योहान 13 - बारेली पावरी

प्रभू भोज

¹ वोलांडोनोन तीहीवारोन पेहेले, जेतार येसु जान लेदू कि ची टेम आव लागली छे कि जोग छुळीन बासोनचा जायीस, ती आपना माणसे जे जोगोमा होता जोसू मोंग चू कोरतू होतु आखरी तोक तोसुच मोंग कोरतू रोयू.

² जेतार भुतडू शिमोनोन पुऱ्यु यहुदा इस्कारीयोतन मोनोमा यो नाख देदलु होतु कि चू धोरावे, ती खाणो खाणेन टेमे.

³ येसु, यो जानीन कि बास आखो काहीन मारा हातोमा कोर देदलु छे एने मे परमेश्वरोनचा गोथू आव रोयू एने परमेश्वरोनचा जाम,

⁴ खाणा पोर गोथू उठीन आपना उपोरला कापळा निकाव देदू, एने फेटू लीन आपनो कोळ्यो बांध्यू.

येसुन चेलान पाय धुवनो

⁵ तेत्यार टाहरामा पाणी भोरीन चेलान पाय धुवने एने जिने फेटे कोरीन कोळ्यो बांधलो होतो तिने फेटे कोरीन नुसने बाज गोयू.

⁶ तेत्यार चू शिमोन पतरस तीना काजे कोयू, “हे प्रभू काहा तू मारा पाय धुवतलु?”

⁷ येसु तीना काजे “जो मे कोरणे बाज रोयू, तू तीनाक कोबी नि सोमजे, बाकीन एरेन ओवतेन सोमजसे.”

⁸ तेत्यार पतरस कोयू, “तू मारा पाय कोबी नि धुव सोके” यो सोमवीन येसु तीना काजे कोयू, “ओगर मे तुसेक नि धुवो, ती मारे पुठी तारू काहीन बी वाटू नि होय.”

⁹ शिमोन पतरस तीना काजे कोयू, “हे प्रभू ती मारा पाय नि, बाकीन हात एने मुंडको बी धुव दे.”

¹⁰ येसु तीना काजे कोयू, जू उंगवी लेदलु छे तीनाक पाय सिवाय ओवी काहीन धुवनेन जोरुरोत नि होय, बाकीन चू निस्तु चुखलु छे; एने तुमु चुखला छे, बाकीन आखान-आखा चुखा नि होय.

¹¹ चू ते आपना धोरावने वावा काजे जानतू होतु इनान कोरता चू कोयू, “तुमु आखान-आखा चुखा नि होय.”

पाय धुवनेन मतलब

¹² तेत्यार येसु तिंदरा पाय धुव देदलु होतु, एने आपना छिंदरा पेहेरीन पोछु बोस गोयू, ती चू कोयने बाज गोयू, “काय तुमु सोमज्या कि मे तुमरे साते काय कोऱ्यु?”

¹³ तुमु मेसेक गुरु एने प्रभू कोयतेला, एने ठीक कोयतेला काहाकि मे चू छे.

¹⁴ ओगर मी प्रभू होयीन तुमरा पाय धुव्यू ती तुमु बी एक दिसरान पाय धुवनो जुवे.

¹⁵ काहाकि मे तुमुक नम्रता देखाळ देदलु कि जोसू मे तुमरे साते कोरलु छे, तुमु बी तोसोच कोऱ्या कोरु.

¹⁶ मे तुमु काजे छाचलीन-छाचलीन कोयो कि सेवक आपना मालिक गोथू मोटू नि होय, एने मुकलायलु मुकलेनेवावा गोथू.

¹⁷ तुमु जे वाते जानतेला, एने ओगर तीनु पोर चाले ती सोयावा छे.

¹⁸ मे तुमुक आखान बारामा नि कोयतू; जीनुक मी नेवाळ देदलु छे, तीनुक मे उवखतलु; बाकीन चू इनान कोरता छे कि पवित्र शास्त्रान यो वचन पुरो होये; यु मारू रुटू खादला, चे मार पोर लात देखाळे.

¹⁹ हिमी मे चो होयनेन पेहेलेत तुमुक जोताळो कि तेत्यार यो होय जाय ती तुमु भुरसू कोरु कि मे चू छे.

