लुका 11 - बारेली पावरी

प्रार्थनान शिक्षा

¹ एक दाहळे येसु प्रार्थना कोरतू होतु. जेतार चु प्रार्थना कोर लेदू, ती तेरा चेला मायलु एक जोणु तीना काजे कोयू, “हे प्रभू, जोसू योहान तेरा चेला काजे प्रार्थना कोरणे सिकाळ्यु तोसुच आमु काजे बी तू सिकाळ दे.”

² चू तीनु काजे कोयू, “जेतार तुमु प्रार्थना कोरसू ती कोयू ‘हे बासो, तारो नाव चुखो मानाय जाय, तारो राज आवे.

³ आमरा आखा दाहळान रुटू दाहळीन आमुक आप्या कोर,

⁴ एने आमरा पापे माफ कोर, काहाकि आमु बी आपना होर एक गुणा वावाक माफ कोरतेला, एने आमुक परीक्षामा झुन लावतू.’”

मांगता रोयू

⁵ जेतार चू तीनु काजे कोयू, “तुमरेमा गोथू कुन छे कि तेरु एक दुस्तीदार रोये, एने चू आदी राती तेरेनचा जायीन तीनाक कोये, ‘हे दोस्ता; मेसेक तीन रूटा आप.

⁶ काहाकि एक यात्री दुस्तीदार मारेंचा आव रोयू, एने तीनाक आपनेन कोरता मारे जुव काहीन नि होय.’

⁷ एने चू माहाय गोथू जोवाब आपे, ‘मेसेक तोकलीतमा देये; हीमी ते झोपलू बोंद छे एने मारा पुऱ्यु मारे साते आथरून पोर छे, इनान कोरता मे उठीन तुसेक आपी नी सोकतू?’

⁸ ‘मे तुमु काजे कोयो कि अगर तेरु दुस्तीदार होयीन बी तीनाक उठीन नि आपे, ते बी तेरी लाज छुळीन मांगणेन वजेसी तीनाक जोतरो जोरूरोत छे तोतरो उठीन आपसे.

⁹ एने मे तुमु काजे कोयो कि मांगू, ती तुमुक आपायसे; हेरु ती तुमुक जोळसे; ठुकू ती तुमरेन कोरीन उगोळसे.’

¹⁰ ‘काहाकि जू कुदू मांगतलु, तीनाक आपनेमा आवतेलो; एने जू हेरतलु, तीनाक जोळसे; एने जू ठूकतलु, तिनान कोरता उगळी जासे.

¹¹ तुमरेमा गोथू कून ओसू बास होसे, कि जेतार तेरु पुऱ्यु रुटू मांगे, ती तीनाक दोगोळू आपे; एने माछो मांगे, ती माछान बोदले घोळसु आपे?

¹² एने आंडो मांगे ती तीनाक विछु आपे?

¹³ आखरी जेतार तुमु भुंडला होयीन बी तुमरा पुऱ्या काजे वारली चीज आपने जानतला, ती सोरगो मायलु बास आपना मांगणे वावा काजे पवित्र आत्मा काहा नी आपे.’”

येसु एने भुंडली आत्मान अगवा

¹⁴ ओवतेन चू एक मुकी भुंडली आत्मा काजे निकाव्यू जेतार भुंडली आत्मा नीकवी गोयी ती चू मुकु बुलणे बाज गोयू; एने माणसो काजे नोवलाय लागी.

¹⁵ बाकीन तिंदरे मायला काहनास कोया, “यु ते बालजबलुन नावोन भुंडली आत्मान प्रधानो सहारासी भुत काजे निकावतलु.”

¹⁶ दिसरा तेरी पोरीक्षा लेनेन कोरता तीना जुव सोरगोन एक चिन्ह मांग्या.

¹⁷ बाकीन चू तिंदरा मोनो मायला वाते जानीन, तीनुक कोयू, “जीना-जीना राजमा फुट होयतेली चो राज उजळी जातलो छे; एने जीना घोरोमा फुट पोळतेली, चो नाश होय जातलो छे.

¹⁸ अगर भुतडू तेरेत खिलाप होय जाय, ती तेरो राज कोसो बोनलो रोयसे? काहाकि तुमु मार बारामा कोयतेला कि यु भुतडान सहारासी भुंडली आत्मा निकावतलु.

