योहान 8 - बारेली पावरी

पाप कोरने वावाक माफी

¹ बाकीन येसु जेतुनोन बोयळा पोर गोयू.

² सोंदारे वेगुत चू ओवी मंदीरमा आव्यु; आखा माणसे तेरेनचा आव्या एने चू बोसीन तीनुक प्रचार देणे बाज गोयू.

³ तेत्यार शास्त्री एने फरुशी एक बायर काजे जी भुंडला काम कोरतेली धोरायली होती, एने तिनी काजे इचमा उभराखीन येसु काजे कोया,

⁴ “हे गुरु, जी बायर भुंडलो काम कोरतेली धोरला छे.

⁵ नियम शास्त्राम मुसा आमु काजे आग्या आपलु छे कि ओसला बायरापोर दोगळ मार कोरु आखरी तू इनी बायरीन बारामा काय कोयने छे?”

⁶ चे तीना काजे पारखने कोरता यी वात कोयु काहाकि तीना पोर गुणू लागाळने कोरता काहीन वात जोळे बाकीन येसु वाकु वोवीन आंगवे कोरीन धोरती पोर लिखने बाज गोयू.

⁷ जेतार चे तीनाक पुछता रोया, ती चू सुधू होईन तीनु काजे कोयू “तुमरेमा जू चुखलु छे चू पेहेले दोगळू देये.”

⁸ एने ओवी वाकीन धोरती पोर आंगवे कोरीन लिखने बाज गोयू.

⁹ बाकीन चे यो सोमवीन मोटला मा गोथा नानला तोक, एक-एक जोणु जात रोया एने येसु एखलु रोय गोयू, एने ची बायोर इचमात उभी रोयी.

¹⁰ येसु सुदू होईन तिनी काजे कोयू, “हे नारी, चे कां गोया? काय कुदू बी तुसेक दोंडोन आग्या नी आप्यू?”

¹¹ ची कोयी, “हे प्रभू, कुदू नी” येसु कोयू, “मे बी तुसेक दोंडोन आग्या नि आपतू; जा, एने ओवी पाप झुनी कोरती.”

येसु जोगोन दिवू

¹² येसु ओवी माणसो काजे कोयू “जोगोन विजावो मे छे; जू मार पोछोव आवसे चू आंदाराम नि चाले, बाकीन जीवनोन विजावो जोळसे.”

¹³ फरुशी तीना काजे कोया, “तू खुदोन गोवायी खुद आपतलु, तारी गोवायी खोरली नि होय.”

¹⁴ येसु तीना काजे जोवाब आप्यू, “भलेत मे मारी गोवायी आपतलु, ते बी मारी गोवायी खोरली छे, काहाकि मेसेक मालूम छे कि मे का गोथू आव रोयू एने का जाणे बाज रोयू? बाकीन तुमुक नि मालूम होय कि मे का गोथू आव रोयू एने का जाणे बाज रोयू.

¹⁵ तुमु डीलोन अनसारे नियाव कोरतेला; मी कुदान नियाव नि कोरतेलु.

¹⁶ ओगर मे नियाव कोरे बी, ती मारू नियाव खोरलू छे; काहाकि मे एखलु नि, बाकीन मेत छे, एने बास चे यु मेसेक मूकल्यु.

¹⁷ तुमरा नियम शास्त्रमा बी लिखलो छे; कि दुय जोनान गोवायी खोरली रोयतली.

¹⁸ एक ते मे खुद आपनी गोवायी आपो, एने दिसरू बास मारी गोवायी देतलु यु मेसेक मूकल्यु.”

¹⁹ चे तीना काजे कोया, “तार बास कां छे?” येसु जोवाब आप्यू, “नि तुमु मेसेक उवखतला, नि मारा बासो काजे, ओगर मेसेक उवखता ती मारा बासो काजे बी उवखता.”

²⁰ जे वाते चू मंदीरमा प्रचार आपतू होतु ती भोंडार घोरोमा कानखुर, एने कुदू तीना काजे नि धोऱ्या काहाकि तेरी टेम हांजू तोक नि आवली होती.

खुदोन बारामा येसुन कहानी

²¹ चू ओवी तीनु काजे कोयू, “मे जाणे बाज रोयू एने तुमु मेसेक हेरसू एने खुदोन पापोमा मोरसू; जा मे जाणे बाज रोयू, चा तुमु नि आव सोकतला.”

