लुका 23 - बारेली पावरी

पिलातुसोन येसुक सावाल

¹ तेत्यार आखी सभा उठीन तीनाक पिलातोन चा लीगोया.

² चे यो कोयीन तीना पोर गुणू लागाळने बाज गोया, “आमु इना माणसो काजे भनकावातु, एने केसरोन फावू आपने मोना कोरतेलू, एने खुदो काजे, मसिह, एने राजा कोयतलू सोमवला छे.”

³ पिलात तीनु काजे पुछु, “काय तू यहुदिन राजा छे?” येसु तीनाक जवाब आप्यू, “तू खुद कोयने बाज रोयू.”

⁴ तेत्यार पिलात प्रधान पुजारा काजे एने माणसो काजे कोयू, “मेसेक इना माणसोम काहीन गुणू नि देखायतू.”

⁵ बाकीन चे बी वातळा होईन कोयने बाज गोया, “यु गलीलमा गोथू या तोक आखा यहुदियामा प्रचार आपीन-आपीन माणसो काजे भडकावातलु.”

⁶ यो सोमवीन पिलात पुछु, “काय यु माणूस गलीली छे?”

⁷ एने जो सोमजीन कि चू हेरोदोन हदमा छे, तिनाक हेरोदोन चा मुकली देदु, काहाकि तीनु दाहळामा चू बी यरुशलेममा होतु.

येसुक हेरोद राजानचा लीजानो

⁸ हेरोद येसु काजे देखीन घोनु खुश होय गोयू, काहाकि चू घोणा दाहळान तीनाक देखणे कोरतू होतु; इनान कोरता कि तेरा बारामा सोमवलू होतु, एने तिना जुव काहीन चिन्ह देखनेन आस कोरतु होतु.

⁹ चू तीनाक लोकेत वाते पुछतु रोयू, बाकीन चू तीनाक काहीन जोवाब नि आप्यू.

¹⁰ प्रधान पुजारू एने शास्त्री उभरोहीण आखा ताकतसी तीना पोर गुणू लागाळता होता.

¹¹ तेत्यार हेरोद तेरा सिपायळा साते तेरी बेइज्जत कोरीन मोजाक कोरता होता, एने चोमोकने वावा छिंदरा पेहेरावीन तीनाक पिलातुसोनचा पोछु मुकल्या.

¹² तिने दाहळे पिलातूस एने हेरोद दुस्तीदार बोन गोया; इनान पेहेले चे एक दिसरा पोर रीस कोरता होता.

पिलातुसोन लारे येसुक मोतन दंड

¹³ पिलात एने प्रधान पुजारू एने सरदारे एने माणसो काजे बुलावीन तीनु काजे कोयू,

¹⁴ “तुमु इना माणसो काजे भनकावने वावु ठेरावीन मारेंचा लाव रोया, एने देखू, मे तुमरे सामने तेरी चौकसी कोऱ्यु, बाकीन जिना वातोन तुमु तीना पोर गुणू लागाळ रोया इनी वातोन बारामा मेसेक काहीन गुणू नि जोळतू;

¹⁵ नि हेरोद काहाकि चू तीना काजे मारेंचा पोछु मुकली देदलु एने देखू, तीना काजे ओसो काय नि होयो कि चू मोरनोन दोंडोन लायक ठेराये.

¹⁶ इनान कोरता मे तीनाक ठुकाळीन छुळ देयो.”

¹⁷ पिलातोन पेहेले टेमे एक बंदीवान छुळनेन रिती होती.

¹⁸ तेत्यार आखा मिवीन आयळने बाज गोया, “एरू काम तमाम कोरु, एने आमरेन कोरता बरब्बा काजे छुळ देवू.”

¹⁹ चू एक दोंगान वजेसी जे सोहोरोमा रोयलु होतु, एने खुन कोरनेन वजेसी बंदी वाळामा नाखायलु होतु.

²⁰ बाकीन पिलात येसु काजे छुळनेन मोर्जीसी माणसो काजे एने समजाळू,

²¹ बाकीन चे आयळीन कोया, “इनाक ख्रुस पोर चोळावू, ख्रुस पोर.”

²² चे तीन कावार तीनाक कोया, काहा, चू कहानी बुराई कोरलु छे? मे इनामा मोतन दोंडोन लायक कहाणीत नि देख्यू इनान कोरता मे इनाक ठूकाळीन छुळ दोम.

²³ बाकीन चे आयळीन-आयळीन पोछोव पोळ गोया कि इनाक ख्रुस पोर चोळावू, एने तिंदरो आयळनो वातळो होयो.

²⁴ आखरी पिलातोन आग्या आवी कि तिंदरी विनतान अनसारे कोऱ्यु.

²⁵ चू तिना माणसो काजे जू दंगान एने खुनोन वोजेसी बंदी वाळामा नाखाय गोयलु होतु, एने जिनाक चे मांगता होता, छुळ देदू; एने येसु काजे तिंदरा मोर्जीन अनसारे सोप देदू.

येसुक ख्रुस पोर चोळावनो

²⁶ जेतार चे तीनाक लीन जाता होता, ती चे शिमोन नावोन एक कुरेनीकोरक जू गाव गोथु आवतू होतु धोरीन तीना पोर ख्रुस मेक देदा कि तीनाक येसुन पोछोव-पोछोव लीन चाले.

²⁷ माणसोन मोटीत भीळ तेरे पोछोव चाल पोळी एने तिंदरेमा लोकेत बायराबी होता जे तेरेन कोरीन छाती-ठूकता एने दुख कोरता होता.

²⁸ येसु तिंदरे भूनी वोवीन कोयू, “हे यरुशलेमोन पुरायटा, मारेन कोरीन मा रोडू; बाकीन खुदोन कोरीन एने तुमरा पुऱ्यान कोरीन रोडू.”

