लुका 18 - बारेली पावरी

रोंडायला एने अधोरमी न्याय कोरने वावू

¹ ओवतेन येसु एरा बारामा कि, हमेशा प्रार्थना कोरणे एने हिंमत नि छुळनो जुवे, तीनुक यु दाखलू कोयू.

² “काहनास देसोमा एक नियाव कोरने वावू रोयतु होतु जू नि परमेश्वर काजे बिहतु होतु एने नि काहनास माणसोन पोरवा कोरतू होतु.

³ तिना देसोमा एक रोडायली रोयती होती, जी तेरेनचा आवी आवीन कोयती होती, ‘मारू न्याय कोरीन मेसेक मारे दुष्मोन मा गोथू मेसेक वाचाड.’

⁴ काहीन टेमे तोक चू नि सोमव्यू बाकीन आखरीमा मोनमा विचार कोरीन कोयू, ‘एने मे नि परमेश्वर काजे बिहतेलु, एने नि माणसोन पोरवाय कोरतेलू.

⁵ ते बी जी रोंडायली मेसेक तोकलीत आप्या कोरे, इनान कोरता मे तेरु नियाव कोरिस, कोदि ओसो नि होये कि घोळी-घोळी आवीन आखिरमा मेसेक तोकलीत आप्या कोरे.’”

⁶ प्रभू कोयू, “सोमवू, अधोरमीन नियाव कोरणे वावु काय कोयतेलु छे?

⁷ इनान कोरता परमेश्वर आपना नेवाळलान काय नि नियाव कोरे, यु रात ने दाहळू तेरी प्रार्थना कोरतू रोयसे? काय चू तिना बारामा वार लागाळ छे?

⁸ मे तुमु काजे कोयो कि, चू तेतारुत तिंदरू नियाव कोरसे ते बी माणसोन पुऱ्यु जेतार आवसे, ती काय चू धोरती पोर भुरसू कोरसे?”

कुन धोरमी गीनायसे?

⁹ चू तीना काजे भुरसू मेकता होता, कि आमु धोरमी छे, एने दिसरा काजे नेचा सोमजता होता, यु दाखलू कोय.

¹⁰ “दुय माणसे मंदीरमा प्रार्थना कोरनेन कोरता गोया; एक फरुशी होतु एने एक फावू लेणे वावु होतु.

¹¹ फरुशी उबु रोयीण आपना मोनोमा प्रार्थना कोरणे बाज गोयू, ‘हे परमेश्वर मे तारू धन्यवाद कोरो कि मे दिसरा माणसो सारकू भुंडू बुलने वावु अधोरमोन कोरणे वावु छिनावो कोरणे वावु नि होय एने नि इना फावू लेणे वावा सारखु छे.

¹² मे हाप्तामा दुय कावा उपास कोरतेलू; मे मारी आखी कोमायीन दोसवू हिस्सू बी आपतलु.’

¹³ बाकीन फावू लेणे वावु नांबेत उभू रोयीण, सोरगो भूनी एने डूवा उपोर कोरीन बी देखणे नि कोऱ्यु, पुन खुदोन छाती पोर ठुकीन कोयू, ‘हे प्रभू मे पापी छे मार पोर दया कोर,’

¹⁴ मे तुमु काजे कोयो कि, ‘चू दिसरू नि, बाकीन यु माणूस धोरमी ठेरावलू जायीन आपने घोर गोयू; काहाकि जू कुदू आपनु काजे मोटु बोनावसे, चू नानू कोवाय जासे; एने जू आपना खुदो काजे नानू बोनावसे, चू मोटू कोराय जासे.’”

नानला पुऱ्या सारखो परमेश्वरोन राज

¹⁵ ओवतेन माणसे आपना पुऱ्या काजे बी तेरेनचा लावणे बाज गोया कि येसु तिंदरे पोर हात मेके; बाकीन चेला देखीन तीनुक जुर कोऱ्यु.

¹⁶ येसु पुऱ्या काजे साते बुलावीन कोयू, “पुऱ्या काजे मारेंचा आवने देवू, एने तीनु काजे मोना कोरु, काहाकि परमेश्वरोन राज असला जून छे.

¹⁷ मे तुमु काजे छाचलीन कोयो कि जू कुदू परमेश्वरोन राज काजे नानला पुऱ्या सारको स्वीकार नि कोरे चू तीनामा कोबी नि जाय सोके.”

मालदार पुऱ्यान येसुक सवाल

¹⁸ काहनुस सरदार तीनु काजे पुछु, “हे वारला गुरु, ओमोर जीवनोन होक लेनेन कोरीन मेकाय कोरो?”