²² इनापोरसी यहुदि माणसे कोया, “काय चू खुदो काजे मार नाखसे, जू कोयतलू, ‘जा मे जाणे बाज रोयू चा तुमु नी आव सोकतला?’”

²³ येसु तीनु काजे कोयू, “तुमु नेचलान छे, मे उपोर गोथू छे; तुमु जोगोन छे, मी जोगोन नि होय.

²⁴ इनान कोरता मी तुमु काजे कोयो कि खुदोन आपना पापोमा मोरसू, काहाकि ओगर तुमु भुरसू नि कोरे कि मे चू छे ती खुद आपना पापोमा मोरसू.”

²⁵ चे तीना काजे कोया, “तू कून छे?” येसु तीनु काजे कोयू, “चू छे जू सूरवात मा गोथू तुमु काजे कोयतू आव रोयू.”

²⁶ तुमरा बारामा मेसेक घोनो काहीन कोयनो एने ठेरावणो छे; बाकीन मेसेक मुकलने वावू खोरलू छे, एने जो मे तिना जुव गोथू सोमवलू चोत जोगो काजे कोयतेलु.

²⁷ चे यो नी सोमज्या कि आमुक बासोन बारामा कोय रोयू.

²⁸ तेत्यार येसु कोयू, “जेतार तुमु माणसोन पुऱ्याक उचला पोर चोळावसे, ती जानसु कि मे चू छे; मे आपना खुदो काजे काहीन नि कोरतु बाकीन जोसू मारू बास मेसेक सोमवाळ्यु तोसोत जे वाते कोय रोयू.

²⁹ मेसेक मुकलने वावू मारे पुठी छे; चे मेसेक एखलु नि छुळयु काहाकि मी हमेशा चोत काम कोरतेलु जीनासी चू खुश रोयतलु.”

³⁰ चू ये वाते कोयनेत बाज रोयू होतु ती घोना सोवटा जोना तीना पोर भुरसू कोऱ्या.

खराय तुमु छुळावसे

³¹ तेत्यार येसु तीनु यहुदिनुक जे येसु पोर भुरसू कोरता होता, कोयू, ओगर तुमु मारा वचन पोर टेकिन रोयसे, ती छाचलीन मारा चेला ठेरायसु.

³² तुमु खोरला काजे जानसु, एने तुमुक छुळावसे.

³³ चे तीनाक जोवाब आप्या, “आमु ते अब्राहामन पिढी मायलु छे, एने कोबी कुदान गुलाम नि होये ती तू कोसू कोरतेलू कि तुमु छुळवाय जासू?”

³⁴ येसु तीनु काजे जोवाब आप्यू, “मे तुमु काजे छाचलीन-छाचलीन कोयो कि यु कुदू पाप कोरतेलू चू पापोन गुलाम छे.”

³⁵ गुलाम हमेशा घोरमा नि रोयतलु; पुऱ्यु हमेशा रोयतलु.

³⁶ इनान कोरता ओगर पुऱ्यु तुमुक छुळावसे, ती छाचलीन तुमु छुळवाय जावू.

³⁷ मेसेक मालूम छे तू अब्राहामन पिढी मायलु छे; ते बी मारो वचन तुमरा डीलोमा जागू नि जोळतलु, इनान कोरता तुमु मेसेक मार नाखनेन कोरतेला.

³⁸ मे चोत कोरतेलु, जो मारेनचा देखलू छे; एने तुमु चोत कोरता रोयतेला यो तुमु आपना बासोन सोमवला छे.

³⁹ चू तिना काजे जोवाब आप्यू, “आमरू बास ते अब्राहामन छे” येसु तीनु काजे कोयू, “ओगर तुमु अब्राहामन पुऱ्या होता, ती अब्राहामन तोसा काम कोरता.”

⁴⁰ बाकीन हिमी तुमु मार सारखा माणसोक मारणे कोरतेला यु तुमुक खोरलो वचन देखाळतलू जो परमेश्वर जू सोमवतलु; ओसो ते अब्राहाम नी कोयु.

⁴¹ “तुमु आपना बासोन तोसो काम कोरतेला” चे तीनाक कोया, “आमु भुंडला विचारसी नी जोनाया, आमरू एक बास चे मतलब परमेश्वर.”

