लुका 20 - बारेली पावरी

यहुदिन येसु काजे सवाल

¹ एक दाहळे ओसो होयो कि जेतार येसु मंदीरमा माणसो काजे सिकाळतू एने वारली खोबरोन प्रचार सोमवाळ रोयू होतु, ती प्रधान पुजारू एने शास्त्री, पुढारी इंदरे पुठी साते आवीन उबरोय गोया;

² एने कोयने बाज गोया, “आमुक देखाळ, तू इना कामो काजे काहना होकोसी कोय रोयु एने चू कून छे जू तुसे काजे यो होक आप्यू?”

³ येसु तीनु काजे जोवाब आप्यू, “मी बी तुमु काजे एक वात पुछो; मेसेक देखाळ.

⁴ योहानोन बाप्तिस्मा सोरगे गोथू होतु कि माणसोमा गोथू होतु?”

⁵ तेत्यार चे आपोसमा कोयने लाग्या, “अगर आमु कोयजे ‘सोरगे गोथू नि ची कोयसे,’ ती तुमु तेरो काहा, ‘नि भुरसू कोरतेला?’

⁶ एने ओगर आमु कोयजे, ‘माणसोमा गोथो,’ ती आखा माणसे आपनेपोर दोगळा देसे काहाकि तीनुक छाचलीन मालूम छे कि योहान भविष्य कोरता होतु.”

⁷ आखरी चे जवाब आप्या, “आमुक नि मालूम कि चू कुनीनचा गोथू छे,”

⁸ येसु तीनु काजे कोयू, “ती मे बी तुमु काजे नि कोयो कि मे काम कुनीन होकोसी कोरतेलु.”

दुष्ट खेती कोरने वावान दाखलू

⁹ तेत्यार चू माणसो काजे यु दाखलू कोयने बाज गोयू, “कहानुस माणूस आंगुरोन वाळी लागाळयु, एने खेत कोरने वावा काजे तेरु ठेकु आप देदू एने घोना सोवटा दाहळान कोरीन परदेस जात रोयू.”

¹⁰ जेतार टेम आवी ती चु खेत कोरने वावानचा एक पावोर काजे मूकल्यु कि चू आंगुरोन वाळी मायलो फोव काहीन तीनाक आपे, बाकीन खेत कोरने वावा तीनाक ठुकीन ठारले हात मुकली देदा.

¹¹ एने चु एक ओवी पावोर काजे मूकल्यु, एने चे तीनाक बी ठुकीन एने तिनान अपमान कोरीन ठारले हात मुकली देदा.

¹² एने ओवतेन चू तीसरा काजे मूकल्यु, चे तिना काजे बी जोखमी कोरीन मुकली देदा.

¹³ ती आंगुरोन वाळीन मालिक कोयू, “मे काय कोरो? मे मारा मोंगावू पुऱ्यु काजे मुकलीस, कोदि माईन चे तेरी आदर कोरसे.”

¹⁴ जेतार खेत कोरणे वावा तीनाक देख्या ती आपोसमा विचार कोरणे बाज गोया, “यु ते वारीस छे; आवू, इनाक मार नाखजे काहाकि वाळी आमरी होय जासे.”

¹⁵ एने चे तीना काजे आंगुरोन वाळीन बारथे निकावीन मारीन नाख देदा ती आंगुरोन वाडीन मालिक तिंदरे साते काय कोरसे?

¹⁶ चू आवीन तीनु खेत कोरने वावा काजे मार देसे, एने आंगुरोन वाळी दिसरा काजे आपसे, यो सोमवीन चे कोया “परमेश्वर कोरे ओसो नि होये.”

¹⁷ चू तिंदरे भूनी भावीन कोयू, “ती यो काय लिखलो छे जिना दोगळाक रीकामलु जाण्या, चू कोपरान सिरा होय गोयू.

¹⁸ जू कुदू तिना दोगळा पर पोळसे चू चूरा-चूरा होय जासे एने जीना पोर चू पोळसे, तीना काजे दोव देसे.”

शास्त्रीन एने डायलान पुढाऱ्यान चाल

¹⁹ ती नि टेमे शास्त्री एने प्रधान पुजारू तिनाक धोरणेन कोऱ्या, काहाकि चे सोमजी गोयला होता क चू आमरेपोर सी जू दाखलू कोयलु छे, बाकीन चे माणसो काजे बिह्या.

²⁰ एने चे तेरी वाट जुवने बाज गोया एने पारखने वावा काजे मुकल्या कि धोरमीन भेद धोरीन तेरी काहीन वातो काजे धोर, काहाकि तीनाक सुभेदारोन हाते एने होकोन हातोमा हवाले कोर देय.

