मत्ती 18 - बारेली पावरी

सोरगोन राजमा मोटलु कुन?

¹ तिने टेमे चेला येसुनचा आवीन पुछने लाग्या, “सोरगोन राजमा मोटू कून छे?”

² इनापोरसी येसु एक पुऱ्या काजे साते बुलावीन तिंदरे इचमा उबराख देदू,

³ एने कोयू, “मे तुमु काजे छाचलीन कोयो कि जेतार तोक तुमु नि बोदले एने नानला पुऱ्यान तोसा नि बोने, तुमु सोरगोन राजमा नि जाय सोके.”

⁴ जू कुदू आपना खुद काजे इना पुऱ्यान तोसु नानलो नि बोने, चू सोरगोन राजमा मोटू होयसे.

⁵ एने जू कुदू मारे नावसी एक ओसा पुऱ्या काजे मारे नावोसी स्वीकार कोरसे चू मेसे काजे स्वीकार कोरसे.

पाप कोरनेन पारख

⁶ “बाकीन जू कुदु इना नानलामा गोथू मार पोर भुरसू कोरे ती एक काजे ठूकर खावाळे, तेरेन कोरता वारला होये कि मोटली घट्टीन पुळ तेरे गोवामा बांदाय जातलो छे, एने चू उंडला दोरीयान पाणीमा डूबाय जातलो.”

⁷ ठूकरोन वोजेसी जोगो पोर हाय ठूकरोन लागनो जोरुरी छे; बाकीन हाय तिना माणसो पोर जिंदरे लारे ठूकर लागतेली छे.

⁸ “कोदि तारू हात नीती तारू पाय तुसेक ठूकर लागाळे, ती तीनाक काटीन नाख दे; दुंन्डू नीती लेंगळू होयीन जीवनमा प्रवेश कोरनो तारेन कोरता इना गोथो भोलो छे कि दुय हात नीती दुय पाय रोयीण बी तू ओमोरकाईन आगठामा नाखाय जाय.

⁹ कोदि तारू डूवू तुसेक ठूकर खावळावे, ती तीनाक निकावीन नाख दे; बाडलु होयीन जीवनमा प्रवेश कोरणे तारेन कोरता एरे गोथो वारू छे कि दुय डूवा रोयीण बी तू नोरोगन आगठामा नाखाय जासे.”

खुवायला गाडरान दाखलू

¹⁰ “देखू, तुमु इना नानलामा गोथू कुदा काजे बी वीटरावो नि सोमजनो; काहाकि मे तुमु काजे कोयो कि सोरगोमा तेरा दूते मारा सोरगोन बासोन मूय हमेशा देखतेला छे,”

¹¹ (काहाकि माणसोन पुऱ्यु खुवायला काजे वाचाडने आवलु छे).

¹² “तुमु काय सोचतला छे? ओगर कुदा माणसो जु सोव गाडरा होसे, एने तिना मायलु एक भोटकी जाय, ती काय चो एक कोम सोव काजे छुळीन, एने बोयळा पोर जायीन, तिनी भोटकायली काजे नी हेरे?”

¹³ एने कोदि ओसो होये कि तीनाक जोळे, ती मे तुमु काजे छाचलीन कोय कि चे तीनाक एक कोम सोव गाडरान कोरता जी खुवायली नी होती, ओतरी खुशीसी नी कोरे जोतरो कि इना गाडरान कोरता कोरसे.

¹⁴ ओसोच तुमरू बास जू सोरगोमा छे जी मोर्जी नी कि इना नानला मायला एक बी नष्ट होये.

गुणावावा साते चाल चलन

¹⁵ “ओगर तारू विस्वासी भाश तारे खिलापमा पाप कोरे, ती जा एने एखलामा वात कोरीन तीनाक सोमजाड; कोदि चू तारी सोमवे ती तू आपना भाश काजे ली लेदू.

¹⁶ ओगर चू नी सोमवे, ती एक नीती दुय जोना काजे आपने साते ओवी लीन जा, कि होर एक वात दुय नीती तीन गोवान मूय सी पाको कोराय जाय.

¹⁷ ओगर चू तिंदरी बी नी माने, ती मंडवी काजे कोय दे, बाकीन कोदि चू मंडवीन नी माने ती तू हिनाक दिसरा जात्या एने फावू लेनेवावान तोसो जान.”

