लुका 24 - बारेली पावरी

येसुन जीव उठनो

¹ बाकीन हाप्तान पेहेले दाहळे सोंदारे वेगोत चे यो वारू इत्तर चे तीयार कोरलो होतो, लीन मोळवाट्यामा आया.

² चे दोगळा काजे मोळवाट्या पोर गोथू धेकली मेक्यू देख्या,

³ बाकीन माही जायीन प्रभू येसुन धोळ नि जोळ्यो.

⁴ जेतार चे इनी वातोसी शोंकामा होता ती देख्या, दुय माणसे चोमोकने वावा डोगला पेहेरीन तिंदरे साते आवीन उभा रोया.

⁵ जेतार चे बिह गोया एने धोरती भूनी मुई वाकाड रोया ती चे तीनाक कोया, “तुमु जीवतला काजे मोरलामा काहा हेरे रोया?

⁶ चू न्या नि होय, बाकीन जीव उठलु छे. फोम कोरु कि चू गलीलमा रोयतू होतु ती तुमु काजे कोयलु होतु.

⁷ गोरोज छे कि माणसोन पुऱ्यु पापीन हाते धोराय जाय, एने ख्रुस पोर चोळाय जासे एने दिसरे दाहळे जीव उठे.”

⁸ ती तेरी वाते तीनु काजे फोम आवी,

⁹ एने मोळवाट्यामा चा गोथा निकवीन चे तीनुक ग्यारा जोना काजे, एने दिसरा आखा काजे, जी वाते कोयीन सोमवाळ्या.

¹⁰ जे प्रेषित काजे जी वाते कोया चे मरीयम मगदलीनी एने योअन्ना एने याकुबोन आया मरीया एने तेरे साते वावा दिसरा बायराबी होता.

¹¹ बाकीन तिंदरी वात काहणी सारखी लागे, एने चे तिंदरे पर भुरसू नी कोऱ्या.

¹² तेत्यार पतरस उठीन मोळवाट्या भूनी दोवळीन गोयू, एने वाकू वोवीन देख्यू ती निसता छिंदरा पोळला देख्यू, एने यो होयलो होतो तीनाक नवलाई कोरतू जायीन तेरे घोर जात रोयू.

इम्माऊस वाटे चेलाक दर्शन

¹³ तिने दाहळे तिंदरे मायला दुय जोना इम्माऊस नावोन एक गाव काजे जाणे बाज रोया होता, चो यरुशलेममा गोथो काहीन दोस किलोमीटर नांबे पोर होतो.

¹⁴ जे इनी आखी वातोपर जी होयली होती, तिंदरेमा वाते कोरता जाता होता,

¹⁵ एने जेतार चे आपसमा वात एने पुस-पास कोरता होता, ती येसु आपसुत आवीन तिंदरे पुठी चाल पोळ्यु.

¹⁶ बाकीन तिंदरा डूवा ओसा बंद कोर देदला होता कि तीनाक उवखी नि सोक्या.

¹⁷ येसु तीनुक पुछु, “जी काय वाते छे, ती तुमु चालता-चालता आपोसमा कोयतेला?” चे उदास मा रोय गोया.

¹⁸ यो सोमवीन तिंदरे मायलु क्लियुपास नावोन एक जोणु कोयू, “काय तू यरुशलेममा एखलु परदेशी छे, जू नि जानतलु कि इनू दाहळामा तीनामा काय होयलो छे?”

¹⁹ येसु तीनु काजे पुछु, “कहानली वाते?” चे तीनु काजे कोया, “येसु नासरीन बारामा जू परमेश्वर एने आखा माणसोन साते काम एने वचनमा ताकत भविष्य कोरता होतु,

²⁰ एने प्रधान पुजारू एने आमरा सरदारे तीनाक धोराव देदा कि तिना पोर मोरनेन आग्या आपाय जाय; एने तीना काजे ख्रुस पोर चोळाव्या.

²¹ बाकीन आमु काजे आस होती कि युत इस्राईल काजे छुटकारू आपसे. इनी आखा वातो सिवाय इनी घोटणाक होयली तिसरो दाहळू छे,

²² एने आमरेमा गोथा घोना सोवटा बायराबी आमुक नोवलाय मा घाल देदला छे, जे वेगात मोळवाट्या पोर गोयला होता;.

²³ एने जेतार तेरो डील नि जोळ्यो ती यो कोयता जायीन आव्या कि आमुक सोरग दूतोन दर्शन जोळ्यो, चे कोया कि चू जीवतलु छे.

²⁴ तेत्यार आमरा दुस्ती दोरोमा गोथू एक मोळवाट्यामा गोयू, एने जोसा बायरा कोयला होता तोसोच देख्यू; बाकीन तीना काजे नि देख्यू.”

²⁵ तेत्यार येसु तीनु काजे कोयू, “हे बिन ओकल्या, एने भविष्य कोरतान आखा वातो पोर भुरसू कोरणेमा मतीमंद्या.

²⁶ काय गोरोज नि होती कि मसिह जो दुख उचलीन आपनी महिमामा जाय?”

