मत्ती 15 - बारेली पावरी

रिती रीवाज काजे माननेन सवाल

¹ तेत्यार यरुशलेममा काहनास फरुशी एने शास्त्री येसुनचा आवीन कोयने बाज गोया,

² “तारा चेला जूनला वाराण रिती काहा टावतेला छे, कि बिना हात धुवनेन खातला छे?”

³ येसु तीनु काजे कोयू, “तुमु बी तुमरा रिती रीवाजोन वजेसी काहा परमेश्वरोन आग्या काजे टावतेला?”

⁴ काहाकि परमेश्वर कोयलु छे, “तुमरा बाबाण एने तुमरा आयान मान कोरजू,” एने जो कुदू बास नीती आया काजे भुंडो कोये, तिनाक मारनेमा आवे.

⁵ बाकीन तुमुक कोये कि कोबी कुदू आपना बास नीती आया काजे कोये, “जू काहीन तुसेक तारे जुव गोथो लाभ पुग सोकतू होतु, चू परमेश्वर काजे भेट चोळाय जाय”

⁶ ती चू आपना बासोन मान नी कोरे, इना रितीसी तुमु आपनी रितीन वोजेसी परमेश्वरोन वचन टाव देदू

⁷ हे कोपट्या यशयाह तुमरे बारामा जी भविष्यवाणी ठीकुत कोरलु छे.

⁸ जे माणसे हुटोसी ते मारू मान कोरतेला छे, बाकीन तिंदरो मोन मारेसी नांबे रोयतलो छे.

⁹ एने चे वायबार मारी आराधना कोरतेला छे, काहाकि माणसोन विधी काजे धर्मान वाते कोरीन सिकाळतला छे.

भुंडली कोरणे वावी वाते

¹⁰ तेत्यार येसु माणसो काजे तेरेनचा बुलावीन तीनु काजे कोयू, “सोमवू, एने सोमजू

¹¹ जो मुयोमा जातलो छे, चो माणसो काजे वीटाव नी कोरतेला, बाकीन जो मुयोमा गोथो निकोवतलो छे, चो माणसो काजे विटाव कोरतेला छे.”

¹² तेत्यार चेला आवीन तीना काजे कोया, “काय तू जानतलु छे कि फरुशी यो वचन सोमवीन ठूकर खादा?”

¹³ चू जोवाब आप्यू, “बाकीन झाड जो मारा सोरगो मायलु बास नी लागाळयु, उखाडणेमा आवसे.”

¹⁴ तीनुक जाणे देवू; चे आंदवा वाट देखाळने वावू छे एने आंदवू आंदवा काजे वाट देखाळसे ती दुयू खाडामा पोड जासे.

¹⁵ यो सोमजीन पतरस येसु काजे कोयू, “यु दाखलू आमुक सोमजाड दे.”

¹⁶ येसु तीनुक जवाब आप्यू, “काय तुमु बी हिमी तोक नासोमोज छे?”

¹⁷ काय तुमु नी जानतला कि यो काहीन मुयोमा जातलो चो पेटोमा पोळतेलो छे, एने हागनेमा निकवी जातलो छे?

¹⁸ बाकीन जो काहीन मुयोमा गोथो निकवतलो छे चो मोनोमा गोथो निकोवतलो छे, एने चोत माणसो काजे विटाव कोरतेला छे.

¹⁹ काहाकि भुंडला विचार, खुन, सिनावो, भुंडला विचार, चुरी, झुटी गोवायी एने बुराई, मोनोसी निकवतली छे.

²⁰ जीत छे जी माणसो काजे विटाव कोरतेली छे, बाकीन हात बिना धुवीन खाणे माणसो काजे विटोव नी कोरतेला.

कनानी जातोन बायरोन भुरसू

²¹ येसु चा गोथू निकवी गोयू, सोर एने सिदोनोन प्रदेश भूनी जात रोयू.

