मत्ती 22 - बारेली पावरी

वियावोन खाणान दाखलू

¹ येसु ओवी तीनु काजे दाखलासी कोयने बाज गोयू,

² “सोरगोन राज इना राजान तोसो छे, जू तेरा पुऱ्यान वियाव कोऱ्यु.

³ एने राजा तेरा पावोर काजे मूकल्यु कि नेवताण माणसो काजे वियावमा खाणो खाणे बुलावे; बाकीन चे आवने नी कोऱ्या.”

⁴ ओवते राजा ओवी पावोरोक यो कोयीन मूकल्यु, “जीनुक नेवतो आपलो होतो तीनु माणसोनुक कोयू; देखू, मे खाणो तीयार कोर रोयू, मारा बुले एने पावला जोनावरे माराय गोयला छे, एने आखो काहीन तीयार छे; वियावोन खाणो खावु.”

⁵ बाकीन चे मोनपोर नि लेदा जात रोया काहना तिंदरा खेतोमा, काहना व्यापार काजे.

⁶ दिसरा जातीन माणसे जे वाच रोया होता तिंदरा पावोर काजे धोरीन बेइज्जत कोऱ्या एने मार नाख्या.

⁷ तेत्यार राजा रीसवाय गोयू, एने तेरी सेना काजे मुकलीन तीनु खुनी माणसोन नास कोऱ्यु, एने तिंदरा गाव काजे धोपाळ देदू.

⁸ तेत्यार चू तेरा पावोर काजे कोयू, “वियावोन खाणो तीयार छे बाकीन जीनुक नेवतो आपायलो होतो चे माणसे खाणान लायक नी ठेऱ्या.

⁹ इनान कोरता चौकोमा जावू एने जोतरा माणसे तुमु काजे जोळे, आखा काजे वियावोन खाणो खाणे बुलाव लावू.”

¹⁰ आखरी चे पावोरे सोळोक पोर जायीन काय भुंडला काय वारला, जोतरा जोळ्या, आखानुक एखठा कोऱ्या; एने वियावोन घोर पाहांतऱ्यामा भोराय गोया.

¹¹ “तेत्यार राजा पाहांतऱ्यामा देखणे कोरीन माहाय आव्यु, ती चू चा एक माणसो काजे देख्यू, जू वियावोन छिंदरा नी पेहेरलु होतु.”

¹² चू तीना काजे पुछु, “हे दोस्त; तू वियावोन छिंदरा पेहेरे बिना या काहा आव रोयू?” तेरो मूय बोंद होय गोयो.

¹³ तेत्यार राजा तेरा सेवक काजे कोयू, “तेरा हात पाय बांधिन तीनाक बारथे आंदारलामा नाख देवू, जा रोडणो एने दात कोकळावनो रोयसे,

¹⁴ काहाकि बुलावलाते लोकेत छे बाकीन नेवाळला थुलाक छे.”

केसर काजे फावू आपनो

¹⁵ तेत्यार फरुशी जायीन आपसामा विचार कोऱ्या कि तीना काजे काहना रितीसी वातोमा फोसाळजे.

¹⁶ ओवतेन चे आपना चेलानुक हेरोदोन हाते येसुनचा यो कोयने मुकल्या कि, “हे गुरु, आमु जानतेला कि तू खोरलु छे, एने परमेश्वरोन वात खोरला रितीसी सीखाळतलु, एने कुदान पोरवा नी कोरतेलू, काहाकि तू माणसोन मूय देखीन वाते नी कोरतेलू.”

¹⁷ इनान कोरता आमुक देखाळ तु काय विचार कोरतेलू? केसर काजे फावू आपनो वारू होय कि नी.

¹⁸ येसु तिंदरू गुणू जानीन कोयू, “हे दोगावा, मेसेक काहा पारखने बाज रोया.”

¹⁹ कोरोन सिक्कू मेसेक देखाळू “तेत्यार चे तीनानचा एक दिनार लाव्या.”

²⁰ चू तीनु काजे पुछु, “यु छापू कुनीन छे?”

²¹ चे तीना काजे कोया, “केसरोन छे” तेत्यार चू तीनुक कोयू, “जो केसरोन छे, चो केसर काजे आपु; एने जो परमेश्वरोन छे, चो परमेश्वर काजे आपु.”

