योहान 2 - बारेली पावरी

कानामा वियाव

¹ एने तिसरे दाहळान बादमा गलीलोन सोहोरोन काना गावमा काहनासून वियाव होतु, एने येसुन आया बी चा होती.

² येसु एने तेरा चेला बी तिना वियावोमा बुलावला होता.

³ जेतार आंगुरोन रोस कोम पोळ्यु, ती येसुन आया येसु काजे कोयी, “तिंदरे जूव आंगुरोन रोस नि रोयू.”

⁴ येसु तिनीक कोयू “हे बायर, मेसेक तारेसी काय काम? हिमी मारी टेम नि आवी.”

⁵ तेरी आया पावर काजे कोयी, “होयू जो काय तुमु काजे कोये, चोत कोरजू.”

⁶ चा यहुदियान चुखो कोरनेन रितीन अनसारे दोगळान छोव ठारला डूचरा मेक रोया होता, जीनुमा दुय-दुय तीन-तीन मोन सोमायतो होतो.

⁷ येसु तीनुक कोयू, “डूचरामा पाणी भोर देवू” चे तीनुक काठेलोग भोर देदा.

⁸ तेत्यार चू तीनुक कोयू, “हिमी निकावीन खाणान कारभारीनचा लीन जावू” एने चे लीगोया.

⁹ जेतार खाणान कारभारी चो पाणी चाख्यू चो आंगुरोन रोस बोन गोयलो होतो एने नि जानतू होतु कि चो का गोथो आवलो छे (बाकीन जे पावरे पाणी निकावला होता चे जानता होता), ती खाणान कारभारी दुल्हा काजे बुलावीन तीनाक कोयू,

¹⁰ “हर एक माणूस पेहेलेत वारलो आंगुरोन रोस आपतलु छे, एने जेतार माणसे पिन छाक जातला ती, तेत्यार कोमजुर आपतला; बाकीन तू वारला आंगुरोन रोस हिमी तोक राख रोयू.”

¹¹ येसु गलीलोन कानामा तेरो यो पेहेलो चमत्कार देखाळीन तेरी महिमा कोराव लेदू एने तेरा चेला तीना पोर भुरसू कोऱ्या.

¹² एरेन ओवतेन चू एने तेरी आया एने तेरा भाशे एने तेरा चेला कफर्णहुम काजे गोया एने चा थुलाक दाहळा रोया.

मंदीरमा गोथा धंदू कोरन्याक निकावनो

¹³ यहुदिन वोलांडोनोन तीहीवार साते होतो, एने येसु यरुशलेममा गोयू.

¹⁴ चू मंदीरमा बुल, गाडरा एने पेरवा काजे वेचने वावा एने लेन देन कोरने वावाणूक बोसला देख्यू.

¹⁵ तेत्यार चू दुवळान चाबकु, बोनावीन आखा गाडरा एने बुल्यो काजे मंदीरमा गोथू निकाव देदु, एने लेन देन वावान पोयशा वेरवी देदु, एने चौरंग काजे वेछडी देदु,

¹⁶ एने पेरवा वेचने वावा काजे कोयू, “इनू काजे न्या गोथो ली जावू मारा प्रार्थनान घोरो काजे व्यापारोन घोर मा बोनावू.”

¹⁷ तेत्यार तेरा चेला काजे फोम आवी कि लिखलो छे, “तारा घोरोन आवाज मेसेक खाय जासे.”

¹⁸ इनापोरसी यहुदि अगवा तीना काजे कोया, “तू जो यो कोयतलू छे ती आमुक काहनलो चमत्कार देखाळतलु छे?”

¹⁹ येसु तीनुक जवाब आप्यू, “इना मंदीर काजे पाळ देवू, एने मे इनाक तीन दाहळामा उभो कोर दिस.”

²⁰ यहुदि अगवा कोया, “इना मंदीर काजे बोनावनेमा चावीस ने छोव साल लागला छे, एने काय तू इनाक तीन दाहळामा उभो कोर दिस?”

²¹ बाकीन चू आपना डीलोन मंदीरोन बारामा कोयलु होतु.

²² आखरी जेतार चू मोरलामा गोथू जीव उठ्यू ती तेरा चेला काजे फोम आवी कि चू यो कोयलु होतु; एने चे पवित्र शास्त्रान एने तीना बुलोन कि यो येसु कोयलु होतु, फोम कोऱ्या.

येसु माणसोन मोन काजे जानतेला

²³ जेतार चू यरुशलेममा वोलांडोनोन तीहीवारोन टेमे होतो, ती जुदा सोवटा जोना इना चमत्कार काजे यो चू देखाळतू होतु देखीन तेरे नावो पोर भुरसू कोऱ्या.

²⁴ बाकीन येसु आपना खुदो काजे तिंदरा भुरसा पोर नि छुळ्यु काहाकि चू आखा काजे उवखतू होतु;.

²⁵ एने तीना काजे गोरोज नि होती कि माणसोन बारामा कुदु गोवायी आपे, काहाकि चू खुद जानतू होतु कि माणसोन मोनोमा काय छे?