मत्ती 23 - बारेली पावरी

¹ तेत्यार येसु भीळ काजे एने तेरा चेला काजे कोयू,

² शास्त्री एने फरुशी मुसान गादीपोर बोस रोया;.

³ इनान कोरता चे तुमु काजे जो काहीन कोये चो कोरजू एने मानजू, बाकीन तिंदरेन तोसा काय काम झुन कोरता काहाकि कोयतेला बाकीन कोरतेला नि.

⁴ चे एक ओसा भारी बुझू काजे जीनाक चुटनो काठो छे, बाकीन तीनाक माणसोन खांदा पोर मेकतेला; बाकीन कुदू तीनाक आपनी आंगवे कोरीन बी नि सोरकावतेला.

⁵ चे आपना आखा काम माणसो काजे देखाळनेण कोरता कोरतेला चे आपना मोर्जीपोद काजे मोटा कोरतेला एने आपना छिंदरान कुरे वोदाळता होता.

⁶ खाणो खाणेन मोटला-मोटला बोसनेन जागा एने सभामा एने प्रार्थना घोरमा मोटला-मोटला बोसनेने जागा, तीनु काजे वारू लागे.

⁷ हाटोमा नमस्कार एने माणसोमा गुरुजी कोवाळनो तीनुक गोवतेलो.

⁸ बाकीन तुमु गुरुजी झुन कोयता, काहाकि तुमरू एकुत गुरु छे, एने तुमु आखा भाश छे.

⁹ धोरती पोर कुदा काजे आपनु बास झुन कोयता, काहाकि तुमरू एकुत बास छे, जू सोरगोमा छे.

¹⁰ एने मालिक बी झुन कोयता, काहाकि तुमरू एकुत मालिक छे, मतलब मसिह.

¹¹ यु तुमरे गोथू मोटू छे, चू तुमरू सेवक बोने.

¹² यु कुदू खुदो काजे मोटू बोनावसे, चू नानू कोराय जासे एने जू कुदू खुदो काजे नानू बोनावसे, चू मोटू कोराय जासे.

¹³ “हे दोगावा शास्त्री एने फरुशी, तुमरे पोर हाय तुमु माणसोन कोरता सोरगोन राजोन झोपलू बोंद कोरतेला नीती खुद मा जाणेन नी कोरतेला एने तीनामा जे जाणेन कोरतेला तीनु काजे जाणे नी देतला.”

¹⁴ (हे दोगावा शास्त्री एने फरुशी, तुमरे पोर हाय, तुमु रोंडायलान घोरो काजे खाय जातला एने देखाळनेन कोरीन घोन वार तोक प्रार्थना कोरता रोयतला; इनान कोरता तुमु काजे जादा दोंड जोळसे).

¹⁵ “हे दोगावा शास्त्री एने फरुशी, तूमरे पोर हाय, तुमु एक जोनाक आपना आपने भूनी लावनेन कोरता आखा पाणी एने धोरती पोर फिरतला, एने जेतार चू जावू मा आवतेलु ती तीनाक आपने गोथू बी डोबोल नोरोगन लायक बोनाव देतला.”

¹⁶ “हे आंदवा, गुंगा, तुमरे पोर हाय, जे कोयतेला कि ओगर कुदु मंदीरोन कोसोम खाय ती काय नि बाकीन ओगर कुदू मंदीरोन सोनान कोसोम खाये ती तीनासी बांधाय जाय.”

¹⁷ हे बिन ओकल्या एने आंदवा, कून मोटो छे; सोनो कि चो मंदीर जीनासी मंदीर चुखलो होयतलो.

¹⁸ ओवते कोयतेला कि ओगर कुदु वेदीन कोसोम खाय ती काय नी, बाकीन जी भेट तिनी पोर छे ओगर कुदू तेरी कोसोम खाय ती बांधाय जाय.

¹⁹ हे आंदवा कून मोटो छे; भेट कि वेदी जीनासी वेदी चुखलो होय जातली?

²⁰ इनान कोरता जू वेदीन कोसोम खातलु, चू तेरी एने जो काहीन तेरे पोर छे, तेरी बी कोसोम खातलु.

²¹ जू मंदीरोन कोसोम खातलू चू तेरो एने तेरेमा रोयने वावान कोसोम खातलु.

