लुका 14 - बारेली पावरी

सब्बातोन दाहळे वारू करनो

¹ ओवतेन येसु शब्बाथोन दाहळे फरुशीन सरदार मायलु काहनास एकान घोर रूट खाणे गोयू; एने चे तीना पोर डाव धोर रोया होता.

² चा एक माणूस तेरे सामने होतु, जीनाक पानझेलान बिमारी होती.

³ इनापोरसी येसु शास्त्रध्यापक एने फरुशी काजे कोयू, “काय शब्बाथोन दाहळे वारू कोरणे वारू छे कि नि होय?”

⁴ बाकीन चे हुगात रोया तेत्यार चू तीनाक छिमीन वारू कोऱ्यु एने जाने देदू,

⁵ एने तीनु काजे कोयू, “तुमरेमा ओसू कुन छे, जेरो गोदळो नीती बुल कुवामा पोळ जाय एने चु शब्बाथोन दाहळे तीनाक तेत्यारुत बारथे नी नीकावे?”

⁶ चे इनी वातोन काहीन जोवाब नी आप सोक्या नंम्रता एने पाहांतऱ्यान सन्मान.

पाहांतऱ्यान स्वागत

⁷ जेतार चू देख्यू कि नेवतामा आवला माणसे कोसा मोटा-मोटा जागा नेवाळ लेतला ती एक दाखलु आपीन तीनु काजे कोयू,

⁸ “जेतार कुदू तुसेक वीयावमा बुलावे, ती मोटली जागा पोर झुन बोसतू, कोबी ओसो नी होये कि चू तार गोथा बी मोटला काजे नेवतो आप रोयू होसे,

⁹ एने चू तुसेक एने तीनाक दुयो काजे बी नेवतो आपलु छे, आवीन तुसेक कोयसे, ‘इना काजे जागू आप,’ एने तेत्यार तुसेक लाजवायीन आखान नेचला जागामा बोसणो पोळती.

¹⁰ बाकीन जेतार तुसेक बुलावे ती आखान नेचला जागामा जायीन बोस कि जेतार चू, जु तुसेक नेवतो आपलु छे आवे, एने तुसेक कोये, ‘हे दुस्ता, ओगोव जायीन बोस,’ तेत्यार तारे साते बोसने वावान सामने तारी महिमा होयसे.

¹¹ काहाकि जू कुदू खुदो काजे मोटू बोनावसे, चु नाणू कोराय जासे; एने जु कुदू खुदो काजे नाणू बोनावसे, चु मोटू कोराय जासे.”

वारला कामोन फोव

¹² तेत्यार येसु आपनुक नेवतो आपनेवावा काजे बी कोयू, “जेतार तू दिसून नि ती रातीन खाणो आपीस, ती आपना दुस्तीदार नीती भाशोन परिवार काजे नीती मालदार साते वावा काजे झुन बुलावे, कोबी ओसो नि होये कि चे बी तुसेक नेवतो आपे, एने तारू बोदलु होय जाय.

¹³ बाकीन जेतार तू खाणो आपीस ती गोरीब, डुंडा, लेंगळा एने आंदवा काजे बुलाव.

¹⁴ तेत्यार तू सोयावा होयीस, काहाकि तिंदरे जुव तुसेक बोदलु आपनेन कोरता काहीन नि होय, बाकीन तुसेक धोरमीन जीव उठने पोर एरू प्रतीफोव जोळसे.”

मोटाला खाणान दाखलू

¹⁵ तेरे साते खाणो खाणे वावा मायलु एक जोनू ये वाते कोयीन सोमवीन येसु काजे कोयू, “सोयावा छे चे जे परमेश्वरोन राजोन रूट खासे.”

¹⁶ येसु तीना जवाब आप्यू, “काहनुस एक माणूस एक पाहांतऱ्यान नेवतो आप्यू एने घोना सोवटाक बुलाव्यू.”

