लुका 5 - बारेली पावरी

येसुन पेहलू चेलु

¹ जेतार गोरदी परमेश्वरोन वचन सोमवनेन कोरता तीना पोर पोळ जाती होती, एने चू गन्नेसरतोन तलाव धोळे उबरोय रोयू होतु, ती ओसो होयो.

² कि चू दोरीयान धोळे दुय ढोंड्या उबरोयला देख्यू, एने माछल्या तीना पोर गोथा उतरीन जाव्या धुवता होता.

³ तिना ढोंड्यामा गोथू एक पोर, जो शिमोनोन होतो, चोळीन चू तीनाक विनता कोऱ्यु कि काठे गोथो थुलोक छेटो लीन चाले तेत्यार चू बोसीन माणसो काजे ढोंड्या पोर गोथू सिकाळने बाज गोयू.

⁴ जेतार चू वाते कोर लेदू ती शिमोन काजे कोयू, “उंडलामा लीन चाल एने माछा धोरणेन कोरता आपनी जाव नाखू.”

⁵ शिमोन तीना काजे जोवाब आप्यू, “हे मालिक, आमु ते आखी रात मेहनत कोऱ्या एने काहीन नि धोऱ्या; ते बी तारे कोयनेसी जाव नाखीस.”

⁶ जेतार चे ओसो कोऱ्या, ती लोकेत माछा घेरवी लाव्या, एने तिंदरा जाव फाटणे बाज गोयी.

⁷ इनापोरसी चे आपना सातीदारो काजे जे दिसरा ढोंड्यामा होता, विचार कोऱ्या कि आवीन आमरी मदत कोरे, एने चे आवीन दुयू ढोंड्या या तोक भोर लेदा कि चे डूबने बाज गोया.

⁸ यो देखीन शिमोन पतरस येसुन पायो पोर पोळ्यु एने कोयू, “हे प्रभू, मारेंचा गोथू जा, काहाकि मे पापी माणूस छे.”

⁹ काहाकि ओतरा माछा धोरायनेसी तीनाक एने तेरा सातीदारो काजे घोनी नोवलाय लागी,

¹⁰ एने तोसाच जब्दिन पुऱ्यु याकुब एने तोसोच योहान काजे बी, जे शिमोनोन भागीदार होता, वाहाराय गोया तेत्यार येसु शिमोन काजे कोयू, “मा बिहे; हीमी गोथू तु माणसो काजे धोरणेवावु बोनीस.”

¹¹ एने चे ढोंड्या काजे काठान धोळे ली आव्या एने आखो काहीन छुळीन तेरे पोछोव चाल पोळ्या.

कुळावाक वारू करनो

¹² जेतार चू एक सोहोरोमा होतु, ती चा कुळावा बिमारीसी भोरायलू एक माणूस आव्यु; एने चू येसु काजे देखीन उबळू पोळ यु एने विनता कोऱ्यु, “हे प्रभू, ओगर तारी मोर्जी होय ती मेसेक चुखू कोर सोकतेलू.”

¹³ चू हात ओगु कोरीन तीनाक छिम्यू एने कोयू, “मारी मोर्जी छे, तू चुखू होय जा” एने तेरी कुळावान बिमारी तेत्यारुत वारू होय गया.

¹⁴ तेत्यार चू तीना काजे जोताळ्यु, “कुदाक झुन कोयतू, बाकीन जायीन खुदोक पुजारू काजे देखाळ, एने आपनो चुखो होयनेन बारामा जो काहीन मुसा चोळावने ठेरावलू छे तीना काजे चोळाव कि तीना पोर गोवायी होये.”

¹⁵ बाकीन तेरी वात एने बी पसरती गोयी, एने गोरदीन गोरदी तेरो सोमवनेन कोरता एने आपनी बिमारीमा गोथा वारू होयनेन कोरता एखठा होया.

¹⁶ बाकीन चू बोयळामा ओलोग जायीन प्रार्थना कोरतू रोयतू होतु.

येसुन लारे लखवा वावाक वारू करनो

¹⁷ एक दाहळू ओसो होयो कि चू सिकाळतु होतु, एने फरुशी एने शास्त्रध्यापक चा बोस रोयला होता चे गलील एने यहुदियान होर एक गाव गोथा एने यरुशलेममा गोथा आवला होता, एने वारू कोरनेन कोरता प्रभून ताकत तेरे पुठी होतो.

¹⁸ तिनी टेमे लोकेत माणसे एक माणूस काजे जू लखवा बिमारी वावू होतु, खाटला पोर लाव्या, एने चे तीनाक माहाय लीजाने एने येसुन ओगोव मेकनेन इलाज हेरता होता.

