मत्ती 10 - बारेली पावरी

बारे चेला

¹ एने येसु आपना बारा चेला काजे, बुलावीन, तीनुक भुंडली आत्मा पोर होक आप्यू, कि तीनु काजे नीकावे, एने आखी भातीन रुगो काजे एने आखी भातीन बिमारी काजे वारू कोरे,

² इना बारा प्रेषितोन नावे ये छे; पेहलु शिमोन, जीनाक पतरस कोयता होता, एने तेरु भाश अन्द्रियास जब्दिन पुऱ्यु याकुब, एने तेरु भाश योहान.

³ फिलीप, एने बरतुल्मै, थोमा, एने फावू लेणेवावू मत्ती, हलफईन पुऱ्यु याकुब, एने तद्दै.

⁴ शिमोन झिलोट, एने यहुदा इस्कारीयोत जु येसुक धोराव देदलु.

चेला काजे सेवा कोरणे मुकोलनो

⁵ इनू बारा जोना काजे येसु आग्या आपीन मूकल्यु, “बिन यहुदी वोखे झुन जाता एने सामरीन काहनात देसोमा जाता झुनी.”

⁶ बाकीन इस्राईलोन घोरानान खुवायला गाडरानचा जावू.

⁷ एने चालता-चालता यु प्रचार कोरु एने कोयु कि सोरगोन राज साते आव लागलो छे.

⁸ बिमारी वावाक वारू कोरु, मोरला काजे जीवाळू, कुळावा काजे चुखा कोरु, भुंडली आत्मा काजे निकावू. तुमु भोरी भोरीन लेदला से भोरी भोरीन आपु.

⁹ आपना कोड्यामा नि ते सोनो, एने नि पोयशा, एने नि ते तांबो मेकजी;.

¹⁰ जानेन टेमे नि झुवनो राखू, नि दुय डोगला, नि खासळा एने नि लाकळी लेवू, काहाकि दाहाळक्या काजे तेरी दाहाळकी जोळनो जुवे.

¹¹ “जिना कानला सोहरोम एने गावोमा जाय, ती पोतू लागाळू कि चा कून लायक छे एने जेतार तोक चा गोथा नि निकवे, तेरेनचा रोयू.”

¹² एने घोरोमा भोरायतू जायीन तीना काजे आशिष आपु.

¹³ कोदि तिना घोरोन माणसे लायक होसे ती तुमरू आशिष हिंदरे पोर पुगसे, बाकीन ओगर चे लायक नि होय ती तुमरू आशिष तुमरेनचा पोछु आवसे.

¹⁴ जो कुदू तुमरु स्वीकार नि कोरे एने तुमरी वाते नि सोमवे, तिना घोरोमा नीती तिना सोहोरमा गोथा निकोवता जायीन तुमरा पायोन छोयळू झोटकी देवू.

¹⁵ मे तुमु काजे छाचलीन कोयो कि नियावोन दाहळे तिना सोहोरोन हालोत सदोम एने गोमोरा सोहोरोन हालोत जादा सोचणेन कोरता रोयसे.

आवने वावा काठला दाहळा

¹⁶ “देखू, मे तुमु काजे गाडरा सारखू कुल्यान इचमा मुकलो इनान कोरता घोळसा सारका बुद्धीवान एने पेरवा सारका भोला बोनू.”

¹⁷ बाकीन माणसो गोथा सावधान रोयू, काहाकि चे तुमु काजे महासभामा तिंदरे होवाले कोरसे, एने पंचायतमा तुमुक चाबका देसे.

¹⁸ तुमु मारेन कोरता सोरदारोन एने राजान सामने तिंदरे पोर एने दिसरा जाती पोर गोवा होयनेन कोरता पुगाळाय जासे.

¹⁹ जेतार चे तुमुक धोरावसे ती जी चिंता घोन कोरता कि आमु काहनला रितीसी एने काय कोयसु, काहाकि जो काय तुमु काजे कोयनो रोयसे, चो तिने टेमे तुमु काजे कोवाय जासे.

²⁰ काहाकि बुलने वावा तुमु नि होय, बाकीन तुमरा परमेश्वरोन आत्मा जू सोरगो माईन बास तुमरेमा बुलतलु छे.

²¹ “भाश, भाशो काजे एने बास पुऱ्या काजे मारनेन कोरता आपसे, एने पुऱ्या आसी-बासान खिलापमा उठीन तीनुक माराव नाखसे”.

