मत्ती 17 - बारेली पावरी

येसुन बदलनो

¹ छोव दाहळान ओवतेन येसु पतरस एने याकुब एने याकुबोन भाश योहान काजे पुठी लेदू, एने तीनु काजे एखलामात काहनास एक उचला बोयडा पोर लीगोयू.

² चा तिंदरे सामने तेरो रूप बदली गोयो, एने तेरो मुय सूर्यान तोसो चोमक्यो एने तेरा डोगला दिवा सारखा विजावो होय गोया.

³ देखू मुसा एने एलिया येसु पुठी वाते कोरतेला तीनुक देखाय पोळ्या.

⁴ इनी वातो पोरसी पतरस येसु काजे कोयू, “हे प्रभू आमरो या रोयनो वारलो छे ओगर तारी मोर्जी होय ती मे या तीन मंडप बोनावीस, एक तारेन कोरता एक मुसान कोरता, एने एलियान कोरता.”

⁵ पतरस बुलतु होतु कि एक धोव्वो वादवो तिंदरे पोर छावाय गोयो, एने तिना वादवा गोथू यु बुल निकव्यू “यु मारू मोंगावू पुऱ्यु छे, जीनासी मे खुश छे तेरी सोमवू.”

⁶ तीन चेला यो सोमवीन उबळा पोळ गोया एने घोणा जुदा बिही गोया.

⁷ तेतार येसु चेलानचा आवीन तीनु काजे छिम्यू, एने कोयू, “उठू, बिहू मा.”

⁸ तेत्यार चे आपना डूवा उगळ्या एने येसुक छुळीन ओवी कुदा काजे नि देख्या.

⁹ जेतार चे बोयळा पोर गोथा उतरतात होता तेत्यार येसु तीनुक जी आग्या आप्यू जेतार तोक माणसोन पुऱ्यु मोरलाम गोथू जीव नि उठे तेतार तोक जो काय तुमु देखला छे कुदा काजे झुन कोयता.

¹⁰ इनापोरसी चेला तीना काजे पुछ्या, “ती शास्त्री काहा कोयतेला कि एलियान पेहले आवनो जोरुरी छे?”

¹¹ येसु जोवाब आप्यू, “एलिया जरूर आवसे, एने आखो कोयीन सुदारसे.”

¹² बाकीन मे तुमु काजे कोयो कि “एलिया आवलु होतु, एने माणसे तीनाक नि उवख्या; बाकीन जोसो जुवे तोसोत तेरे साते कोऱ्या इना रितीसी माणसोन पुऱ्यु बी तिंदरे पुठी दुख उठावसे.”

¹³ तेत्यार चेला सोमज्या कि चू आमु काजे योहान बाप्तिस्मा आपनेवावान बारामा कोयलु छे.

फेपरा वावा पुऱ्याक वारू कोरनो

¹⁴ जेतार चे भिळनचा पुग गोया, ती एक माणूस तेरेनचा आव्यु, एने मांडा टेकिन कोयने बाज गोयू,

¹⁵ “हे प्रभू, मारा पुऱ्या पोर दया कोर! काहाकि तीनाक फेपरो आवतेलो, एने चू घोनो दुख वेठतेलू, एने घोळी-घोळी आगठामा एने घोळी-घोळी पाणीमा पोड जातलू.”

¹⁶ मे तीनाक तारा चेलानचा लावलू होतु, बाकीन चे तीनाक वारू नि कोर सोक्या.

¹⁷ येसु जोवाब आप्यू, “हे कोम भुरस्या एने हट्टी माणसो, मे का तोक तुमरे पुठी रोयीस? का तोक तुमरो वेठीस? तीनाक या मारेनचा लावू.”

¹⁸ तेत्यार येसु भुंडली आत्मा काजे धोमकाव्यू; एने चू तीनामा गोथू निकवी गोयू एने पुऱ्यु तीनेत टेमे वारू होय गोयू.

¹⁹ तेत्यार चेला सुनलामा येसुनचा आवीन कोया, “आमु भुंडली आत्मा काजे काहा नि निकाव सोक्यो?”

²⁰ चे तीनाक कोया, “आपना भुरसान कोमीन वोजेसी, काहाकि मे तुमु काजे छाचलीन कोयो, मे हिमी तुमरू भुरसू राईन दाना बोराबोर बी होय, ती इना बोयळा काजे कोय सोकसू, या गोथू सोरकिन वा जातरो, ती चू जात रोयसे; एने कानलीत वात तुमरेन कोरता होयो नि ओसी नि होय.

²¹ बाकीन जी जात बिना प्रार्थना एने उपासोन नि निकेवतली.”

येसुन मोरनेन दुसरी कावा भविष्यवाणी

²² जेतार चे गलीलमा होता, ती येसु तीनु काजे कोयू, “माणसोन पुऱ्यु माणसोन हाते धोरवाय जासे.”

²³ चे तिनाक मार नाखसे, एने चू तिसरे दाहळे जीव उठसे “इनापोरसी चे घोणा नाराज होय गोया.”

मंदीरोन फावू

²⁴ तेत्यार येसु एने तेरा चेला कफर्णहुम सोहोरोमा पुग्या, ती मंदीरोन फावू लेणे वावा पतरसोनचा आवीन पुछ्या, “काय तुमरू गुरु मंदीरोन फावू नि आपतलु?”

²⁵ चू कोयू, “होव, आपतलु,” जेतार चू घोरमा आव्यु, ती येसु तीनाक पुछनेन पेहलुत तीनाक कोयू, “हे शिमोन, तू काय विचार कोरे? धोरतीन राजा वसुली एने फावू कुनी जुव लेतला? तिंदरा पुऱ्या जुव कि पारका जुव.”

²⁶ पतरस येसु काजे कोयू, “पारका जुव” येसु तिना काजे कोयू, “ती पुऱ्यु वाच गोयू.”

²⁷ ते बी इनान कोरता कि आमु इनुक ठूकर नि खावाळजे, तू गलीली दोरीयान धोळे जायीन गोवी नाख, एने माछो पेहले निकवे, तीनाक ले; तेरो मूय उगाळताच एक सिक्कू जोळसे, तीनाक लीन मारे एने तुमरेन कोरता आप दे.