²² देखू तिना प्रदेशमा गोथी एक कोनानी बायर निकवी, एने आयळीन कोयने लागी, “हे प्रभू! राजा दाऊदन पुऱ्या, मार पोर दया कोर! मारी पुराय काजे भुंडली आत्मा जादा तोकलीत दि रोयो.”

²³ बाकीन चू तिनीक काहीन जोवाब नी आप्यू तेत्यार तेरा चेला आवीन तीना काजे विनता कोऱ्या कि, “इनाक मुकल दे, काहाकि ची आमरे पोछोव आयळती जायीन आवने बाज रोयी.”

²⁴ चू जोवाब आप्यू, “इस्राईलोन घोरानान खुवायला गाडराक छुळीन परमेश्वर मेसेक कुदानचा नी मूकल्यु.”

²⁵ बाकीन कनानी बायोर आवी, एने येसु काजे नोमोन कोरीन कोयने बाज गोयी, “हे प्रभू मारी मदत कोर.”

²⁶ चू जोवाब आप्यू, “पुऱ्यान खाणो लीन कुत्राण ओगोव नाखनो वारू नी होय.”

²⁷ चू कोयू, “खोरलो छे प्रभू, बाकीन कुत्रा बी चुरा चूर खातला छे, जू हिंदरा स्वामीन मेजसी पोळतेलो छे.”

²⁸ इनापोर येसु तीनाक जोवाब आप्यू, “हे बायर, तारू भुरसू मोटलु छे जोसू तुसेक जुवे, तारेन कोरता होसोत होये, एने तेरी पुराय तीनेत घोळी वारू होय गोयी.”

घोणा सोवटा बिमारी वावा काजे वारू कोरनो

²⁹ येसु चा गोथू गलीलोन दोरीयान साते आव्यु, एने बोयडा पोर चोळीन बोस गोयू.

³⁰ ती गोरदी पोर गोरदी हेरे साते आवी चे आपने पुठी लेंगळा आंदवा, गुंगा, डूंन्डा एने घोणा सोवटा जोना काजे तेरेनचा लाव्या, एने तीनुक तेरा पायो पोर मेक देदा, एने चू तीनुक वारू कोऱ्यु.

³¹ तेत्यार माणसे देख्या कि गुंगा बुलतला एने डुंडा वारू होयतला, एने लेंगळा चालतला, एने आंदवा देखतला छे, ती वाहरायीन इस्राईलोन परमेश्वरोन महिमा कोऱ्या.

चार हजार माणसोक खावाळनो

³² येसु तेरा चेला काजे बुलावीन कोयू, “मेसेक इनी गोरदी पोर गिन आव रोयू, काहाकि चे तीन दाहळा गोथा मारे साते छे एने तिंदरे जुवू काहीन खाणे नी होय मे इनुक भूकला मुकलने नी हिंडतू कोबी ओसो नि होये कि वाटी पोर थाकीन रोय जाय.”

³³ चेला येसु काजे कोया, “आमुक इना बोयळामा का गोथा ओतरा रुटा जोड्से कि आमु ओतरी मोटी गोरदी काजे आफरावजे?”

³⁴ येसु तीनु काजे पुछु, “तुमरे जुव कोतरा रुटा छे?” चेला कोया, “सात, एने थुलाक नानला माछा.”

³⁵ तेत्यार येसु माणसो काजे धोरती पोर बोसनेन आग्या आप्यू.

³⁶ एने तीनुक सात रुटा एने माछा काजे लेदू, धन्यवाद कोरीन तुड्यु, एने आपना चेला काजे आपतू गोयू, एने चेला माणसो काजे.

³⁷ इना रितीसी आखा माणसे खायलीन आफरी गोया एने चेला रुटान टुकळा भोरला सात टूपला चूट्या,

³⁸ खाणे वावा बायरा एने पुऱ्या काजे छुळीन चार होजार माणसे होता.

³⁹ तेत्यार चे भिळ काजे मुकलीन ढोंड्या पोर चोळ गोयू, एने मगदान देसोन होद्दीमा आव्यु.