²² मारा नावोन वोजेसी आखा माणसे तुमरे पुठी दुष्मोनी कोरसे, एने जू आखरी तोक धीर धोरीन रोयसे तेरु छुटकारू होयसे.

²³ जेतार चे तुमु काजे एक देसोमा तोकलीत देसे, ती दिसरे जागे ढास जाजू. मे तुमु काजे छाचलीन कोयो, तुमु इस्राईलोन देसोमा नि फिर सोकसे ती माणसोन पुऱ्यु आव लागसे.

चेला बोननेन मतलब

²⁴ चेलू आपना गुरु गोथू मोटू नि रोयतलु; एने नि दास आपना स्वामी गोथू.

²⁵ चेलान एने गुरुन, एने दासोन एने स्वामीन बोराबोर रोयनो सोवटो छे जेतार चे घोरोन स्वामी काजे भुतडो कोये ती तेरे घोर वावा काजे काहा नि कोये.

कुणीक बिहनो

²⁶ इनान कोरता माणसो काजे नि बिहनो काहाकि काहीन ढाकायलो नि होय जो उगळाय नि जाय एने नि काहीन डूकायलो छे चो जाणाय नि जाय.

²⁷ जो मे तुमु काजे आंदारलामा कोय, तीनाक तुमु विजावामा कोयू; जो कानटामा सोमवला, तीनाक छोत पोर जायीन प्रचार कोरु.

²⁸ जो डीलो काजे नाश कोर सोकतेला, बाकीन आत्मा काजे नाश नि कोर सोकतेलां, तिना काजे मा बिहू; बाकीन तिना काजे बिहू, जू आत्मा एने डील दुयू काजे नोरोगमा नाश कोर सकतेलू छे.

²⁹ काय एक पोयश्यामा दुयू चिल्ला नि वेचायतला? ते बी तुमरा बासोन मोर्जी विगुर तीनु मायला एक बी धोरती पोर नि पोड सोकतेला.

³⁰ तुमरा मुनकान झोटा बी आखा गीनायला छे.

³¹ इनान कोरता बिहू मा; तुमु चिल्ला गोथा जादा बोडीन छे.

येसु काजे माननो या नि माननो

³² “जो कुदू माणसोन सामने मेसेक मान लेसे, तीनाक मे बी आपना सोरगोन बासो सामने मान लीस,

³³ बाकीन जो कुदू माणसोन सामने मारू नाकार कोरसे, तीना काजे मे बी आपना सोरगो मायला बासो सामने नाकार कोरिस.”

³⁴ “यो मा सोमजू कि मे धोरती पोर मेवावने आवलु छे; मे मेवावने नि, बाकीन तोलवार चालाळने आव रोयू.”

³⁵ मे ते आवलु छे कि माणसो काजे तेरा बासोसी, एने बेटीस काजे तेरी आया सी, एने वोवळीस काजे तेरी सासूस सी ओलोग कोर दोम.

³⁶ माणसोन दुष्मोने तेरा घोर मायलात माणसे रोयसे.

³⁷ “जू आश नीती बास काजे मारे गोथू जादा मोंगावू जानतेला छे, चे मारा लायक नि होय; एने जू पुऱ्यु नीती पुराय काजे मारे गोथू जादा मोंगावू जाणे, चू मारु लायक नि होय

³⁸ एने जू आपनु ख्रुस लीन मारे पोछोव नि चाले चू मारा लायक नि होय.”

³⁹ जू आपनु जीव वाचाडतेलु छे, चू तीनाक खुवाळसे; एने जू मारे वोजेसी आपनु जीव खुवाळसे, चू तीनाक जोळसे.

प्रतीफोव

⁴⁰ “जू तुमु काजे स्वीकार कोरतेलु छे, चु मेसेक स्वीकार कोरतेलू छे, चू मेसेक मुकलने वावा काजे स्वीकार कोरतेलू छे.”

⁴¹ जू भविष्य कोरणे वावा काजे भविष्य कोरता जानीन स्वीकार कोरे, चू भविष्य कोरणे वावान बोदलु लेसे; एने जू धरमी काजे धोरमी जानीन स्वीकार कोरे, तीनाक धोरमीन बोदलु जोळसे.

⁴² जू कुदू इना नानला मायीन एक काजे मारू चेलू जानीन निस्तु एक गिलास सेव्वो पाणी पियाळे, मी तुमु काजे छाचलीन कोयो, चू काहनला रितीसी तेरो प्रतीफोव नि खुवे.