मत्ती 26 - बारेली पावरी

येसुन मारनेन योजना

¹ जेतार येसु जे आखा वाते कोय देदु ती आपना चेला काजे कोयने बाज गोयू.

² “तुमुक मालूम छे कि दुय दाहळामा वोलांडोनोन तीहीवार छे एने माणसोन पुऱ्यु ख्रुस पोर चोळवाय जाणे कोरीन धोरवाय जासे.”

³ तेत्यार प्रधान पुजारान एने माणसोन डायलू कैफा नावोन महायाजकोन आंगनामा एखठा होता.

⁴ एने आपसामा विचार कोरणे बाज गोया कि येसु काजे दोगासी धोरीन मार देणे,

⁵ बाकीन चे कोयता होता “वोलांडोनोन टेमे नी, कोदि ओसो नी होयो कि माणसोमा दोंगु होय जाय.”

येसु पोर मोहेंगलो इत्तर छिळेकनो

⁶ जेतार येसु बैतनिय्याह गावमा शिमोन कुळावा बिमारी वावान घोरमा होतु जेनाक येसु वारू कोरलु होतु.

⁷ ती एक बायोर संगमरमरोन केटलीमा मोहोंगलो इत्तर लीन तेरेनचा आवी एने जेतार चू खाणो खाणे बोस रोयू होतु ती तेरे मुंडका पोर रेचवी देदी.

⁸ यो देखीन तेरा चेला रीसवाया एने कोयने बाज गोया “एरू काहा नाश कोर देदी?

⁹ इनाक ते वारला किमोत मा वेचीन गोरीब काजे वाट सोकता होता.”

¹⁰ यो जानीन येसु तीनु काजे कोयू, “बायर काजे काहा तोकलीत आपने बाज रोया? जी मारे पोर भोलाई कोरली छे.

¹¹ गोरीब ते तुमरे साते हमेशा रोयतला छे, बाकीन मे तुमरे साते हमेशा नी रोयो.

¹² होयी ते मारे डीलोपोर यो इत्तर रेचवली छे, यो मारे गाळाय जाणे कोरीन कोरलो छे.

¹³ मे तुमु काजे छाचलीन कोयो कि आखा जोगोमा जा जी वारली खोबरोन प्रचार कोराय जासे चा तेरा इना कामोन फोम कोरायसे.”

यहुदा इस्कारीयोतन विस्वासघात

¹⁴ तेत्यार यहुदा इस्कारीयोत जू बारा चेला मायलु एक होतु, प्रधान पुजारानचा जायीन कोयू.

¹⁵ “अगर मे तीनाक तुमरे हाते धोराव दोम ती मेसेक काय आपसु? चे तीना काजे तीस चांदीन सीक्का तुलीन आप देदा,

¹⁶ एने चू तिनी टेमे तीनाक धोरावनेन मोकू हेरने बाज गोयू.”

चेला साते आखरी खाणो

¹⁷ बेखमीर रुटान तीहीवारोन पेहेले दाहळे चेला येसुनचा आवीन पुछ्ने बाज गोया “तू काय चाहे कि आमु तारेन कोरता वोलांडोनोन तीहीवारोन तीयारी कोरजे?”

¹⁸ चू कोयू, “सोहोरोमा आमुक माणसोन घोर जायेन तीनाक कोयू ‘गुरु कोये कि मारू टेमे साते छे, मे आपना चेला साते तारेनचा वोलांडोनोन तीहीवार कोरु.’”

¹⁹ आखरी चेला येसुन आग्या मानीन वोलांडोनोन तीहीवारोन तीयारी कोऱ्या.

²⁰ जेतार सांतो होयो ती चू बारा चेला साते खाणो खाणे कोरीन बोशु.

²¹ जेतार चे खाणे बाज रोया होता ती चु कोयू, “मे तुमु काजे छाचलीन कोयो कि तुमरेमा गोथू एक मेसेक धोरावसे”

²² इनापोरसी चे जुदा नाराज होय गोया, एने होर एक जोणु तीनाक पुछने बाज गोया, “हे गुरु काय चू मे छे?”

