मत्ती 14 - बारेली पावरी

हेरोदोसोन येसुन बारामा सोमवाळनो

¹ तिनी टेमे चोवथायीन देसोन राजा हेरोद येसुन बुलनो सोमव्यू,

² एने हेरोद तेरा सेवक काजे कोयू, “यु योहान बाप्तिस्मा आपनेवावू छे! चू मोरलामा गोथू जीव उठलु छे, इनान कोरता तेरेसी मोटला काम देखाय पोळतेला छे.”

योहानोन खुन

³ काहाकि हेरोद तेरा भाश फिलीपोन लाडी हेरोदोन वोजेसी, योहान काजे धोरीन बांधी एने जेलमा घाल देदली होती.

⁴ काहाकि योहान तीना काजे कोयलु होतु कि इना काजे राखनो तारेन कोरता वारलो नी होय.

⁵ इनान कोरता हेरोद तीनाक मार नाखने कोरतू होतु, बाकीन माणसो काजे बिहतु होतु काहाकि चे तीनाक भविष्य कोरता मानता होता.

⁶ बाकीन जेतार हेरोदोन पोयदा होयलू चू दाहळू आयु, ती हेरोदोन पुराय तीहीवारोमा नाच देखाळीन हेरोद काजे खुश कोरीन.

⁷ इनापोर हेरोद कोसोम खायीन वचन आप्यू, “जो काय तू मांगीस मे तुसेक आपीस.”

⁸ ची तेरी आयान सिकाळला पोरसी बुली, “योहान बाप्तिस्मा आपनेवावान मुंडको थाविमा न्या मेसेक मांगाळ दे”

⁹ राजा हेरोद दुखी होयू, बाकीन आपनी कोसोमोन, एने साते बोसने वावान वोजेसी, आग्या आप्यू कि आपाय जाय.

¹⁰ एने चू जेलमा माणसो काजे मुकलीन योहानोन मुनको काटाळ देदु.

¹¹ एने तेरो मुनको थाविमा लावाय गोयो एने पुराय काजे आपाय गोयो, जीनाक ची तेरी आयानचा लीन गोयी.

¹² तेत्यार योहानोन चेला आव्या एने तेरा धोळ काजे लीजायीन गाळ देदा, एने जायीन येसु काजे निरोप आप्या.

पाच हजार माणसोक खावाळनो

¹³ जेतार येसु यो सोमव्यू, ती चू ढोंड्या पोर चोळीन चा गोथू काहनास सुनसान जागामा, एखलामात जात रोयू माणसे यो सोमवीन सोहोर-सोहोरोमा पायेत तेरे पोछोव चाल पोळ्या.

¹⁴ येसु निकवीन तिंदरे ओगोव आव्यु एने एक मोटी गोरदी देख्यू एने तिंदरे पोर गिन कोऱ्यु एने तिंदरा बिमारी काजे वारू कोऱ्यु.

¹⁵ जेतार सांतो होयो ती येसुन चेला तेरेनचा आव्या एने कोया, “जी सुनसान जागा छे एने वार होयने बाज गोयली छे; माणसो काजे मुकलाय जाय कि चे वस्तीमा जायीन आपनेन कोरता खाणो मुले लेये.”

¹⁶ बाकीन येसु तीनु काजे कोयू, “हिंदरो जाणो जोरुरी नी होय! तुमुत हिनु काजे खाणो आपु.”

¹⁷ चेला येसु काजे कोया, “न्या आमरे जुव पाच रुटा एने दुय माछा काजे छुळीन एने काय नी होय.”

¹⁸ चू कोयू, “तीनाक न्या मारेंचा लीन आवू.”

¹⁹ जेतार चू माणसो काजे खोडा पोर बोसने कोरीन कोयू, एने तिना पाच रुटा एने दुय माछा काजे लेदू; एने सोरग भूनी भावीन धन्यवाद कोऱ्यु एने रुटा तुडी तुडीन चेला काजे आप्यू, एने चेला माणसो काजे.

²⁰ जेतार आखा खायीन आफरी गोया, ती चेला वाचला तुकडा सी भोरला बारा टूपल्या चुट्या.

²¹ एने खाणे वावा, बायरा एने पुऱ्या काजे छुळीन, पाच हजार माणसोन लगभग होता.

येसुन पाणी पोर चालनो

²² तेत्यार चू तेतारुत आपना चेला काजे ढोंड्या पोर चोळनेन कोरीन कोयू कि चे हिंदरे पेहले पार जात रोये, जेतार चू माणसो काजे मुकली देये.

²³ चू माणसो काजे मुकलीन, प्रार्थना कोरनेन कोरीन ओगोव बोयडा पोर जात रोयू; एने सांतू चू एखलु होतु.

²⁴ तिनी टेमे ढोंड्यो दोरीयान इचमा लेहोरोसी डूलायती होती, काहाकि वाहवो सामने वावो होतो.

²⁵ एने येसु रातीन चोवथे घोळी दोरीया पोर चालतु जायीन तिंदरे साते आव्यु.

²⁶ चेला हिनाक दोरीयामा चालतलु देखीन बिह गोया एने कोयने बाज गोया, “यु भुतडू छे” एने बिकोन मारे आयळने बाज गोया.

²⁷ तेत्यार येसु तिंदरे साते तेतारुत वाते कोऱ्यु एने कोयू, “हिंमत धोरू! मे छे, बिहू मा.”

²⁸ पतरस तीनाक जोवाब आप्यू, “हे प्रभू, कोदि तुत छे, ती मेसेक तारे पुठी पाणी पोर चालीन आवनेन आग्या आप.”

²⁹ येसु कोयू, “आव” ती पतरस ढोंड्या पोर गोथू उतरीन येसुनचा जाणेन कोरीन पाणी पोर चालने बाज गोयू.

³⁰ बाकीन वाहवा काजे देखीन बिही गोयू, एने जेतार डूबने बाज गोयू ती आयळीन कोयू, “हे प्रभू, मेसेक वाचाड,”

³¹ येसु तेतारुत हात ओगु कोरीन तीनाक धोर लेदू एने तीनाक कोयू, “हे कोमजुर भुरसू वावा, तू काहा शंका कोऱ्यु?”

³² जेतार चे ढोंड्या पोर चोळ गोया, ती वाहवी हुगी होय गोयली.

³³ इनापोरसी जे ढोंड्या पोर होता, येसुक नोमोन कोरीन कोया, “छाचलीन, तू परमेश्वरोन पुऱ्यु छे.”

येसुन मांदला माणसो काजे वारू कोरनो

³⁴ चे पोल धोळे उतरीन गन्नेसरत जागामा पुग्या.

³⁵ चा वावा माणसे तीनाक उवखी लेदा एने आस-पास वावा आखा देसोमा खोबर कोय मुकल्या, एने आखा बिमारी वावा काजे येसुनचा लाव्या,

³⁶ एने माणसे येसु काजे विनता कोरणे बाज गोया कि चू आपना छिंदरा कुपरा काजे छिमने दे; एने जोतरा जोना तीनाक छिम्या, चे वारू होय गोया.