लुका 10 - बारेली पावरी

सत्तर चेलाक मुकलनो

¹ इनी वातोन ओवतेन प्रभू सत्तर ओवी माणसे नेवाळ्यू, एने जीना-जीना सोहोरमा एने जागे चू जानेवावू होतु, चा तीनुक दुय-दुय कोरीन तेरे ओगोव मूकल्यु.

² चू तीनु काजे कोयू, “पाकलो खेतोमा घोन सोवटो छे, बाकीन दाहाळक्या थुलाक छे; इनान कोरता खेतोन मालिक काजे विनता कोरु कि चू आपनो धान काटणे दाहाळक्या मुकली देये.”

³ जावू; देखू, मे तुमु काजे गाडरान तोसा कुल्यान इचमा मुकोलणे बाज रोयू.

⁴ इनान कोरता नी थोयलू, नी झुवनो, नी खासळा लेजू; एने नि वाटे कुदा काजे नमस्कार कोरजू.

⁵ जिना कुदान घोरमा जाय, पेहेले कोयू, “इना घोरोन भोलो होये.”

⁶ अगर चा कुदू भोलायीन लायक होसे, ती तुमरी भोलाई तिंदरे पोर रोयसे, नीती तुमरेनचा पोछि आवसे.

⁷ तीना घोरोमा रोयू, एने जो काहीन तिंदरे जुव गोथो जोळे चोत खावू-पिवू, काहाकि दाहाळक्या काजे तिंदरी दाहाळकी जोळनु जुवे; घोरे-घोर झुन फिरता.

⁸ जीना सोहोरोमा जासू, एने चांवावा माणसे तुमरु स्वीकार कोरसे एने जो तुमरे सामने आपायसे चोत खावू.

⁹ चा वावा मांदलानु काजे वारू कोरु एने तीनु काजे कोयू, “परमेश्वरोन राज तुमरे साते आव लागलो छे.”

¹⁰ बाकीन जीना सोहोरोमा जासू, एने चा वावा माणसे तुमरू स्वीकार नि कोरे, ती तिंदरा हाटोमा जायीन कोयू,

¹¹ तुमरा सोहोरोन छोयळू बी, जू आमरे पाये लाग रोयू, आमु तुमरे सामने झोटकी देजे; ते बी यो जान लेयू कि परमेश्वरोन राज तुमरे साते आव लागलो छे.

¹² मे तुमु काजे कोय कि तिने दाहळे तीना सोहोरोन हालोत गोथी सदोमोन हालोत जादा वेठनेन लायोक होयसे.

मन नि फिरावने वावा पोर हाय

¹³ “हाय खुराजीन हाय बेथसदा जे मोटला कामे तुमरेमा कोरला, अगर चे सोर एने सिदोनमा कोरायता ती गोनटो पांगरीन एने रुखळामा बोसीन चे कोत्यारून मोन फिराव लेता.”

¹⁴ बाकीन नियावोन दाहळे तुमरी हालोत गोथी सोर एने सिदोनोन हालोत जादा वेठनेन लायोक होसे.

¹⁵ एने हे कफर्णहुम, काय तू सोरगे तोक उचू कोराय जासे? तुते अधोलोक तोक नेचू जायीस.

¹⁶ “जू तुमरी सोमवतलु, चू मारी सोमवतलु; एने जू तुमु काजे नेचू सोमोजतलु, चू मेसे काजे नेचू सोमोजतलु; एने जू मेसेक नेचू सोमोजतलु, चू मेसेक मुकोलने वावा काजे नेचू सोमोजतलु”.

सत्तर चेलान पोछा आवनो

¹⁷ चे सत्तर चेला खुशी कोरता जायीन पोछा आव्या एने कोयने बाज गोया, “हे प्रभू, तारा नावोसी भुंडली आत्मा बी आमरा ताबामा छे”.

¹⁸ येसु तीनु काजे कोयू, मे भुतडा काजे विजवीन तोसु सोरगोमा गोथू पोळतेलु देख रोयू होतु.

¹⁹ देखू मे तुमु काजे घोळसा एने विछाकाजे छेंदीन एने दुष्मोनोन आखा ताकत पोर होक आपलु छे; एने कानली चीजोसी तुमरो काहीन नुकसान नि होये.

²⁰ ते बी इनापोरसी खुश मा होयू कि भुंडली आत्मा तुमरा ताबामा छे, बाकीन इनापोरसी खुश होयू कि तुमरो नाव सोरगोमा लिखलो छे.

पुऱ्यान लारे बासोक देखाळने

²¹ तिने टेमे चू पवित्र आत्मामा भोरायीन खुशीसी भोराय गोयू, एने कोयू, “हे बास, सोरगोन एने कोवीन प्रभू, मे तारो धन्यवाद कोरो कि तू इनी वातो काजे ग्यानवावा एने सोमोजदारी वावासी डूकाळीन मेक्यू, एने पुऱ्या पोर प्रगट कोऱ्यु होव, हे बास, काहाकि तुसेक योत वारलो लाग्यो.”

