मत्ती 13 - बारेली पावरी

बीज वेरने वावान दाखलू

¹ तिने दाहळे येसु घोरोमा गोथू निकवीन दोरीया धोळे जायीन बोश्यू.

² एने तेरेनचा ओसी मोटीत गोरदी एखठी होयी कि चू ढोंड्या पोर चोळ गोयू, एने आखी भिळ दोरीयान धोळे उबरोय गोयी.

³ एने येसु तीनु काजे दाखलामा गोथू घोणा सोवटा वाते कोयू, “देखू एक वेरणेवावु बीज वेरणे निकव्यू,

⁴ वेरणेन टेमे काहनोस बीज वाटी धोळे पोळ्यो, एने चिल्ला आवीन तीनाक खाय गोया,

⁵ काहनोस बीज खराब वावा जागामा पोळ्या, चा तीनाक जादा धुवू नि जोळनेन वोजेसी चे मामार उग नी सोक्या,

⁶ बाकीन सूर्य निकवने पोर चे बोव गोया, एने मुवा नी धोरणेसी सुक गोया,

⁷ काहनोस बीज झाडवाट्यामा पोळ्या एने झाडे मोटा होयीन तीनु काजे दाब देदा,

⁸ बाकीन काहनलो बीज वारला जागामा पोळ्यो, एने फोव लायो, काहनलो सोव गुणा, काहनलो साठ गुणा, एने काहनोस तीस गुणा,

⁹ जेरा कानटा छे चो सोमवी लेये.”

दाखलान महत्व

¹⁰ चेला साते आवीन येसु काजे कोयू, “तू माणसो साते दाखलासी काहा वाते कोरतेलू?”

¹¹ येसु जोवाब आप्यू, “तुमु काजे सोरगोन राजोमा भेदोन सोमोज आपाय गोयलो छे, बाकीन तीनु काजे नी.

¹² काहाकि जेरे जूव छे, तीनुक आपाय जासे, एने तेरे जुव घोनो सोवटो होय जासे; बाकीन जेरे जुव काय नि होय तेरे जुव जो काय छे चो बी मांगाय जासे.

¹³ मे तिंदरे साते दाखलामा इनान कोरता वाते कोरतेलू छे कि चे देखता जायीन बी नी देखतला एने सोमवता जायीन बी नि सोमवतला, एने सोमजतला.

¹⁴ तिंदरा बारामा यशयाहन जी भविष्यवाणी पुरी होये” तुमु कानटासी ते सोमवसु, बाकीन सोमजे नी; एने डूवासी ते देखसु, बाकीन तुमुक नी देखाये.

¹⁵ काहाकि इना माणसोन मोने काठला होय गोयला छे, एने चे कानटासी उचेत सोमवतला एने चे आपना डूवा ढाक लेदला छे; कोदि ओसो नी होयनो जुवे कि चे डूवे कोरीन देखे, एने कानटासी सोमवे एने मोनोसी सोमजे, एने फिर जाय, एने मे तीनुक वारू कोरो.

¹⁶ बाकीन सोयावा छे तुमरा डूवा, कि चे देखतला छे; एने तुमरा कानटा कि चे सोमवतला छे.

¹⁷ काहाकि मे तुमु काजे छाचलीन कोयो कि घोणा सोवटा भविष्य कोरता एने धोरमी काजे लाग्यो कि जे वाते तुमु देखतला छे, देखे, बाकीन नी देख्या; एने जो तुमु सोमवतला छे, सोमवू, बाकीन नी सोमवे.

दाखलान मतलब

¹⁸ “हिमी तुमु वेरने वावान दाखलान मतलब सोमवू,

¹⁹ जो कुदू राजोन वचन सोमवीन नी सोमजतेला, तिंदरा मोनोमा जो काय वेराय गोयलो होतो, तीनाक चू भुतडू आवीन हापकी ली जातलु छे यो चोत छे, जो वाटीन धोळे वेराय गोयलो होतो.”

²⁰ एने जो खुरबामा जागा पोर वेराय गोयो, यो चोत छे, जो वचन सोमवीन तेतारुत खुशी साते मान लेतलु छे.

²¹ बाकीन आपनेमा मुवा नी राखनेण वोजेसी चो इतराक दाहळान छे, एने जेतार वचनोन वोजेसी दुख एने सोंकोट होयतेलो छे, ती तेत्यारुत ठूकर खातला छे.

