योहान 17 - बारेली पावरी

येसुन खुदोन कोरता प्रार्थना

¹ येसु जी वाते कोयू एने आपना डूवा सोरगे भूनी उचा कोरीन कोयू, “हे बास, ची टेम आव पुगली छे; आपना पुऱ्यान महिमा कोर कि पुऱ्यु बी तारी महिमा कोरे,

² काहाकि तू तिना काजे आखा जोनावर पोर होक आप्यू, कि जीनुक चू तीनुक आपलु छे तीनु आखा काजे ओमोर जीवन आपे.

³ एने ओमोर जीवन यो छे कि चे तुसेक एक धोळ्या खोरला परमेश्वर काजे येसु मसिह काजे, जीनाक तू मुकेललु छे, जाणे.

⁴ जो काम तू मेसेक कोरणे कोरीन आपलु होतु, तीनाक पुरो कोरीन मे कोवीमा तारी महिमा कोरलु छे.

⁵ हिमी हे बासो, तू आपने साते मारी महिमा तिनी महिमासी कोर जो जोगोन कोवोन पेहेले, मारी तारे साते होती.”

येसुन चेलान कोरता प्रार्थना

⁶ “मे तारो नाव तीना माणसो पोर प्रगट कोरलु छे जीनाक तू जोगोमा गोथू मेसेक आपलु छे चे तारा होता एने तू मेसेक आप्यू, एने चे तारा वचन काजे मान लेदला छे.”

⁷ हिमी चे जान गोयला छे कि जो काहीन तू मेसेक आपलु छे चो आखो तारे जुव गोथो छे;.

⁸ काहाकि यो वचन तू मेसेक आप्यू, मी तीनुक तीनु काजे पुगाळ देदू; एने चे तीनु काजे ग्रहण कोऱ्या, एने खोरलो-खोरलो जान लेदला छे कि मे तारे जुव गोथू आवलु छे, एने भुरसू कोर लेदलु छे कि तूत मेसेक मूकल्यु.

⁹ मे तिंदरेन कोरता विनता कोरो; जोगोन कोरता विनता नि कोरतू बाकीन तिंदरेन कोरता जीनुक तू मेसेक आपलु छे, काहाकि चे तारा छे;.

¹⁰ एने जो काहीन मारो छे चो आखो तारो छे, एने जो तारो छे चो मारो छे, एने इनासी मारी महिमा देखायली छे.

¹¹ मे हिमी जोगोमा नि रोयो, बाकीन जे जोगोमा रोयसे, एने मे तारेनचा आवो हे चुखलु बास, आपना तीना नावोसी जो तू मेसेक आपलु छे तीनुक सोमाव कि चे आमरेन तोसा एक होये.

¹² जेतार मे हिंदरे पुठी होतु, ती मे तारा तीना नावोसी, जो तू मेसेक आपलु छे तिनान राखवावी कोऱ्यु. मी तेरी पुस-पास कोऱ्यु, एने नाशोन पुऱ्या काजे छुळीन तिंदरेमा गोथू मोटलु नाश नी होय, इनान कोरता कि पवित्र शास्त्रामा जो कोवाय गोयलो चो पुरो होये.

¹³ हिमी मे तारेनचा आवो, एने जे वाते जोगोमा कोय, कि चे मारी खुशी हिंदरेमा पुरी जोळे.

¹⁴ मे तारो वचन तीनुक पुगाळ देदलु छे; एने जोग तिंदरे पोर दुष्मोनी कोऱ्यु, काहाकि जोसो मे जोगोन नि होय, तोसाच चे बी जोगोन नि होय.

¹⁵ मे यो विनता नि कोरतू कि तू हिनुक जोगोमा गोथू चूट ले; बाकीन यो कि तू हिनुक तिना बुराईसी सी वाचाडीन राख.

¹⁶ जोसू मी जोगोन नि होय, तोसात चे बी जोगोन नि होय.

¹⁷ खोरलान लारे हिनुक चुखो कोर तारो वचन खोरलो छे.

¹⁸ जोसू तू मेसेक जोगमा मूकल्यु, तोसुच मे बी हिनु काजे जोगमा मूकल्यु;.

¹⁹ एने तिंदरेन कोरता मी आपना खुदो काजे चुखो कोरो, काहाकि चे बी खोरलान लारे चुखा कोराये जाय.

येसुन विस्वास्यान कोरता प्रार्थना

²⁰ “मे निस्तु इंदरेन कोरता विनता नि कोरतु, बाकीन इंदरेन कोरता बी जे इंदरा वचनोन लारे मार पोर भुरसू कोरसे,

²¹ कि चे आखा एक होये; जोसू तू छे बास मारेमा छे, एने मे तारेमा छे, तोसाच चे बी आमरेमा होये, जीनामा जोग भुरसू कोरे कि तूच मेसेक मुकेललु छे.”

²² ची महिमा जी तू मेसेक आपलु ची मे हिनुक आपलु छे, कि चे तोसाच एक होये जोसा कि आमु एक छे,

²³ मे तिंदरेमा एने तुमरेमा कि चे खोरलो होयीन एक होय जाय, एने जोग जाणे कि तू मेसेक मुकेललु, एने जोसू तू मारे पोर मोंग कोऱ्यु तोसोच तिंदरे पोर मोंग कोऱ्यु.

²⁴ हे बासो, मे चाहो कि जीनुक तू मेसेक आपलु छे, चे जा मे छे चा चे बी मारे साते रोये, ती चे मारी तिनी महिमा काजे देखे जो तू मेसेक आपलु छे, काहाकि तू जोगोन पेहेले गोथू मार पोर मोंग कोऱ्यु.

²⁵ हे धोरमी बासो, जोग मेसेक नि जान्यू, बाकीन मे तुसेक जान्यू; एने जेबी जान्या कि तूच मेसेक मुकेललु चे.

²⁶ “मी तारो नाव तीनु काजे कोयू एने कोयतू रोयीस जो मोंग तुसेक मार पोर होतो चो तिंदरेमा रोये, एने मे तिंदरेमा रोयो.”