²² मारू बास मेसेक आखो काहीन आप देदलु छे; एने कुदु नि जानतलो कि पुऱ्यु कुन छे निस्तू बास, एने बास कुन छे ज्योबी कुदू नी जानतला निसतो पुऱ्यान तोरोफसी चू जीना पोर पुऱ्यु तीनाक प्रकट कोरतेलू.

²³ तेत्यार चेला भूनी वोवीन एखला होता ती कोयू, “सोयावा छे चे डूवा, जे ये वाते जे तुमु देख रोया देखतेला छे,

²⁴ काहाकि मे तुमु काजे कोयो कि घोन सोवटा भविष्य कोरता एने राजा इंदरी मोर्जी होती कि ये वाते तुमु देख रोया देखनेंन कोरला बाकीन नि देख्या, एने जे वाते तुमु सोमवने बाज रोया चे वाते सोमवनेन कोरला बाकीन नी सोमव्या.”

वारली सामरीन दाखलू

²⁵ एने देखू, एक शास्त्रध्यापक उठ्यू एने यो कोयीन तेरी परीक्षा कोरणे बाज गोयू, “हे गुरु, ओमोर जीवनोन वारीस होयनेन कोरता मे काय कोरो?”

²⁶ चू तीना काजे कोयू, “बायबोल शास्त्रमा काय लिखलो छे? तू कोसू भोनतेलू?”

²⁷ चू जोवाब आप्यू, “तू प्रभू आपना परमेश्वर पोर आपना आखा मोनोसी एने आपना आखा जीवोसी एने आपनी आखी ताकतसी एने आपना आखा ग्यानोसी मोंग कोर; एने आपना साते वावा काजे आपने सारको मोंग कोर.”

²⁸ चू तीना काजे कोयू, “तू सही जोवाब आप्यू, ओसू कोर ती तू जीवतु रोयीस.”

²⁹ बाकीन चू आपना खुदो काजे धोरमी ठेरावणेन मोर्जी येसु काजे पुछु, “ती मारे साते वावू कुन छे?”

³⁰ येसु जोवाब आप्यू, “एक माणूस यरुशलेममा गोथू यरीहो जातू होतु ती चुटा तेरा छिंदरा निकाव लेदा, एने ठूकीन आदु मोरतू छुळीन जात रोया.

³¹ एने ओसो होयो कि तीनेत वाटे एक पुजारू जाणे बाज रोयू होतु, बाकीन तीनाक देखीन टोवीन जात रोयू.

³² इना रितीसी एक लेवी तीना जागा पोर आव्यु, चू बी तीनाक देखीन टोवीन जात रोयू.

³³ बाकीन एक सामरी यात्री चा आव लाग्यू, एने तीनाक देखीन गिन आवी.

³⁴ चू तीनानचा आवीन तेरा घावोपोर तेल एने आंगुरोन रोस लागाळीन पाटा बांद्यू, एने आपना सवार पोर चोळावीन धोरोम शाळामा लीगोयू एने तेरी सेवा कोऱ्यु.

³⁵ दिसरे दाहळे चू दुय दिनार निकावीन धोरोम शाळान मालिक काजे आप्यू, एने कोयू, ‘एरी चाकरी कोरतू रोयजी, एने जो काहीन तारो एने लागसे, चो मे पोछु आवीन तुसेक आपदिस.’

³⁶ हीमी तारी सोमोजमा जू चूटामा घेराय गोयलु होतु, इनू तीनु जोनामा गोथू तेरु साते वावू कून बोन्यू?

³⁷ चू कोयू, ‘चू जीना पोर चू दया कोऱ्यु’ येसु तीनाक कोयू, ‘जा, तु बी ओसुत कोर.’”

मार्था एने मरीयम

³⁸ जेतार चे जाता होता ती चू एक गावमा गोयू, एने मार्था नावोन एक बाय तीनाक आपने घोर बुलावी.

³⁹ मरीया नावोन तेरी एक बहोनिश होती ची प्रभून पायोंचा बोसीन तेरो वचन सोमवती होती.

⁴⁰ बाकीन मार्था सेवा कोरती-कोरती घाबराय गोयी एने तेरेनचा आवीन कोयने बाज गोयी, “हे प्रभू काय तुसेक काहीन चींता नि होय कि मारी बहोनिश मेसेक सेवा कोरनेन कोरता एखली काजे मेक देदली छे? इनान कोरता तिनी काजे कोय कि मारी मदत कोरे.”

⁴¹ प्रभू तिनी काजे जोवाब आप्यू, “मार्था, हे मार्था; तू घोणा वातोन कोरता चिंता कोरतेली एने घाबराय तेली.

⁴² बाकीन एक वात जोरुरी छे, एने तिना वारला वाटाकाजे मरीया नेवाळ लेदली छे जो तिनी जुव गोथो हापकाये नी.”