²⁰ “मे तुमु काजे छाचलीन-छाचलीन कोयो कि जू मेसेक मुकेलने वावाक काजे स्वीकार कोरसे, चू मेसेक स्वीकार कोरसे; एने जू मेसेक स्वीकार कोरतेलु, चू मेसेक मुकलने वावाक स्वीकार कोरतेलू.”

भुरसू घाती वोखे इशारू

²¹ ये वाते कोयीन येसु आपना आत्मामा चिंताम पोड गोयू एने जी गोवायी आप्यू, “मे तुमु काजे छाचलीन-छाचलीन कोयो कि तुमरेमा गोथू एक जोणु मेसेक धोराय देसे.”

²² चेला शंका कोरता जायीन कि यु कुनीन बारामा कोये बाज रोयू, एक दुसरा भूनी भावने बाज रोया.

²³ तेरा चेला माहीन एक जिना पोर येसु मोंग कोरतु होतु, येसुन छाती भूनी वाकू वोवीन बोस रोयू होतु.

²⁴ शिमोन पतरस तिना भूनी इशारू कोरीन तीनाक पुछु, “काय ते चू कुनीन बारामा कोय रोयू?”

²⁵ तेत्यार चू तोसुच येसुन छाती भूनी वाकू वोवीन येसु काजे पुछु, “हे प्रभू चू कून छे?”

²⁶ येसु जोवाब आप्यू, “जीनाक मी यु रुटान भुकरू डूबाळीन आपीस चू छे” एने चू भूकरु डूबाळीन शिमोन इस्कारीयोतन पुऱ्यु यहुदा काजे आप्यू.

²⁷ भूकरु लेतेच भुतडू तीनामा भोराय गोयू तेत्यार येसु तीना काजे कोयू, “जो तू कोयने बाज रोयू, मामार कोर.”

²⁸ बाकीन बोसने वावा मायला कुदु नी सोमज्या कि चू जी वात तीना काजे कालगान कोरता कोयू.

²⁹ यहुदा जुव थोयली रोयती होती, इनान कोरता काहना-काहना सोमज्या कि येसु तीनाक कोय रोयू कि जो काहीन आमुक तीहीवारोन कोरता जुवे चो मुले लेणे, नि ती यो कि गोरीबो काजे काहीन आपे.

³⁰ आखरी चू भूकरू लीन मामार बारथे जात रोयू; एने जो रातीन टेम होती.

नवली आग्या

³¹ तेत्यार चू बारथे जात रोयू ती येसु कोयू, “हिमी माणसोन पुऱ्यान महिमा होय गोयली छे, एने परमेश्वरोन महिमा तीनामा होयली छे”

³² ओगर तीनामा परमेश्वरोन महिमा होयली छे ती परमेश्वर आपनेमा महिमा कोरसे एने मामार कोरसे.

³³ “हे पुऱ्या, मी एने थुलिक वार तुमरे साते छे ओवते तुमु मेसेक हेरसू, एने जोसू मे यहुदिन काजे कोयलु, जा मे जाणे बाज रोयू चा तुमु नि आव सोकतला, तोसुच मे हिमी तुमु काजे कोयो.”

³⁴ मे तुमु काजे एक नोवली आग्या आपो कि एक दिसरा पोर मोंग कोरु; जोसू मे तुमरे पोर कोरतेलू, तोसोच तुमु बी एक दिसरा पोर मोंग कोरु.

³⁵ ओगर आपोसमा मोंग कोरसू, ती इनासी आखा सोमजी जासू कि तुमु मारा चेला छे.

पतरसोन येसुक मना करनेन भविष्यवाणी

³⁶ शिमोन पतरस तीना काजे कोयू, “हे प्रभू, तू कां जाणे बाज रोयू?” येसु जोवाब आप्यू, “जा मे जाणे बाज रोयू चा तुमु बी मारे पोछोव आव नि सोकतला; बाकीन इनान ओवतेन मार पोछोव आवसे.”

³⁷ पतरस तीना काजे कोयू, “हे प्रभू, मे हिमी तारे पोछोव कानली आव सोकतेलु? मे ते तारेन कोरता आपनु जीव बी आपदिस.”

³⁸ येसु जोवाब आप्यू, काय तू मारेन कोरता तारू जीव आपीस? मे तुसेक छाचलीन छाचलीन कोयो कि कुकळू वासे नि तेतार तोक तू तीन कावार मारु इनकार कोर दिस.