²⁷ तेत्यार चू मुसा काजे एने आखा भविष्य कोरता गोथू सूरवात कोरीन आखा पवित्र शास्त्रमा गोथू आपना बारामा लिखली वातोन मतलब, तीनु काजे सोमजाड देदू.

²⁸ तोतरातमा चे तीना गावोन साते पुग गोया. चे जाता होता, एने तिनान ढोंगोसी ओसो मालूम पोळ्यो कि तीनाक ओगो जाणे जुवतो होतो.

²⁹ बाकीन चे यो कोयीन तीनाक रुक्या, “आमरे साते रोय, काहाकि सांतो होयने बाज रोयो एने दाहळू जादा ढोव गोयलु छे,” तेत्यार चू तिंदरे साते रोयने कोरीन माही गोयू.

³⁰ जेतार चू तिंदरे साते खाणो खाणे बोश्यू, ती चू रुटू लीन धन्यवाद कोऱ्यु एने तीनाक तुडीन तीनुक आपने बाज गोयू.

³¹ तेत्यार तिंदरा डूवा उगळी गोया; एने चे तीनाक उवखी लेदा, एने चू तिंदरा डूवा गोथू डूकाय गोयू.

³² चे आपसामा कोया, “जेतार चू वाटी पोर आमरे पुठी वाते कोरतू होतु एने पवित्र शास्त्रन मतलब आमुक सोमजाडतू होतु, ती काय आमरा मोनोमा उतेजन नि पोयदा होयो?”

³³ चे तिने टेमे उठीन यरुशलेममा जात रोया, एने तीनु ग्यारा काजे एने तिंदरा साथीदार काजे एखठा देख्या.

³⁴ चे कोयता होता, “प्रभू छाचलीन जीव उठलु छे, एने शिमोन काजे देखाय पोळ्यु.”

³⁵ जेतार चे वाटीपोरला वाते तीनुक कोय देदा एने यो बी कि चे तीनाक रुटू खाणेन टेमे कोसा उवख्या.

येसुन चेलापोर उतरणो

³⁶ चे ये वाते कोयनेत बाज रोया होता कि चू खुद तिंदरे इचमा आवीन उभू रोयू, एने चू कोयू, “तुमुक शांती जोळे.”

³⁷ बाकीन चे घाबराय गोया एने बिह गोया, एने सोमज्या कि आमु कहानला भुतडा काजे देख रोया.

³⁸ येसु तीनु काजे कोयू, “काहा घाबराय गोया? एने तुमरा मोनोमा काय विचार आव रोया?

³⁹ मारा हात एने मारा पायो काजे देखू कि मी चू छे मेसेक छिमीन देखू, काहाकि आत्मा काजे हाडका मास नि रोयतलो जोसो मारेमा देख रोया.”

⁴⁰ यो कोयीन चू तीनुक तेरा हात पाय देखाळ्यू.

⁴¹ तेत्यार खुशीन मारे चे भुरसू नी कोऱ्या. एने चे नोवलायी कोरता होता, ती चू तीनुक पुछु, “काय न्या तुमरे जुवू काहीन खाणो छे?”

⁴² चे तीनाक भुंजला माछांन टूकडू आप्या.

⁴³ चू लीन तिंदरे सामने खादु.

⁴⁴ एने चू तीनुक कोयू, “जी मारी वाते छे, जी मे तुमरे साते रोयीण तुमु काजे कोयलु होतु कि गोरोज छे कि जोतरा वाते मुसान शास्त्राम एने भविष्य कोरतान एने शास्त्रान किताबमा मारा बारामा लिखलो छे चो आखो पुरो होये.”

⁴⁵ तेत्यार चू पवित्र शास्त्र सोमोजनेन कोरता तिंदरी समज उगाळ देदू.

⁴⁶ एने तीनु काजे कोयू, “यो लिखलो छे कि मसिह दुख हाकलसे, एने तिसरे दाहळे मोरलामा गोथु जीव उठसे,

⁴⁷ एने यरुशलेम गोथो आखा जात्यामा मोन फिरावोन एने पापोन माफी प्रचार तिनान नावसी कोराय जासे.

⁴⁸ तुमु इनी आखी वातोन गोवा छे.

⁴⁹ एने देखू, जेबी वायदू मारू बास कोरलु छे, मे तीना काजे तुमरे पोर उतारीस एने जेतार तोक सोरगोमा गोथो ताकत नि जोळे, तेत्यार तोक तुमु इना सोहोरोमा रोय रोयू.”

येसुन सोरगोमा जाणो

⁵⁰ तेत्यार चू तीनुक बैतनिय्याह तोक बारथे ली आव्यु, एने आपनु हात उचा कोरीन तीनु काजे आशिष आप्यू;

⁵¹ एने तीनुक आशिष आपतू जाईन ओलोग होय गोयू एने सोरगोमा चुटाय गोयू.

⁵² तेत्यार चे तीना काजे नोमोन कोरीन मोटी खुशीसी यरुशलेममा जात रोया;

⁵³ एने चे लोगातार मंदीरमा रोयीन परमेश्वरोन स्तुती कोऱ्या कोरता होता.