²¹ चे तीना काजे यो पुछ्या, “हे गुरु, आमुक मालूम छे कि तू ठीक कोये एने सिकाळ तलू बी छे, एने कुदान भेदभाव नि कोरतेलु, बाकीन परमेश्वरोन वात खोरलू देखाळतलु.

²² काय आमुक केसर काजे फावू आपनो वारू छे कि नि?”

²³ चू तिंदरा हुशारी पारखीन तीनु काजे कोयु,

²⁴ “एक आणू मेसेक देखाळ इनापोर कुनीन छापू एने नाव छे?” चे कोया, “केसरोन.”

²⁵ येसु तीनु काजे कोयू, “ती जो केसरोन छे, चो केसर काजे आपु; एने जो परमेश्वरोन छे चो परमेश्वर काजे आपु.”

²⁶ चे माणसो सामने इनी वातोमा तीनाक धोरी नी सोक्या, बाकीन तेरा जवाबसी वाहाराइन हुगात रोय गोया.

जीव उठनो एने वियाव

²⁷ ओवतेन सदुकी जो कोयता होता कि मोरलामा गोथा जीव उठने होय नि, तीनुमा गोथा कहानास तीनानचा आवीन पुछ्या,

²⁸ “हे गुरु, मुसा आमरेन कोरता जो लिखलू छे ‘ओगर कुदान भाश आपनी रोयते विगुर पुऱ्या मोर गोयू, ती तेरु भाश तिनान लाडी साते वियाव कोर लेये ती एने आपना भाशोन कोरीन पुऱ्या पोयदा कोरे.’

²⁹ सात भाश होता, पेहेलू भाश वियाव कोरीन बिना पुऱ्यान मोर गोयू.

³⁰ ओवतेन दिसरो,

³¹ एने तीसरु तिनी बायर साते वियाव कोर लेदू इना रितीसी सात बिना पुऱ्यान मोर गोया.

³² आखरीमा ची बायर बी मोर गोयी.

³³ इनान कोरता जीव उठने पर ची तिंदरे माईन कुनीन लाडी बोनसे, काहाकि ची सात जोनान लाडी होय गोयली होती.”

³⁴ येसु तीनु काजे कोयु, “इना संसारमा पुऱ्यान कोरता ते वियाव होयतलु,

³⁵ बाकीन जे माणसे एरे लायक ठेरायसे कि, इना संसारमा एने मोरला माईन जीव उठने ली लेये, चे नि नियाव कोरे एने नि वियाव कोरसे.

³⁶ चे ओवतेन मोरे बि नी; काहाकि चे सोरगो दूतो सारखा रोयसे, एने पोछा जीव उठनेन कायमोन होयनेसी परमेश्वरोन बी पुऱ्या होयसे.

³⁷ बाकीन इनी वातो काजे मोरला जीव उठतला छे, मुसा बी झाडक्यान कहानी कोयलु कि चू प्रभू काजे, ‘अब्राहामन परमेश्वर, एने इसाहाकोन परमेश्वर, एने याकुबोन परमेश्वर कोयतलु छे.’

³⁸ परमेश्वर मोरलान नी बाकीन जीवातेलान परमेश्वर छे काहाकि तेरे साते आखा जीवतला छे.”

³⁹ ती चु सोमवीन शास्त्री मायला कहानास यो कोया, “हे गुरु, तू वारलो कोऱ्यु.”

⁴⁰ एने तीनु काजे एने तीना काजे काहीन एने पुछनेन हिंमत नि कोऱ्या.

येसु दाऊदन पुऱ्यु

⁴¹ एने चु तीनु काजे पुछु, “मसिह काजे दाऊदन पुऱ्या कोसो कोयतेला?

⁴² दाऊद आपसुत भजन संहिता किताबमा कोयतलु छे, ‘प्रभू ते मारा प्रभू काजे कोयु,

⁴³ मारे जेवळे धोळे बोस, जा तोक कि मे तारा दुष्मोनो काजे तारा पायो तोवे नि कोर दोम.’”

⁴⁴ दाऊद ते तिनाक प्रभू कोयतलु छे, “ती चु तीनाक पुऱ्या कोसू कोयसे?”

शास्त्रीन खिलापमा येसुन चेतावनी

⁴⁵ जेतार तोक माणसे सोमवी रोया होता, ती चू तेरा चेला काजे कोयू,

⁴⁶ “शास्त्री गोथा हुशारीमा रोयू, जीनुक नांबा-नांबा डोगला पेहेरीन वारू लागतलो छे, एने तीनु काजे हाटोमा नमस्कार, एने प्रार्थना घोरमा बोसनेन मोटली जागा खाणेन जागे मोटली जागा वारू लागतली छे.

⁴⁷ चे रोंडायलान घोरे खाय जातला छे, एने देखाळनेन कोरता घोनी वार तोक प्रार्थना कोरतेला छे, तीनुक घोनी मोटी दोंड जोळसे.”