²³ चू जोवाब आप्यू, “जू मारे साते थाविमा हात घाल रोयु चू मेसेक धोरावसे.

²⁴ माणसोन पुऱ्यु ते जोसो तेरे बारामा लिखलो छे, जातलु छे; बाकीन तिना माणसोन कोरीन दुख छे जिनान लारे माणसोन पुऱ्यु धोराय जातलू छे; अगर तिना माणसोन जन्मो नि होयतो, तेरेन कोरता वारलो होयतो”

²⁵ तेत्यार चू धोरणे वावू यहुदा कोयू, “हे रब्बी, काय चू मे छे?” तीनाक चू कोयू, “तू कोय देदू.”

प्रभू भोज

²⁶ जेतार चे खाय रोया होता ती येसु रुटू लेदू एने आशिष मांगीन एने रुटू तुळीन चेलाक कोयू, “खावू यो मारो डील छे,”

²⁷ ओवतेन चू प्यालू लीन धन्यवाद कोऱ्यु एने तीनुक आपतू जायीन कोयु “तुमु आखा न्या गोथो पिवू.

²⁸ काहाकि जो नोवीन वायदू जो लुय छे जो घोणा सोवटा जुगू पापोन माफीन कोरता वोयाळाय जातलो छे,

²⁹ मे तुमु काजे छाचलीन कोयो कि आंगुरोन जू रोस तिने दाहळे तोक नि पियो जेतार तोक तुमरे साते मारा बासोन राजमा नोवलो नि पियो.”

³⁰ ओवतेन चे गीते गावीन जयतुन बोयळा पोर गोया.

पतरसोन मना कोरनेन भविष्यवाणी

³¹ तेत्यार येसु तीनु काजे कोयू, “तुमु आखा आज राती मारे बारामा ठूकर खासु, काहाकि लिखलो छे मे गुवाव्या काजे भाविस, एने टूवान गाडरा वेरा वेर होय जासे.

³² बाकीन मे मारे जीव उठनेन बादमा तुमरेन पेहेले गलीलमा जायीस.”

³³ इनापोरसी पतरस तीनाक कोयु, “ओगर आखा तारा बारामा ठूकर खाय ती खाय, बाकीन मे कोबी नि ठूकर खाम.”

³⁴ येसु तीना काजे कोयू “मे तुसेक छाचलीन कोय कि आज राती कुकळू वासनेण पेहेले तू तीन कावा मारू नाकार कोरिस.”

³⁵ पतरस तीनाक कोयू, “ओगर मेसेक तारे साते मोरनु बी पोळे ती, ते बी मे तारू इनकार नी कोरो एने ओसोत आखा चेला बी कोया.”

गतसमनीमा प्रार्थना

³⁶ जेतार येसु आपना चेला साते गेथसेमोन नावोन एक जागे आव्यु, एने आपना चेला काजे कोयने बाज गोयू, “जेतार तोक मे वा जायीन प्रार्थना कोरो, तेतार तोक न्यात बोस रोयजू.”

³⁷ येसु पतरस एने जब्दिन दुयू पुऱ्या याकुब एने योहान काजे साते लीगोयू एने नोजोरमा कासावीस होयने बाज गोयू.

³⁸ तेत्यार चू तीनु काजे कोयू, “मारू जीव निकवने बाज रोयू, न्या तोक कि मारू जीव निकोवने हिंडे, तुमु न्यात उबा रोयू एने मारे साते जागता रोयू.

³⁹ ओवतेन येसु थुलूक ओगु जायीन उबळू पोळ गोयू; एने जी प्रार्थना कोऱ्यु, कि हे मारा बास ओगर होय सोके ती यो दुख मारेनचा गोथो तोव जाय बाकीन जोसो मे लागे तोसो नि बाकीन जोसो तूसेक लागे तोसोत होयने दे.”

