लुका 15 - बारेली पावरी

खुवायला गाडरान दाखलू

¹ आखा फावू लेणे वावा एने पापी तेरेनचा आव्या कोरता होता काहाकि चे येसुन सोमवे.

² फरुशी एने शास्त्री कुरकुर कोरता जायीन कोयने बाज गोया, “यु ते पापी काजे मेवतलु एने तिंदरे साते खातलू बी.”

³ तेत्यार येसु तीनु काजे यु दाखलु कोयू,

⁴ “तुमरेमा कुन छे जेरा सोव गाडरा रोये, एने तीनामा गोथो एक खुवाय जाय, ती निन्यानोव काजे बोयळामा छुळीन, तिना खुवायला काजे जेतार तोक जोळी नी जाय हेरतू नि रोये?

⁵ एने जेतार जोळ जातलो, तेत्यार चू घोनी खुशीसी तीनाक खांदा पोर हाकली लेतलू.”

⁶ एने घोर आवीन दुस्तीदार एने साते वावा काजे एखठा कोरीन कोयतलु, “मार पुठी खुशी कोरु, काहाकि मारो खुवायलो गाडरो जोळ गोयलो छे.”

⁷ मे तुमु काजे कोयो कि इना रितीसी एक पसतावू कोरणे वावा पापीन बारामा बी सोरगोमा ओतरीत खुशी होयसे, जोतरी कि निन्यानोव ओसा धोरमीन बारामा नी होता, जीनुक पोस्तावू कोरनेन गोरोज नि होय.

खुवायला सिक्कान दाखलू

⁸ नि ते कुन ओसी बायोर होसे जेरे जुव दोस ओदला होसे, एने तीनामा गोथो एक खुवाय जाय ती ची दिवू धोपाळीन एने घोर बाहारीन, जेतार तोक जोळी नी जाय जीव लागाळीन हेरतीरोये?

⁹ एने जेतार जोळ जातलो ती ची आपना दुस्तीदार एने साते वावा काजे एखठा कोरीन कोयतेली, “मार पुठी खुशी कोरु, काहाकि मारू खुवायलु ओदलु जोळ गोयलु छे.”

¹⁰ मे तुमु काजे कोयो कि इना रितीसी एक पसतावू कोरणे वावा पापीन बारामा परमेश्वरोन सोरग दूतोन सामने खुशी होयतेली.

खुवायला पुऱ्यान दाखलू

¹¹ एने येसु कोयू, “काहनास माणसोन दुय पुऱ्या होता.”

¹² तीना मायलु नानलु बासो काजे कोयू, “हे बाबा, धोनोमा गोथू जु हिस्सू मारू होसे चू मेसेक आपी दे चू तीनु काजे आपनो धोन वाट देदू.”

¹³ जादा दाहळा नी होयला होता कि नानलु पुऱ्यु आखो काहीन एखठो कोरीन नांबे देस जात रोयू, एने चा भुंडला कामोमा आपनो धोन उळाव देदू.

¹⁴ जेतार चु आखो काहीन खोरचू कोर देदू, ती तीना देसोमा मोटूत काव पोळ्यु, एने चु ठारलू होय गोयू.

¹⁵ इनान कोरता चू तीना देसोन रोहीवासी मायला एकानचा जाय लाग्यू चु तीनाक आपना खेतोम सुवऱ्याक चारणेन कोरता मूकल्यु.

¹⁶ एने तीनाक लागतो होतो कि तीना सेंगवामा गोथा जीनुक सुवऱ्या खाता होता, आपनो पेट भोरे एने तीनाक कुदू काहीन नी आपता होता.

¹⁷ जेतार चू सुदपोर आव्यु तेत्यार कोयने बाज गोयू, मारा बासोनचा कोतरा दाहळक्या काजे खाणासी बी जादा रुटू जोळतलू, एने मे न्या भूकलू मोर रोयू.

¹⁸ मे हीमी उठीन आपना बासोनचा जायीस एने तीनाक कोयीस कि बाबा, मे सोरगोन खिलापमा एने तारी नोजोरमा पाप कोरलु छे.

¹⁹ हिमी इनान लायक नि रोयू कि तारू पुऱ्यु कोवाये, मेसेक आपना एक दाहळक्या सारकू राखले.

खुवायला पुऱ्यान पोछो आवनो

²⁰ तेत्यार चू उठीन आपना बासोनचा चाल पोळ्यु चू हिमी नांबेत होतु ती तेरा बासो काजे तीनाक गिन आवी, एने दोवळीन तीनाक गोवे लागाळयू, एने घोनु गुवा देदू.

²¹ पुऱ्यु तीनाक कोयू, “बाबा, मे सोरगोन खिलापमा एने तारी नोजोरमा पाप कोरलु छे; एने हिमी इनी लायक नी रोयू कि तारू पुऱ्यु कोवायो.”

²² बाकीन बास आपना पावोर काजे कोयू, “मामार वारलामा गोथा वारला छिंदरा निकावीन इना काजे पेहेरावू, एने एरे हातोमा मुंदी एने पायोमा खासळा पेरावू,

²³ एने पावलो जोनावर लावीन मारू काहाकि आपनु खासु एने खुशी कोरसू.”

²⁴ काहाकि मारू यु पुऱ्यु मोर गोयलु होतु, पोछु जीव गोयलु छे, खुवाय गोयलु होतु, हिमी जोळ गोयलु छे एने चे खुशी कोरणे बाज गोया.

मोटाला पुऱ्यान सिकायात

²⁵ बाकीन तेरु मोटलु पुऱ्यु खेतोमा होतु जेतार चू आवीन घोरो साते पुग गोयू, ती चू गावणेन-वाजाळणेन एने नाचणेन ओवाज सोमव्यू.

²⁶ आखरी चू एक पावोर काजे बुलावीन पुछु, “यो काय होय रोयो?”

²⁷ पावोर तीनाक कोयू, “तारू भाश आव रोयू एने तारू बाबू पावलु केवळू काटाळ रोयू, इनान कोरता कि चु वारलु आरेगलू जोळलु छे.”

²⁸ यो सोमवीन तीनाक रीस लागी एने चू माही जाने नि हिंनतु होतु, बाकीन तेरु बाबू बारथे आवीन तीनाक सोमजाडने बाज गोयू.

²⁹ चू बासो काजे जोवाब आप्यू, “देख मे ओतरा सालोसी तारी सेवा कोर रोयू एने कोबी बी तारी आग्या नि टाव्यू, ते बी तु मेसेक कोबी एक बुकळान गिदल्यो बी नी आप्यू कि मे मारा दुस्तीदार पुठी खुशी कोरतू.

³⁰ बाकीन जेतार तारू यु पुऱ्यु, जु तारो धोन व्यभिचार बायरापोर उळाव देदलु छे, आव्यु, ती तिनान कोरता तू पावलु केवळू काटाळयु.”

³¹ तेरु बास तीनाक कोयू, “पुऱ्या, तू हमेशा मार पुठी छे; एने जो काहीन मारो छे चो आखो तारोत छे.”

³² बाकीन हीमी खुशी कोरणे एने मुजा कोरनु जुवे काहाकि यु तारू भाश मोर गोयलु होतु, पोछु जीवतु होय गोयू; खुवाय गोयलु होतु, हिमी जोळ गोयलु छे.