²⁹ काहाकि देख, चे दाहळा आवसे, जीनामा माणसे कोयसे, “सोयावा छे जे वांझ्या छे एने चे कुखा जे नि पोयदा कोऱ्या एने चे छात्या जे दूध नि पाव्या;

³⁰ तिनी टेमे” जे बोयडा काजे कोयने बाजसे कि आमरेपोर पोड, एने टेकळा काजे कि आमुक टूप ले.

³¹ काहाकि जेतार चे निव्वा झाडोन साते ओसो कोरतेला, ती सुकलान साते काय-काय नि कोराय जाय?

³² चे दिसरा दुय माणसो काजे बी जे भुंडला काम कोरण्या होता तिना पुठी मारने कोरीन लीन गोया.

³³ जेतार चे तिना जागा पोर जीनाक खोपडी कोयतेला पुग्या, ती चे चा येसु काजे एने भुंडला कामे कोरण्या काजे बी, एक जेवळे एने एक दिसरा काजे डाखरे धोळे ख्रुस पोर चोळाव्या.

³⁴ तेत्यार येसु कोयू, “हे बासो, इनुक माफ कोर, काहाकि जे जानता नि कि काय कोर रोया,” एने चे चिठ्या नाखीन तेरा छिंदरा वाट लेदा.

³⁵ माणसे उभा-उभा देखता होता, एने सरदार बी मजाक कोर कोरीन कोयता होता यु दुसरा काजे वाचाळ्यु, “ओगर यु परमेश्वरोन मसिह छे, एने तेरु नेवाळलु छे, ती खुदो काजे बी वाचाड.”

³⁶ सिपायळाबी साते आवीन एने मुनको हालवीन आंब आपीन तिनान मोजाक कोरीन कोयता होता,

³⁷ “अगर तू यहुदिन राजा छे, ती खुदो काजे वाचाड.”

³⁸ एने तेरे उपर एक गुणान-चिट्ठी बी लागाळलो होतो “यु यहुदिन राजा छे.”

ख्रुस पोर मोन फिरावने वावु चुटू

³⁹ जे गुणावा चा टांगला होता, तिंदरे मायला एक येसुन बुराई कोरीन कोयू, “काय तू मसिह नि होय? ती खुदो काजे एने आमुक वाचाड.”

⁴⁰ इनापोरसी दिसरू तीनाक लोळीन कोयू, “काय तू परमेश्वर काजे बि नी बिहतु? तू बी ते चू दोंड भुक्ती रोयू,

⁴¹ एने आपनु ते नियावोन नुसार दोंड भुक्ती रोया, काहाकि आपु आपना कामोन ठीक फोव भुक्ती रोया; बाकीन काहनोत भुंडलो काम नि कोऱ्यु.”

⁴² तेत्यार चू कोयु, “हे येसु जेतार तू आपना राजमा आवीस, ती मारी फोम कोरजी.”

⁴³ ती चु तीनाक कोयू, “मी तुसेक छाचलीन कोयो कि तू आजुत तू मारे पुठी सोरग लोकमा रोयीस.”

येसुन जीव निकवनो

⁴⁴ कम से कम दुय पोहोर गोथो तिसरे पोहोर तोक आखा देसोमा आंदारो ढूप होय गोयो,

⁴⁵ एने दाहळान विजावो जात रोयो, एने मंदीरोन पोडदु इचमा गोथू फाट गोयू,

⁴⁶ एने येसु मोटात बुलोमा आयळीन कोयू, “हे बासो, मी मारू आत्मा तारा हातोमा सोपो” एने जो कोयीन जीव छुळ देदू.

⁴⁷ सुभेदार, जो काहीन होयलो होतो देखीन परमेश्वरोन बोढाई कोऱ्यु, एने कोयू, “छाचलीन यु माणूस धोरमी होतु.”

⁴⁸ एने भिळ जी यो देखने एखठी होय गोयली होती, इनी होकिगत काजे छाती ठूकता जायीन पोछा जात रोया.

⁴⁹ बाकीन येसुन आखा उवखान वावा, एने जे बायरा गलीलमा गोथा तेरे पुठी आवला होता, नांबेत उभरोहीण यो आखो देखता होता.

अरीमतीयान युसुफन लारे येसुक गाळनो

⁵⁰ चा युसूफ नावोन एक मोटली सभान एक मेंबर होतु चू वारलु एने धोरमी माणूस होतु.

⁵¹ एने इंदरी विचारोन एने इंदरा कामो पोर खुश नि होतु चू यहुदिन सोहोरोन अरिमतियाह रोयने वावू एने परमेश्वरोन राजोन वाट जुवने वावू होतु.

⁵² चू पिलातोन चा जायीन येसुन धोळ मांग्यू;

⁵³ एने तीनाक उतारीन मखमलोन चादरामा गुडाव्यू, एने एक मोळवाट्यामा मेक्यू, यो चाफऱ्याम खुंदलो होतो; एने तीनामा कुदु नि मेकायलु होतु.

⁵⁴ चू तीयारीन दाहळू होतु, एने दितवारोन दाहळू आवनेमा होतु.

⁵⁵ चे बायरा जे तेरे पुठी गलीलमा गोथा आवला होता, पोछोव-पोछोव जायीन तिना मोळवाट्या काजे देख्या, एने यो बी कि तेरो धोळ काहना रितीसी मेकायलो छे.

⁵⁶ तेत्यार चे पोछा जायीन वारला सुगंधवावा चीजे इत्तर तीयार कोऱ्या; एने दितवारोन दाहळे आग्यान अनसारे आराम कोऱ्या.