मत्ती 25 - बारेली पावरी

दोस कुवारीन दाखलू

¹ सोरगोन राज “तीनु दोस कुवारीन सारखो होयसे जे तिंदरा दिवा लीन दुल्हा काजे भेटने कोरीन निकव्या.

² तीनुमा पाच सोमोजदार होता, एने पाच सोमोजदार नी होता.”

³ जे सोमोजदार नी होता चे तिंदरा दिवा ली लेदा, बाकीन तिंदरे साते तेल नी लेदा.

⁴ बाकीन जे सोमोजदार होता चे तिंदरा दिवा पुठी तिंदरा केटल्यामा तेल भोर लेदा.

⁵ जेतार दुल्हा काजे आवनेमा मुळू होय गोयू, ती चे आखा डूलक्या लेने बाज गोया, एने सुव गोया.

⁶ “आदी राती पुकार होयू, ‘देखू दुल्हा आवने बाज रोयू तीनाक भेटने कोरीन चालू.’”

⁷ तेत्यार चे आखा कुवाऱ्या उठीन तिंदरा दिवा सुदारने बाज गोया.

⁸ एने नि सोमोजदार होता चे सोमोजदार होता तीनुक कोया; तुमरा तेलोमा गोथो थुलोक आमु काजे बी आपु, काहाकि आमरा दिवा उलायने बाज रोया.

⁹ बाकीन सोमोजदार जोवाब आप्या, कांखुर मायन यो तुमरेन कोरता एने आमरेन कोरता पुरो नी होये; वारलो यो छे कि तुमु वेचनेवावानचा जायीन तुमरेन कोरता मुले ली लेवू.

¹⁰ जेतार ची मुले लेणे जाता होता ती दुल्हा आवीन पुग गोयू एने जे तीयार होता चे तिना साते वीयावोन घोरमा जात रोया एने झोपलु बोंद कोराय गोयू.

¹¹ ओवतेन चे दिसरा कुवाऱ्या बी आवीन कोयने बाज गोया, “हे माहाराज, आमरेन कोरता झोपलु उगाळ दे.”

¹² चू जोवाब आप्यू मे तुमु काजे छाचलीन कोयो कि मे तुमु काजे नी उवेखतलु.

¹³ इनान कोरता जागता रोयू काहाकि तुमु नी तिना दाहळाक जानतला नि तिनी टेमो काजे.

तीन दासोन दाखलू

¹⁴ “काहाकि परमेश्वरोन राज तिना माणसोन सारखो छे जू परदेश जाणेन टेमे आपना पावोर काजे बुलावीन आपनी मालमत्ता तिंदरे होवाले कोर देदू.”

¹⁵ चू एक काजे पाच तुळा, दिसरा काजे दुय, तिसरा काजे एक मतलब; होर एक काजे तिंदरी लायकी देखीन आप्यू एने चू पोरदेस जात रोयू.

¹⁶ तेत्यार जीना काजे पाच तुळा जोळला होता चू तेत्यारुत जायीन तिना पोर लेन देन कोऱ्यु एने पाच तुळा एने कोमायू.

¹⁷ इना रितीसी जिनाक दुय जोळला होता चू बी दुय एने कोमायू.

¹⁸ बाकीन जीना काजे एक आपलु होतु चू जायीन जागाक खोंद्यू एने आपना मालकोन तुळा डुकाळ देदु.

¹⁹ घोणा सोवटा दाहळान बाद तीनु पावोरन माहाराज आवीन तिंदरे जुव हिसाब लेणे बाज गोयू.

²⁰ जीना काजे पाच तुळा जोळला होता चू, पाच तुळा एने लावीन कोयू, “हे माहाराज, तू मेसे काजे पाच तुळा आपलु होतु, देख, मे पाच तुळा एने कोमायलु छे.”

²¹ तेरु माहाराज तिना काजे कोयू, “सोयावा वारला एने भुरसान लायक पावोर, तू थुलाकमा भुरसान लायक रोयू; मे तुसेक घोणा सोवटा चीजोन अधिकारी बोनावीस, आपना महाराजोन खुशीमा सहभागी होय जा.”

²² “एने जीना काजे दुय तुळा आपला होता, चू बी आवीन कोयू ‘हे माहाराज, तू मेसेक दुय तुळा आपलु होतु, देख मे दुय तुळा एने कोमायू.’

²³ तेरु माहाराज तीनाक कोयू, ‘सोयावा छे, वारला एने भुरसान लायोक दास, तु थुलाक भुरसान लायोक रोयू; मे तुसेक घोणा सोवटा चिजोन अधिकारी बोनावीस आपना महाराजोन खुशीमा सहभागी होय जा.’”

²⁴ तेत्यार जीनाक एक तुळा आपलु होतु, चू आवीन कोयू, “हे माहाराज, मेसेक मालूम होतो कि तू रीसावू माणूस छे; तू जा नि वेरतलु चा काटतेलु छे, एने जा वेरायलो नि होय चा गोथू टुवू कोरतेलू,”

²⁵ “इनान कोरता मे बिह गोयू एने जायीन तारा तुळा धोरतीमा डुकाळ देदू, देख जो तारो छे, चो यो छे.”