⁴² येसु तीनु काजे कोयू, “कोदि परमेश्वर तुमरू बास रोयतु, ती तुमु मार पोर मोंग कोरता; काहाकि परमेश्वर भूनी गोथू आव रोयू मे मार मारे नि आव्यु, बाकीन चू मेसेक मूकल्यु.

⁴³ तुमु मारी वात काहा नि सोमोजतेला? इनान कोरता कि तुमु मारो वचन सोमवी नि सोकतला.

⁴⁴ तुमु तुमरा बास भुतडासी छे एने तुमरा बासोन मोर्जी काजे पुरी कोरणे चाहतला. चू ते सुरवाती गोथूच हत्यारु एने खोरला पोर सुदू नि रोयू, काहाकि खोरलो तीनामा होतो नि जेतार चू झूट बुलतलु, ती तेरा स्वभावमा गोथूच बुलतलू; काहाकि चू झुटू छे एने झुटोन बास छे.

⁴⁵ बाकीन मे यो छाचलीन बुलने बाज रोयू, इनान कोरता मार पोर भुरसू नि कोरता.

⁴⁶ तुमरे माईन कून मेसेक पापी ठेरावतलू? ओगर मे छाचलीन बुलतलू, ती मार पोर भुरसू काहा नि कोरतेला?

⁴⁷ जो परमेश्वर भूनी रोयतलो, चो परमेश्वरोन वाते सोमवतलू; एने तुमु इनान कोरीन नि सोमवतला कि परमेश्वर भूनी गोथो नि होय.”

येसु एने अब्राहाम

⁴⁸ यो सोमवीन यहुदि तीना काजे कोया, “काय आमु वारलो नि कोरतेला कि तू सामरी छे, एने तारेमा भुंडली आत्मा छे?”

⁴⁹ येसु जोवाब आप्यू, “मारेमा भुंडली आत्मा नि होय; बाकीन मे मारा बासोन मान कोरतेलू, एने तुमु मारु मान नि कोरतेला.”

⁵⁰ बाकीन मेसेक मारी महिमा नि जुवती; होव, एक छे जो मेसेक गोवतेलो एने नियाव कोरतेला.

⁵¹ मी तुमु काजे छाचलीन-छाचलीन कोय कि “ओगर कुदू माणूस मारा वचनोपोर चालतलु, ती चू ओमोर काव तोक मोत नि देखे.”

⁵² यहुदि तीना काजे कोया, “हिमी जान लेदा कि तारेमा भुंडली आत्मा छे अब्राहाम मोर गोयू, एने भविष्य कोरता बी मोर गोयला छे; एने तू कोयतलू, ओगर कुदु मारा वचन पोर चालतलु चू मोतन सोवाद नि चाखे.”

⁵³ आमरू बास अब्राहाम ते मोरगोयु काय तू तीना गोथू बी मोटू छे? एने भविष्य कोरता बी मोर गोया तू आपना खुदो काजे काय ठेरावतलू?

⁵⁴ येसु जोवाब आप्यू, “ओगर मे मारा खुदोन महिमा कोरो, ती मारी महिमा काहीच नि; बाकीन मारी महिमा कोरणे वावा मारा बासोन छे, जीनु काजे तुमु कोयतेला कि चू तुमरू परमेश्वर छे.

⁵⁵ तुमु ते तीनाक नि जानतला बाकीन मे ते तीनाक जानतलु ओगर मी कोय कि मी तीनाक नि जानतलु ती मे तुमरेन तोसु झुटू ठेरायीस; बाकीन मे तीनाक जानतलु एने तेरा वचनोपोर चालतलु.

⁵⁶ तुमरु बास अब्राहाम मारा दाहळा देखनेन आसो खुश होतु; एने चू देख्यू एने खुशी कोऱ्यु.”

⁵⁷ यहुदि तीना काजे कोया, “हिमी तोक तू पोचास सालोन नि होयू, तीबी तू अब्राहाम काजे देख रोयू?”

⁵⁸ येसु तीनु काजे कोयू, “मी तुमु काजे छाचलीन-छाचलीन कोयो, कि अब्राहामन पेहेले, मी छे.”

⁵⁹ तेत्यार चे तीनाक मार नाखणेन कोरता दोगळा चुट्या, बाकीन येसु डूकायीन मंदीरमा गोथू निकवी गोयू.