⁴⁰ एने चू चेलानचा आवीन तीनुक सुवतला देख्यू एने पतरस काजे कोयू, “काय तुमु मारे साते एक घोळीक भोर बी नी जाग सोक्या?

⁴¹ जागता रोयू, एने प्रार्थना कोरता रोयू, कि तुमु परीक्षामा नी पोळे, आत्मा ते तीयार छे बाकीन डील कोमजुर छे.”

⁴² एने चू दिसरे कावा जायीन एने प्रार्थना कोऱ्यु कि, “हे मारा बासो, अगर यो मारे पिये बिना नी छेटो होय सोकतो ती तारी मोर्जी पुरी होये.”

⁴³ तेत्यार चू आवीन तीनुक ओवी सुवतला देख्यू, काहाकि तिंदरा डूवा निंदोमा भोरायला होता,

⁴⁴ तीनुक छुळीन चू ओवी जात रोयू एने तीनु बुलोमा एने तिसरे कावार प्रार्थना कोऱ्यु.

⁴⁵ तेत्यार चू चेलानचा आवीन तीनु काजे कोयू, हिमी सुवता रोयू, एने आराम कोरु देखू टेम आव लागली छे, एने माणसोन पुऱ्याक पापीन हाते धोरवाय जातलु छे,

⁴⁶ उठू, चालू; देखू, मेसेक धोरणे वावा साते आव लागला छे.

येसु काजे बंदी बोनावनो

⁴⁷ चू जो कोय रोयू होतु कि यहुदा जू बारामायलु एक होतु आव्यु, एने तेरे साते प्रधान पुजारू एने माणसो मायला डाहला पुढारी, इंदरे तोरोफसी मोटीत गोरदी तलवाऱ्या एने लाकळ्या लीन आव्या.

⁴⁸ तीनाक धोरणेवावु तीनुक निशाणी आपतू होतु; “जीनाक मे गुवू आपो चू छे; तीना काजे धोर लेजू.”

⁴⁹ एने तेत्यारुत येसुनचा आवीन कोयु “हे रब्बी, नमस्कार” एने तीनाक जादा गुवू देदू.

⁵⁰ येसु तीना काजे कोयू, “हे दोस्ता, जिना कामोन कोरता तू आवलु छे तीनाक कोरले,” तेत्यार चे साते आवीन येसु पोर हात नाखीन एने तीनाक धोर लेदा.

⁵¹ येसुन साथीमा गोथू एक माणूस हात बोढावीन तेरी तलवार निकावीन महायाजक पावोर पोर चालाळीन तेरो कानटो काट देदू.

⁵² तेत्यार येसु तीनाक कोयू, “तारी तोलवार पोछि जागा पोर मेक ले काहाकि जू तलवार चालाळे चे आखा तलवारे कोरीन माराय जासे.

⁵³ काय तुसेक नि जनायतो कि मे मारा बासोसी विनता कोर सोको, एने चू सोरगोन दूतोन बारा पालटोन गोथो जादा मारेनचा हिमी मुकली देये?

⁵⁴ बाकीन पवित्र शास्त्रान जी वाते ओसोत जोरुरी छे, कोसो पुरो होयसे?”

⁵⁵ तिनी टेमे येसु भीळ काजे कोयू, “तुमु तलवारे एने डेंगा लीन मेसेक डाखून तोसो धोरणे कोरीन निकवी रोया?” मे दाहळीन मंदीरमा बोसीन प्रचार कोरतू होतु एने तुमु मेसेक नि धोऱ्या.

⁵⁶ बाकीन यो आखो इनान कोरता होयो कि भविष्य कोरतान वचन पुरो होये तेत्यार आखा चेला तीना काजे छुळीन दोवळी पोळ्या.