²² जो झाडक्यामा वेरायलो होतो, यो चो छे, जू वचन काजे सोमोवतलु छे, बाकीन चे इना संसारोन चिंता एने धोनोन धुकू वचन काजे दाब देतला छे, एने चो फोव नी लावतलो,

²³ जो वारली जागामा वेरायतलो छे; यो चो छे चू वचन काजे सोमवीन सोमजी लेतलु एने फोव लावतलु; काहनुस सोव गुणा, काहनुस साठ गुणा, एने काहनुस तीस गुणा.

गहू एने जंगली बिजोन दाखलू

²⁴ येसु तीनु काजे एने एक दाखलू आप्यू, “सोरगोन राज तीना माणसो सारखो छे जू आपना खेतोमा वारलो बीज वेऱ्यु.”

²⁵ बाकीन जेतार माणसे सुवरोया होता ती तेरु दुष्मोन आवीन गोहून इचमा जंगली बीज वेरीन जात रोयू.

²⁶ जेतार डीरा फुटीन उबा आव्या ती जंगली दानान झाडे बी देखाय पोळ्या.

²⁷ इनापोरसी मालकोन पावोर आवीन तीना काजे कोयु, “हे माहाराज, काय तू आपना खेतोमा वारलो बीज नी वेरलू होतु? ती जंगली दानान झाडे बी हिनामा कां गोथा आया?”

²⁸ चू तीना काजे कोयू, “यो काहनास दुष्मोनोन काम छे” पावोर तीना काजे कोयू, “तारी काय मोर्जी छे, कि आपु जायीन हिनु काजे एखठा कोर लेये?”

²⁹ चू कोयू, “नी, ओसो नी होयनो जुवे कि जंगली दानान झाडे एखठा कोरता जायीन तुमु हिंदरे पुठी गोहू बी उखाव लेसू.”

³⁰ काटनेण दाहळे तोक दुयो काजे मोटा होयने दे, एने काटनेण टेमे काटने वावा काजे कोयीस पेहेले जंगली दाना वावा रूपे एखठा कोरीन बावनेन कोरता तिंदरा पुवा बांद लेवू, एने गोहू काजे मारा कुठारामा एखठा कोरु.

रायोन दानान दाखलू

³¹ “चू तीनु काजे एक ओवी दाखलू आप्यू, सोरगोन राज राईन एक दाना सारको जीनाक काहनु माणूस लीन आपना खेतोम लागाळ देदु.”

³² चो आखा बिजोम गोथो नानो रोयतलो, बाकीन जेतार मोटो होय जातलो ती आखा झाडोसी मोटो होय जातलो एने ओसो होय जातलो कि सोरगो मायला चिल्ला आवीन तेरे डावे पोर रोयनेन पुतरा बोनावतेला छे.

खमिरोन दाखलू

³³ चू एक ओवी दाखलू तीनु काजे सोमवाळ्यु सोरगोन राज खमीर सारको छे जीनाक काहनीस बायोर लाविन तीन चौकि पिठामा भेसकी देदी एने होयतो-होयते चो आखो खमीर होय गोयो.

दाखलान वापोर

³⁴ ये आखा वाते येसु दाखलामा माणसो काजे कोयू, एने बिना दाखलान चू हीनु काजे काय नि कोयतू होतु,

³⁵ कि जो वचन भविष्य कोरतान लारे कोवाय गोयलो होतो, चो पुरो होये “मी दाखलू कोयने कोरीन मारो मूय उगाळीस मे इना वातो काजे जी जोगोन पेहले गोथो डूकायीन रोयलो छे.”

जंगली बिजोन दाखलान मतलब

³⁶ तेत्यार ची गोरदी काजे छुळीन घोरोमा आव्यु, एने तेरा चेला तेरेनचा आवीन कोया, “खेतोन जंगली दानान दाखलू आमु काजे सोमजाड दे.”

³⁷ चू तीनुक जोवाब आप्यू, “वारला बीज वेरणेवावु माणसोन पुऱ्यु छे.”

³⁸ खेत जोग छे, वारलो बीज राज्योन पुऱ्या, एने जंगली बीज भुतडान छे.