¹⁷ जेतार खाणो तीयार होय गोयो ती चू आपना पावोरोन हाते नेवतो आपला माणसो काजे बुलावने मूकल्यु, “आवू, हीमी खाणो तीयार छे.”

¹⁸ बाकीन चे आखान आखा माफी मांगणे बाज गोया पेहेलू तीनाक कोयू, “मे खेत मुले लेदलु छे, एने जोरुरी छे कि तीनाक देखो; मे तुसेक विनता कोरो कि, मेसेक माफ कोर दे.”

¹⁹ दिसरू कोयू, “मे पाच जुळी बुले मुले लेदलु छे, एने तीनु काजे पारखने जाने बाज रोयू; मे तुसे काजे विनता कोरो, मेसेक माफ कोर.”

²⁰ एक ओवी दिसरू कोयू, “मे वीयाव कोरलु छे, इनान कोरता मी नि आव सोकतू.”

²¹ चू पावोर आवीन आपना मालिक काजे कोयीन सोमवाळ्यु तेत्यार घोरोन मालिक रीसवायीन आपना पावोर काजे कोयू, “सोहोरोन हाटोमा एने गोव्यामा मामार जायीन गोरीब, डुंडा, लेंगळा एने आंदवा काजे न्या लीयाव.”

²² पावोर ओवी कोयू, “मालिक, जोसू तू कोयलु होतु, तोसोत कोरायलो छे; एने ओवी जागा छे.”

²³ मालिक पावोर काजे कोयू, “सोयळोक पोर एने वाळाभूनी जा एने माणसो काजे इशारू कोरीन लीयाव काहाकि मारो घोर भोराय जाय.”

²⁴ काहाकि मे तुमु काजे कोयो कि तीनु नेवतो आपायला माणसो मायला काहना मारा खाणा काजे नि चाखे.

येसुन चेला बोननो

²⁵ जेतार मोटीत गोरदी तेरे साते जाती होती, ती चू पोछु फिरीन तीनु काजे कोयू,

²⁶ “अगर कुदू मारेंचा आवे, एने आपनु बास एने आश एने लाडी एने पुऱ्या एने भाश ने बहोनिश एने आपना जीव काजे मोंगावू नि जाणे, ती चू मारू चेलू नी बोन सोके;.

²⁷ एने जु कुदू आपनु ख्रुस नि हाकले, एने मार पोछोव नि आवे, चू बी मारू चेलू नि बोन सोके.”

²⁸ तुमरेमा कुन छे जू गोढ बांदनेन कोरे, एने पेहेले बोसीन खोरचू नी जुळे कि पुरो कोरनेन ताकत मारे पास होय कि नि होय?

²⁹ कोदि ओसो नि होये कि जेतार चू पायु घाल लेये बाकीन तीयार नि कोर सोके, ती आखा देखने वावा यो कोयीन तेरी मोजाक उळावणे बाज जाय,

³⁰ “यु माणूस बांदने ते बाज रोयू बाकीन तीयार नी कोर सोक्यू?”

³¹ एने कुन ओसू राजा छे जु दिसरा राजा पुठी लोळाय कोरणे जातलु, एने पेहेले बोसीन विचार नि कोरे कि जे वीस होजार लीन मार पोर चोळीन आवतेलु काय मे दोस होजार लीन तेरु सामनु कोर सोकतलु, कि नी?

³² नीती तेरेसी नांबे रोयतेत चु दुतो काजे मुकलीन मेवायने कोरणे देखसे.

³³ इना रितीसी तुमरे मायलु जू कुदू आपनो आखो काहीन छुळ नी, चू मारू चेलु नि होय सोकतलु.

बिना सोवादोन मीठ

³⁴ “मीठो ते वारलो छे, बाकीन अगर मीठान सोवाद बीगळी जाय ती चो काहना चीजोसी खोरलो कोरायसे.

³⁵ चो नि ते धोरतीन एने नी खाणेन काममा आवतेलो तीनाक ते माणसे बारथे नाख देतला जिंदरा सोमोवणेन कानटा छे चे सोमवी लेये.”