लुका 8 - बारेली पावरी

येसुन चेलापन

¹ एरे बाद चू सोहोर-सोहोर एने गाव-गाव प्रचार कोरतू जायीन, एने परमेश्वरोन राजोन वारली खोबर सोमवावतू जायीन फिरने बाज गोयू, एने चे बारा जोना तेरे साते होता,

² एने काहनास बायरा होता जे भुंडली आत्मामा गोथा एने बिमारीमा गोथा छुळावला होता, एने चे ये छे, मरीया जी मगदलीनी कोवायती होती, जीनीमा गोथी सात भुंडली आत्मा निकोवली होती,

³ एने हेरोदोन कारभारी खुजा एरी लाडी योअन्ना एने सुसन्ना, एने ओवी घोन सोवटा बायरा ये आपना पोयशासी तेरी सेवा कोरता होता.

बीज वेरने वावान दाखलू

⁴ जेतार घोनी मोटी गोरदी एखठी होयी एने देस-देसोन माणसे तेरेनचा आव्या कोरता होता, ती चू दाखलामा गोथू कोयू.

⁵ “एक वेरणेवावु बीज वेरणे निकव्यू वेरणेन टेमे काहनोस वाटी धोळे पोळ्यो, एने रोंदवाय गोयो एने वादवा मायला चिल्ला तीनुक खाय गोया.

⁶ काहनोस चाफऱ्या वावे जागे पोळ्यो, एने उग्यो बाकीन सोरदावु नी जोळनेन वजेसी सुक गोयो.

⁷ काहनोस झाडवाट्यामा पोळ्यो, एने काटाव्या साते-साते वोदीन तीनाक डाब देदा.

⁸ काहनोस वारले जागे पोळ्यो, एने उगीन सोव गुणा फोव लाव्यो” यो कोयीन चु उचा बुलोमा कोयू, “जिंदरा सोमोवणेन कानटा छे चे सोमवी लेये.”

दाखलान महत्व

⁹ तेरा चेला तीना काजे पुछ्या कि इना दाखलान काय मतलब छे?

¹⁰ येसु कोयू, “तुमु काजे परमेश्वरोन राजोन भेद सोमजणेन कोरता सोमोज आपली छे, बाकीन दिसरा काजे दाखलासी सोमवाय जातलो छे, इनान कोरता” चे देखीन बी नी देखे, एने सोमवीन बी नी सोमजे.

बीज वेरने वावान दाखलान मतलब

¹¹ “दाखलान मतलब यो छे बीज परमेश्वरोन वचन छे.

¹² वाटी धोळे वावो चे जे छे, जे सोमव्या; तेत्यार भुतडा आवीन तिंदरे मोनोमा गोथो वचन चुटीन ली जाती रोयतलु कि कोदि ओसो नि होये कि चे भुरसू कोरीन छुटकारू लेये.

¹³ चाफऱ्या पोरला चे छे कि जेतार सोमवतला, ती खुशीमा वचन काजे स्वीकार ते कोरतेला बाकीन मुवे नि धोरणेसी चे थुलिक वार तोक भुरसू कोरतेला एने पारखोन टेमे घाबराय जातला.

¹⁴ जो झाडक्यामा पोळ्यो, यो चे छे जे सोमोवतला, बाकीन ओगा चालीन चींता, एने धोन, एने जीवनोन सुखोमा फोस जातला छे एने तिंदरो फोव नी पाकतलो.

¹⁵ बाकीन वारली जागा मायला ये चे छे, जे वचन सोमवीन वारू एने घोनो वारू आपना मोनोमा सोमावीन राखतला एने धीर धोरीन फोवे लावतेला छे.

दिवान दाखलू

¹⁶ “कुदू दिवू धोपाळीन ठाहरे कोरीन नि ढाकतेला, एने नी खाटला तोवे मेकतेला, बाकीन पाटळी पोर मेकतेला कि माहाय आवने वावाक विजावो देखाये.

¹⁷ काहीन डूकायलो नी जो जोळे नी, एने नि काहीन डूकायलो छे जो सोमजी नी सोके एने सामने नी होये.

¹⁸ इनान कोरता हुशारीमा रोयू कि तुमु काहना रितीसी सोमवतला? काहाकि जीना जुव छे तीनाक आपायसे, एने जीना जुव नि होय तिना जुव चो बी मांगाय जासे, जीना काजे चू आपनु सोमोजतेलु.”

येसुन खोरलो घरबार

¹⁹ तेरी आया एने तेरा भाश तेरेनचा आव्या बाकीन गोरदीन वोजेसी तीनाक भेटी नी सोक्या.

