लुका 1 - बारेली पावरी

लुकान उद्देश

¹ लोकेत जोना तिनी वातो काजे आमरे इचमा वीतली छे, इतिहास लिखनेमा हात लागाळला छे,

² जोसा कि चे यो पेहेलेन इनी वातो काजे देखने वावा एने वचनोन चेला होता, आमरेनचा तोक पुगाळ्या.

³ इनान कोरता, हे माहाराज थियुफिलुस, मेसेक बी यो वारूत मालूम होयो कि इनी आखी वातोन आखी हाल आखान पेहेलेन खोरो-खोरो तोपास कोरीन, तीना काजे तारे जुगू आकळावारी लिखो.

⁴ काहाकि तू यो पाको जान लेये कि चे वाते जेरो तू शिक्षा लेदलु छे, कोसो पाको छे.

जखऱ्या एने एलीशिबा

⁵ यहुदियान राजा हेरोदोन टेमे अबिय्याहोन वर्गवारी मायला जखऱ्या नावोन एक पुजारू होतु, एने तेरी लाडी हारुनोन पिढी मायली होती जेरो नाव एलीशिबा होतो.

⁶ चे दुयु परमेश्वरोन सामने धोरमी होता, एने प्रभून आखी आग्या एने रिती पोर निरदोष चालने वावा होता.

⁷ तिंदरो पुऱ्या नि होता, काहाकि एलीशिबा वांजाय होती, एने चे दुय बी डुकरा होता.

योहानोन जन्मोन भविष्यवाणी

⁸ जेतार चू आपना वर्गवारी पोर, परमेश्वरोन सामने पुजारान काम कोरतू होतु,

⁹ ती पुजारान रितीन अनसारे तेरा नावोन चिट्ठी निकवी कि प्रभून मंदीरमा जायीन धूप बावे.

¹⁰ धुप बावनेन टेमे माणसोन आखी मंडवी बारथे प्रार्थना कोरती होती.

¹¹ तिने टेमे प्रभून एक दूत धुपोन वेदीन जेवळे धोळे उबरोयलु तिनाक देखाय पोळ्यु.

¹² जखऱ्या देखीन बिहयु एने चू घोनु बिह गोयू.

¹³ बाकीन सोरगोन दूत तीना काजे कोयू, “हे जखऱ्या बिहे मा, काहाकि तारी प्रार्थना सोमवाय गोयली छे; एने तारी लाडी एलीशिबा सी तारेन कोरता एक पुऱ्यु पोयदा होयसे, एने तू तेरो नाव योहान मेकजी.

¹⁴ तुसेक आनंद एने खुशी होयसे एने घोना माणसे तेरा जन्मोन वोजेसी खुश होयसे,

¹⁵ काहाकि चू प्रभून सामने मोटू होयसे; एने आंगुरोन रोस एने मोंद कोबी नि पिये; एने आपनी आशोन कुखोमा गोथूच पवित्र आत्मासी भोराय जासे;.

¹⁶ एने इस्राईलमा गोथू घोना जोना काजे तिंदरा प्रभू परमेश्वर भूनी फिराव से.

¹⁷ चू एलियान आत्मा एने ताकतसी तेरे ओगोव-ओगोव चालसे कि बासोन मोन पुऱ्या पारी भूनी फिराव देसे; एने आग्या नि मानने वावा काजे धोरमीन समजदारी पोर लावसे; एने प्रभून कोरता एक लायक प्रजा तीयार कोरे.”

¹⁸ जखऱ्या सोरगोन दूत काजे पुछु, “यो मे कोसो सोमजो? काहाकि मे ते डाहलू छे; एने मारी लाडी बी डाहली होय गोयली छे.”

¹⁹ सोरगोन दूत तीना काजे जोवाब आप्यू “मे गब्रिएल छे, जु परमेश्वरोन सामने उबरोयतेलू; एने मे तारे पुठी वाते कोरणे एने तुसेक जी वारली खोबर सोमवाळने कोरीन मुकलाय गोयलु छे.

²⁰ देख, जिने दाहळे तोक ये वाते पुरा नि होय जाय, तिने दाहळे तोक तू मुक्कू रोयसे एने बुल नी सोके, इनान कोरता कि तू मारी वातो काजे जी आपना टेम पोर पुरी होयसे, भुरसू नी कोऱ्यु.”

²¹ माणसे जखऱ्यान वाट देखता रोया एने नोवलाय कोरणे बाज गोया कि तीना काजे मंदीरमा ओतरी वार काहा लागी.

²² जेतार चू बारथे आव्यु, ती तिंदरे पुठी बुली नी सोक्यू आखरी चे सोमजी गोया कि चू मंदीरमा काहीन दर्शन देखलू छे; एने चू तिंदरेसी इशारू कोरतू रोयू, एने मुक्कू रोय गोयू.

²³ जेतार तेरा सेवा कोरनेन दाहळा पुरा होय गोया, ती चू तेरे घोर जात रोयू.

