योहान 12 - बारेली पावरी

बेथनीमा येसुन आदर

¹ येसु वोलांडोनोन तीहीवार गोथा छोव दाहळान पेहले बैतनिय्याह गावमा आव्यु जा लाजर होतु, जीनाक येसु मोरलामा गोथू जीवाळलु होतु.

² चा चे तेरेन कोरता खाणो तीयार कोऱ्या; एने मार्था सेवा कोरती होती, एने लाजर तीना मायलु एक होतु जू तेर पुठी खाणो खाणेन कोरता बोसलु होतु.

³ जेतार मरीयमन जटामासीन आदु शेर मोहोंगलो इत्तर लीन येसुन पायो पोर लागाळी, एने तेरे झोटे कोरीन तेरा पाय नुसी; एने इत्तरोन गोंधसी घोर सुगंधीत होय गोयो.

⁴ बाकीन तेरा चेला मायलु यहुदा इस्कारीयोत नावोन एक चेलु जू तीनाक धोरणे वावू होतु, कोयने बाज गोयू,

⁵ “यो इत्तर तीन सौ दिनारोमा वेचीन गोरीब काजे काहा नि आप्या?”

⁶ चू यो वात इनान कोरता नी कोयू कि तीनाक गोरीबोन चिंता होती, बाकीन इनान कोरता कि चू चुटू होतु, तिंदरेजू चुरी कोरणेन थोयली रोयती होती एने तीनिमा जो काहना नाखायतो होतो चो चू निकाव लेतलु होतु.

⁷ येसु कोयू, “तिनीक रोयने देवू. तिनीक यो मारा गाळाय जाणेन दाहळान कोरता मेकने देवू.

⁸ काहाकि गोरीब ते तुमरे पुठी हमेशा रोयतलु, बाकीन मी तुमरे पुठी हमेशा नि रोयो.”

लाजर काजे मारनेन फेसलु

⁹ जेतार यहुदिन मोटी भिळ जान गोया कि चू वा छे, ती चे नि बाकीन येसुन वोजेसी आव्या बाकीन इनान कोरता बी कि लाजर काजे देखणे जीनाक चू मोरलामा गोथू जीवतलु कोरलु होतु.

¹⁰ तेत्यार प्रधान पुजारू लाजर काजे मारनेन डाव धोऱ्या.

¹¹ काहाकि तेरो वोजेसी लेकेत यहुदि जात रोया एने येसु पोर भुरसू कोऱ्या दिसरे दाहळे लोकेत माणसे जे तीहीवारोमा आवला होता यो सोमवीन कि येसु यरुशलेममा आवने बाज रोयू.

यरुशलेममा जाणो

¹² दिसरे दाहळे घोणा सोवटा माणसे जे वोलांडोनोन तीहीवारमा आवला होता यो सोमवीन कि येसु यरुशलेममा आवने बाज रोयू.

¹³ इनान कोरता खोजुरोन डाव्या लीन एने तीनाक भेटनेन कोरीन निकव्या, एने आयळने बाज गोया होसान्ना, सोयावा इस्राईलोन राजा, जू प्रभून नावोसी आवलु,

¹⁴ जेतार येसु काजे गोदळीन एक पिलो जोळ्यो; ती चू तीना पोर बोस गोयू, जोसो लिखलो छे,

¹⁵ “हे सियोनोन बेटीस मा बिहे देख, तारू राजा गोदळीन पिलापोर चोळीन आवसे.”

¹⁶ तेरा चेला ये वाते पेहेले नी सोमज्या, बाकीन जेतार येसुन महिमा देखायी ती तीनुक फोम आवी कि जे वाते तेरा बारामा लिखायली होती एने माणसे तेरे पोर इना रितीसी वेहवहार कोरला होता.

¹⁷ तेत्यार भीळमा चे माणसे गोवायी आप्या जे तिने टेमे तेरे पुठी होता जेतार चू लाजर काजे मोळवाट्यामा गोथू बुलावीन मोरलामा गोथू जीवतलु कोरलु होतु.

¹⁸ इनान वोजेसी माणसे तीनाक भेटने कोरता आवला होता काहाकि चे सोमवला होता कि यो निशाणी देखाळतलु.

¹⁹ तेत्यार फरुशी आपसमा कोया, “विचार कोरु ते खोरा कि तुमरे माहीन कुदान नि चालतलो देखू जोग तेरे पोछोव जाणे बाज रोया.”

येसु एने युनानी

²⁰ जे माणसे तीहीवारोमा आराधना कोरणे आवला होता तिंदरे मायला काहनास युनानी होतु.

²¹ चे गलीलोन बेथसदामा रोयने वावान फिलीपोनचा आवीन तीनाक विनता कोऱ्या, कि “माहाराज आमु येसु काजे भेटने छे.”

²² फिलीप आवीन अन्द्रियास काजे कोयू, तेतार अन्द्रियास एने फिलीप जायीन येसु काजे कोया.

²³ इनापोरसी येसु तीनु काजे कोयू, ची टेम आव लागली छे कि माणसोन पुऱ्यान महिमा होये.

²⁴ मी तुमु काजे छाचलीन-छाचलीन कोयो, कि जेतार तोक गोहून दाना धोरतीमा पोळीन मोरे नि, चू एखलु रोयतलु; बाकीन जेतार मोर जातलू ती लोके फोव लावतलू.

²⁵ यु आपना जीवो पोर मोंग कोरे, चू तीनाक खुवतेलु; एने जू इना जोगोमा आपना जीवो पोर मोंग नि कोरतेलू चू ओमोर जीवनोन कोरता तीनाक सोमावतलु.