²⁰ तीनाक कोया, “तारी आया एने तारा भाश बारथे उबरोय रोया तुसेक भेटने कोर रोया.”

²¹ चू इना जोवाबमा तीनु काजे कोयू, “मारी आया एने मारा भाश येत छे, जे परमेश्वरोन वचन सोमवतेला एने मानतला.”

आंजी एने वाहवाक शांत कोरनो

²² ओवतेन एक दाहळे चू एने तेरा चेला ढोंड्यामा चोळ्या, एने चू तीनु काजे कोयू, “आवू, दोरीयान पोरले धोळे जाता” आखरी चे ढोंड्यो छुळ देदा.

²³ बाकीन जेतार ढोंड्यो चालतोत होतो, ती चू सुव गोयू; एने दोरीयामा आंजी आवी, एने ढोंड्यो पाणीसी भोरायने बाज गोयो एने चे घाबरायला होता.

²⁴ तेत्यार चे साते आवीन तीनाक जागाळ्या एने कोया, “माहाराज! माहाराज! आपनु नाश होयने बाज रोयू” तेत्यार चू उठीन आंजी काजे एने पाणीन लेहेरो काजे धोमकाव्यू एने चे हुगरोया एने आराम होय गोयो.

²⁵ तेत्यार चू तीनु काजे कोयू, “तुमरू भुरसू का होतु?” बाकीन चे बिह गोया एने वाहारायीन आपोसमा कोयने बाज गोया, “यु कून छे जू आंजी एने पाणी काजे आग्या आपतलु, एने चे तेरी मानतेला?”

भुंडली आत्माक निकावनो

²⁶ ओवतेन चे गिरासेन देसोमा पुग्या, जो पोरले धोळे गलीलोन सामने छे.

²⁷ जेतार चू काठे उतऱ्यु ती तीना सोहोरोन एक माणूस तीनाक भेट्यू जीनामा भुंडली आत्मा होती चू घोना दाहळा गोथू नी छिंदरा पेहेरतू होतु एने नी घोरमा रोयतू होतु एने मोळवाट्यामा रोया कोरतू होतु.

²⁸ चू येसु काजे देखीन आयळ्यु एने तेरे सामने दौडीन मोटात बुलोमा कोयू, “हे परमप्रधान परमेश्वरोन पुऱ्या येसु! मेसेक तारे पुठी काय काम? मे तुसेक विनता कोरो, मेसेक तोकलीत मा देये.”

²⁹ काहाकि चू तिनी भुंडली आत्मा काजे तीना माणसोमा गोथू निकोवनेन आग्या आपने बाज रोयू होतु, इनान कोरता कि ची तीना पोर घोळी-घोळी ताबू कोरती होती न्या तोक माणसे साकव्या एने बेळ्या कोरीन बांदता होता ते बी चू बांदला काजे तुळ नाखतू होतु, एने भुंडली आत्मा तीनाक बोयळामा दोवळावती फिरवती होती.

³⁰ येसु तीना काजे पुछु, “तारो काय नाव छे?” चू कोयू, “सेना,” काहाकि घोन सोवटी भुंडली आत्मा तेरेमा भोराय रोय होती.

³¹ चे तीनाक विनता कोऱ्या कि आमु काजे उंडा खाडामा जाणेन आग्या मा आपे.

³² चा बोयळा पोर सुवऱ्यान एक मोटूत टूवू चोरणे बाज रोयू होतु, इनान कोरता चे तीनाक विनता कोऱ्या कि आमुक तीनुमा भोरायने दे, चू तीनुक जाने देदू.

³³ तेत्यार भुंडली आत्मा तीना माणसोमा गोथी निकवीन सुवऱ्यामा गोयी एने चू टूवू आडखा पोर गोथा झोळवायीन दारीयामा जायीन पोळ्या एने डूबीन मोर गया.

³⁴ गुवाव्या यो जो होयलो होतो देखीन दोवळ्या एने सोहोरमा एने गावोमा जायीन तेरी खोबर कोऱ्या.

³⁵ माणसे यो जो होयलो होतो तीनाक देखणे कोरीन निकव्या, एने येसुनचा आवीन जीना माणसोमा गोथी भुंडली आत्मा निकोवली होती, तीनाक येसुन पायोनचा छिंदरा पेहेरीन एने सुदपोर बोस रोयलू देखीन बिह गोया;.

³⁶ एने देखणे वावा तीनु काजे कोया कि चू भुंडली आत्मान तोकलीत वावू माणूस काहना रितीसी वारू होयू.

