मत्ती 11 - बारेली पावरी

येसु एने बाप्तिस्मा आपनेवावू योहान

¹ जेतार येसु बारथे चेला काजे आग्या आप देदलु होतु, ती चू तिंदरा सोहरोमा सिकाळने एने प्रचार कोरने चा गोथू जात रोयू.

² योहान जेलखानामा मसिह येसुन कामोन वारली खोबर सोमव्यू एने तेरा चेला काजे तेरेनचा यो पुछने मूकल्यु,

³ “काय आवने वावु तुत छे, कि आमु कुदान दिसरान वाट जुवजे?”

⁴ येसु जोवाब आप्यू, “जो काहीन तुमु सोमवतेला एने देखतेला, चो आखो जायीन योहान काजे कोय देवू,

⁵ कि आंदवा देखतेला एने लेंगळा चालतला एने फिरतेला, कुळावाक चुखा कोराय जातला एने बेहरा सोमवतेला, मोरलाक जीवता कोराय जातला, एने गोरीबोक वारली खोबर सोमवाळाय जातली.

⁶ एने सोयावा छे चे, जे मारे वोजेसी ठूकर नि खाय.”

येसुन लारे योहानोन आदर

⁷ जेतार चे चा गोथा जाणे बाज गोया ती, येसु योहानोन बारामा माणसो काजे कोयने बाज गोयू, “तुमु बोयळामा काय देखणे गोयला होता? काय हवासी हालणे वावा सुटा काजे?”

⁸ एने तुमु काय देखणे गोयला होता? काय मोखमोलोन छिंदरा पेहेरला माणसो काजे? देखू, जे घाटावा छिंदरा पेहेरला, चे राजान राजवाळामा रोयतेला.

⁹ ती एने का गोयला? काय काहना भविष्य कोरता काजे देखणे कोरीन? होव मे तुमु काजे कोयो कि भविष्य कोरणे वावा गोथा बी मोटला काजे.

¹⁰ यो चो छे जीनान बारामा लिखलो छे देख, मे आपना दुतो काजे तारे ओगोव मुकलो; जू तारे ओगोव तारी वाट तीयार कोरसे.

¹¹ “मे तुमु काजे छाचलीन कोयो कि जे बायरासी जन्मो लेदला छे, तिंदरेसी योहान बाप्तिस्मा आपनेवावामा कुदू मोटू नि होय; बाकीन सोरगोन राजमा नानासी नाना छे चे आखा गोथा मोटा छे.”

¹² योहान बाप्तिस्मा आपनेवावा दाहळे गोथा हिमी तोक सोरगोन राजमा ताकतोन चढाई, एने ताकत वावा तीनाक हापकी लेतला.

¹³ योहान तोक आखा भविष्य कोरता एने नियम शास्त्रान भविष्यवाणी कोरता रोया.

¹⁴ एने मोर्जी ते माणू कि एलिया जू आवने वावू होतु, चू युत छे.

¹⁵ जिंदरा सोमवनेन कानटा होसे, चे सोमवी लेवू.

¹⁶ “मे इनी टेमेन माणसोन भाव कुणी काजे आपो? चे इनू पुऱ्या सारका छे, जे हाटोमा बोसीन दिसरा काजे आयळीन-आयळीन कोयतेला,”

¹⁷ आमु तुमरेन कोरीन पावी वाजाळतेला, एने तुमु नि नाच्या; आमु दुख कोरतेला, एने तुमु नी रोड्या.

¹⁸ काहाकि योहान नि खातू आव्यु एने नि पितु, एने चे कोयतेला तीनामा भुंडली आत्मा छे.

¹⁹ माणसोन पुऱ्यु खातू-पीतू आव्यु, एने कोयतेला, देखू, खादळ्यु एने मोंदळ्यु माणूस, फावू लेनेवावा एने पापी माणसोन दुस्तीदार बाकीन ग्यान तेरा काममा खोरलो ठेराय गोयलो छे.

भुरसू नि कोरने वावा पोर हाय

²⁰ तेत्यार चू तिना सोहोरोक दोषी लागाळने बाज गोयू, जीनामा चू घोणा मोटला कामे कोरलु होतु, काहाकि चे तिंदरा मोन नि फिराव्या.

²¹ “हाय खुराजीन! हाय, बेथसदा, जे मोटला कामे तुमरेमा कोरायला, ओगर चे सोर एने सिदोनमा कोरायता, ती गोनटो पांघरीन, एने रुखळामा बोसीन चे तेतारुत मोन फिराव लेता.”

²² बाकीन मे तुमु काजे कोयो कि नियावोन दाहळे तुमरी हालत सोर एने सिदोन गोथी बी जादा सोहनेन लायक होयसे.

²³ कफर्णहुम, काय तू सोरग तोक उचू कोरायसे? तू ते अधोलोक तोक नेचू कोरायसे जे मोटला कामे तारेमा कोरायला छे, ओगर सदोममा कोरायता, ती चू आज तोक रोयतु.

²⁴ बाकीन मे तुमु काजे कोयो कि नियावोन दाहळे तेरी हालोत सदोमोन हालोत गोथी जादा सोहोनेन लायक होयसे.

येसुनचा आराम

²⁵ तिनी टेमे येसु कोयू, “हे बासो, सोरग एने धोरतीन प्रभू, मे तारो धन्यवाद कोरो कि तू इनी वातो काजे ग्यानी एने समजदारीसी डुकाळीन मेक्यू, एने पुऱ्या काजे आप देदू.”

²⁶ होव, हे बास, काहाकि तुसेक यो वारलो लाग्यो.

²⁷ “मारू बास मेसेक आखो काहीन सोप देदलु छे; एने कुदू बासो काजे नी उवखतलु, निस्तु; पुऱ्या काजे; एने चू जीना पोर पुऱ्यु तीनाक देखाळने हिंडे.”

²⁸ हे आखा मेहनत कोरणे वावा एने भारोसी दाबायला माणसे, मारेनचा आवू; मे तुमु काजे आराम आपीस.

²⁹ मारो जुवळो आपनेपोर हाकली लेवू, एने मारेसी सीकू; काहाकि मे नम्र एने मोनोन गोरीब छे एने तुमु काजे आपना आत्मामा आराम जोळसे.

³⁰ काहाकि मारो जुवळो सोपो एने मारु भार होलकु छे.