लुका 9 - बारेली पावरी

बारा चेला काजे मुकोलनो

¹ जेतार येसु बारा जोना काजे बुलावीन तीनुक आखी भुंडली आत्मा पोर एने बिमारी काजे वारू कोरणेन ताकत एने होक आप्यू,

² एने तीनुक परमेश्वरोन राजोन प्रचार कोरणेन एने बिमारी वावा काजे वारू कोरणेन कोरता मूकल्यु.

³ चू तीनुक कोयू, “वाटे जुगू काहीन झुन लेता, नि ते लाकळी, नि झुवनो, नि रुटा नि पोयशा एने नि दुय-दुय डोगला.

⁴ जीना कुदान घोरमा तुमु जासू चा रोयू एने चांत गोथा जावू.”

⁵ “जू कुदू तुमरू स्वीकार नी कोरे, तीना सोहोरोमा चालता जायीन आपना पायोन छोयळू झोटकी देवू कि तीनु पोर गोवायी होये.”

⁶ आखरी चे निकवीन गाव-गाव वारली खोबर सोमवावता, एने होर एक माणसो काजे वारू कोरता जायीन फिरता रोया.

हेरोदोसोन बिहनो

⁷ देसोन चौथायीन राजा हेरोद यो आखो सोमवीन बिह गोयू, काहाकि काहनास कोया कि योहान मोरलामा गोथू जीव उठलु छे,

⁸ एने कहानास यो कि एलिया देखाय पोळ्यु, एने कुदू यो कि जूनला भविष्य कोरता मायलु कुदु जीव उठलु छे.

⁹ बाकीन हेरोद कोयू, “योहानोन ते मे मुनको काटाळलु, हीमी यु कुन छे जेरा बारामा मे ओसी वात सोमवतलु?” एने चू तीना काजे देखणेन मोर्जी कोऱ्यु.

पाच हजार काजे खावाळनो

¹⁰ ओवतेन प्रेषितोन पोछा आवीन जो काहीन चे कोरला होता, तीना काजे कोया; एने चू तीनु काजे ओलोग कोरीन बेथसदा नावोन सोहोरोमा लीगोयू.

¹¹ यो सोमवीन गोरदी तेरे पोछोव चाल पोळी, एने चू खुशीसी तीनुक भेट्यू, एने तिंदरे पुठी परमेश्वरोन राजोन वाते कोरणे बाज गोयू, एने जीनुक आरगाई जुवती होती तीनुक आरगाई आप्यू.

¹² जेतार दाहळू ढोवणे बाज गोयू ती बारा जोना आवीन येसु काजे कोया, “गोरदी काजे मुकली दे कि चारू धोळेन गावे एने वोसत्यामा जायीन रोये एने खाणेन सोय कोरे, काहाकि आपनु न्या सुनसान जागे छे.”

¹³ चू तीनुक कोयू, “तुमुत तीनु काजे खाणो आपु” चे कोया, “आमरे जुव पाच रुटा एने दुय माछा छुळीन ओवी काहीन नी होय; बाकीन होव हीमी आमु जायीन इनू आखा माणसो जुगू खाणो मुले लेये ती होय सोकसे” चे माणसे ते पाच होजारोन आस पास ओदमीत होता.

¹⁴ तेत्यार चू आपना चेला काजे कोयू, “तीनु काजे पोचास-पोचास कोरीन पोंगात ने पोंगात बोसाळ देवू.”

¹⁵ चे तोसात कोऱ्या, एने आखा काजे बोसाळ देदा.

¹⁶ तेत्यार चू पाच रुटा एने दुय माछा लीन एने सोरगो भूनी भावीन धन्यवाद कोऱ्यु, एने भांग भांगीन चेला काजे आपतू गोयू कि माणसो काजे वाटे.

¹⁷ तेत्यार आखा खायीन आफरी गोया, एने चेला रोयला भूकरान बारा टूपला भोरीन चुट्या.

पतरसोन येसु काजे मसिहा कोरीन माननो

¹⁸ जेतार चू सुनले जागे प्रार्थना कोरने बाज रोयू होतु एने चेला तेरे पुठी होता, ती चू तीनु काजे पुछु, “माणसे मेसे काजे काय कोयतेला?”

¹⁹ चे जोवाब आप्या, “योहान बाप्तिस्मा आपनेवावू, एने काहना-काहना एलिया, एने काहना यो कि जूनला भविष्य कोरता मायलु कुदू एक जीव उठलु छे.”

²⁰ चू तीनु काजे पुछु, “बाकीन तुमु मेसेक काय कोयतेला?” पतरस जोवाब आप्यू, “परमेश्वरोन मसिह.”

²¹ तेत्यार चू तीनु काजे जोताळीन कोयू कि यो कुदा काजे झुन कोयता.

