मत्ती 12 - बारेली पावरी

येसु शब्बाथोन परमेश्वर

¹ तिने टेमे येसु शब्बाथोन दाहळे खेतोमा गोथू जातु होतु, एने तेरा चेला काजे भूक लागी ती चे कोनसे भांगी-भांगीन खाणे बाज गोया.

² फरुशी यो देखीन तिना काजे कोयू, “देख, तारा चेला चो काम कोर रोया, जो शब्बाथोन दाहळे कोरनो वारू नी होय.”

³ चू तीनाक कोयू “काय तुमु नी वाच्या, कि राजा दाऊद जेतार चू एने तेरा साती भूकला होता ती काय कोऱ्या.”

⁴ चू कोसु परमेश्वरोन मंदीरमा गोयू, एने भेटोन रुटा खादु, जीनुक खाणो नी नि ते तीनाक एने नि ते तेरा दुस्तीदार काजे, बाकीन निसता पुजारा काजे खोरलो होतो?

⁵ एने काय तुमु शास्त्रामा नि भोन्या कि पुजारू शब्बाथोन दाहळे मंदीरमा शब्बाथोन दाहळान रिती काजे बी भुंड कोरे ती चे बी निरदोष गीनायतेला?

⁶ बाकीन मे तुमु काजे कोयो कि या चू छे जू मंदीर गोथू बी मोटू छे.

⁷ ओगर तुमु एरो मतलब जानतेला, मे दयासी खुश होयतलु, बलिदान सी नि, ती तुमु निरदोष काजे दोषी नि ठेरावता.

⁸ माणसोन पुऱ्यु ते शब्बाथोन दाहळान बी प्रभू छे.

सुकला हात वावाक वारू कोरनो

⁹ चा गोथू चालीन चू तिंदरा प्रार्थना घोरमा आव्यु.

¹⁰ चा एक माणूस होतु, जेरु हात सुकलु होतु, चे येसु पोर गुणू लागाळनेन कोरता तीनाक पुछ्या “काय शब्बाथोन दाहळे वारू कोरनो खोरलो छे.”

¹¹ चू तीनुक कोयू, “तुमरेमा ओसू कून छे जेरो एकुत गाडरो होसे, एने चो शब्बाथोन दाहळे खाडामा पोळ जाय, ती चू तीनाक धोरीन नी नीकावे,

¹² वारला माणसोन मुल गाडरा गोथो बोढीन छे! इनान कोरता शब्बाथोन दाहळे भोलाई कोरनो खोरलो छे.”

¹³ तेत्यार चू तिना माणसो काजे कोयू, “आपनु हात ओगो कोर” चू ओगु कोऱ्यु एने चू पोछु दिसरा हातो सारखू वारू होय गोयू.

¹⁴ तेत्यार फरुशी बारथे जायीन तेरा खिलापमा एकी कोऱ्या कि तीनाक काहना रितीसी मारजे.

परमेश्वरोन नेवाळलु सेवक

¹⁵ यो जानीन येसु चा गोथू जात रोयू एने घोणा सोवटा माणसे तेरे पोछोव चाल पोळ्या, एने चू आखा काजे वारू कोऱ्यु,

¹⁶ एने तीनु काजे जोताळ्यु कि मेसेक सामने मा लावू,

¹⁷ काहाकि यो वचन यशयाह भविष्य कोरतान लारे कोवायलो होतो, पुरो होयो.

¹⁸ “देखू, यु मारू सेवक छे, जिनाक मे नेवाळलु छे, मारू मोंगावू, जीनासी मे खुश छे मे मारी आत्मा तीना काजे आपीस, एने चू दिसरा जातीन नियावोन वारली खोबर कोयसे.”

¹⁹ “एने चू नि झोगळू कोरे, एने नि धूम कोरे, नि हाटोमा कुदु तेरु आवाज सोमवे.”

²⁰ चू छोंदायला सुटा काजे नि भागे, एने धुवाळू निकवने वावी दिवा काजे नि उलवे, जेतार तोक चू नियाव काजे प्रबळ नि कोरे.

²¹ एने दिसरा जातीन तेरेम वावा आस कोरसे.

येसु एने भुंडली आत्मान अगवू

²² तेत्यार माणसे एक आंदवा-गुंगा काजे जीनामा भुंडली आत्मा होती, तेरेनचा लाव्या, एने चू तीनाक वारू कोऱ्यु, एने चू बुलने एने देखणे बाज गोयू.

²³ इनापोरसी आखा माणसे वाहारायीन कोयने बाज गोया, “यु काय दाऊदन पुऱ्यु छे?”

²⁴ बाकीन फरुशी यो सोमवीन कोया, “यु ते भुंडली आत्मान सरदार, भुतडान मदत विगुर भुंडली आत्मा काजे नि निकावतलु”.

²⁵ चू तिंदरा मोनोन विचार जानीन तीनु काजे कोयू, “जिना काहना राजमा फुट पोळे ती, चो उजाळ होय जातलो; एने एक सोहोरोमा नीती घोरोमा फुट पोळतेली, टेकिन नि रोये.”

²⁶ एने भुतडूत भुतडा काजे निकावे, ती चू आपनात खिलापमा होय जासे; ओवते तेरो राज कोसो टेकिन रोयसे?

²⁷ एने, ओगर मी भुतडान मदतसी भुंडली आत्मा काजे निकावतलु, ती तुमरा पुऱ्या कुनीन मदतसी निकवली? इनान कोरता चेत तुमरू न्याय कोरसे.