¹⁹ भोलेत अगर मे भुतडान न सहारासी भुंडली आत्मा काजे निकावतलु, ती तुमरा पुऱ्या कुनीन सहारासी निकावतला? इनान कोरता चे तुमरू न्याय कोरसे.

²⁰ बाकीन अगर मे परमेश्वरोन ताकतसी भुंडली आत्मा काजे निकावतलु, ती परमेश्वरोन राज तुमरे साते आव लागलो छे.”

²¹ जेतार ताकतवान माणूस हत्यार लीन तिंदरा घोरोन राखवावी कोरे, ती तेरो धोन वाच जातलो.

²² बाकीन तेरेसी बोळीन कुदू ओवी ताकत वावू लोळाय कोरीन तीनाक जीक लेये, ती तेरो चो हत्यार जीना पोर तेरु भुरसू होतु, हापकी लेतलु एने तेरो धोन लुटीन वाट देतलु.

²³ जू मारे साते नि होय चू मारे खिलापमा छे, एने जू मारे साते नि टूवू कोरतेलु चू वेरवी देतलू.

भुंडली आत्मान घरोन हेरे

²⁴ “जेतार भुंडली आत्मा माणसोमा गोथी निकवी जातली ती सुकली जागामा आराम हेरती फिरतली, एने जेतार नि जोळे ती कोयतली, ‘मे आपना तीनात घोरमा जीनामा गोथी निकोवली होती पोछि जात रोयीस.’

²⁵ एने जायीन तीनाक बाहारलो सापसुतरो एने घाटावो देखतेली.

²⁶ तेत्यार ची जायीन आपने गोथी सात भुंडली आत्मा काजे आपने साते लीयावतेली, एने चे तीनामा भोरायन रोयतली, एने तीना माणसोन पोछली हालोत पेहेले गोथी बी भुंडी होय जातली.”

²⁷ जेतार चू ये वाते कोयनेत बाज रोयू होतु ती गोरदीमा गोथी काहनीस एक बाय जुरेत ओवाजमा कोयी, “सोयावा छे ची कुख जीनामा तू रोयलू एने चे छात्या जे तू चुसलु.”

²⁸ चू कोयू, “होव; बाकीन सोयावा चे छे जे परमेश्वरोन वचन सोमवतला एने मानतला.”

सोरगोन चिन्हान मांग

²⁹ जेतार मोटीत गोरदी एखठी होयने बाज रोयी होती ती चू कोयने बाज गोयू, “इनी पिढीन माणसे भुंडला छे; ये चिन्ह हेरतेला; बाकीन योनान चिन्ह काजे छुळीन दिसरो ओवी चिन्ह नी आपाये.

³⁰ जोसू योना, नीनवेन माणसोन कोरता चिन्ह ठेऱ्यू, तोसुच माणसोन पुऱ्यु बी इनी पिढीन माणसोन कोरता ठेरायसे.”

³¹ दोक्षीनोन राणी नियावोन दाहळे इनी टेमेन माणसोन साते उठीन तीनुक गुणावा ठेरावसे, काहाकि ची शलमोनोन ग्यान सोमवने कोरीन धोरतीन पोरले धोळे गोथी आवी, एने देखू, न्या चू छे जू सुलेमान गोथू बी मोटू छे.

³² नीनवेन माणसे न्यायोन दाहळे इनी टेमोन माणसो पुठी साते उबरोयीन, तीनुक गुणावा ठेरावसे; काहाकि चे योनान प्रचार सोमवीन मोन फिराव्या, एने देखू न्या चू छे जू योना गोथू बी मोटू छे.

डीलोन दिवू

³³ “काहनु माणूस दिवू धोपाळीन तोव घोरमा नीती मापो तोवे नि मेकतेलु बाकीन पाटळी पोर मेकतलु कि माहाय आवने वावाक विजावो देखाये.”

³⁴ तारा डीलोन दिवू तारू डूवू छे, इनान कोरता तारू डूवू साफ छे ती तारो आखो डील बी विजावो छे; बाकीन जेतार चू भुंडलु होय ती तारो डील बी आंदारलो छे.

³⁵ इनान कोरता हुशारीमा रोयजू कि जो विजावो तारेमा छे चो आंदारलो नि होय जाय.

³⁶ इनान कोरता अगर तारो आखो डील विजावो होसे एने तेरु काहनु हीस्सू आंदारामा नि रोये ती सोब काय आखो ओसो विजावो रोयसे, जोसो तिनी टेमे होयतेलो जेतार दिवू आपना धोपला दिवासी विजावो आपतलो.