येसुन मोरनेन भविष्यवाणी

²² ओवतेन चू कोयू, “माणसोन पुऱ्यान कोरता जोरुरी छे कि चू घोनो दुख उठावसे, एने डाह-डाहान एने प्रधान पुजारू एने शास्त्री तीनाक विटाव सोमजीन मार नाखसे, एने चू तिसरे दाहळे जीव उठसे.”

येसुन पोछोव चालनेन मतलब

²³ चू आखा काजे कोयू, “अगर कुदाक मारे पोछोव आवने लागे, ती आपना खुदो काजे नाकार कोरे एने होर दाहळे आपनु ख्रुस हाकलीन मारे पोछोव चाले.

²⁴ काहाकि जू कुदू आपनु जीव वाचाडने देखसे चू तीनाक खुवसे, बाकीन जू कुदू मारेंन कोरता आपनु जीव खुवसे चू तीनाक वाचाडसे.

²⁵ अगर माणूस आखा जोगो काजे मेव्वीलेये एने आपना जीवो काजे खुवाळ देये नि ते तिंदरो नुकसान कोर लेये ती तीनाक काय लाभ होये?

²⁶ जू कुदू मेसेक एने मारी वातोक लाजवायसे, माणसोन पुऱ्यु बी, जेतार आपनी एने आपना बास तोरोफसी एने चुखला सोरग दूतोन महिमा साते आवसे, ती तीनासी लाजवायसे.

²⁷ मे तुमु काजे छाचलीन कोयो, कि जे न्या उबरोय रोया, इनुमा गोथा काहनास ओसा छे कि जेतार तोक परमेश्वरोन राज नि देख लेये, तेत्यार तोक मोतोन सोवाद नी चाखे.”

येसुन साते मुसा एने एलिया

²⁸ इनी वातोन ओवतेन आठ दाहळा ओवते चू पतरस, योहान एने याकुब काजे साते लीन प्रार्थना कोरणेन कोरता बोयळा पोर गोयू.

²⁹ जेतार चू प्रार्थना कोरणेत बाज रोयू होतु, ती तेरा चेहरान रूप बोदोल गोयो, एने तेरा छिंदरा धोव्वा सोप होयीन चोमोकने बाज गोया.

³⁰ एने देखू, मुसा एने एलिया ये दुय माणसे तेरे साते वाते कोरणे बाज रोया होता.

³¹ ये महिमा पुठी देखाय पोळ्या एने तेरी मोरणेन बारामा वात कोरता होता, जो यरुशलेममा होयने वावो होतो.

³² पतरस एने तेरा सातीदार निंदराव्वा होता, एने जेतार वारू सुद्दीपोर आव्या, ती तेरी महिमा एने इनू दुय ओदमी काजे, जे तेरे साते उबरोय रोया होता, देख्या.

³³ जेतार चे तेरे साते गोथा जाने बाज गोया, ती पतरस येसु काजे कोयू, “हे माहाराज, आमरो न्या रोयनो वारू छे, आखरी आमु तीन मंडप बोनावसु एक तारेन कोरता, एक मुसान कोरता, एने एक एलियान कोरता” चू जान रोयू होतु कि काय कोयने बाज रोयू.

³⁴ चू कोयनेत बाज रोयू होतु ती एक वादवो आवीन तिंदरे पोर छावाय गोयो, एने जेतार चे तिना वादवो मा घेरायणे बाज गोया ती बिह गोया.

³⁵ तेत्यार तीना वादवामा गोथू यु बुल निकव्यू, “यु मारू पुऱ्यु एने मारू नेवाळलु छे, एरी सोमवू.”

³⁶ यु बुल होयताच येसु एखलुत देखायू; एने चे हुगात रोया, एने जो काय देखला होता तेरी कानलीत वात तीनु दाहळामा कुदा काजे नि कोया.

भुंडली आत्मासी पुऱ्याक छुळवनो

³⁷ दिसरे दाहळे जेतार चे बोयळा पोर गोथा उतऱ्या ती एक मोटीत गोरदी तीनु काजे भेटायी.

³⁸ एने देखू, गोरदीमा गोथू एक माणूस आयळीन कोयू, “हे गुरु, मी तुसे काजे विनता कोरो कि मारा पुऱ्या पोर मोंगोन नोजोर कोर; काहाकि चू मारू एखलुत पुऱ्यु छे.

³⁹ एने देख, एक भुंडली आत्मा तीनाक धोरतेली, एने चू उचकालुन आयळने बाज जातलू; एने ची तीनाक ओसी पिवोवतेली कि चू मुयोमा फेस भोर लावतेलु; एने तीना काजे छेंदीन पोरीशान कोरीन छुळतली.

⁴⁰ मे तारा चेला काजे विनता कोऱ्यु कि तीनाक निकावू, बाकीन चे नि निकाव सोक्या”

⁴¹ येसु जोवाब आप्यू, “हे कोम भुरस्या एने एक हेटी माणसो, मे का तोक तुमरे पुठी रोयीस एने तुमरो वेठीस? तारा पुऱ्या काजे न्या लाव.”