¹⁹ येसु तीना काजे कोयू, “तू मेसेक वारला काहा कोयने बाज रोयू? कुदू वारलो नि होय निसतू एक मतलब परमेश्वर.

²⁰ तू आग्या काजे जानतलु छे, ‘व्यभिचार घोन कोरे, खुन कोरतू झुनी एने चुरी बी कोरतू झुनी, झुटी गोवायी नि आपनो, आपना बास एने आशोन मान राखनो.’”

²¹ चू कोयू, “मे ते यो नानलुन मानतू आव रोयू.”

²² यो सोमवीन येसु तीना काजे कोयू, “तारेमा हिमी बी एक वातोन कोमी छे, आपनो आखो काय वेचीन गोरीब काजे वाट दे, एने तुसेक सोरगोम धोन जूळसे एने आवीन मारे पोछोव.”

²³ चू यो सोमवीन जुदु नोराज होय गोयू, काहाकि चू मोटलु मालदार होतु.

²⁴ येसु तीनाक देखीन कोयू, “मालदार काजे परमेश्वरोन राजमा जाणे कोतरो काठो छे.

²⁵ परमेश्वरोन राजमा मालदारोन जानो उटळान सुईन नाकमा गोथो जाणे सोप छे,”

²⁶ इनापोरसी सोमवने वावा कोया “तेत्यार तेरु छुटकारू होय सोकसे?”

²⁷ येसु कोयू, “जो माणसोसी नि होय सोके, चो परमेश्वर सी होय सोकतलो छे,

²⁸ पतरस कोयू, देख आमु ते घोर बार छुळीन आवला छे.”

²⁹ येसु तीनु काजे कोयू, “मे तुमु काजे छाचलीन कोयो कि ओसो कुदू नि होय जू परमेश्वरोन राजोन कोरता घोर एने लाडी एने भाश नीती आश एने बास नीती पुऱ्या-पारीक बी छुळ देदलु छे.

³⁰ एने इनी टेमे इना गोथू जादा नि जोळे एने आवने वावा संसारमा ओमोर जीवन.”

पोछो जीव उठनेन भविष्यवाणी

³¹ ओवतेन येसु बारा जोना काजे साते ली जाईन तीनुक कोयू, “देखू आपनु यरुशलेममा जाणे बाज रोया, एने ओतरी वाते, माणसोन पुऱ्यान कोरता भविष्य कोरतान लारे लिखायलो छे चो आखो पुरो होयसे,

³² काहाकि चू दिसरा जातीन हातोमा सोपाय जासे एने चे तेरी ओपमान कोरसे एने तेरे पोर थूपसे.

³³ एने तीनाक चापका देसे, एने मार देसे एने चू तीसरे दाहळे जीव उठसे.”

³⁴ बाकीन चे इनी वातो गोथा कानलीत वाते नि सोमव्या; एने जी वाते तिंदरेसी डूकायली रोयी एने जो कोयलो होतो चो तिंदरे सोमोजमा नि आव्यो.

आंदवा भिकारीण देखायनो

³⁵ तेत्यार चू यरीहो साते पुग्यू, ती एक आंदवू वाटी धोळे बोस रोयलू होतु भिक मागतु होतु.

³⁶ चू गोरदीन चालनेन आवाज सोमवीन पुछने बाज गोयू, “यो काय होय रोयो?”

³⁷ चे तीनाक कोया, “येसु नासरी जाणे बाज रोयू.”

³⁸ तेत्यार चू आयळीन कोयू, “हे येसु, दाऊदन पुऱ्या, मार पोर दया कोर!”

³⁹ जे ओगोव-ओगोव जाता होता, चे तीनाक जुर कोरणे बाज गोया कि हुगुरोये; बाकीन चू ओवी बी आयळने बाज गोयू, “हे दाऊदन पुऱ्या मार पोर दया कोर”

⁴⁰ तेत्यार येसु उभू रोयीन आग्या आप्यू कि हिनाक मारेंचा लावू, एने जेतार चू साते आव्यु ती येसु तीना काजे पुछु,

⁴¹ “तारी काय मोर्जी छे कि मे तारेन कोरता कोरो?” चू कोयू, “हे प्रभू यो कि मे देखणे बाजजाम.”

⁴² येसु तीना काजे कोयू “देखणे बाज जा; तारू भुरसू तुसेक वारू कोर देदलु छे.”

⁴³ तेत्यार चू तेत्यारुत देखणे बाज गोयू एने परमेश्वरोन बोढाई कोरतू जायीन तेरे पोछोव चाल पोळ्यु; एने आखा माणसे देखीन परमेश्वरोन बोढाई कोऱ्या.