योहान 3 - बारेली पावरी

येसु एने निकेदमुस

¹ फरुशीमा निकदेम नावोन एक माणूस होतु जू यहुदिन सरदार होतु.

² चू राती येसुनचा आवीन तीना काजे कोयू, “हे रब्बी, आमु जानतला कि तू परमेश्वरोनचा गोथू गुरु बोनीन आव रोयू, काहाकि कुदू इना चमत्कार काजे जो तू देखाळलु, ओगर परमेश्वर तिना पुठी नि होय ती नि देखाळ सोकतलु.”

³ येसु तीनु काजे जोवाब आप्यू, “मे तुसेक छाचलीन-छाचलीन कोयो, ओगर कुदू नोवला रितीसी नि जन्म होये ती परमेश्वरोन राज देख नि सोकतलू,.”

⁴ निकदेम तीनाक कोयू, “माणूस जेतार डूकरू होय गोयू, ती कोसू जन्म होय सोकतलू? काय चू आपना आशोन कुखोमा दुसरे कावार जन्म होय सोकतलु?”

⁵ येसु जोवाब आप्यू, मे तुमुक छाचलीन-छाचलीन कोयो कि जेतार तोक कुदू माणूस पाणी एने आत्मासी नि जन्म होये ती चू परमेश्वरोन राजमा जाय नि सोकतलु.

⁶ काहाकि जे डीलोसी जन्म होयला छे, चे डील से एने आत्मासी जन्म होयलो छे, चे आत्मा छे.

⁷ नोवलाय मा कोरे कि मे तुसेक कोयू, “तुसेक नोवला रितीसी जन्म लेनो जोरुरी छे.”

⁸ वाहवू जिन्खुर जाने चाहे तिन्खुर जातली छे एने तू तेरू शब्द सोमवतेलु, बाकीन नि मालूम कि चू का गोथू आवलु एने कांखुर जातला? जू कुदु आत्मासी जन्म होयलू छे चू ओसुत छे.

⁹ निकदेम तीना काजे जोवाब आप्यू, “जे वाते कोसा होय सोकतला?”

¹⁰ यो सोमवीन येसु तीना काजे कोयू, “तू इस्राईलोन गुरु होयीन बी काय इनी वातो काजे नि सोमज्यू?

¹¹ मी तुसेक छाचलीन कोयो कि आमु जानतला छे चोत कोयतेला एने जिनाक आमु देखला छे तेरी गोवायी आपला, एने तुमु आमरी गोवायी मानतला नी.

¹² जेतार मे तुमु काजे कोवीन वाते कोयू तुमु भुरसू नि कोरतेला, ती ओगर मे तुमु काजे सोरगोन वाते कोयीस ती कोसा भुरसू कोरसू?

¹³ कुदू सोरगोपोर नि चोळ्यु, निस्तु चू सोरगोमा गोथू उतेरलू मतलब माणसोन पुऱ्यु जू सोरगोमा छे.

¹⁴ एने जिना रितीसी मुसा बोयळामा घोळसा काजे उपोर चोळाव्यू, इनी रितीसी जोरुरी छे कि माणसोन पुऱ्यु उचला पोर चोळाय जाय;

¹⁵ काहाकि जू कुदू इनापोर भुरसू कोरे तीनाक ओमोर जीवन जोळसे.

¹⁶ काहाकि परमेश्वर जोगो पोर ओसू मोंग कोऱ्यु कि तेरु मोंगावू पुऱ्यु आप देदु, काहाकि जू कुदू तीना पोर भुरसू कोरे चू नाश नी होये, बाकीन तीनाक ओमोर जीवन जोळे.

¹⁷ परमेश्वर तेरा पुऱ्या काजे जोगोमा इनान कोरता नि मूकल्यु कि जोगो पोर दोंडोन आग्या आपे बाकीन एरेन कोरता कि कोवजुग तेरे लारे छुटकारू ली लेये,

¹⁸ जू कुदू तेरे पोर भुरसू कोरे तेरे पोर दोंडोन आग्या नि होये, बाकीन जो तेरे पोर भुरसू नि कोरे चू गुणावू ठेराय गोयलु छे एरेन कोरता कि चू परमेश्वरोन पुऱ्यान नाव पोर भुरसू नि कोऱ्या.

