योहान 6 - बारेली पावरी

पाच हजार माणसोक खावाळनो

¹ इनी वातोन ओवतेन येसु गलीलोन दारीयामा मतलब तिबिरियासोन दोरीयान पोल धोळे गोयू.

² एने एक मोटी भीळ तेरे पोछोव होय गोयी काहाकि जे मोटला काम चू मांदला पोर देखाळतू होतु तीना काजे देखता होता.

³ तेत्यार येसु बोयळा पोर चोळीन आपना चेला साते चा बोठ गोयू.

⁴ यहुदिन वोलांडोनोन तीहीवार साते आव रोयू होतु.

⁵ जेतार येसु तेरा डूवा उचा कोरीन एक मोटीत गोरदी काजे आपने साते आवतेली देख्यू, ती फिलीप काजे कोयू, “आपु इनुक खाणेन कोरता का गोथू रुटा मुले लावणे?”

⁶ चू जी वात तीनाक पारखने कोरता कोयू, काहाकि चू आपसुत जानतू होतु कि चू काय कोरसे.

⁷ फिलीप तीनाक जोवाब आप्यू, “दुय सोव दिनारोन रुटा बी तिंदरेन कोरता पुरा नि होये कि तिंदरेमा हर एक जोना वाटू थुळो-थुळो जोळ जाये.”

⁸ तेरा चेलामा गोथू शिमोन पतरसोन भाश अन्द्रियास तीनुक कोयू,

⁹ “न्या एक पुऱ्यु छे जेरे जुव जुवारीन पाच रुटा एने दुय माछा छे; बाकीन ओतरा माणसोन कोरता ओतरो होय जासे काय?”

¹⁰ येसु कोयू, “माणसो काजे बोसाळ देवू,” तिना जागा पोर घोनो खोळो होतो तेत्यार माणसे जीना माणसोन आकळू आस पास पाच होजारोन होतु, बोस गोया.

¹¹ तेत्यार येसु रुठा लेदू, एने धन्यवाद कोरीन बोसने वावा काजे वाट देदु; एने तोसोच माछामा गोथो जोतरो तीनु काजे जुवतो होतो वाट देदा.

¹² जेतार चे खायीन आफरी गोया ती चू आपना चेला काजे कोयू, “वाचला तुकडा एखठा कोर देय कि काहीन नाखाय नि जाय.”

¹³ आखरी चे एखठा कोऱ्या, एने जुवारीन पाच रुटान तुकडा सी जे खाणे वावा गोथो वाचलो होतो, बारा टूपल्या भोराया.

¹⁴ तेत्यार यो मोटलो काम चू कोरीन देखाळ्यू तीनाक चे माणसे देखीन कोयने बाज गोया, “यु खोरलु भविष्य कोरता जू जोगोमा आवने वावु होतु चू युत छे.”

¹⁵ येसु यो जानीन कि चे मेसेक राजा बोनावनेन कोरता धोरणे हिंड रोया, पोछु बोयडा पोर एखलुत जात रोयू.

येसुन पाणी पोर चालनो

¹⁶ जेतार सांतो होयो, ती तेरा चेला गलीलोन दोरीयान काठे गोया,

¹⁷ एने ढोंड्या पोर चोळीन दोरीयान पार कफर्णहुम काजे जाणे बाज गोया तिने टेमे आंदारो होय गोयलो होतो, एने येसु हिमी तोक नी आवलु होतु.

¹⁸ आंजीन वोजेसी दोरीयामा झेलके उठने बाज गोया.

¹⁹ जेतार चे चालाळता-चालाळता तीन-च्यार मिलोन लगभग निकवी गोया, तेत्यार येसु काजे दोरीया पोर चालतलु एने ढोंड्यान साते आवतेलु देख्या, एने बिह गोया.

²⁰ बाकीन चू तीनु काजे कोयू, “मे छे; बिहू मा.”

²¹ आखरी चे तिनाक ढोंड्या पोर चोळावनेन कोरता तीयार होया एने तेतारुत चो ढोंड्या तिना जागा पोर जायीन पुग्यो जा चे जाता होता.

माणसोन येसु काजे हेरनो

²² दिसरे दाहळे ची भीळ, जी दोरीयान पोल धोळे उभी होती, यो देख्यू कि न्या एक काजे छुळीन ओवी कहानलो नानलो ढोंड्यो नि होतो; एने येसु आपना चेला पुठी ढोंड्या पोर नी चोळलु होतु, बाकीन निसता तेरा चेलात गोयला होता.

²³ तेत्यार दिसरा ढोंड्या तिबिरियास गोथा तिना जागान साते आव्या, जा चे प्रभून धन्यवाद कोरनेन ओवते रुटू खादला होता.

²⁴ इनान कोरता जेतार गोरदी मायला देख्या कि न्या नि येसु होय एने नि तेरा चेला, ती चे बी ढोंड्यो पोर चोळीन येसु काजे हेरता-हेरता कफर्णहुम पुग्या.