²² जो सोरगोन कोसोम खातलु चू परमेश्वरोन एने सिहासनोन एने तीना पोर बोसने वावान बी कोसोम खातलु.

²³ हे दोगावा शास्त्री एने फरुशी तुमरे पोर हाय! तुमु पुदिना, एने सुंट, एने जीनान दोसवू हिस्सू आपतला, बाकीन तुमु नियम शास्त्रान महत्वान वात काजे मतलब न्याय, एने दया, एने भुरसू काजे छुळावतला छे; लागतो होतो कि इनुक बी कोरता रोयता एने इनुक बी नि छुळता.

²⁴ हे आंदवा, गुंगा, तुमु मच्छर काजे गाव देतला एने उटळा काजे गिव जातला.

²⁵ हे दोगावा शास्त्री एने फरुशी, तुमरे पोर हाय! तुमु वाटको एने थावि काजे उपोर-उपोर उजावतला बाकीन चे माही खराबी एने नाकमासी भोरलो छे.

²⁶ हे आंदवा फरुशी, पेहले वाटको एने थाविक माहिय गोथू उजाव कि जे बारथे गोथा बी साफ होये.

²⁷ “हे दोगावा शास्त्री एने फरुशी, तुमु पोर हाय! तुमु चुणु लागाळला मोळवाट्या सारखा छे ये उपोर गोथा ते घाटावा देखायतला, बाकीन माहाय मोरलान हाडका एने आखा भातीन भुंडलासी भोरलो छे.”

²⁸ इना रितीसी तुमरे बी उपोर गोथा धोरमी देखायतेला, बाकीन माहाय दोखु एने पाप सी भोरला छे.

²⁹ “हे दोगावा शास्त्री एने फरुशी, तुमरे पोर हाय, तुमु भविष्य कोरतान मोळवाट्यान सोवारता एने धोरमीन मोळवाट्या, बांधतला.”

³⁰ एने कोयतेला, “ओगर आमु आपना बाप दादान दाहळामा होयतो ती भविष्य कोरतान लुयमा तिंदरी भागीदार नि होती.”

³¹ इनासी तुमु खुद तेरे उपोर गोवायी देतला कि तुमु भविष्य कोरतान मारण्यान पुऱ्या छे.

³² आखरी तुमु आपना बाप दादान पापोन घोळू भोर देवू.

³³ हे घोळसान पिला, तुमु नोरोगन दोंडसी कोसा वाचसू?

³⁴ इनान कोरता देखू, मे तुमरेनचा भविष्य कोरता एने ग्यानी एने शास्त्री काजे मुकलो; एने तुमु तिंदरेमा गोथा काहनास काजे मार नाखसू एने ख्रुस पोर चोळावसू, एने काहनास काजे आपना प्रार्थना घोरोमा चाबका मारसू एने सोहोरोमा गोथा दिसरा सोहोरोमा दोवळावता फिरसू.

³⁵ जिनासी धोरमी हाबिलोनचां गोथा बिरिक्याह पुऱ्यु जखऱ्या तोक, जीनाक तुमु मंदीर एने वेदीन इचमा मामार नाखला होता, जेतार धोरमीन लुय धोरती पोर वोयलो छे चो आखो तुमरा मुंडकामा पोळसे.

³⁶ मे तुमु काजे छाचलीन कोय कि, जे आखा वाते इनी टेमोन माणसे पोर आवीन पोळसे.

³⁷ “हे यरुशलेम, हे यरुशलेम; तू भविष्य कोरता काजे मार नाखतलु, एने जे तारेनचा मुकल्या तिंदरे पोर दोगळ मार कोरतेला लोकेत कावा मेसेक लागतो होतो कि जोसी कुकळी आपना पिलात काजे आपना पाखळा तोवे एखठा कोरतेली, तोसुच मे बी तारा पुऱ्या काजे एखठा कोर लोम, बाकीन तुमुक नी लागतो होतो.”

³⁸ देखू, तुमरा घोरे तुमरेन कोरता उजाळ्या छुळाव जातला.

³⁹ काहाकि तुमु काजे कोय कि हिमी गोथा जा तोक तुमु नी कोये, “सोयावा छे चे चू, जू प्रभून नावोसी आवतेलु तेत्यार तोक तुमु मेसेक एने कोबी नी देखू.”