योहान 11 - बारेली पावरी

लाजारोन मोरनो

¹ मरीया एने तेरी बहोनिश मार्थान गाव बैतनिय्याहान लाजर नावोन एक माणूस बिमार होतु.

² जी ची मरीया होती जी प्रभू पोर इत्तर लागाळीन तेरा पायो काजे आपना झोटे कोरीन नुसली होती, तेरु भाश लाजर बिमार होतु.

³ आखरी तेरा बहोनिशा कोयने मुकल्या, “हे प्रभू, देख, जीना पोर तू मोंग कोरतेलू, चू मांदलो छे.”

⁴ यो सोमवीन येसु कोयू, “जी बिमारी मोतन नि होय; बाकीन परमेश्वरोन पुऱ्यान महिमान कोरता छे, कि तेरे लारे परमेश्वरोन पुऱ्यान महिमा होये.”

⁵ येसु मार्था एने तेरी बहोनिश एने लाजर इंदरे पोर मोंग कोरतेलू.

⁶ ते बी जेतार चू सोमव्यू कि चू मांदलु छे, ती जीना जागा पोर चू होतु, चा दुय दाहळा रोय गोयू.

⁷ ओवते येसु चेला काजे कोयू, “आवू, आपनु ओवी यहुदाम जाता.”

⁸ चेला तिना काजे कोया, “हे रब्बी, हिमी ते यहुदि तार पोर दोगळ मार कोरणे होय रोया, एने काय तू एने बी चांत जाय रोयू?”

⁹ येसु जोवाब आप्यू, “काय दाहळान बारा घोंटा नि होयतला? ओगर कुदू दिसू चाले ती झोटवाये नी, काहाकि इना जोगोन विजावो देखलू छे.

¹⁰ बाकीन ओगर कुदू राती चाले ती झोटवायतलु काहाकि तीनामा विजावो नि होय.”

¹¹ चू जे वाते कोयू, एने ओवतेन चू तीनु काजे कोयने कोये बाज गोयू, “आमरू दुस्तीदार लाजर सुवगोयलू छे बाकीन तीनाक जागाळने जाम.”

¹² तेत्यार चेला तीना काजे कोया, “हे प्रभू, ओगर चू सुव गोयलु छे, वारलु होय जासे.”

¹³ येसु ते तेरे मोरलान बारामा कोयलु होतु बाकीन सोमज्या कि चू निंदोमा सुव जाणेन बारामा कोयू.

¹⁴ तेत्यार येसु तीनु काजे साफ कोय देदू, “लाजर मोर गोयलु छे;

¹⁵ एने मे तुमरे बारामा खुश छे कि मे चा नि होतु जीनासी तुमु भुरसू कोरे बाकीन हिमी आवू आपु तेरेनचा जाता.”

¹⁶ तेत्यार थोमा यु दिदुमुस कोवायतू होतु आपना साती चेला काजे कोयू, “आवू, आमु बी तेरे साते मोरणे जाता.”

येसु पोछु जीव उठनो एने जीवन

¹⁷ चा पुग गोया ती येसु काजे मालूम होतो कि, लाजर काजे मोळवाट्यामा मेकीन चार दाहळा होय गोयला छे.

¹⁸ बैतनिय्याह यरुशलेम साते दुय कूस नांबे होतो.

¹⁹ घोणा सोवटा यहुदि मार्था एने मरीयमन साते तेरा भाशोन मोरनो पोर शांती आपनेन कोरता आवला होता.

²⁰ जेतार मार्था येसुन आवनेन खोबर सोमवी ती तीनाक भेट कोरणे गोयी, बाकीन मरीया घोरमा बोस रोयी होती.

²¹ मार्था येसु काजे कोयी, “हे प्रभू, अगर तू न्या रोयतू, ती मारू भाश कोदि नी मोरतू.

²² एने ओवी बी मेसेक मालूम छे कि जो काहीन तू परमेश्वर जूव मांगसे, परमेश्वर तुसे काजे आपसे.”

²³ येसु तीनु काजे कोयू, “तारू भाश पोछु जीव उठसे,”

²⁴ मार्था तीना काजे कोयी, “मेसेक मालूम छे कि आखरी दाहळे पोछो जीव उठनेन टेमे चू जीव उठसे.”

²⁵ येसु तिनी काजे कोयू, “पोछु जीव उठनो एने जीवन मेत छे; जू कुदु मार पोर भुरसू कोरतेलू छे अगर चू मोरी बी जाय ती जीवसे,

²⁶ एने जू कुदु जीवतलु छे एने मार पोर भुरसू कोरतेलू छे, चू ओमोर जीवन तोक नि मोरे. काय तू इनी वातोपर भुरसू कोरतेली छे?”

²⁷ ची तीनाक कोयी, “होव, हे प्रभू, मी भुरसू कोरतेली कि परमेश्वरोन पुऱ्यु मसिह जू जोगोमा आवने वावु होतु, चू तुत छे.”

लाजर काजे जीवाळनो

²⁸ यो कोयीन ची जात रोयी, एने तेरी बहोनिश मरीयम काजे बुलावीन चुराये कोयी, “गुरु न्यात छे एने तुसेक बुलावे.”

²⁹ यो सोमवीन ची मामार उठीन तेरेनचा आवी.

³⁰ येसु हिमी गावोमा नि पुगलू होतु बाकीन तिने जागे होतु जा मार्था तीनाक मेवली होती.

³¹ तेत्यार जे यहुदि तिनी साते घोरोमा होता एने तिनी काजे शांती आपता होता, यो देखीन कि मरीयम मामार उठीन बारथे गोयली छे यो सोमज्या कि ची मोळवाट्या पोर रोडने कोरीन जाय रोयी, तेरे पोछोव चाल पोळ्या.