²² यो सोमवीन चे वाहाराय गोया एने तीनाक छुळीन जात रोया.

पोछो जीव उठनेन एने वियाव

²³ तिने दाहळे सदुकी जे कोयतेला कि मोरला गोथा जीव उठनेन होय नी, तेरेनचा आव्या एने तीनाक पुछ्या,

²⁴ “हे गुरु, मुसा कोयलु होतु कि ओगर माणूस, बिना कामोन मोर जाय ती तेरु भाश तेरी लाडी पुठी वियाव कोरीन आपना भाशोन कोरता पिढी पोयदा कोरे.

²⁵ हिमी ओगर न्या सात भाशे रोयता होता, एने पुऱ्या नी होयनेन वोजेसी आपना भाशोन कोरता छुळीन जात रोयी,

²⁶ इना रितीसी दिसरू तिसरू बी कोऱ्यु, एने सातवू चा तोक ओसोत होयो.

²⁷ आखान ओवतेन ची बायर बी मोर गोयी.

²⁸ हिमी जीव उठनेन ओवतेन ची इनू सातो माहीन कुनीन लाडी होयसे? काहाकि ची आखान लाडी बोनली होती.”

²⁹ येसु तीनु काजे जोवाब आप्यू, “तुमु पवित्र शास्त्र एने परमेश्वरोन ताकत नी जानतला; इनान वोजेसी भूल मा पोळ रोया.”

³⁰ काहाकि जीव उठनेन ओवतेन चे नी वियाव कोरे एने नी वियावमा आपायसे बाकीन सोरगोमा दूतो सारखा होयसे.

³¹ बाकीन मोरलामा जीव उठनेन बारामा काय तुमु यो वचन नि पोळ्या जो परमेश्वर तुमु काजे कोयलु.

³² “मी अब्राहामन परमेश्वर, एने इसाहाकोन परमेश्वर, एने याकुबोन परमेश्वर छे? चू मोरलू नि होय, बाकीन जीवतलान परमेश्वर छे.”

³³ यो सोमवीन माणसे तेरा प्रचार पोर वाहराय गोया.

आखान मोटली आग्या

³⁴ जेतार फरुशी सोमव्या कि येसु सदुकीन मूय बोंद कोर देदू, ती चे एखठा होया,

³⁵ तिंदरे माहीन एक शास्त्रध्यापक तीनाक पारखनेन कोरता तीनाक पुछु,

³⁶ “हे गुरु, शास्त्रान नियममा काहणी आग्या मोटी छे?”

³⁷ चू तिना काजे कोयू, “तू परमेश्वर आपना प्रभू पोर आपनो आखो मोन एने आपनु जीव एने आपनो आखो ग्यानसी मोंग कोरजी.

³⁸ मोटीत एने आखान मोटली आग्या ते जीत छे.

³⁹ एने इनीन तोसी जो दिसरी बी छे कि तू आपना साते वावा पोर आपने सारको मोंग कोरजी,

⁴⁰ योत दुय आग्या आखा शास्त्रोन नियममा एने भविष्य कोरतान आधार छे.”

दाऊदन पुऱ्यु येसु

⁴¹ जेतार फरुशी एखठा होता, ती येसु तीनु काजे पुछु,

⁴² “मसिहन बारामा तुमु काय विचार कोरतेला? चू कुनीन पुऱ्यु छे?” चे तीनाक कोया, “दाऊदन.”

⁴³ चू तीनु काजे पुछु, “ती दाऊद आत्मामा भोरायीन तीनुक प्रभू काहा कोयतेला?

⁴⁴ ‘प्रभू, मारा प्रभू काजे कोयु, मारे जेवळे बोस, जेतार तोक कि मे तारा दुष्मोन काजे तारा पायो तोवे नी कोर दोम.’

⁴⁵ ती, जेतार दाऊद तीनाक प्रभू कोयतेलु, ती चू पुऱ्यु कोसू ठेरायसे?”

⁴⁶ तिनान जोवाबमा कहानीत एक वात नी कोय सोक्या तिने दाहळे गोथा कुदा काजे एने काहीन पूछनेण हिंमत नी होयी.