लुका 13 - बारेली पावरी

पश्चाताप कोरु नि ती मोरू

¹ तिनी टेमे काहनास माणसे आव लाग्या, एने तीनु साते चू गलील मायला वाते कोरणे बाज गोया जिंदरो लुय पिलात तिंदरात बलिदान साते भेसकलु होतु.

² यो सोमवीन तीनुक चू जोवाबमा यो कोयू, “काय तुमु सोमजतला कि ये गलील एने आखा गलीली गोथा जादा पापी होता कि तिंदरे पोर ओसो संकट पोळ्यो?

³ मे तुमु काजे कोयो कि नी बाकीन अगर तुमु मोन नि फिरावे ती तुमु आखा बी इना रितीसी नाश होय जासू.

⁴ नीती, काय तुमु सोमोजतेला कि चे आठरा जोना जीनुपोर सिलोहोन टावर पोळ्यु, एने चे डाबायीन मोर गोया यरुशलेम मायला एने आखा रोयने वावा गोथा जादा गुणावा होता?

⁵ मे तुमु काजे कोयो कि नी; बाकीन अगर तुमु मोन नि फिरावे ती तुमु आखा बी इना रितीसी नाश होय जासू.”

बिना फोव वावु गुलोरोन झाड

⁶ ओवतेन येसु यु दाखलु बी कोयू “काहनास आंगुरोन वाळीमा एक गुलोरोन झाड लागाळलो होतो चु तीनामा फोव हेरने आव्यु, बाकीन नि जोळ्यो.

⁷ ती चू वाळीन राखवाव काजे कोयू, ‘देख, तीन साल मे इना गुलोरोन झाडोमा फोव हेरने आवतेलु, बाकीन नि जोळतलो इना काजे काट दे कि यो जागा काजे काहा रुक रोये?’

⁸ चू तीनाक जोवाब आप्यू, ‘हे मालिक, इनाक इने साल ओवी रोयने दे कि मे एरे चारू धोळे खोंदीन खोत घाल.

⁹ अगर ओगो फोवे ती भोलो, नीती तीनाक काट देजी.’”

कुबळी बायोर काजे वारू करनो

¹⁰ दितवारोन दाहळे चू एक प्रार्थना घोरोमा सिकाळतू होतु.

¹¹ चा एक बायोर होती तिनीक आठरा सालोसी एक कोमजुर कोरणे वावी भुंडली आत्मा लागली होती, एने ची कुबळी होय गोयली होती एने काहनात रितीसी सुदी नि होय सोकती होती.

¹² येसु तिनीक देखीन बुलाव्यू एने कोयू, “हे बायर, तू तारी कोमजूरीसी छुट गोयी.”

¹³ तेत्यार चू तिनी पोर हात मेक्यू, एने ची तेत्यारुत सुदी होय गोयी एने परमेश्वरोन महिमा कोरणे बाज गोयी.

¹⁴ इनान कोरता कि येसु शब्बाथोन दाहळे तिनीक वारू कोरलु होतु, प्रार्थना घोरोन सरदार रीसवायीन माणसो काजे कोयने बाज गोयू, “छोव, दाहळा छे जीनुमा काम कोरनो जुवे, आखरी तीनुत दाहळामा आवीन वारू होये, बाकीन शब्बाथोन दाहळे नी.”

¹⁵ यो सोमवीन प्रभू जोवाब आप्यू, “हे दोगावा, काय शब्बाथोन दाहळे तुमरे मायीन आखा जोना आपना बुल्योक एने गोदळा काजे जागा पोर गोथा छुळीन पाणी पावणे नि लीजातला?”

¹⁶ “ती काय वारू नि होतो कि ची बायर जी अब्राहामन बेटीस छे जीनीक भुतडू आठरा सालोसी बांदीन मेक रोयू होतु, शब्बाथोन दाहळे इना बंधनमा गोथी छुळवाय जाय?”

¹⁷ जेतार येसु ये वाते कोयू, ती तेरा आखा दुष्मोन लाजवाय गोया, एने आखी भीळ तिनी महिमान कामो पोरसी जो चू कोरतू होतु, खुश होय गोया.

राईन दाना एने खमिरोन दाखलू

¹⁸ एने येसु कोयू, “परमेश्वरोन राज कुनी सारको छे? एने मे तेरो नाव कुनी सारको आपो?