रुकनो एने मोकू आपनो

¹⁸ “मे तुमु काजे छाचलीन कोयो, जो काहीन तुमु धोरती पोर बांधसु, चू सोरगोमा बांधसे एने जो काय तुमु धोरती पोर उगाळसु, चो सोरगोमा उगळसे.

¹⁹ एने मे तुमु काजे कोयो, कोदि तुमरे मायीन दुय जोना धोरती पोर काहनीस वातोन कोरता एक मोन होयीन तीनाक मांगे, ती चो मारे बासो जुव गोथो जू सोरगोमा छे, तिंदरेन कोरता होय जासे.

²⁰ काहाकि जा दुय नीती तीन मारा नावमा एखठा होयतला छे, चा मे तिंदरे इचमा मा रोयतलु छे.”

दया नि करनेवावा दासोन दाखलू

²¹ ती पतरस साते आवीन येसु काजे कोयू, “हे प्रभू, ओगर मारू भाश पाप कोरतू रोये, ती मे हिनाक कोतरी कावार माफ कोरो? काय सात कावार तोक?”

²² येसु तीना काजे कोयु, “मे तुसे काजे यो नी कोयतू कि सात कावार तोक नी तेत्यार सात कावारोन सत्तर गुणा तोक.”

²³ “इनान कोरता सोरगोन राज तिना राजा सारखो छे, जू तेरा दासो जुव लेखो लेने हिंड्यु.

²⁴ जेतार चू लेखो लेने बाज गोयू, ती एक जोन तेरे सामने लावाय गोयू जू दोस होजार तुळान कर्जदार होतु.

²⁵ जेतार कि आपने कोरीन काय नी होतो, ती तेरु मालिक कोयू, यु एने हेरी लाडी एने पुऱ्या एने जो काय हेरो छे आखो काय वेचाय जाय, एने कोरजू आपाळाय जाय.”

²⁶ इनापोरसी चू दास पोळीन तीनाक नोमोन कोऱ्यु, एने कोयू, “हे मालिक धीर धोर, मे आखो काय भोर दिस.”

²⁷ तेत्यार तिना दासोन मालिक गिन खायीन तीनाक छुळ देदू, एने तेरु कोरजू बी माफ कोर देदु.

²⁸ बाकीन जू दास बारथे निकव्यू, ती तेरा साती दासोमा गोथू एक हिना काजे मेव्यू जू तेरा सोव दिनारोन कर्जदार होतु; चू तीनाक धोरीन तेरु गोवू दाब्यू एने कोयू, “जो काय तार पोर कोरजू छे भोर दे.”

²⁹ इनापोरसी तेरु साती दास पोळीन तीनाक विनता कोरणे बाज गोयू, “धीर धोर, मे आखो भोर दिस.”

³⁰ चू नि मान्यु, बाकीन जायीन हिनाक बंदी घोरोमा घाल देदु कि जेतार तोक कोरजू भोरी नी आपे, चा तोक होयात रोये.

³¹ तेरे साती दास यो चो होयलो होतो देखीन जुदा उदास होया, एने जायीन आपना मालिक काजे पुरो हाल कोय देदा.

³² तेत्यार तेरु मालिक तीनाक बुलावीन तीना काजे कोयू, “हे दुष्ट दास, तू यो मेसे काजे विनता कोऱ्यु, ती चो मे तारू पुरू कोरजू माफ कोर देदू,

³³ इनान कोरता जोसू मे तारे पोर दया कोऱ्यु, तोसोच काय तुसेक बी आपने साती दासो पोर दया कोरनो नी जुवतो होतो?”

³⁴ एने तेरु मालिक रीसमा आवीन तीनाक दोंड देणे वावान हातोमा सोप देदु, कि जेतार तोक चू आखो कर्जदार भोरी नी आपे, तेत्यार तोक तिंदरा हातोमा रोये.

³⁵ “इना रितीसी कोदि तुमरे माहीन होर एक आपना भाशो काजे मोनोमा माफ नी कोरे, ती मारू बास जू सोरगोमा छे, तुमरे साते होसुत कोरसे.”