³² जेतार मरीयम चा पुग गोयी जा येसु होतु, ती तीनाक देखीन तेरे पायो पोर पोडीन कोयी, “हे प्रभू, ओगर तू न्या रोयतू ती मारू भाश नि मोरतू,”

³³ जेतार येसु तिनीक एने तीनु यहुदि काजे जे तिनी साते आवला होता, रोडतला देख्यू, ती आत्मामा घोनु नाराज एने कासावीस होय गोयू,

³⁴ एने कोयू, “तुमु तीना काजे का मेकला छे?” चे येसु काजे कोया, “हे प्रभू, आवीन देखले.”

³⁵ येसु रोड्यू.

³⁶ तेत्यार यहुदि कोयने बाज गोया, “देखू, यु तीना पोर कोतरु मोंग कोरतू होतु.”

³⁷ बाकीन तीनु मायला कहानास कोया, “काय यु आंदवान डूवा उगाळलु, यो बी नि कोर सोक्यू कि यु माणूस नि मोरतू?”

³⁸ येसु मोनोमा ओवी घोनु जुदु दुखी होयीन मोळवाट्या पोर आव्यु चा एक बिळो होतो एने एक दोगळू तीना पोर मेकलु होतु.

³⁹ येसु कोयू, “दोगळू छेटू कोरु” तिना मोरलान बहोनिश मार्था तीनाक कोयने लागी, “हे प्रभू, हिनामा गोथो हिमी ते गोंदायने बाज रोयो, काहाकि हिनाक मोरलू च्यार दाहळा होय गोयला होता.”

⁴⁰ येसु तिनी काजे कोयू, “काय मे तुसेक नि कोयलु होतु कि कोदि तू भुरसू कोरिस, ती परमेश्वरोन महिमा काजे देखीस.”

⁴¹ तेत्यार चे तीना दोगळा काजे छेटू कोऱ्या येसु डूवा उचा कोरीन कोयू, “हे बासो, मे तारो धन्यवाद कोरो कि तू मारो सोमवी लेदलु छे.

⁴² मी जानतू होतु कि तू हमेशा मारी सोमवतलु छे, बाकीन जी भीळ आस पास उभी छे, इनान वोजेसी मे यो कोयू जीनासी कि चे भुरसू कोरे कि तू मेसेक मुकेललु छे.”

⁴³ यो कोयीन चे मोटला आवाजसी आयळ्यु, “हे लाजर, निकवीन आव.”

⁴⁴ जू मोर गोयलु होतु चू मोळवाट्याम गोथू हात पाय बांधायलू निकवीन आव्यु, एने तेरो मूय कापळासी वेटावलो होतो येसु तीनु काजे कोयू, “हिनाक छुळ देवू एने जाणे देवू.”

येसुन खिलाप चाल

⁴⁵ तेत्यार जे यहुदि मरीयमनचा आवला होता एने तेरो यो काम देखला होता, तिंदरे मायला घोणा सोवटा जोना भुरसू कोऱ्या.

⁴⁶ बाकीन तीनु मायला काहनास फरुशीनचा जायीन येसुन कामोन खोबर आप्या.

⁴⁷ इनापोरसी प्रधान पुजारू एने फरुशी मोटली सभा मेक्या, एने कोया, “आपनु काय कोर रोया? यु माणूस ते घोना सोवटा चमत्कार देखाळतलु छे.

⁴⁸ ओगर आपु हिना काजे ओसुत छुळ देसू, ती आखा हिनापोर भुरसू कोर लेसे, एने रोमी आवीन आमरी जागा पोर एने माणसोपोर ताबू कोर लेसे.”

⁴⁹ तेत्यार तीनु मायलु कैफा नावोन एक माणूस तिने साल महायाजक होतु, चु कोयू, “तुमु कायबी नि जानतला;

⁵⁰ एने यो नि सोमोजतेला कि तुमरेन कोरता यो भोलो चे कि आपना माणसोन कोरीन एक माणूस मोरे, एने आखा माणसे नाश नि होये.”

⁵¹ जी वाते चे आपना खुदसी नि कोया, बाकीन तिने सालोन महायाजक होयीन भविष्यवाणी कोऱ्यु, कि येसु तीना जातीन कोरता मोरसे;.

⁵² एने नि निसतू तीना जातीन कोरता बाकीन इनान कोरता कि परमेश्वरोन वेरायला पुऱ्या काजे एखठा कोरे.

⁵³ आखरी तिने दाहळे गोथा तीनाक मारनेन छोमचू कोरणे बाज गोया.

⁵⁴ इनान कोरता येसु इने टेमे गोथू यहुदिन सामने आवीन नि फिऱ्यु, बाकीन चा गोथू बोयळान सातेवावान देसोन एप्रैम नावोन एक देसोमा जात रोयू; एने तेरा चेला साते चांत रोयने बाज गोयू.

⁵⁵ यहुदियान वोलांडोनोन तीहीवार साते होतु, एने जुदा सोवटा माणसे वोलांडोनोन पेहले बाहार गाव गोथा यरुशलेममा गोया कि आपना खुदो काजे चुखा कोरे.

⁵⁶ आखरी चे येसु काजे हेरने बाज गोया एने मंदीरमा उभ रोयीण आपोसमा कोयने बाज गोया, “तुमु काय सोच रोया? काय चू तीहीवारोमा नि आवे?”

⁵⁷ प्रधान पुजारू एने फरुशी यु हुकुम आप रोया होता कि कोदि कुदु यो जाणे कि येसु का छे ती कोये, काहाकि चे तीनाक धोर सोके.