²⁴ इनू दाहळान ओवतेन तेरी लाडी एलीशिबा भारीस होय गोयी; एने पाच मोहना तोक खुदो काजे यो कोयीन डुकाळीन राखी,

²⁵ माणसोमा मारी अपमान नांबे कोरनेन कोरता, प्रभू इनू दाहळामा मोंगोन नोजोर कोरीन मारेन कोरता ओसू कोरलु छे.

सोरगो दूत एने मरीयम

²⁶ छोव मोहनामा परमेश्वरोनचा गोथू गब्रिएल सोरगो दूत, गलीलोन नासरेथ सोहोरोमा, एक कुवारीन चा मुकलायु.

²⁷ जेरी जूळावनी युसूफ नावोन दाऊदन घोरानान एक ओदमी साते होयली होती तिनी कुवारीन नाव मरीया होतो.

²⁸ एने सोरगो दूत तीनिनचा माहाय आवीन कोयू, “खुशी एने जीत तारी होये, जीना पोर परमेश्वरोन दया होयली छे! प्रभू तारे पुठी छे.”

²⁹ ची इना वचनोपोर सी घोनी बिह गोयी, एने फोम कोरणे बाज गोयी कि यो काहना भातीन अभिवादन छे.

³⁰ सोरग दूत तिनी काजे कोयू, “हे मरीया, बिहे मा, काहाकि परमेश्वरोन दया तार पोर होयली छे.”

³¹ देख, तू भारीस होयीस, एने तारू एक पुऱ्यु पोयदा होयसे; तू तेरो नाव येसु मेकजी.

³² चू मोटू होयसे एने परमप्रधानोन पुऱ्यु कोवायसे; एने प्रभू परमेश्वर तेरु बास दाऊदन राज गादी तीना काजे आपसे,

³³ एने चू याकुबोन घोरोपोर हमेशा राज कोरसे; एने तेरा राजोन आखरी नी होये.

³⁴ मरीया सोरगो दूत काजे कोयी, “यो कोसो होयसे मे ते ओदमी काजे जानतेली तोक नी.”

³⁵ सोरगो दूत तिनी काजे जोवाब आप्यू, पवित्र आत्मा तारे पोर आवसे, एने परमप्रधानोन ताकत तारे पोर सहावू कोरसे; इनान कोरता चू पवित्र जू पोयदा होयने वावू छे, परमेश्वरोन पुऱ्यु कोवायसे.

³⁶ एने देख तारा परिवार मायली एलीशिबान बी डाहावारामा पुऱ्यु होयने वावु छे, यो तेरो, जी वांजाय कोवायती होती छोव मोहनो छे.

³⁷ काहाकि यो वचन परमेश्वर भूनी गोथो रोयतेला छे चो होये नी ओसो नी रोयतेला.

³⁸ मरीया कोयी, “देख, मे प्रभून सेविका छे, मेसेक तारा वचनोन अनसारे होये,” तेत्यार सोरगो दूत तीनिनचा गोथू जात रोयू.

मारियान एने एलीशिबान भेट

³⁹ तीनु दाहळामा मरीया उठीन मामार बोयळान देसोमा यहुदा सोहोरोमा गोयी,

⁴⁰ एने जखऱ्यान घोरोमा जायीन एलीशिबा काजे नमस्कार कोरी.

⁴¹ जोसी एलीशिबा मरीयान नमस्कार सोमवी, तोसोच पुऱ्यो तेरा पेटमा उछव्यो, एने अलीशीबा पवित्र आत्मासी भोराय गोयी.

⁴² एने ची मोटेत बुलोसी आयळीन कोयी, “तु बायरामा सोयावी छे, एने तारो पेटोन फोव सोयावो छे.”

⁴³ यो मोंग मार पोर का गोथो होयो कि मारा प्रभून आया मारेंचा आवी?

⁴⁴ देख, जोसो तारू नमस्कारोन बुल मारे कानटे पोळ्यु, तोसोच पुऱ्यो मारा पेटोमा खुशीसी उछोव पोळ्यो.

⁴⁵ सोयावा छे जे तीना पोर भुरसू कोऱ्या कि जी वात प्रभून तोरोफसी तीनुक कोवायली, ची पुरी होयसे.

मरीयमन बोडाइन गीत

⁴⁶ तेत्यार मरीया कोयी, “मारू जीव प्रभून बोढाई कोरे

⁴⁷ एने मारी आत्मा मारू छुटकारू कोरणे वावा परमेश्वर पोर खुश होयी,

⁴⁸ काहाकि चू आपनी सेविकान दिनतापोर नोजोर कोरलु छे; इनान कोरता देखू हीमी गोथा आखा कोवी-कोवीन माणसे मेसेक सोयावी कोयसे,

⁴⁹ काहाकि चू ताकत वावू मारेन कोरीन मोट-मोटा कामे कोरलु छे तेरो नाव चुखलो छे,

⁵⁰ एने तेरी दया इनुपोर, जे तीना काजे बिहतेला छे, पिढ्यान पिढ्या तोक बोनली रोयतली छे

⁵¹ चू आपनु पोराक्रोम देखाळ्यू, एने जे खुदो काजे मोटा सोमजता होता, तीनु काजे वेरा-वेर कोऱ्यु

⁵² चू अधिपती काजे तिंदरा राज गादीपोर गोथू पाळ देदू; एने गोरीबो काजे उचा कोऱ्यु

⁵³ चू भूकला काजे वारला चीजोसी आफराव देदू, एने मालदार काजे ठारले हाते निकाव देदू

⁵⁴ चु आपना सेवक इस्राईल काजे सोमाव लेदू कि आपनी तिनी दया काजे फोम कोरे,

⁵⁵ जु अब्राहाम एने तेरा पिढीपोर हमेशा रोयसे, जोसू चू आमरा आडा-बुढा काजे कोयलु होतु.”