येसु जीवनोन रुटू

²⁵ दोरीयान पार जेतार चे तीनु काजे मेव्या ती कोया, “हे रब्बी, तू न्या कोत्यार आव्यु?”

²⁶ येसु जोवाब आप्यू, “मे तुमु काजे छाचलीन-छाचलीन कोयो, तुमु मेसे काजे इनान कोरता नि हेरता कि तुमु मोटला कामे देख्या, बाकीन इनान कोरता कि तुमु रुटा खायीन आफरी गोया.

²⁷ नाश होयने वावा खाणान कोरीन मेहनत मा कोरु, बाकीन तीना खाणान कोरीन जो ओमोर जीवन तोक उबो रोये, जीनाक माणसोन पुऱ्यु तुमुक आपसे; काहाकि बास मतलब परमेश्वर तीना पोर छापू लागाळलु छे.”

²⁸ चे येसु काजे कोया, “परमेश्वरोन काम कोरनेन कोरीन आमु काय कोरजे?”

²⁹ येसु तीनुक जोवाब आप्यू, “परमेश्वरोन काम योत छे कि तुमु तीना पोर, जीनाक चू मुकलु छे, भुरसू कोरु,”

³⁰ तेत्यार चे तीनाक कोया, “तेत्यार तू काहनलो चमत्कार देखाळतलु छे कि आमु तीनाक देखीन तारू भुरसू कोरजे? तू काहनलो काम देखाळतलु छे?

³¹ आमरा बाप दादा बोयळामा मन्ना खादा; जोसो लिखलो छे, चू तीनुक खाणेन कोरीन सोरगोमा गोथू रुटा आप्यू.”

³² येसु तीनु काजे कोयू, “मे तुमु काजे छाचलीन-छाचलीन कोयो कि मुसा तुमु काजे चे रुटा सोरगोमा गोथू नि आप्यू, बाकीन मारू बास तुमुक खोरलू रुटू सोरगोमा गोथू आपतलु छे.

³³ काहाकि परमेश्वरोन रुटू युत छे जो सोरगोमा गोथो उतरीन जोगो काजे जीवन आपतलो छे.”

³⁴ तेत्यार चे येसु काजे कोया, “हे प्रभू, यु रुटू आमुक हमेशा आप्या कोर.”

³⁵ येसु तीनुक कोयू, “जीवनोन रुटू मेत छे जू मारे साते आवे छे चू कोबी भूकलू नि रोये, एने जो मार पोर भुरसू कोरे चू कोबी तीसलु नि रोये.

³⁶ बाकीन मे तुमु काजे कोयलु होतु कि तुमु मेसे काजे देखी बी लेदला छे तीबी भुरसू नि कोरतेला.

³⁷ जो काहीन बास मेसेक आपतलु छे चो आखो मारेनचा आवसे, एने जू कुदू मारेनचा आवसे तीना काजे मे कोबी बी नी निकावो.

³⁸ काहाकि मे मारा मोर्जी नि बाकीन आपने मुकलने वावान मोर्जी पुरी कोरनेन कोरता सोरगे गोथू उतरलू छे;

³⁹ एने मेसेक मुकलनेन वावान मोर्जी जी छे कि जो काय चू मेसेक आपलु छे, तीनामा गोथू मे काय नि खाम, बाकीन तीनाक आखरी दाहळे पोछु जीव उठाळीस.

⁴⁰ काहाकि मारा बासोन मोर्जी जीत छे कि जो कुदू पुऱ्या काजे देखीन एने तीना पोर भुरसू कोरे; तीनाक ओमोर जीवन जोळे; एने मे तीनाक आखरी दाहळे पोछु जीव उठाळीस.”

⁴¹ इनान कोरता यहुदि तीना पोर कुरकुर कोरणे बाज गोया, काहाकि चू कोयलु होतु, “यु रुटू सोरगे गोथू उतऱ्यु चू मेत छे.”

⁴² एने चे कोया, “काय यु युसूफोन पुऱ्यु येसु नि होय, जिनान आसी-बासा काजे आमु जानतेला छे? ती यु कोसू कोये कि मे सोरगे गोथू उतरलु छे?”

⁴³ येसु तीनुक जोवाब आप्यू, “आपोसमा कुरकुर मा कोरु.

⁴⁴ कुदु मारे साते नि आव सोकतलू जेतार तोक बास, जू मेसेक मुकलू छे, तीनाक हापकी नि लेये; एने मे तीनाक आखरी दाहळे पोछु जीव उठाळीस.

⁴⁵ भविष्य कोरतान लेखो मा यो लिखलो छे ‘चो आखो परमेश्वर जुव गोथो लिखाय गोयो होसे’ जो कुदु बासो जूव गोथो सोमव्या एने सीखला छे, चे मारे साते आवसे.

⁴⁶ यो नि कि कुदु बासो काजे देखलो छे बाकीन यो परमेश्वर जुव गोथो छे, निसतू चू बासो काजे देखलू छे.

