लुका 2 - बारेली पावरी

बेथलेहेममा येसुन जन्मो

¹ तीनु दाहळामा औगुस्तुस केसरोनचा गोथी आग्या निकवी कि आखा जोगोन माणसोन नावे लिखाय जाय.

² या पेहेल नाव लिखायो तिने टेमे होयी, तेत्यार क्वीरीनीय सिरीयान डाहालू होतु.

³ आखा माणसे नाव लिखाळणेन कोरता आपना-आपना सोहोरोमा गोया.

⁴ आखरी युसूफ बी इनान कोरता कि चू दाऊदन घोरानान एने पोयदावारी होतु, गलीलोन नासरेथ सोहोरोमा गोथू यहुदियामा दाऊदन सोहोर बेथलेहेममा गोयू,

⁵ कि तेरी जूळावनी मरीया साते जी भारीस होती नाव लिखाळे.

⁶ तेरेनचा रोयती जायीन तेरा पोखळायनेन दाहळा पुरा होय गया,

⁷ एने ची तेरा पेहेला पुऱ्या काजे जन्मो आपी एने तीना काजे कापळामा गुंडाविन वाळामा मेकी; काहाकि तिंदरेन कोरता जागा नि होती.

गुवाव्याक सोरगोदुतोन खोबर कोयनो

⁸ एने तिना देसोमा कोतरा गाडरान गुवाव्या होता, जे राती खोयळामा रोयीन आपना टूवान राखवावी कोरता होता.

⁹ एने प्रभून एक दूत तिंदरेनचा आवीन उबरोयू, एने प्रभून विजावो तिंदरे चारू धोळे चोमक्यो, एने चे घोना जुदा बिह गोया.

¹⁰ तेत्यार सोरग दूत तीनु काजे कोयू, “मा बिहू; काहाकि देखू, मे तुमु काजे मोटीत वारली खोबर सोमवाळो यो आखा माणसोन कोरता होयसे,

¹¹ कि आज दाऊदन सोहोरोमा तुमरेन कोरता एक छुटकारू आपन्यु पोयदा होय रोयू, एने युत मसिह प्रभू छे.

¹² एने तेरु तुमरेन कोरता यु चिन्ह छे कि तुमु एक पुऱ्या काजे कापळामा गुंडावलो एने वाळामा लुटाळलो देखसु,”

¹³ तेत्यार उचकालुन तिना सोरगो दूतो साते सोरगोन दूतोन टूवू परमेश्वरोन स्तुती कोरता जायीन एने यो कोयता देखाय पोळ्या,

¹⁴ “सोरगोमा परमेश्वरोन महिमा एने धोरती पोर जीना माणसोमा चु खुश छे, शांती होये.”

बेथलेहेममा गुवाव्यान जाणो

¹⁵ जेतार सोरगो दूत तिंदरेनचा गोथा सोरगे जात रोया, ती गाडरा गुवाव्या आपोसमा कोया, “आवू, आपु बेथलेहेममा जायीन जी वात होयली छे, एने जी प्रभू आपु काजे देखाळलू छे, देखता.”

¹⁶ एने चे छाटा जायीन मरीया एने युसूफ काजे, एने गोवाणीमा तिना पुऱ्या काजे लुट रोयला देख्या.

¹⁷ इनू काजे देखीन चे जी वात इना पुऱ्यान बारामा तीनु काजे कोयली होती, चे कोया,

¹⁸ एने आखा सोमोवणे वावा इनी वातो पोरसी जे गाडरान गुवाव्या तीनु काजे कोया नोवलाय कोऱ्या.

¹⁹ बाकीन मरीया ये आखा वाते तेरा मोनोमा मेकीन फोम कोरती रोयी.

²⁰ एने गाडरान गुवाव्या काजे जोसो कोयलो होतो, तोसोच आखो सोमवीन एने देखीन परमेश्वरोन महीमा एने महिमा कोरता जायीन पोछा जात रोया.

येसुन सुंता एने नवे मेकनो

²¹ जेतार आठ दाहळा पुरा होय गोया एने तेरी सुंतान टेम आवी, ती तेरो नाव येसु मेकाय गोयो यो सोरगो दूत मरीयान पेटोमा आवनेन पेहेलेन कोयलु होतु.

²² जेतार मुसान नियमन रितीन अनसारे तिंदरा चुखा होयनेन दाहळा पुरा होय गोया, ती चे तीना काजे यरुशलेममा लीगोया कि प्रभून सामने लावे,

²³ (जोसो कि प्रभून शास्त्रामा लिखलो छे “होर एक पेहेलो प्रभून कोरता चुखलो ठेरायसे.”)

²⁴ एने प्रभून नियमोन अनसारे हुलान एक जुळो, नीती पेरवान दुय पिला लावीन बलिदान कोरु.

शिमोनोन भविष्यवाणी

²⁵ यरुशलेममा शिमोन नावोन एक माणूस होतु, एने चू माणूस धोरमी एने भोक्ती कोरणे वावु होतु; एने इस्राईलोन शांतीन कोरीन वाट जुवतू होतु एने पवित्र आत्मा तेरे उपर होती.

²⁶ एने पवित्र आत्मान लारे तीना पोर देखायतो होतो कि जेतार तोक चू प्रभून मसिह काजे देखी नी लेये, तेत्यार तोक मोत काजे नी देखे.

