लुका 21 - बारेली पावरी

गरीब रोंडालीन खरलो दान

¹ ओवतेन येसु डूवा उगाळीन मालदार माणसो काजे आपनो-आपनो दान पेटीमा आपतला देख्यू.

² चू एक गोरीब रोंनडायली काजे बी तीनामा दुय दोमड्या आपतली देख्यू.

³ तेत्यार येसु कोयू, “मे तुमु काजे छाचलीन कोयो कि जी गोरीब रोंनडायली आखा गोथो बोढीन आपली छे.

⁴ काहाकि चे आखा आपना बोढतीमा गोथो दानमा काहीन नाखला छे, बाकीन जी ते आपना कोमायीमा गोथो तेरी आखी जीवनेन कोमाय नाख देदी.”

जोगोन नाश होयनेन दावू

⁵ आखा माणसे मंदीरोन बारामा कोय रोया होता कि जे कोसा घाटावा दोगळा एने भेटोन चीजोसी सोजाळलो गोयलो छे, ती चु कोयू,

⁶ “चे दाहळा आवसे, जीनामा ये आखा तुमु देखतला, इनामा गोथू न्या दोगळा पोर दोगळू बी नि छुटे यो ढोवी नि जाय.”

⁷ चे तीनु काजे पुछा, “हे गुरु, यो आखो कोत्यार होयसे? एने जे वाते जेतार पुरी होयने पोर होसे तिनी टेमोन काय निशाणी रोयसे?”

⁸ येसु कोयू, “हुशारीमा रोयू कि भुलवाय नि जाय, काहाकि घोणा सोवटा मारे नावोसी आवीन कोयसे, ‘मे होयु छे,’ एने यो बी कि, ‘टेम साते आव लागली छे’ तुमु तिना पोछोव झुनी जाता.

⁹ जेतार तुमु लोळाय एने दोंगान वाते सोमवे ती घाबरायता झुनी, काहाकि इंदरो पेहले होयनो जोरुरी छे बाकीन तिनी टेमे तेत्यारुत आखरी नि होये.”

¹⁰ तेत्यार येसु तीनु काजे कोयू, “जाती पोर जाती राज्य पर राज चोढाइ कोरसे,

¹¹ एने मोटा-मोटा भूकंप होयसे, एने जागे-जागे कावा एने महामरी पोळसे, एने सोरगोमा भयानाक वाते मोटा-मोटा चिन्ह देखायसे.

¹² बाकीन इनी आखी वातोसी पेहेले चे मारे नावोन वाजेशी तुमु काजे धोरसे, एने तोकलीत देसे, एने पंचायतोन हवाले कोरसे, एने जेलमा घालाड देसे, एने राजा एने पुढारीन सामने लीजासे.

¹³ बाकीन जो तुमरेन कोरता गोवायी आपनेन मोकू होय जासे.

¹⁴ इनान कोरता आपना-आपना मोनोमा पाको राखू कि, आपु पेहेलेसी जोवाब आपनेन चिंता नि कोरजे.

¹⁵ काहाकि मे तुमु काजे ओसू बुल एने ग्यान आपीस कि तुमरा आखा दुष्मोन तुमरू सामनु नीती रूकावट नि कोर सोके.

¹⁶ तुमरा आसी-बासा, एने भाशे एने घोरल्या, एने दुस्तीदार भी तुमु काजे धोरावसे; न्या तोक कि तुमरे मायला कहानास काजे मार नाखसे.

¹⁷ मारा नावोसी आखा माणसे तुमरे पोर दुष्मोनी कोरसे

¹⁸ बाकीन तुमरे मुंडकान एक झोटू भी हालणे नि दोम,”

¹⁹ आपना धीरसी तुमु आपना जीवो काजे वाचाडीन राखसू.

यरुशलेमोन नाश

²⁰ जेतार तुमु यरुशलेम काजे सेनासी घेरला देखे, ती सोमजी जाजू कि तेरो उजळी जाणो साते छे.

²¹ तेत्यार जे यहुदियामा छे चे बोयळामा दोवळी पोळू; एने जे यरुशलेम माहिय छे चे बारथे निकवी जावू; एने जे गावोमा छे चे तीनामा मा जावू.

²² काहाकि जे बोदलू लेनेन तोसा दाहळा रोयसे, जीनामा लिखली आखी वाते पुरी होय जासे.

²³ तिनु दाहळामा जी भारीस एने दूध पावने वावा होसे, तिंदरेन कोरता हाय, हाय! काहाकि देसोमा मोटू संकट एने माणसो पोर जुदी तोकलीत होयसे.

²⁴ चे तलवारोन धारसी पोळसे, एने आखा देसोन माणसोमा बोंदी बोनीन पुगडाइ जासे; एने जेतार तोकून दिसरा जात्यान टेम पुरी नी होये, तेत्यार तोक यरुशलेम दिसरा जात्यासी छेंदाय जासे.

येसुन पोछु ओवतेन संकेत

²⁵ “दाहळू, एने चांद, एने चांदण्यामा चिन्ह देखायसे; एने धोरती परदेस देसोन माणसो पर संकोट आवसे, काहाकि चे दोरीयान आवाज एने झोलोकोन उछेवनेसी घाबराय जासे.”

²⁶ बिकोसी एने जोगोपर आवने वावो तोकलीतोन बारामा वाट देखते-देखते माणसोन जीवोमा जीव नि रोये, सोरगोन ताकत हालवाय जासे.

²⁷ तेत्यार चे माणसोन पुऱ्याक ताकत एने मोटली महिमा साते वादवा पोर आवतेलु देखायसे.

²⁸ तेत्यार जे वाते होयने बाज जाय, ती सुदा होईन आपनो मुनका पोर हुचल; काहाकि तुमरू छुटकारू साते होसे.

परमेश्वरोन राज साते छे

²⁹ येसु तीना काजे एक दाखलु बी कोयू, “गुलोरोन झाड एने आखा झाडो काजे देख्यू.”

³⁰ जेतार तीनुमा डीरा निकोवतला, ती तुमु देखीन खुद सोमजी जातला कि उणावू साते छे.

³¹ इना रितीसी आखा तुमु जे वाते होयतला देखसु, ती सोमजी जाजू कि परमेश्वरोन राज साते छे.

³² मे तुमु काजे छाचलीन कोयो कि जेतार तोक जे आखा वाते नि होय जाय, तेत्यार तोक इनी पिढीन कोदिबी आखरी नि होये.

³³ सोरग एने धोरती टोव जासे, बाकीन मारी वाते कोबी नि टोवे.

सदा तीयार रोयू

³⁴ इनान कोरता हुशारीमा रोयू, ओसो नि होये कि तुमरा मोन खुमारीमा, एने मोंदळ्यामा, एने इना जीवनोन चिंतामा पोड जाय, एने चू दाहळू तुमरे पोर फासी सारखु आवीन पोळे.

³⁵ काहाकि चू आखी धोरतीमा रोयने वावापोर इना रितीसी आव लागसे.

³⁶ इनान कोरता जागता रोयू एने होर एक टेमे प्रार्थनामा रोयू कि तुमु इना आखी आवने वावी घोटनामा गोथू वाचने एने माणसोन पुऱ्या सामने उभू रोयनेन लायक बोनो.

³⁷ येसु दिसू मंदीरमा सिकाळतू कोरतू होतु एने, राती बारथे जाईन जेतुन नावोन बोयळा पोर रोया कोरतू होतु;

³⁸ एने सोंदारे वेगोत आखा माणसे हेरी सोमवनेन कोरता मंदीरमा हेरेनचा आव्या कोरता होता.