लुका 16 - बारेली पावरी

चालाक पुरती कोरणे वावु

¹ ओवतेन येसु चेला काजे बी कोयू एक मालदारोन एक कारभारी होतु, माणसे तीना पोर ओसू गुणू लागाळ्या कि चू तारो आखो धोन उळाव देदलु छे.

² आखरी मालदार तीनाक बुलावीन कोयू, “यो काय छे जो मे तारा बारामा सोमवी रोयू? तारा कारभारन हिसाब आप, काहाकि तू ओगु कारभारी नि रोय सोकतलु.”

³ तेत्यार कारभारी विचार कोरणे बाज गोयू, हिमी मे काय कोरो? काहाकि मारू मालिक कारभारन काम मारजुव गोथो हापकणे बाज रोयू धुवू ते मारेसी खोंदायतलू नि; एने भिक मागणे मेसेक लाज आवतेली.

⁴ मे सोमज गोयू कि काय कोरिस, काहाकि जेतार मे कारभारीण कामोसी छुळवाय जाम ती माणसे मेसेक तिंदरा घोरमा ली लेसे.

⁵ तेत्यार चू आपना मालिकन करजा वावाणूक एक-एक जोनाक बुलाव्यू एने पेहला काजे पुछु, “मार पोर मालकोन कोतरू कोरजू छे.”

⁶ चे कोया, “सोव मोन तेल” तेत्यार चू तीनु काजे कोयू, “मारो हिसाबोन लिखलो ले एने बोसीन मामार पोचास लिख ले.”

⁷ एने चू दिसरा काजे पुछु, “तारे पोर कोतरू कोरजू छे?” चू कोयू, “सोव मोन गोहून बालटा,” तेत्यार चू तीनाक कोयू, “तारो हिसाबोन-खातो लीन आस्सी लिख दे.”

⁸ “मालिक तिना झुटा अधोरमीन वाह-वाह कोऱ्यु, चू हुशारीसी काम कोरतेलू छे काहाकि इनी संसारोन माणसे आपना टेमोन माणसो साते रिती-रीवाजोन विजावान माणसो गोथा बी घोणा हुशार छे.”

⁹ एने मे तुमु काजे कोयो कि अधोरमोन धोनोसी आपनेन कोरता दुस्तीदार बनाय लेवू, काहाकि जेतार तोक चो जात रोये ती चे तुमुक ओमोर नीवासीमा ली लेये.

¹⁰ जे थुलाकमा गोथा थुलाक खोरला छे, चे लोकेत मा गोथा बी खोरला छे, एने जे थुलाकमा गोथा थुलाक अधोरमी छे, चे लोकेत मा भी झुटा छे.

¹¹ इनान कोरता जेतार तुमु अधोरमोन धोनमा खोरला नि ठेराये, ती खोरलो धोन तुमुक कून सोपसे?

¹² एने ओगर तुमु परायान धोनमा खोरला नि ठेरे ती जो तुमरो छे, तीनाक तुमुक कुन आपसे?

¹³ “काहनु पावोर दुय मालिकन चाकरी नि कोर सोके काहाकि चू एक पोर दुष्मोनी एने दिसरा पोर मोंग कोरसे; नीती एक साते मेवायीन रोयसे एने दिसरा काजे विटोव सोमजसे तुमु परमेश्वरोन एने धोन दुयोन सेवा नि कोर सोकतेला.”

परमेश्वरोन राजोन किमोत

¹⁴ फरुशी जे लालची होता, यो आखा वाते सोमवीन तेरी मोजाक कोरणे बाज गोया.

¹⁵ चू तीनु काजे कोयू, तुमु ते माणसोन सामने खुदो काजे धोरमी ठेरावणेन, बाकीन परमेश्वर तुमरो मोन जानतेला छे, काहाकि जो चीज माणसोन नोजोरसी महान छे, चू परमेश्वरोन साते भुंडला छे.

¹⁶ “नियम शास्त्र एने भविष्य कोरता योहान तोक रोया; इनी टेम पोर परमेश्वरोन राजोन वारली खोबर सोमवावता होता एने कुदू बी तीनामा ताकतसी माहाय जाता होता.

¹⁷ सोरग एने धोरतीन टोव जानो नियम शास्त्रान एक बिंदून खुळाय जानेसी सोपो छे.

¹⁸ जू कुदू आपनी लाडी काजे छुळीन दिसरी साते वियाव कोरतेलू चू व्यभिचार कोरतेलू, एने जू कुदू ओसली छुळली बायर साते वियाव कोरतेलु चू भी भुंडला विचार कोरतेलू.”

मालदार माणूस एने गरीब लाजर

¹⁹ एक मालदार माणूस होतु जू जामन्या कपडा एने मखमोलोन पेहेरीन एने होर एक दाहळे सुख-खुशालीमा एने एस आरामोमा रोयतू होतु.

²⁰ लाजर नावोन एक गरीब घावोसी भोरलु होतु तेरा झोपलांचा नाखाय जातलू,

²¹ एने तीनाक लागतो होतो कि मालदारोन टेबल पोरला उसटलासी आपनो पेट भोराये; या तोक कि कुत्रा बी आवीन तेरा घावो काजे चाटता होता.

²² ओसो होयो कि चू गरीब मोर गोयू, एने सोरगो दूत तीनाक ली जाईन अब्राहामन खुवामा पुगाळ देदा. चू मालदार बी मोर गोयू एने गाळाय गोयू,

²³ एने अधोलोकमा चू पिळामा पोळलु तेरा डूवा उचा कोऱ्यु, एने नांबे गोथू अब्राहामन खुवामा लाजर काजे देख्यू.

²⁴ तेत्यार चू आयळीन कोयू, “हे बासो अब्राहाम मार पोर दया कोरीन लाजर काजे मुकली दे, काहाकि चू तेरी आंगवीन पोर पाणीमा भिगवीन मारी जीब काजे थोंडी कोरे, काहाकि इना आगठामा मे फोपळी रोयू.”

²⁵ बाकीन अब्राहाम कोयू, हे पुऱ्या, फोम कोर कि तू तारा जीवनोमा वारला चीजे ली लेदलु छे, एने तोसोत लाजर भुंडली चीजे बाकीन हिमी चू या शांतीमा रोयू, एने तू फोपळने बाज रोयू.

²⁶ इनी आखी वातोक छुळीन आमरे एने तुमरा इचमा एक भारी खाडू ठेराय गोयलु छे कि जे या गोथा पोले धोळे तुमरेनचा जाणेन कोरसे, चे नि जाय सोके, एने नि कुदू वा गोथा इना धोळे आमरेनचा आव सोके.

²⁷ मालदार माणूस कोयू, “ती हे बासो, मे तुसेक विनता कोरो कि तू तीनाक मारा बासोन घोर मुकोल,

²⁸ काहाकि मारा पाच भाश छे; चू तिंदरे सामने इनी वातोन गोवायी आपे, ओसो नि होये कि चे इनी पिळान जागामा आवे.”

²⁹ अब्राहाम तीनाक कोयू, “तिंदरेनचा ते मुसा एने भविष्य कोरताण किताबे छे, चे तिंदरी सोमवे.”

³⁰ चू कोयू, “नि, हे बासो अब्राहाम; बाकीन ओगर कुदू मोरलामा गोथा तिंदरेनचा जाय, ती चे मोन फिराव ले.”

³¹ चू तीनाक कोयू, जेतार चे मुसा एने भविष्य कोरतान नि सोमवतला ती हिमी मोरला गोथू कुदू जीवतु होयीन बी उठे ते बी तेरी नि माने.