²⁶ तेरु माहाराज तीनाक जोवाब आप्यू; “हे दोगावा एने उजग्यू पावोर, जेतार तुसेक जो मालूम होतो कि जा मे नि वेरतलु चा गोथो काटतेलु एने जां मे नि पोसरावतलू चा गोथो टूवू कोरतेलू.”

²⁷ ती तू ओसो कोरणो होतो कि मारा रुप्या सावकारो काजे आप देतु, मे आवीन मारो घोनो व्याज सोहित ली लेतू.

²⁸ इनान कोरता चू तुळू हेरेनचा गोथा ली लेयू, एने जीना जूव दोस तुळा छे तीना काजे आप देयू.

²⁹ काहाकि जिना कुदा जुव छे, तीनाक एने आपाय जासे एने तेरे जुव घोनो सोवटो होय जासे बाकीन जिना जुव नि होय, तेरेनचा गोथो चो बी जो हेरे जुवसे, मांगाय जासे,

³⁰ एने इना रिकामा पावोर काजे बारथेला आंदारलामा नाख देवू, जा रोडनो एने दात कोकळावनो छे.

संसारोन न्याय

³¹ “जेतार माणसोन पुऱ्यु तेरा महिमामा आवसे एने आखा सोरग दूत तेरे साते आवसे ती चू महिमान सिहासन पोर बोससे.”

³² एने आखा देसोन माणसे तेरे ओगोव एखठा कोरायसे, एने जोसो राखवाव गाडरा काजे बुकळामा गोथू ओलोग कोरतेलू, तोसोत चू तीनुक एक दिसराक ओलोग कोरसे.

³³ चू गाडरा काजे तेरे जेवळे धोळे एने बुकळा काजे तेरे डाखरे धोळे कोरसे.

³⁴ तेत्यार राजा तेरे जेवळे धोळे वावा काजे कोयसे, “हे मारा बासोन सोयावा माणसे आवू इना राजोन अधिकारी बोन जावू, जो जोगोन पेहेले गोथो तुमरेन कोरता तियार कोरलु छे.”

³⁵ काहाकि मे भूकलू होतु, एने तुमु मेसेक खाणे आपला छे; मे तीसलू होतु एने तुमु मेसे काजे पाणी पीवाळला; मे परदेसी होतु एने तुमु मेसेक आपना घोरमा राख्या;.

³⁶ मे उगाळलु होतु, एने तुमु मेसेक डोगला पेराव्या; मे बिमार होतु ती तुमु मारी चाकरी कोऱ्या मे जेलमा होतु, एने तुमु मेसेक मेवने आव्या.

³⁷ तेत्यार धोरमी तीना काजे जोवाब आपसे “हे प्रभू, आमु, कोत्यार तुसे भूकलू देखीन खाणो खावाळला? एने तीसलु देखीन पाणी पिवाळला?

³⁸ आमु कोत्यार तुसेक पोरदेसी देख्या, एने आमरे घोरमा राख्या? एने उगाळलु देखीन डोगला पेहेराव्या?

³⁹ आमु कोत्यार तुसेक बिमारीमा एने जेलमा देख्या, एने तुसे काजे मेवने आव्या?”

⁴⁰ तेत्यार राजा तीनुक जोवाब आपसे, “मे तुमु काजे छाचलीन कोय कि, तुमु जे मारा नानामा नाना भाशोमा गोथा काहना एका साते कोऱ्या चो मारे साते कोऱ्या.”

⁴¹ “तेत्यार चू डाखऱ्या धोळे वावा काजे कोयसे, ‘हे शापित माणसो मारे ओगोव गोथा तिना ओमोरकाईन आगठामा जात रोयू जो भुतडान एने तेरा दूतोन कोरता तीयार कोरलो छे,

⁴² काहाकि मे भूकलू होतु एने तुमु मेसेक खाणे नी आप्या, मे तीसलु होतु एने तुमु मेसेक पाणी नी पिवाळ्या.

⁴³ मे पोरदेसी होतु, एने तुमु मेसेक तुमरे घोरमा नी राख्या, मे उगाळलु होतु, एने तुमु मेसेक डोगला नी पेराव्या; मे मांदलु होतु एने जेलमा तुमु मारी खोबर नी लेदा.’”

⁴⁴ तेत्यार चे जोवाब आपसे, “हे प्रभू, आमु तुसेक केतार भूकलू, एने तीसलु, एने पोरदेसी, एने उगाळलु, एने मांदलु, एने जेलमा देख्या, एने तारी सेवा नी कोऱ्या,

⁴⁵ तेत्यार चू तीनुक जोवाब आपसे, ‘मे तुमु काजे छाचलीन कोय कि, तुमु जे इना नानलामा गथा नानला एक साते बी नी कोऱ्या, चू मारे साते बी कोऱ्या,

⁴⁶ एने जे ओमोरकाई दोंड भुगसे, बाकीन धोरमी ओमोर जीवनोमा जासे.’”