योहान 14 - बारेली पावरी

येसुन चेला काजे हिंमत आपनो

¹ तुमरो मोन कासावीस नि होये; परमेश्वर पोर भुरसू कोरु एने मार पोर बी भुरसू कोरु.

² मारा बासोन घोरमा घोनु सोवटू रोयनेन जागू छे, ओगर नि रोयतु ती मे तुमु काजे कोय देतु; काहाकि मे तुमरेन कोरता जागू तीयार कोरनेन कोरता जाम.

³ एने ओगर मी जायीन तुमरेन कोरता जागू तीयार कोरो, ती पोछु आवीन तुमु काजे मारेंचा लीन जायीस कि जा मी रोयीस चा तुमु बी रोये.

वाट, खराई एने जीवन

⁴ जा मे जाम चा वावी वाट तुमुक मालूम छे.

⁵ थोमा तीना काजे कोयू, “हे प्रभू, आमुक नि मालूम कि तू का जाणे बाज रोयू; ती वाट कोसा जानजे?”

⁶ येसु तीनु काजे कोयू, “वाट एने खोरलु एने जीवन मेत छे; बिना मारे विगुर कुदू बासोनचा नि पुग सोकतलु.

⁷ ओगर तुमु मेसेक उवखी लेता, ती मारा बासो काजे बी उवखी लेता; एने हिमी तीनाक उवखी रोया, एने तीनाक देखला बी छे.”

⁸ फिलीप तीना काजे कोयू, “हे प्रभू, बासो काजे आमुक देखाळ दे, योत आमरेन कोरता रेट छे.”

⁹ येसु तिना काजे कोयू, “हे फिलीप, मे ओतरा दाहळासी तुमरे साते छे, एने काय तू मेसेक नि उवेखतू? जू मेसेक देखलू छे चू बासो काजे देखलू छे. तू काहा कोये कि बासो काजे मेसेक देखाळ?

¹⁰ काय तू भुरसू नि कोरतेलु कि मी बासोमा छे एने बास मारेमा छे? जे वाते यो मे तुमु काजे कोय रोयू, मारेंनचा गोथू नि कोयतू, बाकीन बासोमा रोयीण आपनो काम कोरतेलू छे.

¹¹ मार पोर भुरसू कोरु कि मे बासोमा छे एने बास मारेमा छे; नीती कामो पोरसी मारू भुरसू कोरु.”

येसुन नावमा दुवा

¹² “मी तुमु काजे छाचलीन-छाचलीन कोयो कि जू मारे पोर भुरसू कोरे, जो काम मे कोरतेलू छे चू बी कोरसे, बाकीन इनू गोथा बी मोटा काम कोरसे, काहाकि मे बासोनचा जाम.

¹³ जो काय तुमु मारे नावोसी मांगे, चोत मे कोरिस कि पुऱ्यान लारे बासोन महिमा होये.

¹⁴ ओगर तुमु मारे जुवू मारा नावोसी काहीन मांगसु, ती मे तीनाक आपीस.”

चुखली आत्मान कोसोम

¹⁵ ओगर तुमु मारे पोर मोंग कोरे ती, मारा आग्या काजे मानजू.

¹⁶ मे बासो काजे विनता कोरीस एने चू तुमुक एक ओवी मदतगार आपसे कि चू कायम तुमरे साते रोये.

¹⁷ बाकीन खोरलु आत्मा, जिना काजे संसार स्वीकार नि कोर सकतला काहाकि चे तीनाक नि जानतेला; तुमु तीनाक जानतला, काहाकि तुमरे साते रोयलू, एने चू तुमरेमा रोयसे.

¹⁸ “मे तुमुक विखावावा कोबी नि छुळो; मे तुमरेनचा आवो.”

¹⁹ एने थुलिक टेम रोय गोयली छे कि ओवी संसार मेसेक नि देखे, बाकीन तुमु मेसेक देखसु, इनान कोरता कि मे जीवतलु छे, तुमु बी जीवतला रोयसू.

²⁰ तिने दाहळे तुमु सोमजी जासू कि मी मारा बासोमा छे, एने तुमु मारेमा, एने मे तुमरेमा.

²¹ जेरे जुव मारी आग्या छे एने चू तीनुक मानतलु छे, चू मारे पोर मोंग कोरतेलु छे; एने जू मारे पोर मोंग कोरतेलू छे तीनाक मारू बास मोंग कोरसे, एने मे तिना पोर मोंग कोरिस एने मे आपना खुदो काजे तेरे सामने लाविस.

²² चू यहुदा जू इस्कारीयोतन नि होतु, तीना काजे कोयू, “हे प्रभू, काय होयो कि तू आपना खुदो काजे आमरेपोर प्रगट कोरणे कोय रोयू एने जोगो पोर नि?”

²³ येसु तीनाक जोवाब आप्यू, “ओगर कुदु मार पोर मोंग कोरसे ती चू मारा वचन काजे माणसे, एने मारू बास तीना पोर मोंग कोरसे, एने आमु तेरेनचा रोयसू.”

²⁴ जू मार पोर मोंग नि कोरे, चू मारो वचन नि मानतलु; एने जो वचन तुमु सोमोवतला चो मारो नि होय बाकीन बासोन छे, जू मेसेक मूकल्यु.

²⁵ “जे वाते मे तुमरे साते रोयनेन टेमे गोथू कोयलु छे.

²⁶ बाकीन मदतगार मतलब पवित्र आत्मा जीनाक बास मारे नावसी मुकलसे, चू तुमु काजे आखा वाते सिकाळसे, एने जो काहीन मी तुमु काजे कोयलु छे, चो आखो तुमु काजे फोम देवाळसे.”

येसुन शांतीन भेट

²⁷ मे तुमुक शांती आप दोम, मारी शांती तुमुक आप दोम; जोसो जोग आपतला छे, तोसो मे तुमुक नि आपो, तुमरो मोन कासावीस नि होये एने मा बिहू.

²⁸ तुमु सोमव्या कि मे तुमु काजे कोयू, “मे जाम, एने तुमरेनचा पोछु आवीस” ओगर तुमु मार पोर मोंग कोरता, ती इना वातोसी खुश होयता कि मे बासोनचा जाम, काहाकि बास मार गोथू मोटू छे.

²⁹ एने मे यो कोयनेन पेहेले तुमु काजे कोय देदलु छे, कि जेतार चो होय जाय, ती तुमु भुरसू कोरु.

³⁰ मे हिमी तुमरे साते ओवी वाते नि कोरो, काहाकि इना जोगोन सरदार आव रोयू मारे पोर तेरु काय होक नी होय;.

³¹ बाकीन यो इनान कोरता होय रोयो कि जोग जाणे कि मे बासोपोर मोंग कोरतेलू छे, एने जोसो बास मेसेक आग्या आपलु मे तोसोच कोरतेलू छे. उठू, न्या गोथा जाता.