लुका 22 - बारेली पावरी

येसुक मारनेन योजना

¹ बेखमीर रुटान तीहीवारोन जिनाक वोलांडोनोन तीहीवार कोयतेला, साते होतु;

² एने प्रधान पुजारू एने शास्त्री इनी वातोन हेरेमा होता कि तीनाक कोसा मारजे, बाकीन चे माणसो काजे बिहता होता.

यहुदा इस्कारीयोतन भुरसू घात

³ तेत्यार भुतडू यहुदामा भोराय गोयू, जू इस्कारीयोत कोवायतलु एने बारा चेलामा गीनायतू होतु.

⁴ चू जायीन प्रधान पुजारान सोरदार साते वात कोऱ्यु कि तीनाक काहना रितीसी तेरे हाते धोरावजे.

⁵ चे खुश होया, एने तीना काजे रुप्या आपनेन कबूल कोऱ्या.

⁶ चू मान लेदू, एने टेम हेरने बाज गोयू कि जेतार गोरदी नि रोये ती तेरे हाते धोराव दे.

तीहीवारोन तीयारी

⁷ जेतार बेखमीर रुटान तीहीवारोन दाहळू आव्यु जीनामा वोलांडोनोन बलिदान बुकडू मारनेन गरज होती.

⁸ येसु पतरस एने योहान काजे यो कोयीन मूकल्यु “जाईन आमरे खाणेन कोरीन तीहीवारोन तोयारी कोरु.”

⁹ चे तीना काजे पुछ्या, “तुसेक का जुवे कि आमु इनान तीयारी कोरजे?”

¹⁰ येसु तीनु काजे कोयू, “देखू, सोहोरोमा जातेज एक माणूस पाणीन डूचरो चुटीन तुमुक भेटायसे; जिना घोरोमा चू जासे तुमु हेरे पोछोव जात रोयजू,”

¹¹ एने तीना घोरोन मालिक काजे कोयजू, “गुरु तुसे काजे कोयो कि पाहांतऱ्यान जागू का छे जीनामा मे आपना चेला साते वोलांडोनोन खाणो खाम?”

¹² चू तुमु काजे एक सोजाडली मोटीत खुली देखाळसे; चा तीयारी कोरु.

¹³ चे जायीन, जोसो चू तीनु काजे कोयलु होतु तोसोच, देख्या एने वोलांडोनोन तीयारी कोऱ्या.

परमेश्वरोन आखरी खाणो

¹⁴ जेतार खाणेन टेम आव लागी ती, चु प्रेषितोन साते खाणो खाणे बोशु.

¹⁵ एने चू तीना काजे कोयु, “मेसेक घोनी मोर्जी होती कि दुख भोगणेन पेहेले जो तीहीवारोन खाणो तुमरे साते खाम.

¹⁶ काहाकि मे तुमु काजे कोय कि, जेतार चे परमेश्वरोन राजमा जुनलो होयते तोक मे इनाक कोबी नि खाम.”

¹⁷ तेत्यार चू प्यालू लीन धन्यवाद कोऱ्यु एने कोयू, “इना काजे लेवू एने आपोसमा वाट लेवू.

¹⁸ काहाकि मे तुमु काजे कोयो कि जेतार तोक परमेश्वरोन राज नि आवे मे आंगुरोन रोस कोबी नि पियो,”

¹⁹ ओवतेन चु रुटू लेदू, एने धन्यवाद कोरीन भांग्यु, एने तीनु काजे यो कोयतु जाईन आप्यू, “यो मारो डील छे यो तुमरेन कोरता आपाय जाय रोयो मारा स्मरणन कोरता यो कोरता रोयजू.”

²⁰ इना रितीसी चू खाणान ओवतेन प्यालू बी आपतू जाईन कोयू, यो प्यालू मारा तीना लुयमा जो तुमरेन कोरीन वोयाळाय जाय नवीन वायदू छे.

²¹ बाकीन देखू, मेसेक धोरणे वावान हात मारे साते टेबल पोर छे.

²² काहाकि माणसोन पुऱ्यु ते जोसो तेरेन कोरता ठेरावलो गोयलो छे, बाकीन हाय तिना माणसो पोर जीनान लारे चू धोराय जातलू छे.

²³ जेतार चे आपोसमा पुछपाछ कोरणे बाज गोया कि आमरे मायलु कुन छे, जू यो काम कोरसे.

आखान कुन जानाये?

²⁴ तीनुमा यु जोखळाय बी होयलु तीनुमा गोथू कून मोटू सोमजाय जातु होसे?

²⁵ येसु तीनु काजे कोयु, “दिसरा जातीन राजा तिंदरे पोर हुकुम चालाळे; एने जे तुमरे पोर होक मेके चे तेरु उपकारी कोवाये.