शास्त्री एने फरुशी काजे लोळनो

³⁷ जेतार येसु वाते कोरणे बाज रोयू होतु ती एक काहनुस फरुशी विनता कोऱ्यु कि मारेंचा खाणो खा चू माही जायीन खाणो खाणे बोश्यू.

³⁸ फरुशी काजे यो देखीन नोवलाय लागी कि चू खाणो खाणेन पेहेले उंगव्यू नी.

³⁹ प्रभू तीना काजे कोयू, “हे फरुशी तुमु कोवशु एने थाविक उपोर-उपोर गोथा उजावतला, बाकीन तुमरे महाय आंदारो एने रीस भोरली छे.”

⁴⁰ हे बिना ग्यानोन जू बारथे वावु हिस्सू बोनाव्यू, काय चू महाय वावु हिस्सू नि बोनाव्यू?

⁴¹ बाकीन होव, महाय वावी चीजो काजे दान कोर देवू, ती देखू, सोब काय तुमरेन कोरता चुखो होय जासे.

⁴² “बाकीन हे फरुशी, तुमरे पोर हाय तुमु पुदिना एने सुदाबोन एने आखा भातीन भाजी पालान दसवू हिस्सू आपतला, बाकीन न्याय काजे एने परमेश्वरोन मोंग काजे टाव देतेला; जुवतो ते होतो कि तीनाक कोरता रोयतेला एने तीनुक बी नि छुळतला.

⁴³ हे फरुशी, तुमरा मोंग पोर हाय! तुमु प्रार्थना घोरोमा मोटी-मोटी बोसनेण जागा एने हाटोमा नमस्कार हेरतेला.

⁴⁴ हाय तुमरे पोर! काहाकि तुमु इना डूकायला मोळवाट्या सारका छे, जीना पोर माणसे चालतला बाकीन नि जानतला.”

⁴⁵ तेत्यार एक शास्त्रध्यापक तीना काजे जोवाब आप्यू, “हे गुरु, इनी वातो काजे कोयीन तू आमरी नींदा कोरतेलु.”

⁴⁶ चू कोयू, “हे शास्त्रध्यापक तुमरे पोर बी हाय! तुमु ओसा भार जीनु काजे हाकेलनो काठो छे, माणसो पोर मेकतला बाकीन तुमु खुद इना बुजा काजे आपनी एक आंगवे कोरीन बि नी छिमतेला.”

⁴⁷ हाय तुमरे पोर! तुमु तीनु भविष्य कोरतान मोळवाट्या बोनावतेला, जीनु काजे तुमरात बाप दादा मार नाखला होता.

⁴⁸ आखरी तुमु गोवा छे, एने तुमरा बाप दादान कामोमा मेवायला छे! काहाकि चे तीनुक मार नाखला एने तुमु तिंदरा मोळवाट्या बोनावतला.

⁴⁹ इनान कोरता परमेश्वरोन ओकोल बी कोयली छे, “मे तिंदरेनचा भविष्य कोरता काजे एने प्रेषितोन काजे मुकलीस, एने चे तिंदरे मायला काहनास काजे मार नाखसे, एने काहनास काजे तोकलीत देसे.”

⁵⁰ काहाकि जोतरा भविष्य कोरतान लुय जोग बोननेन टेमे वोयलो छे, आखान हिसाब इना कोवीन माणसोसी लेवायसे.

⁵¹ हाबिलोन होत्त्यान चा गोथो लीन जखऱ्यान होत्त्यान चा तोक, जो वेदीन एने मंदीरोन इचमा खुन कोऱ्या मे तुमु काजे छाचलीन कोयो, “इना आखान लेख इनी टेमोन माणसोसी लेवायसे.

⁵² हाय तुमरे शास्त्रध्यापक पोर! तुमु ग्यानोन कुची ली ते लेदला, बाकीन तुमु खुद भोराया नी, एने भोरायने वावा काजे बी रुक देदा.”

⁵³ जेतार येसु चा गोथू निकव्यू ती शास्त्री एने फरुशी घोणा तेरे पोछोव पोळ्या एने छेळने बाज गोया कि चू लोकेत वातोन बारामा कोये,

⁵⁴ एने मारनेन कोरता टीपता रोया कि तेरा मुयोन कानली वात धोरजे.