⁵⁶ मरीया लोग-भोग तीन मोहना तेरे पुठी रोयीन तेरे घोर आवती रोयी.

बाप्तिस्मा आपनेवावान जन्मो

⁵⁷ तेत्यार एलीशिबान पोखळायनेन टेम पुरी होय गोयी, एने ची पुऱ्या काजे जन्मो आपी.

⁵⁸ तेरे साते वावा एने परिवार वावा यो सोमवीन कि प्रभू तिनी पोर मोटीत दया कोरलु छे, तेरे साते खुशी कोऱ्या,

⁵⁹ एने ओसो होयो कि आठवे दाहळे चे पुऱ्यान सुंता कोरणे आव्या एने तेरो नाव बासोन नावोपोरसी जखऱ्या मेकने बाज गोया.

⁶⁰ इनापोरसी तेरी आया जोवाब आपी, “नि बाकीन हेरो नाव योहान मेकनो जुवे.”

⁶¹ चे तिनी काजे कोया, “तारा परिवार मा कुदान यो नाव नि होय.”

⁶² तेत्यार चे तेरा बाबा काजे इशारू कोरीन पुछ्या कि तू तेरो नाव काय मेकने होय रोयू?

⁶³ चू लिखनेन पाटी मांगाळीन लिख देदू, “तिनान नाव योहान छे, एने आखा काजे नोवलाय लागी.”

⁶⁴ तेत्यार तेरो मुय एने जीब तेत्यारुत उगळी गोयी; एने चू बुलणे एने परमेश्वरोन धन्यवाद कोरणे बाज गोयू.

⁶⁵ तेरे आळी छेळी आखा रोयने वावामा बिक भोराय गोयी; एने इनी आखी वातोन खोबर यहुदिया आखा बोयळा मायला देसोमा फीर गोयी,

⁶⁶ एने आखा सोमवने वावा आपना-आपना मोनोमा विचार कोरीन कोया, “यु पुऱ्यु कोसू होसे?” काहाकि परमेश्वरोन हात तेरे पुठी होतु.

जखऱ्यान भविष्यवाणी

⁶⁷ तेरु बास जखऱ्या पवित्र आत्मासी भोराय गोयू, एने भविष्यवाणी कोरणे बाज गोय.

⁶⁸ प्रभू इस्राईलोन परमेश्वर सोयावा होये, काहाकि चु आपना माणसो पोर नोजोर कोऱ्यु एने तिंदरू छुटकारू कोरलु छे,

⁶⁹ एने आपनु सेवक दाऊदन घोरानामा आमरेन कोरीन छुटकारान सिंगडा निकव्यो,

⁷⁰ (जोसू चू आपना चुखला भविष्य कोरतान लारे जो जोगोमा पेहेले गोथो होयतो आवलो छे कोयलु होतु,)

⁷¹ मतलब आमरा दुष्मोनसी, एने आमरा आखा दुष्मोनोन हातोसी आमरू छुटकारू कोरलु छे,

⁷² कि आमरा आळखा-बुळकापोर दया कोरीन आपनी चुखला वायदान फोम कोरे,

⁷³ एने ची कोसोम जी चू आमरू बास अब्राहाम साते कोरलु होतु,

⁷⁴ कि चू आमुक यो आपे कि आमु आमरा दुष्मोन हातोसी छुटकारू होये एने नि बिहता जाईन परमेश्वरोन सेवा कोरनेन कोरता मोकू जुळे,

⁷⁵ तेरे सामने पवित्र एने धोरमीसी उमोर भोर मजबूत रोयीन तेरी सेवा कोरता रोयजे

⁷⁶ एने तू हे पुऱ्या, परमप्रधानोन भविष्य कोरता कोवायीस, काहाकि तु प्रभून वाट तीयार कोरणे कोरता तेरे ओगोव-ओगोव चालीस,

⁷⁷ कि तेरा माणसो काजे छुटकारान ग्यान आपे, यो तिंदरा पापोन माफीसी जोळतेलो छे

⁷⁸ यो आमरा परमेश्वरोन इनी मोटीत दयासी होयसे; जिनान वजेसी आमरेपोर सोंदारेन विजावो उगसे,

⁷⁹ कि आंदारान एने मोतोन सहावामा बोसने वावा काजे विजावो आपे, एने आमरा पायो काजे शांतीन वाटे सुदा चालाळे,

⁸⁰ एने चो पुऱ्यो मोटो होयतो एने आत्मामा मजबूत होयतो गोयो, एने इस्राईलोन सामने आवनेन दाहळे तोक बोयळामा रोयू.