¹⁹ चो राईन दाना सारको छे, जीनाक एक माणूस लीन आपनी वाळीमा वेऱ्यु; एने चो वोदीन झाड बोन गोयो; एने सोरग मायला चिल्ला तेरा डाव्या पोर पुतरा बांद्या.”

²⁰ चू ओवी कोयू, “मे परमेश्वरोन राजोन नाव कुनी सारको आपो?

²¹ चो खमीर सारको छे, जीना काजे एक बाय लीन तीन माप पिठामा भेसक्यू, एने बोनतु-बोनतु आखू पिठू खमीर बोन गोयू.”

साकळू झोपलु

²² येसु सोहोर-सोहोरोमा, एने गाव-गावमा जायीन सिकाळतू जायीन यरुशलेम भूनी जातू होतु,

²³ ती काहनुस एक जोनू तीना काजे पुछु, “हे प्रभू, काय छुटकारू लेणे वावा थुलाक छे?” चू तीनुक कोयू,

²⁴ “साकेळला झोपलामा गोथा जानेन कोशिश कोरु, काहाकि मे तुमु काजे कोयो कि घोन सोवटा जानेन कोरसे, एने नि जाय सोके.”

²⁵ जेतार घोरोन मालिक उठीन झोपलू बोंद कोर लेदू होसे, एने तुमु बारथे उबरोयीन झोपलू ठूकीन कोयसू, “हे प्रभू, आमरेन कोरता उगाळ दे,” एने चू जोवाब आपसे, “मे तुमु काजे नि उवेखतलु, तुमु का वावा छे?”

²⁶ तेत्यार तुमु कोयसू, “आमु तारे सामने खादला-पिदला एने तू आमरा हाटोमा सिकाळतलु.”

²⁷ बाकीन चू कोयसे, “मे तुमु काजे कोयो, मे नि उवेखतलु तुमु का गोथा छे हे अधोरमोन कामे कोरणे वावा तुमु आखा मारेंचा गोथा छेटा होयू.”

²⁸ चा रोडणो एने दात कोकळावनो होसे; जेतार तुमु अब्राहाम एने इसाहाक एने याकुब एने आखा भविष्य कोरता काजे परमेश्वरोन राजमा बोस रोयला, एने आपना खुदो काजे बारथे निकावला देखसु.

²⁹ एने पुरब एने पच्छिम; उत्तर एने दक्षिण गोथा माणसे आवीन परमेश्वरोन राजमा खाणेन भागीदार होयसे.

³⁰ एने देखू, “काहनास पोछला छे चे पेहेला होयसे, एने काहनास जे पेहेला छे, चे पोछला होयसे.”

हेरोदोन दुष्मोनी

³¹ तिनी टेमे काहनास फरुशी आवीन तीना काजे कोया, “न्या गोथू निकवीन जात रोय काहाकि हेरोद तुसेक मारनेन कोर रोयू.”

³² येसु तीनुक कोयू, “जायीन तीना कुल्या काजे कोय देवू कि देख, मे आज एने वाहाणे भुंडली आत्मा-काजे निकावो एने बिमारी वावा काजे वारू कोरो, एने तिसरे दाहळे आपनो काम पुरो कोरीस.”

³³ ते बी मेसेक आज एने वाहाने एने पोनदाहळे चालनो जोरुरी छे, काहाकि होय नी सोकतलो कि काहनुस भविष्य कोरता यरुशलेमोन बारथे माराय जाय.

यरुशलेमोन कोरता झगळू

³⁴ “हे यरुशलेमोन माणसे, हे यरुशलेमोन माणसे, तु जू भविष्य कोरता काजे मार नाखतलू, एने जे तारेनचा मुकेलला छे तिंदरे पोर दोगळ मार कोरतेलू कोतरा कावा मेसेक लागतो होतो कि जोसी कुकळी आपना पीच्या काजे आपना पाखळा तोवे एखठा कोरतेली, तोसुच मे बी तारा पुऱ्या काजे एखठा कोरो, बाकीन तुमुक यो नि गोवतो.

³⁵ देखू, तुमरा घोरे तुमरेन कोरता उजाळ्या छुळ देतला, एने मे तुमु काजे कोयो जेतार तोक तुमु नी कोये, ‘सोयावा छे चे, जे प्रभून नावोसी आवतेला छे,’ तेत्यार तोक तुमु मेसेक ओवी कोबी नी देखे.”