²⁸ बाकीन ओगर मे परमेश्वरोन साहायतासी भुंडली आत्मा काजे निकावतलु, ती परमेश्वरोन राज तुमरेनचा आव लागलो छे.

²⁹ नीती कोसू काहनु माणूस कुदान ताकत वावान घोरमा भोरायीन तेरु माल लुट सोकतेलू जेतार तोक कि पेहले चू तिना ताकत वावा काजे नि बांध लेये? तेत्यार चू तेरो घोर लुट लेसे.

³⁰ जू मारे साते नि होय चू मारा खिलापमा छे, एने जू मारे साते नि होय चू टूवू नि कोरतेलू बाकीन चू वेरवी देतलू.

³¹ इनान कोरता मी तुमु काजे कोयो कि माणसोन आखा भातीन पाप एने बुराईन माफी कोराय जासे? बाकीन जू कुदू चुखली आत्मान बुराई कोरसे तेरी माफी नि होय.

³² जू कुदू माणसोन पुऱ्यान खिलापमा काहीन वात कोयसे, तेरु यु गुणू माफ कोराय जासे, बाकीन जू कुदू पवित्र आत्मान खिलापमा काहीन कोयसे, तेरा गुणान नि ते इना संसार एने नि ते तिना आवने वावा संसारमा माफ कोरायसे.

झाड एने तेरो फोव

³³ “ओगर झाडोक वारलो कोये, ती तेरा फोव काजे वारला कोयू, नि ती रिकामो कोयू, काहाकि झाड आपना फोव सी उखाये.”

³⁴ “हे घोळसान पीला, तुमु भुंडला होयीन बी कोसा वारलो वाते कोय सोकतला? काहाकि जो मोनोमा भोरलो छे, चोत मुयोमा आव लागतेलो.”

³⁵ वारलु माणूस मोनोन वारलो भोंडारमा गोथू वारली वाते निकावतलु.

³⁶ एने तुमु काजे कोयो कि जे-जे रिकामा वाते माणसे कोयसे, नियावोन दाहळे हर एक तिनी वातोन हिसाब आपसे.

³⁷ काहाकि तू आपनी वातोन वोजेसी निरदोष एने आपनी वातोन वोजेसीच गुणावू ठेराय जाश.

येसु जू चिन्हान मांग

³⁸ इनापोरसी काहना शास्त्री एने फरुशी तीनाक कोया, “हे गुरु, आमु तारे जुवू एक निशाणी देखणेन कोर रोया.”

³⁹ चू तीनुक जोवाब आप्यू, “इनी कोवीन भुंडा एने व्यभिचारोन माणसे निशाणी हेरतेला, बाकीन योना भविष्य कोरतान निशाणी काजे छुळीन कानली ओवी निशाणी नि आपाये”.

⁴⁰ योना तीन रात तीन दाहळा माछान पेटोमा रोयू, तोसुच माणसोन पुऱ्यु तीन रात तीन दाहळा धोरतीन माहिय रोयसे.

⁴¹ नीनवेन माणसे नियावोन दाहळे इनी कोवीन माणसो पुठी उठीन तीनुक गुणावा ठेरावसे, काहाकि चे योनान प्रचार सोमवीन बी मोन नि फिराव्या; एने देखू, या चू छे जू योना गोथू बी मोटू छे,

⁴² दक्षिणोन राणी न्यायोन दाहळे इनी कोवीन माणसो पुठी उठीन तीनुक गुणावा ठेरावसे काहाकि ची सुलेमानोन राजान ग्यान देखनेन कोरता धोरतीन इने धोळे गोथी पोरले धोळे आवी; एने देखू, या चू छे जू शलमोनोन गोथू बी मोटू छे.

भुंडली आत्मान हेरे

⁴³ “जेतार भुंडली आत्मा माणसोमा गोथी निकवी जातली, ती सुखोन जागामा आराम हेरतली एने तिनीक नि जोळतली.

⁴⁴ तेत्यार ची कोयतली छे, मे मारा जिना घोरमा मे आवली होती, तीना घोरमा पोछि जाती रोयीस, एने जेतार ची पोछि आवतेली छे ती ठारलो, झाडलो बाहारलो सजाडलो देखतली छे.

⁴⁵ तेत्यार चू जायीन तेर गोथी सात भुंडली आत्मा काजे तेरे साते लीन आवतेली, एने चे चा वास कोरे एने तिना माणसोन पेहली दशासी पोछली दशा जादा भुंडी होय जातली छे. इनी कोवीन भुंडला माणसोन हालत बी ओसीत होयसे.”

येसुन खोरलो परिवार

⁴⁶ जेतार चू भीळमा वाते कोरणे बाज रोयू होतु, तेत्यार तेरी आया एने भाश बारथे उभरोय रोया होता, एने तीना पुठी वाते कोरनेन कोर रोया होता.

⁴⁷ कुदु तरी येसु काजे कोयू, “देख, तारी आया एने तारू भाश बारथे उभरोय रोया, एने तारे पुठी वाते कोरनेन कोर रोया.”

⁴⁸ यो सोमवीन तीनाक कोयने वावाक जोवाब आप्यू, “कून छे मारी आया? एने भाश?”

⁴⁹ एने तेरा चेला वोखे तेरु हात ओगु कोरीन, कोयू “देखू, मारी आश एने भाशे ये छे,

⁵⁰ काहाकि जो कुदु मारा सोरगोन बासोन मोर्जी पोर चाले, चेत मारा भाशे एने बहोनिशा, एने मारी आया छे.”