³⁹ जू दुष्मोन तीनु काजे वेऱ्यु चू भुतडू छे; काटनी जोगोन आखरी छे, एने काटनी कोरणे वावु सोरग दूत छे.

⁴⁰ एरेन कोरता जोसा जंगली दाना एखठा कोराय जातला एने धोपाळाय जातला छे तोसोत जोगोन आखरीमा होयसे.

⁴¹ माणसोन पुऱ्यु आपना सोरग दूत काजे मुकलसे, एने चे तेरा राजमा गोथा आखा ठूकरोन वोजेसी चा तेरे भूनी भुंडला कामे कोरणे वावा काजे एखठा कोरसे,

⁴² एने तीनु काजे आगठान कुंडामा नाखायसे, जा सारीक रोडने एने दात पिसनो रोयसे.

⁴³ तिने टेमे धोरमी आपना बासोन राजोमा सूर्यान तोसा चोमकसे, जेरा कानटा होसे चू सोमवी लेये.

दुकायलो धोन

⁴⁴ “सोरगोन राज खेतोमा डूकाळला धोनोन सारखो छे, जीनाक काहनास माणसो काजे जोळ्यो एने डुकाळ देदू, एने खुशीन मारे जायीन तेरो आखो काहीन वेच देदू एने तिना खेत काजे मुले ली लेदू.”

मोहेंगलु हिरू

⁴⁵ एने सोरगोन राज एक व्यापारीन सारखो छे जू वारला हिरान हेरेमा होतु.

⁴⁶ जेतार तीनाक एक मोहेंगलु हिरू जोळ्यो ती चू जायीन तेरो आखो काहीन वेच देदू एने तीनाक मुले ली लेदू.

जावीन दाखलू

⁴⁷ “एने सोरगोन राज तिना मोटली जावीन सारखो छे जो दोरीयामा नाखायी गोयी, एने भाती भातीन माछा सेमटी लाया.”

⁴⁸ एने जेतार जावी भोराय गोयी, ती माछ्ल्या तिना काजे काठे पोर हापकीन लाव्या, एने बोसीन वारला-वारला ते टाहरामा एखठा कोऱ्या एने जे कामोन नि होय नाख देदा.

⁴⁹ जोगोन आखरीमा ओसोत होयसे सोरग दूत आवीन दुष्ट काजे धोरमीनचा गोथा ओलोग कोरसे,

⁵⁰ एने तीनुक आगठान कुंडामा घालसे जा रोडनो एने दात पिसनो रोयसे.

नोवली एने जुनली भोनने महत्व

⁵¹ “काय तुमु जे आखा वाते सोमज्या.” चे तीना काजे कोया, “होव”

⁵² येसु तीनु काजे कोयू, “इनान कोरता होर एक शास्त्री जू सोरगोन राजोन चेलू बोनलू छे, तिना घोरोन सारखू छे जू आपना भोंडारमा गोथू नोवली एने जुनली चीजे निकावतलु छे.”

येसुन नासरेतमा पोछु आवनो

⁵³ जेतार येसु ये आखा दाखला कोय देदलु, ती चा गोथू जात रोयू.

⁵⁴ एने आपना सोहोरोमा आवीन आपना प्रार्थना घोरोमा तीनु काजे ओसू संदेश आपने बाज गोयू कि चे वाहारायीन कोयने बाज गोया, “इनाक ये ग्यानोन एने मोटला काम का गोथा जोळ्या?”

⁵⁵ काय यु सुतारोन पुऱ्यु नी होय? एने काय एरी आयान नाव मरीयम एने एरा भाशोन नावे याकुब, युसूफ, शिमोन एने यहुदा नी होय?

⁵⁶ एने काय येरा आखा बहोनिशा आमरे इचमा नि रोयतला? ती इना काजे यो आखो का गोथो जोळ्यो?

⁵⁷ इना रितिसी चे तिनान वोजेसी ठूकर खादा, बाकीन येसु तीनु काजे कोयू, “भविष्य कोरता आपना देस काजे एने आपना घोर काजे छुळीन नि ओवी कांखुर बिना आदरोन नि होता”.

⁵⁸ एने चू चा तिंदरा बिना विस्वासोन वोजेसी घोणा सोवटा मोटला काम नि कोऱ्यु.