केफान अगोव येसु

⁵⁷ तेत्यार येसुक धोरणे वावा तीनाक कैफा नावोन महायाजकोनचा लीन गोया चा शास्त्री एने पुढारी घोन डाहाला माणसे टूवायला होता,

⁵⁸ पतरस नांबेत-नांबे तेरे पोछोव-पोछोव महायाजकोन आंगने तोक गोयू, एने माही जाईन आखरी तोक काय होयतालो देखणेन कोरता खुलीमा जाईन बोस गोयू.

⁵⁹ प्रधान पुजारू एने आखरी महासभा, येसु काजे मार नखाने कोरीन तेरे खिलापमा झुटी गोवायी हेरता होता.

⁶⁰ बाकीन घोनसोवाटा गोवायी हेरनेपोर भी नि जोळी, आखिरमा दुय जोना आया.

⁶¹ एने कोया “जू कोयलु छे कि मे परमेश्वरोन मंदीर काजे पाळ सोकतलु एने तीनाक तीन दाहळामा बोनाव सोकतलु?”

⁶² तेत्यार महायाजक उबरोयीन येसु काजे कोयू “काय तू काहीन जोवाब नि आपतलु? जे माणसे तारे बारामा काय गोवायी देणे बाज रोया?”

⁶³ बाकीन येसु हुगुत रोयू तेत्यार महायाजक तीनाक कोयू “मे तुसेक जीवतला परमेश्वरोन कोसोम आपो कि अगर तू परमेश्वरोन पुऱ्यु मसिह छे ती आमु काजे कोय दे,”

⁶⁴ येसु तीना काजे कोयू, “तू आपसुत कोय देदू; बाकीन मे तुमु काजे यो भी कोयो कि हिमी गोथा तुमु माणसोन पुऱ्या काजे सर्वशक्तिमानोन जेवळे धोळे बोसलू एने सोरगोन वादवा पोर आवतेलु देखसु.”

⁶⁵ इनापोरसी महायाजक आपना छिंदरा फाळीन कोयु, “जू परमेश्वरोन बुराई कोरलु छे, हिमी आमुक गोवायीन काय जरुरत छे? देखू तुमु हिमी जी बुराई सोमवला छे.

⁶⁶ तुमु काय विचार कोरतेला?” चे जोवाब आप्या “यो मोरणोन दोंडोन लायक छे,”

⁶⁷ तेत्यार चे तेरे मुयो पोर थूक्या, एने तीनाक धूमा देदा, दिसरा थापळ्या देदा एने कोया,

⁶⁸ “हे मसिह, आमुक भविष्यवाणी कोरीन देखाळ कि कून तूसेक देदो?”

पतरसोन येसुन मना कोरनो

⁶⁹ पतरस बारथे आंगनामा बोस रोयु होतु कि एक पावेरनी तेरेनचा आवी एने कोयी “तू बी येसु गलीली साते होतु.”

⁷⁰ चू आखान सामने यो कोयतू जायीन इनकार कोऱ्या, “मे नी जानतलु कि तू काय कोय रोयी.”

⁷¹ जेतार चू बारथे देवळीमा गोयू ती, दिसरी पावेरनी तीनाक देखीन तीनु काजे जे चा होता तीनुक कोयी, “यु बी येसु नासरी साते होतु.

⁷² चू कोसोम खायीन एने इनकार कोऱ्यु मे तिना माणसो काजे नी उवखतलु.”

⁷³ थुलिक वारमा माणसे जे चा उबरोया होता, पतरसोनचा आवीन तीना काजे कोया छाचलीन तू बी तीना मायलु छे, काहाकि तारी बुली, तारू भेद खुल देदली छे.

⁷⁴ तेत्यार चू झीटकारिन कोसोम खाणे बाज गोयू “मे तीना माणसो काजे नी उवेखतलु,” एने तिनी टेमे कुकळू वासने बाज गोयू.

⁷⁵ तेत्यार पतरस काजे येसुन कोयली वात फोम आवी कुकळू वासने पेहेले तू तीन कावार मारू इनकार कोरिस एने चू बारथे जायीन ढसा-ढसा रोड्यू.