⁴⁷ मी तुमु काजे छाचलीन-छाचलीन कोयो कि जू कुदू भुरसू कोरतेलू छे, ओमोर जीवन तेरोत छे.

⁴⁸ जीवनोन रुटू मेत छे.

⁴⁹ तुमरा बाप दादा बोयळामा मन्ना खादा एने मोर गोया.

⁵⁰ यु चू रुटू छे जो सोरगे गोथो उतेरतलो छे काहाकि माणसे तीनाक खाय एने नि मोरे.

⁵¹ जीवनोन रुटू जो सोरगे गोथो उतऱ्यु, मी छे कोबी कुदू इना रुटाम गोथू खाय, ती कायम जीवतलु रोयसे; एने यु रुटू मे जोगोन जीवनोन कोरता आपीस, चो मारो मास छे.”

⁵² इनापोरसी यहुदि यो कोयीन आपोसमा लोळायने बाज गोया, “यु माणूस कोसू आमुक आपनो मास खाणे आप सोकतलु छे?”

⁵³ येसु तीनु काजे कोयू, “मे तुमु काजे छाचलीन-छाचलीन कोयो कि जेतार तोक तुमु माणसोन पुऱ्यान मास नि खाय, एने तेरो लुय नि पिये, तुमरेमा जीवन नि.”

⁵⁴ जू मारो मास खातलु एने मारो लुय पितलु छे, ओमोर जीवन तीरोत छे; एने मे तीनाक आखरी दाहळे एने जीव उठाळीस.

⁵⁵ काहाकि मारो मास देखणे जाय ती खाणेन चीज छे, एने मारो लुय देखणे जाय ती पिणेन चीज छे.

⁵⁶ जो मारो मास खातलो एने मारो लुय पितलो चो मारेमा पाको बोनीन रोयतलो छे, एने मे तेरेमा.

⁵⁷ जोसो जीवतलु बास मेसेक मूकल्यु, एने मे बासोन वोजेसी जीवतलु छे, तोसुच चू बी यु मेसेक खासे जीवतलु रोयसे.

⁵⁸ जू रुटू सोरगे गोथू उतरलु छे, तिना रुटा सारखो नि जीनाक बाप दादा खादला एने मोर गोया; जू कुदु यु रुटू खासे, चू कायम जीवतलु रोयसे.

⁵⁹ जी वात चू कफर्णहुमोन एक प्रार्थना घोरोमा सिकाळतू जाईन कोयू.

ओमोरकाई जीवनोन वचन

⁶⁰ तेरा चेला मायला घोणा सोवटा यो सोमवीन कोया, “जी काठली वात छे; इना काजे कून सोमवी सोकतलो छे?”

⁶¹ येसु आपना मोनोमा यो जाणीन कि मारा चेला आपोसमा इनी वातो पोर कुरकुर कोर रोया, चू पुछु, “काय इना वातोसी तुमुक ठूकर लागतली छे?”

⁶² कोदि तुमु माणसोन पुऱ्या काजे जा चू पेहेले होतु, चा उपोर जातलू देखसे, ती काय होयसे?

⁶³ आत्मा ते जीवन छे, डीलोसी काय फायदु नि होय; जी वात मे तुमु काजे कोयलु छे ची आत्मा छे, एने जीवन बी छे.

⁶⁴ बाकीन तुमरेमा गोथा कहानास ओसला छे जे भुरसू नि कोरतेला काहाकि येसु पेहेलू गोथू जानतू होतु कि जे भुरसू नि कोरतेला, चे कून छे; एने कून मेसे काजे धोरावसे.

⁶⁵ एने येसु कोयू, “इनान कोरता मे तुमु काजे कोयलु होतु कि जेतार तोक कुदा काजे बासो जूव गोथो यो वरदान नि आपाय जाय तेत्यार तोक चू मारे साते नि आव सोकतलू.”

पतरसोन भुरसू

⁶⁶ इनापोरसी तीना चेलामा गोथा घोणा सोवटा उलटा फिर गोया एने तिनान ओवतेन तेरे साते नि चाल्या.

⁶⁷ तेत्यार येसु तीनु बारा जोना काजे कोयू, “काय तुमु बी जाणे हिंड रोया?”

⁶⁸ शिमोन पतरस तीना काजे जोवाब आप्यू, “हे प्रभू, आमु कुनीनचा जाजे? ओमोर जीवनोन वाते ते तारे पास छे;.

⁶⁹ एने आमु भुरसू कोऱ्या एने जानी लेदा कि परमेश्वरोन चुखलो जोणु तुत छे.”

⁷⁰ येसु तीनुक जोवाब आप्यू, “काय मे तुमु बारा जोना काजे नि नेवाळ्यू? ते बी तुमरेमा गोथू एक जोन भुतडू छे.”

⁷¹ यो चू शिमोन इस्कारीयोतन पुऱ्यु यहुदान बारामा कोयलु होतु, काहाकि चू बारा जोनामा गोथू एक होतु, तीनाक धोरावने वावू होतु.