²⁶ बाकीन तुमु ओसा नि होयजू; बाकीन जो तुमरेमा मोटू छे, चू नानला सारखु एने जे अधिकारी छे, चे सेवकन तोसा बोने.”

²⁷ काहाकि मोटू कुन छे जू खाणे बोस रोयू, कि यु चाकरी कोरणे बाज रोयू? काय नि यु खाणे बोस रोयू? बाकीन मे तुमरे इचमा एक चाकरोन तोसु छे.

²⁸ “तुमु जे छे, जे मारी परीक्षामा हमेशा मारे साते रोयू;

²⁹ एने जोसो मारो बास मारेन कोरता एक राज ठेरावालु छे, तोसोच मे बी तारेन कोरता ठेरावीस,

³⁰ काहाकि तुमु मारा राज्यमा मारे साते बोसीन मारा मेज पर खावू-पिवू, बाकीन सिहासन पोर बोसीन इस्राईलोन बारा पिढीन नियाव कोरो.

पतरसोन मना येसुक मना कोरणेन भविष्यवाणी

³¹ “शिमोन हे शिमोन देख, भुतडू तुमु माणसो काजे मांग लेदलु छे कि गोहून तोसो झाडे,

³² बाकीन मे तारेन कोरता विनता कोऱ्यु कि तारू भुरसू कोमजुर नि होये; एने जेतार तू फिरे, आपना भाशो काजे पाको कोरजी.”

³³ पतरस येसु काजे कोयू, “हे प्रभू, मे तारे साते जेलमा जाणे नि बाकीन मोरने भी तीयार छे,”

³⁴ येसु कोयू, “हे पतरस, मे तुसे काजे कोयो कि आज कुकळू वासनेन पेहेल जेतार तोक तू तीन कावा मेसेक नाकारनेन नि कोर लेये कि मेसेक नि उवखतलु.”

दुख झेलणे तीयार रोयू

³⁵ एने येसु तीनु काजे कोयू, “जेतार मे तुमुक थोयला, एने झुवनो, एने बिना खासळान मूकल्यु होतु, ती काय तुमु काजे कानली चीजोन कोमी पोळली होती काय?” चे कोया, “कहानी चीजोन नि.”

³⁶ येसु तीनु काजे कोयू, बाकीन हिमी जिना जुव थोयलू, छे चू तीनाक लेयू एने तोसोच झुवनो बी,

³⁷ काहाकि मे तुमुक कोयो, कि यो लिखलो से, चू अधोरमी साते गीनाय गोयू, तेरो मारेमा पुरो होयनो गरजोन छे, काहाकि मारे बारामा वाते पुरी होयने पोर छे.

³⁸ चे कोया “हे माहाराज, देख या दुय तलवारे से,” इनापोर चू तीनुक कोयू, “लोकेत छे.”

जेतुनोन बोयळाम येसुन प्रार्थना

³⁹ ओवतेन चू चा गोथू उठीन आपना रितीसी जेतुनोन बोयळा पोर गोयू एने चेला तेरे पोछोव चाल पोळ्या.

⁴⁰ ती चे बारा जोना निकवीन आपनी रितीन अनसारे जेतुनोन बोयळा पोर गोयू, एने चेला तेरे पोछोव चाल पोळ्या. चू तिना जागा पोर पुग्यू ती येसु तीनुक कोयू, “प्रार्थना कोरु कि तुमु परीक्षामा नि पोळे.”

⁴¹ तिने जागे पुगीण येसु तीनु काजे कोयू, “प्रार्थना कोरु कि तुमु पारखमा नि पोळती” एने चू आपसुत एक कावा नाखे होतरे नांबे गोयू, एने मांडा टेकिन प्रार्थना कोरणे बाज गोयू,

⁴² “हे बासो, ओगर तारी मोर्जी होय ती इना प्याला काजे मारेंचा गोथू छेटू कोरले, बाकीन मारी नि बाकीन तारीत मोर्जीसी पुरो होये.”

⁴³ तेत्यार सोरगोमा गोथू एक दूत तीना काजे देखाय पोळ्यु चू तीनाक ताकत आपतू होतु.

⁴⁴ चू घोनु जुदु तोकलीतमा कासावीस होईन ओवी बी दुखोमा भोरीन प्रार्थना कोरणे बाज गोयू; एने तेरु पेसोव जोसो लुयोन मोटा-मोटा तेळा सारखो धोरती पोर पोळतो होतो.

⁴⁵ तेत्यार चू प्रार्थना कोरीन उठ्यू एने आपना चेलानचा साते आवीन तीनु काजे नाराजगीन मारे सुवतला देखाया.

⁴⁶ एने तीनु काजे कोयू, “काहा सुवरोया? उठू, प्रार्थना कोरु कि परीक्षामा नि पोळे.”