¹⁹ बाकीन जेतार गोरदीन वोजेसी तीनाक माहाय नि लीजाय सोक्या ती चे छोत पोर चोळीन एने कोवला छेटा कोरीन, तीनाक खाटला भेव इचमा येसुन सामने उतार देदा.

²⁰ चू तिंदरू भुरसू देखीन तीना काजे कोयू, “हे ओदमी, तारा पाप माफ होय गया,”

²¹ तेत्यार शास्त्री एने फरुशी विचार कोरणे बाज गोया, “यु कून छे जू परमेश्वरोन बुराई कोरतेलू? परमेश्वर काजे छुळीन एने कून पापोन माफी कोर सोकतलू?”

²² येसु तिंदरा मोनोम वावी वात जानीन, तीनु काजे कोयू, “तुमु आपना मोनोमा काय विचार कोर रोया?

²³ सुदो काय छे? काय यो कोय कि तारा पाप माफ होय गया, कि यो कोय कि, उठ एने चाल फिर?

²⁴ बाकीन इनान कोरता कि तुमु जानु कि माणसोन पुऱ्या काजे धोरती पाप माफ कोरनेन बी होक छे” चू लखवा वावा मांदला काजे कोयू, “मे तुसे काजे कोय, उठ एने आपनो खाटलो हाकलीन आपने घोर जातरो.”

²⁵ चू तेत्यारुत तिंदरे सामने उठ्यू, एने जीना पोर चू सुव रोयू होतु तीनाक हाकलीन, परमेश्वरोन महिमा कोरतू जायीन आपने घोर जात रोयू.

²⁶ तेत्यार आखा वाहराय गोया एने परमेश्वरोन महिमा कोरणे बाज गोया एने घोणा बिहीन कोयने बाज गोया, “आज आमु ओनजानली वात देखला छे.”

मत्तीक बुलावनो

²⁷ इनान ओवतेन चू बारथे गोयू एने लेवी नावोन एक फावू लेणे वावा काजे फावू लेनेन चौकिपोर बोसलू देख्यू, एने तीना काजे कोयू, “मारे पोछोव आव.”

²⁸ तेत्यार चू आखो काहीन छुळीन उठ्यू एने तेरे पोछोव चाल पोळ्यु.

पापी साते खाणो

²⁹ तेत्यार लेवी आपना घोरमा तिंदरेन कोरता एक मोटीत पाहांतराय आप्यू; एने फावू लेणे वावान एने दिसरा माणसोन ये तेरे साते खाणो खाणे बोसला होता, एक मोटीत गोरदी होती.

³⁰ इनापोरसी फरुशी एने तिंदरा शास्त्री तेरा चेला काजे यो कोयीन कुरकुर कोरणे बाज गोया एने कोये कि, तुमु फावू लेणे वावा एने पापी पुठी काहा खातला पितला?

उपवासोन बारामा येसुन कोयनो

³¹ येसु तीना काजे जोवाब आप्यू, “दवा वारला आरगाई वावान कोरता नी, बाकीन बिमारी वावान कोरता जरूरी छे.

³² मे धोरमी काजे नि, बाकीन पापीन मोन फिरावनेन कोरता बुलावने आव रोयू.”

³³ चे तिना काजे कोया, “योहानोन चेला ते बोराबोर उपास राखतेला एने प्रार्थना कोरता रोयतेला, एने तोसात फरुशीन चेला बी, बाकीन तारा चेला ते खातला-पितला.”

³⁴ येसु तीनु काजे कोयू, “काय तुमु वोरात्या काजे, जेतार तोक लाडू तिंदरे पुठी रोये, उपास कोराव सोकसू काय?

³⁵ बाकीन चे दाहळा आवसे, जीनामा लाडू तीनुमा गोथू ओलोग कोराय जासे, तेत्यार चे तीनु दाहळामा उपास कोरसे.”

³⁶ येसु एक एने दाखलू बी तीनु काजे कोयू “कुदू माणूस नोवला छिंदरामा गोथू फाळीन जूनला छिंदरा काजे थीगवो नि लागाळतलु, नीती नोवलो फाट जासे एने चो थीगवो जूनलामा मेव बी नी खाय.

³⁷ एने कुदू नोवलू आंगुरोन रोस जूनला ठाहरामा नि भोरतेला, नीती नोवलु आंगुरोन रोस ठाहरा काजे फाळीन वय जासे, एने ठाहरो बी नाश होय जासे.

³⁸ बाकीन नोवलो आंगुरोन रोस नोवला ठाहरामा मा भोरनो जुवे.

³⁹ काहनुस माणूस जुनलू आंगुरोन रोस पियीन नोवलू नी मांगतलु काहाकि चू कोयतलु, कि जुनलूत वारला छे.”