³⁷ तेत्यार गिरासेनोन आळी-छेळीन आखा माणसे येसु काजे विनता कोऱ्या कि आमरेनचा गोथू जात रोय; काहाकि तिंदरेमा घोनी बिक भोराय गोयली होती आखरी चू ढोंड्यामा चोळीन पोछु जातू होतु ती.

³⁸ जीना माणसोमा गोथी भुंडली आत्मा निकोवली होती चू तीना काजे विनता कोरणे बाज गोयू कि मेसेक तारे साते रोयने दे, बाकीन येसु तीनाक मुकेलतू जायीन कोयू,

³⁹ “तारे घोर पोछु जात रोय एने माणसो काजे देखाळ कि परमेश्वर तारेन कोरता कोसा मोटा कामे कोरलु छे” चू जायीन आखा सोहोरोमा प्रचार कोरणे बाज गोयू कि येसु मारेन कोरीन कोसा मोटा-मोटा कामे कोऱ्यु.

मांदली बायर एने मोरली पुराय काजे वारू करनो

⁴⁰ जेतार येसु पोछु आव्यु ती माणसे तीना काजे खुशीमा मेव्या, काहाकि चे आखा तेरी वाट जुव रोया होता.

⁴¹ तेत्यारुत याईर नावोन एक माणूस जु प्रार्थना घोरोन सरदार होतु, आव्यु एने येसुन पायो पोर पोळीन तीना काजे विनता कोरणे बाज गोयू कि मारे घोर चाल,

⁴² काहाकि तेरी बारा सालोन एकुत पुराय होती, एने ची मोरणे पोर होती जेतार चू जातू होतु ती माणसे तीना पोर हिट पोळता होता.

⁴³ एक बायोर जीनीक बारा सालोन लुय वोयनेने बिमारी होती, एने ची तेरी आखी कोमाय दवाखाना पोछोव खोरचू कोर देदली होती, ते बी कुदान हाते वारू नि होयी,

⁴⁴ पोछोव गोथी आवीन तेरा छिंदरा छेवळा काजे छिमी, एने तेत्यारुत तेरो लुय वोयनो बोंद होय गोयो.

⁴⁵ इनापोरसी येसु कोयू, “मेसेक कुन छिम्यो?” जेतार आखा वोवीन देखणे बाज गोया, ती पतरस एने तेरा सातीदार कोया, “हे माहाराज, तुसेक ते गोरदी डाबणे बाज रोयी एने तारे पोर हिट पोळतेली.”

⁴⁶ बाकीन येसु कोयू, “कुन तोरी मेसेक छिमलो छे, काहाकि मे जान लेदलु छे कि मारेमा गोथो ताकत निकोवलो छे.”

⁴⁷ जेतार बायोर देखी कि मे डूकाय नी सोकती, तेत्यार कापती जायीन आवी एने तेरा पायो पोर पोळीन आखा माणसो सामने कोयी कि ची काहना वोजेसी तीनाक छिमली, एने कोसी तेत्यारुत वारू होय गोयी.

⁴⁸ येसु तिनी काजे कोयू, “बेटी, तारा भुरसा पोरसी तुसेक वारू कोरलु छे, खुशालमा जात रोय.”

⁴⁹ चू यो कोयनेत बाज रोयू होतु कि कुन तोरी प्रार्थना घोरोन सरदारोन चा गोथू आवीन कोयू, “तारी पुराय मोर गोयी गुरु काजे तोकलीतमा आपे.”

⁵⁰ येसु यो सोमवीन तीनाक जोवाब आप्यू, “मा बिहे; निस्तु भुरसू मेक, ती ची वाच जासे.”

⁵¹ घोरोमा आवीन चू पतरस, योहान, याकुब, एने पुऱ्या आसी-बासाक छुळीन दिसरा कुदाक तेरे साते माहाय आवने नी देदू.

⁵² आखा तीनिन कोरीन रोडापीट वोव रोया होता, बाकीन येसु कोयू, “रोडू मा; जी मोरी नी बाकीन सुवने बाज रोयी.”

⁵³ चे यो सोमज्या कि ची मोर गोयली छे तेरी मोजाक कोरणे बाज गोया.

⁵⁴ बाकीन चू तेरु हात धोऱ्यु, एने जुरेत कोयू, “हे पुराय, उठ”

⁵⁵ तेत्यार तेरु जीव पोछु आव्यु एने ची तेत्यारुत उठीन बोसी ओवतेन चू आग्या आप्यू कि इनीक काजे काहीन खाणे आपे.

⁵⁶ तेरा आसी-बासा वाहराय गोया, बाकीन चू तीनु काजे जोताळ्यु कि यो जो होयलो छे कुदा काजे झुन कोयता.