²⁶ ओगर कुदु मारी सेवा कोरसे ती, मारे पोछोव चालू; एने चा मे छे, चा वारू सेवक बी रोयसे ओगर कुदु मारी सेवा बी कोरसे ती, बास तेरु मान कोरसे.

येसुन मोरनेन भविष्यवाणी

²⁷ “हिमी मारू जीव कासावीस होय रोयू इनान कोरता मी काय होयो? ‘हे बासो, मेसेक इनी टेमे सी वाचाड?’ ती, काहाकि इनान वोजेसी इनी टेमे पुग गोयलु छे.”

²⁸ हे बासो तार नावोन महिमा कोर तेत्यार जो सोरग वाणी होई, “मे तारी महिमा कोरलु छे, एने ओवी बी कोरिस.”

²⁹ तेत्यार जे माणसे उभरोहीण सोमवता होता चे कोया वादवो गाजे, दिसरा कोया, “कुदू एक सोरग दूत येसु पुठी बुल्यू.”

³⁰ इनापोरसी येसु कोयू, “यु आवाज मारेन कोरता नि होय, बाकीन तुमरे कोरता आवलु छे.

³¹ हिमी इना जोगोन नियाव होयसे, हिमी इना जोगोन सरदार; निकवाय जासे.

³² एने मी ओगर धोरती पोर गोथू उचला पोर चोळाय जाश ती, आखा काजे आपने जुव हापकीस.”

³³ ओसो कोयीन चू देखाळ देदू कि कोसा मोत सी मोरसे.

³⁴ इनापोरसी माणसे तीनाक कोया, “आमु नियम शास्त्रान जी वात सोमवला चे कि मसिह हमेशा रोयसे, ती तू काहा कोयतलु कि माणसोन पुऱ्यु काजे उचला पोर चोळनो जोरुरी छे? यु माणसोन पुऱ्यु कून छे?”

³⁵ येसु तीनु काजे कोयू, “विजावो हिमी थुलिक वार तोक तुमरेमा छे जेतार तोक विजावो तुमरे पुठी छे तेत्यार तोक चालता रोयू, ओसो नि होये कि आंदारो तुमुक आवीन घेर लेये; यु आंदाराम चालतलु चू नि जानतलु कि कांखुर जाणे बाज रोयू.

³⁶ जेतार तोक विजावो तुमरे पुठी छे, विजावा पोर भुरसू कोरु काहाकि तुमु विजावान पुऱ्या बोने” जे वाते कोयीन येसु जात रोयू एने तिंदरेनचा गोथू डूकाय रोयू.

भविष्यवाणी पुरो होयनो

³⁷ चू तिंदरे सामने चमत्कार देखाळ्यू, ते बी चे तिना पोर भुरसू नि कोऱ्या;.

³⁸ काहाकि यशयाह भविष्य कोरतान वचन पुरो होय गोयो जे चे कोयला “हे प्रभू, आमरा वारली खोबर पोर कून भुरसू कोरलु छे? एने प्रभून भूज बल कुनीपोर एखलु छे?”

³⁹ इनान वोजेसी चे भुरसू नि कोर सोक्या, काहाकि यशयाह जोबी कोयलु छे;

⁴⁰ “चू तिंदरा डूवा आंदवा एने तिंदरा मोने काठला कोर देदलु छे; कोबी ओसो नि होये कि डूवे कोरीन देखसे, एने मोनोसी समजे, एने फिरे एने मे तीनुक वारु कोरिस.”

⁴¹ यशयाह ये वाते इनान कोरता कोयलु कि चू तेरी महिमा देखलू, एने चू तेरा बारामा वाते कोऱ्यु.

⁴² ते बी अधिकारी मायला लोके तेरे पोर भुरसू कोऱ्या, बाकीन फरुशी वोजेसी देखाळता नि होता, कोबी ओसो नि होये कि चे प्रार्थना घोरोमा गोथा निकावाय जाय.

⁴³ काहाकि माणसो भूनी गोथी गोवायी तीनु काजे परमेश्वर भूनी गोथी बोढाईन आस जादा मोंगावी लागती होती.

विजावामा चालनो

⁴⁴ येसु आयळीन कोयू, जू मारे पोर भुरसू कोरतेलू, चू मार पोर नि बाकीन मेसेक मुकलने वावा पोर भुरसू कोरतेलु,

⁴⁵ एने जो मेसेक देखतला चे मेसेक मुकलने वावाक देखतलु.

⁴⁶ मी जोगोमा विजावो बोनीन आव रोयू, काहाकि जू कुदु मार पोर भुरसू कोरे चू आंदारामा नि रोये.

⁴⁷ ओगर कुदु मारी वात सोमवीन नि माने, ती मे तीनाक गुणावू नि ठेरावतू; काहाकि मे जोगो काजे गुणावा ठेरावने नि, बाकीन जोगोन छुटकारू कोरनेन कोरता आव रोयू.

⁴⁸ जू मेसेक वीटवलु माणसे एने मारा वातोन भुरसू नि कोरतेलू तीनाक गुणावू ठेरावने वावू ते एक छे मतलब जो वचन मे कोयलु छे, चोत ओगला दाहळामा तीनाक गुणावू ठेरावसे.

⁴⁹ काहाकि मे मारेनचा गोथू वाते नि कोऱ्यु; बाकीन बास जू मेसेक मुकेललु छे चू मेसेक आग्या आपलु छे कि काय-काय कोयो एने काय-काय बुलो?

⁵⁰ एने मेसेक मालूम छे कि तेरी आग्या ओमोर जीवन छे इनान कोरता मे जो काहीन बुलतलु, चो जोसू बास मेसेक कोयलु छे तोसोच बुलतलु.