खुदुत येसुन चेलु होतु, आयु.

⁵⁸ चू पिलातुसोनचा जायीन येसुन धोळे मांग्यू इनापोरसी पिलात आपनेन आग्या आप्यो.

⁵⁹ युसूफ धोळ लेदू, एने धोव्वा चादरामा गुंडाव्यू,

⁶⁰ एने तीनाक हेरा नोवला मोळवाट्यामा मेक्यू जीनाक चू टेकळामा खुदाळलु होतु, एने मोळवाट्यान झोपला पोर मोटलु दोगळू धोकलीन जात रोयू.

⁶¹ मरीयम मगदलीनी एने दिसरी मरीयम चा मोळवाट्यो सामने बोठ रोया होता.

कबरोन राखवाव

⁶² दिसरे दाहळे तीयारीन दाहळेन दिसरू दाहळू होतु, प्रधान पुजारू एने फरुशी पिलातुसोनचा एखठा होयीन कोया,

⁶³ “हे माहाराज, आमुक फोम छे कि चू बुलावने वावू जीवतू होतु कोयलु होतु, मे तीन दाहळान ओवतेन जीव उठीस.

⁶⁴ आखरी आग्या आप कि तीन दाहळा तोक मोळवाट्यान राखवावी कोराय जाय, ओसो नी होयनो जुवे कि हेरा चेला आवीन हिनाक चूर लीजाय एने माणसो काजे कोयने बाज जाय, ‘चू मोरलोमा गोथू जीव उठलु छे’ ती पोछलु धोकु पेहेले गोथो बी बुरु होयसे.”

⁶⁵ पिलात तीनु काजे कोयू, “तुमरे जुव ते राखवाव्या ते छे जावू, आपना सोमोजोन अनसारे राखवावी कोरु.”

⁶⁶ आखरी चे राखवाव्या काजे साते लीजायीन, दोगळा पोर छापू लागाळीन मोळवाट्यान राखवावी कोऱ्या.