⁴² चू आवनेत बाज रोयू होतु ती भुंडली आत्मा तीनाक आसटीन पीव्वी देदी, बाकीन येसु भुंडली आत्मा काजे धोमकाव्यू एने पुऱ्या काजे वारू कोरीन तेरा बासोन होवाले कोर देदू.

⁴³ तेत्यार आखा माणसे परमेश्वरोन महान ताकत पोरसी वाहराय गोया. बाकीन जेतार आखा माणसे इना आखा कामो पोरसी जो चू कोरतू होतु वाहारायता होता, ती आपना चेला काजे कोयू,

येसुन मोरनेन दुसरी कावा भविष्यवाणी

⁴⁴ “तुमु इना वातो पोर कानटा लागाळू काहाकि माणसोन पुऱ्यु माणसोन हाते धोरवायने वावू छे.”

⁴⁵ बाकीन चे इनी वातो काजे नी सोमज्या, एने यो तिंदरेमा डूकायलो रोयो कि चे तीनाक सोमजी नि सोक्या; एने चे इनी वातोन बारामा तीना काजे पुछ्ने बिहता होता.

आखान मोताळू कुन

⁴⁶ ओवते तिंदरेमा ओसा विचार आवने बाज गोया कि आपने गोथू मोटू कून छे.

⁴⁷ बाकीन येसु तिंदरा मोनो मायला विचार जान लेदू, एने एक पुऱ्या काजे लीन आपने साते उबराख्यू,

⁴⁸ एने तीनु काजे कोयू, “जू कुदू मारे नावोसी ओसला पुऱ्या काजे स्वीकार कोरतेलू चू मेसेक स्वीकार कोरतेलु; एने जू कुदू मेसेक स्वीकार कोरतेलु, चू मेसेक मुकोलने वावान स्वीकार कोरतेलु, काहाकि जू तुमरेमा आखान नानामा गोथू नानू छे, चू मोटलु छे.”

जू खिलापमा नि चू पक्षमा छे

⁴⁹ तेत्यार योहान कोयू, “हे माहाराज, आमु ते एक माणसो काजे तारा नावोसी भुंडली आत्मा काजे निकावतलु देख्या, एने आमु तीनाक मोना कोऱ्या, काहाकि चू आमरे पुठी आवीन तारे पोछोव नी चालतलु.”

⁵⁰ येसु तीनु काजे कोयू, “तीनाक मोना मा कोरु; काहाकि जू तुमरा खिलापमा नि होय, चू तुमरे भूनी छे.”

यरुशलेममा जाणो

⁵¹ जेतार तेरा उपोर चूटाय जाणेन दाहळा पुरा होयने वावा होता, ती चू यरुशलेममा जानेन विचार पाक्कू कोऱ्यु.

⁵² चू आपना ओगोव दुत मुकोल्यू चे सामरी एक गावमा गोया कि तेरेन कोरता जागू तीयार कोरे.

⁵³ बाकीन चे माणसे तीनाक आवने नी देदा, काहाकि चू यरुशलेममा जातू होतु.

⁵⁴ यो देखीन तेरा चेला याकुब एने योहान ये कोया, “हे प्रभू, काय तारी मोर्जी होय ती आमु आग्या आपजे कि सोरगोमा गोथी आगठाम तीनुक धोपाळ देये?”

⁵⁵ बाकीन येसु पोछु वोवीन तीनु काजे कोयू, “तुमु नि जानतेला कि तुमु कोसला आत्मान छे काहाकि माणसोन पुऱ्यु माणसोन जीवन नाश कोरणे नि बाकीन वाचाडनेन कोरता आवलु छे.”

⁵⁶ एने चे काहना एक दिसरा गावोमा जात रोया.

येसुन पोछोव चालनेन मतलब

⁵⁷ जेतार चे वाटे जाता होता ती काहनुस तीनाक कोयू, “जा-जा तू जायीस, मे तारे पोछोव आवीस.”

⁵⁸ येसु तीनाक कोयू, “कुल्या काजे बिळो एने वादवा मायला चिल्ला काजे पुतरा रोयतेला, बाकीन माणसोन पुऱ्या काजे मुनको मेकनेन बी जागू नि होय.”

⁵⁹ चू दिसरा काजे कोयू, “मारे पोछोव आव” चू कोयू, “हे प्रभू, मेसेक पेहेल जान दे कि मारा बासो काजे गाळ दोम.”

⁶⁰ येसु तीनु काजे कोयू, “मोरला काजे आपनो मोरलो गाळणे दे, बाकीन तू जायीन परमेश्वरोन राजोन वात सोमवाळ.”

⁶¹ दिसरू एक जोनू एने कोयू, “हे प्रभू, मे तारे पोछोव आवीस; बाकीन पेहेल मेसेक जाने दे आपना घोरोन माणसो काजे कोयीन आवो.”

⁶² येसु तीना काजे कोयू, “जू कुदू आपनु हात होवोपोर मेकीन पोछोव देखे, चू परमेश्वरोन राजोन लायोक नि होय.”