²⁷ चु आत्मान सिकाळने पोरसी मंदीरमा आव्यु; एने जेतार आसी बासा तिना पुऱ्या येसु काजे माहाय लाव्या, कि तीना काजे नियमोन अनसारे कोरे,

²⁸ ती चू तीना काजे तेरा खुवामा लेदू एने परमेश्वरोन धन्यवाद कोरीन कोयू,

²⁹ “हे स्वामी, हीमी तू तारा चेला काजे तारा वचनोन अनसारे शांतीसी जाने देतलू छे

³⁰ काहाकि मारा डूवा तारा छुटकारू काजे देख लेदला छे,

³¹ जीना काजे तू आखा देसोन माणसो सामने तीयार कोरलु छे,

³² कि चू दिसरा जाती काजे विजावो आपनेन कोरता दिवू, एने तारा प्रेषितोन माणसे इस्राईलोन महिमा होये.”

³³ तेरु बास एने तेरी आया इनी वातो पोरसी जी तेरे बारामा कोवायती होती, भोनगालाय जाता होता.

³⁴ तेत्यार शिमोन तीना काजे आशिष आपीन, तेरी आया मरीया काजे कोयी, “देख, होयु इस्राईलमा घोना सोवटान पोळनो, एने जीव उठनेन कोरता, एने एक ओसो सोहलानी होयनेन कोरता ठेराव गोयलु छे, जिनान बारामा गलत वाते कोरायसे.

³⁵ एने ताराबी जीवोमा तलवारोन वार पार भोराय जासे-इनासी घोना आत्मान विचार सामने होयसे.”

हन्नान गोवायी

³⁶ आशेरोन पोयदावारी मायली हन्ना नावोन फनूएलोन बेटीस एक भविष्य कोरणे वावी होती ची घोनी डाहली होती, एने वीयाव होयनेन ओवतेन सात साल तेरा पाहणा पुठी रोय सोकली होती.

³⁷ ची चौर्यायशी सालोसी रोंडायली होती एने मंदीर काजे नि छूळती होती, एने उपास एने प्रार्थना कोर कोरीन रात-दाहळू आराधना कोरती होती.

³⁸ एने ची तिनी टेमे चा आवीन परमेश्वरोन बोडाई कोरणे बाज गोयी, एने तीनु सोबोकाजे, जे यरुशलेमोन छुटकारान वाट जुवता होता, तिना पुऱ्यान बारामा वाते कोरणे बाज गोयी.

युसूफ एने मरीयमन घोर आवनो

³⁹ जेतार चे प्रभून नियमोन अनसारे आखो काय पुरो कोर लेदा ती गलीलमा आपनो गाव नासरेथमा पोछा जात रोया.

⁴⁰ एने पुऱ्यो बोढतो, एने ताकत वावु होयतू गोयू, एने ग्यानसी पुरू होयतू गोयू; एने परमेश्वरोन मोंग तीना पोर होतो.

मंदीरमा येसुन रोयनो

⁴¹ तेरा आसी-बासा होर साल वोलांडोनोन तीहीवारोन पेहेले यरुशलेममा जाया कोरता होता.

⁴² जेतार येसु बारा सालोन होयू, तेत्यार चे जुनला रितीन अनसारे यरुशलेममा गोया.

⁴³ जेतार चे तीनु दाहळा काजे पुरा कोरीन पोछा आवने बाज गोया, ती चू पुऱ्यु, येसु यरुशलेममा रोय गोयू; एने यो तेरा आसी-बासा नि जानता होता.

⁴⁴ चे यो सोमज्या कि चू दिसरा माणसो साते होसे, एक दाहळान पोळावू निकवी गोयू एने तीनाक तेरा सोगासाईमा एने उवखायतामा हेरने बाज गोया.

⁴⁵ बाकीन जेतार नी जोळ्यू, ती हेरता-हेरता यरुशलेममा पोछा गोया,

⁴⁶ एने तीन दाहळान ओवतेन चे तीनाक मंदीरमा भोननेवावन इचमा बोस रोयलू, तिंदरो सोमवने एने तीनुक सोवाल कोरतेलू देखायू.

⁴⁷ जोतरा तेरो सोमवता होता, चे आखा तेरी सोमोज एने तेरा जोवाब पोरसी वाहरायता होता.

⁴⁸ तेत्यार चे तीनाक देखीन वाहाराया एने तेरी आया तीनाक कोयी, “हे पुऱ्या, तू आमरे साते काहा ओसू वेहवहार कोऱ्यु? देख, तारू बास एने मे तोकलीत कोरीन तुसेक हेरता होता?”

⁴⁹ येसु तीनु काजे कोयू, “तुमु मेसेक काहा हेरता होता? काय नि जानता होता कि मेसेक मारा बासोन घोरमा रोयनो जोरुरी छे?”

⁵⁰ बाकीन जी वात चू तीनु काजे कोयू, चे तिनीक नी सोमज्या.

⁵¹ तेत्यार चू तिंदरे पुठी गोयू, एने नासरेथमा आव्यु, एने तिंदरा कोयामा रोयू; एने तेरी आया जे आखा वाते आपना मोनोमा राखी.

⁵² एने येसु ग्यान एने डीलोमा, एने परमेश्वरोन एने माणसोन मोंगोमा मोटू होयतू गोयू.