¹⁹ एने दोंडोन आग्यान वोजह यो छे कि विजावो जोगोमा आवलो छे एने माणसे आंदारला काजे विजावासी जादा मोंग कोऱ्या काहाकि तिंदरा काम भुंडला होता.

²⁰ काहाकि जू कुदु भुंडलो कोरतेलू चू विजावो पोर दुष्मोनी कोरतेलु एने विजावो साते नी आवतेलु, ओसो नि होये कि तेरा कामो पोर गुणू लागाळाय जाय.

²¹ बाकीन जू खोरला पोर चालतलु, चू विजावान साते आवतेलु, काहाकि तेरा कामे देखायनो जुवे कि चू परमेश्वरोन तोरोफसी कोरायला छे.”

येसुन बारामा योहानोन गोवायी

²² इनान ओवते येसु एने तेरा चेला यहुदिन देसोमा आव्या एने चू चा तिंदरे पुठी रोयीन बाप्तिस्मा आपने बाज गोयू.

²³ योहान बी शालेमोन साते ऐनोन गावमा बाप्तिस्मा आपतू होतु काहाकि चा घोन सोवटो पाणी होतो, एने माणसे आवीन बाप्तिस्मा लेता होता.

²⁴ योहान तिने टेमे तोक जेलमा नि नाखायलू होतु.

²⁵ चा योहानोन चेलान कहाना यहुदिन साते चुखो कोरनेन बारामा जोखळाय पोळ्या.

²⁶ एने चे योहानोनचा आवीन तीना काजे कोया, “हे रब्बी यु माणूस यरदन नोंदीन पोले धोळे तारे साते होतु, एने जेरी तू गोवायी आपलु देख, चू बाप्तिस्मा आपतलु, एने आखा तेरेनचा आवतेला.”

²⁷ योहान जवाब आप्यू, “जेतार तोक माणसो काजे सोरगोमा गोथो नि आपाये, तेत्यार तोक तीनाक काय नी जोळ सोकतलो.”

²⁸ तुमु ते खुद मारा गोवा छे कि मे कोयलु, “मे मसिह नी बाकीन तेरे ओगोव मुकलायु छे.”

²⁹ जेरी लाडी छे; चू लाडू छे बाकीन लाडान दुस्तीदार जू उभरोयीन तेरी सोमवतलु, लाडान बुलोसी घोनु खुश होयतलु; हिमी मारी जी खुशी पुरी होयली छे.

³⁰ जोरुरी छे कि चू बोढे एने मे घोटो.

³¹ “यु उपोर गोथू आवलु चू आखान वारलु छे; जू धोरतीमा गोथू आवलु चू धोरतीन छे, एने धोरतीन वाते कोयतेला, यु सोरगोमा गोथू आवलु छे, चू आखान उपोर छे.

³² जो काय चू देखलू एने सोमवलू, तेरीत गोवायी आपतलु; एने कुदु तेरी गोवायी मानतलु नि.

³³ जू तेरी गोवायी मान लेदू चू इनी वातोपर छापू लागाळ देदू कि परमेश्वर खोरलू छे.

³⁴ काहाकि जीनाक परमेश्वर मूकललु छे, चू परमेश्वरोन वाते कोयतेलु काहाकि चू आत्मा माप-मापीन नि आपतलु.

³⁵ बास पुऱ्या काजे मोंग कोरतेलु, एने चू आखा चीजे तेरा हातोमा आप देदलु छे.

³⁶ जू पुऱ्या पोर भुरसू कोरतेलु ओमोर जीवन तेरो छे; बाकीन जू पुऱ्यान नि सोमवतेलु, चू जीवन काजे नि देखे, बाकीन परमेश्वरोन रीस तीना पोर रोयतली.”