येसुक बंदी बोनावनो

⁴⁷ चू यो कोयतुत होतु कि एक गोरदीन टूवू आव्यु, एने तीनु बारा जोनामा गोथू एक जेरो नाव यहुदा होतो तिंदरे ओगोव-ओगोव आव रयु होतु चू येसुनचा आयु कि तेरु गुवू लेये.

⁴⁸ येसु तीना काजे कोयु, “हे यहुदा, काय तू गुवू लीन माणसोन पुऱ्या काजे थोरावतलु?”

⁴⁹ तेरा सातीदारो जेतार देख्या कि काय होयने वावो छे, ती कोया, “हे प्रभू, काय आमु तोलवार चालाळजे?”

⁵⁰ एने तीनु मायलु एक जोनु महायाजकोन दास पोर तलवार चालाळीन तेरो जेवळो कानटो काट देदु.

⁵¹ इनापोरसी येसु कोयू, “हिमी बोस कोरु” एने तेरा काटा काजे हात लागाळीन तिनाक वारू कोऱ्यु.

⁵² तेत्यार येसु प्रधान पुजारू एने मंदीरोन पुढारी एने सोरदार जे येसु काजे धोरणे आवला होता तीनु काजे कोयू, “काय तुमु मेसेक डाखू सोमजीन तलवारे एने लाकळ्या लीन नीकवी रोया?

⁵³ जेतार मे मंदीरमा दाहळीन तुमरे साते होतु, ती तुमु मारे पोर हात नि नाख्या; बाकीन जी तुमरी टेम छे, एने अंधकारोन होक छे.”

पतरसोन येसुक मना कोरनो

⁵⁴ ओवतेन चे धोरीन लीगोया, एने महायाजकोन घोरोमा ली आव्या पतरस नांबे नांबेत तेरे पोछोव-पोछोव चालतु होतु;

⁵⁵ एने जेतार चे आंगनामा आगठो धोपाळीन एखठा बोश्या, ती पतरस बी तिंदरे इचमा मा बोस गोयू.

⁵⁶ ती एक पावेरनी तीना काजे आगठान विजावामा बोसलु देखीन एने तेरे भूनी जुराखी भावीन कोयने बाज गोयी, “यु बी ते तेरे साते होतु.”

⁵⁷ बाकीन चू यो कोयीन नाकार कोऱ्यु, “हे बायोर, मे तीनाक नी उवखतलु.”

⁵⁸ थुलिक वारमा कहानुस, एने तीनाक देखीन कोयू, “तू बी ते तीनु मायलु छे” पतरस कोयू, “माणूस, मी नि होय.”

⁵⁹ एक घोनटान ओवतेन एक माणूस भुरसासी कोयने बाज गोयू, “छाचलीन यु बी ते तेरे साते होतु, काहाकि यु गलीली छे.”

⁶⁰ पतरस कोयू, “हे माणूस, मे नि जानतलु कि तू काय कोयतेलु” चू कोयने बाज रोयू होतु, कि तेतारुत कुकळू वास गोयू.

⁶¹ ती प्रभू पोछु फिरीन पतरस भूनी भाव्यू, एने पतरस काजे प्रभून ची वात फोम आवाळीन जी चू कोयलु होतु, “आज कुकळू वासदेनेन पेहेले, तू तीन कावार मारू नाकार कोरसे.”

⁶² एने चू बारथे निकवीन मोटा दुखसी रोड्यू.

येसुन उपवास

⁶³ जे माणसे येसु काजे धोर रोया होता, चे तेरी मोजाक उळावीन देणे बाज गोया;

⁶⁴ एने तेरा डूवा ढाकिन तीना काजे पुछ्या, “भविष्यवाणी देखाळ कि तुसेक कून देदो.”

⁶⁵ एने चे घोन सोवटी ओवी बी बुराईन वाते तेरा खिलापमा कोया.

डाहला एने माणसो सामने येसुन होयनो

⁶⁶ जेतार दाहळू उग्यु ती माणसोन डायला एने प्रधान पुजारू एने शास्त्री एखठा होया, एने तीनाक आपना महासभामा लावीन पुछ्या,

⁶⁷ “काय तू मसिह छे, ती आमु काजे कोय दे” येसु तीनु काजे कोयू, “अगर मे तुमु काजे कोयो, ती भुरसू नि कोरे;

⁶⁸ एने ओगर पुछो, ती जवाब नि आपे.

⁶⁹ बाकीन हिमी गोथू माणसोन पुऱ्यु आखामा ताकत वावू परमेश्वर जेवळे धोळे बोसलू रोयसे.”

⁷⁰ इनापोरसी बी आखा कोया, ती काय तू परमेश्वरोन पुऱ्यु छे? चू तीनुक कोयू, “तुमु आपसात कोयतेला, काहाकि मेत छे.”

⁷¹ तेत्यार चू कोयू, “हिमी आमु काजे गोवायीन काय गरज छे; काहाकि आमु खुद तेरे मुयोसी सोमवी लेदला छे.”