योहान 10 - बारेली पावरी

गुवाव्यू एने दादरान दाखलू

¹ “मे तुमु काजे छाचलीन-छाचलीन कोयो कि जू कुदु झोपले गोथू गाडरान वाडामा नि भोराये बाकीन दुसरे जागो गोथा चोळ जातला, चे चूटा एने डाखू छे.

² बाकीन जू झोपलामा गोथू माही भोराये चू गाडरान राखवाव गुवाव्यू छे.

³ तिनान कोरता झोपलान राखवाव झोपलु उगाळ देदलु छे, एने गाडरा तेरी वात सोमवतला छे, एने चू आपना आखा गाडरा काजे नाव लीन बुलावतलु छे, एने बारथे लीन जातलू छे.

⁴ जेतार चू आपना आखा गाडरा काजे बारथे निकाव लेतलु, ती तिंदरे ओगोव-ओगोव चालतलु एने गाडरा तेरे पोछोव-पोछोव चाल पोळतेला, काहाकि चे तेरा आवाज काजे उवखतला छे.

⁵ बाकीन चे पोरायान पोछोव नि जाय, बाकीन तीनाक देखीन दोवळसे, काहाकि चे पारका बुले नि उवेखला.”

⁶ तेत्यार येसु तीनु काजे एने कोयू, बाकीन चे नि सोमजे कि जे काय वाते छे जू चू आमु काजे कोयतेलु छे.

येसु वारलु गुवाव्यू

⁷ तेत्यार येसु तीनु काजे ओवी कोयू, “मे तुमु काजे छाचलीन-छाचलीन कोयो कि गाडरान झोपलु मी छे,

⁸ जोत्रा मारेन गोथा पेहेले आव्या चे आखा चूटा एने डाखू छे, बाकीन गाडरा तेरो नि सोमव्या.

⁹ झोपलु मी छे अगर कुदू मारे झोपले माइन भोराये ती छुटकारू जोळसे एने माही-बारथे आव जाव कोरसे एने चारू जोळसे.

¹⁰ चुटू काहीन ओवी दिसरा कामोन कोरता नि बाकीन निस्तु चुरी कोरणे, एने घात कोरणे एने खोतम कोरनेन कोरता आवतेलु छे; मे इनान कोरता आव रोयू कि तीनुक जीवन जोळे, एने घोना सोवटा काजे जोळे.

¹¹ वारलु गुवाव्यू मे छे; वारलु गुवाव्यू गाडरान कोरता आपनु जीव आप देतलू छे.

¹² दाहळक्या जे नि गुवाव्या होय एने नि गाडरान मालिक होय, लेंड्याक आवतेलु देखीन गाडरा काजे छुळीन दोवळी पोळतेलु छे; एने लेंड्या तीनु काजे धोरतेला एने वेरा वेर कोर देतलो छे.

¹³ चू इनान कोरता दोवळी पोळतेलु कि चू दाहाळक्यू छे, एने तीनाक गाडरान चिंता नि होय.

¹⁴ वारलु गुवाव्यू मे छे; मे मारा गाडरा काजे जानतलु छे, एने मारा गाडरा मेसेक जानतेला छे.

¹⁵ जोसू बास मेसेक जानतलु छे एने मे बी बास काजे जाणलु-छे एने मे गाडरान कोरता मारू जीव आपतलु छे.

¹⁶ मारा ओवी बी गाडरा छे, जे इना गाडरान वाडामा नि होय मेसेक तीनुक बी लावणो जोरुरी छे चे मारा बुल सोमोवसे, तेत्यार एकुत टुवू एने एकुत गुवाव्यू रोयसे.

¹⁷ बास इनान कोरता मारे पोर मोंग कोरतेलु कि मी आपनु जीव आपतलु छे कि तीनाक पोछु ली लेये.

¹⁸ कुदू तीनाक मारेंचा गोथू हापके नी, बाकीन मी तीना काजे आपसुत आप देतलू छे मेसेक तिनान आपनेन बी होक छे, एने तीनाक पोछु लेनेन बी होक छे जी आग्या मारा बासो जू गोथी मेसेक जोळली छे.”

¹⁹ इना वातोन वोजेसी यहुदियामा पोछि फुट पोडी.

²⁰ इनामा गोथा घोणा सोवटा कोयने बाज गोया, “तीनामा भुंडली आत्मा छे, एने चू पागल छे; तेरी काहा सोमवतला?”

²¹ दिसरा माणसे कोया, “जे वाते ओसला माणसोक नि जीनामा भुंडली आत्मा छे. काय भुंडली आत्मा आंदवान डूवा उगाळ देतली छे?”

यहुदिन अविस्वास

²² यरुशलेममा स्तापित कोरनेन तिवार मोनावने बाज रोया होता; एने सेव्वान दाहळा होता.

²³ येसु मंदीरमा सुलेमानोन उटा पोर फिरतू होतु.

²⁴ तेत्यार यहुदि माणसे आवीन घेरवी लेदा एने पुछ्या, “तू आमरा मोनो काजे कोत्यार तोक शंकामा राखीस? ओगर तू मसिह छे ती साफ कोय दे.”

²⁵ येसु तीनु काजे जोवाब आप्यू, “मे तुमु काजे कोय देदू बाकीन तुमु भुरसू नि कोरतेला जो काम मी मारा बासोन नावसी कोरतेलू चेत मारो गोवा छे,

²⁶ बाकीन तुमु इनान कोरता भुरसू नि कोरतेला काहाकि मारा गाडरा मायला नि होय.

²⁷ मारा गाडरा मारू बुल सोमवतला छे; मी तीनु काजे उवखतलु एने चे मारा पोछोव-पोछोव आवतेला छे;

²⁸ एने मे तीनु काजे ओमोर जीवन आपलो छे चे कोबी नाश नि होये, एने कुदु तीनुक मारा हातोमा गोथो हापकीन नि लीजाय.

²⁹ मारू बास, जू तीनु काजे मेसेक आपलु छे, आखा गोथू मोटलु छे एने कुदु तीनुक बासोन हातोमा गोथू हापकीन नी सोकतलु.

³⁰ मे एने बास एकुत छे,”

³¹ यहुदि तीना पोर दोगळा देनेन कोरता पोछा दोगळा चुट्या.

³² इनापोरसी येसु तीनु काजे कोयू, “मी तुमु काजे मारा बासो जू गोथू जूदा सोवटा वारला कामे देखाळलु छे; तीनामा गोथा काहनला कामोसी तुमु मार पोर दोगळा दि रोया?”

³³ यहुदि माणसे जोवाब आप्या, “वारला कामोन कोरता आमु तार पोर दोगळा नि देता बाकीन परमेश्वरोन बुराई कोरनेन वोजेसी; एने इनान कोरता कि तू माणूस होयीन तू खुदो काजे परमेश्वर बोनावतलु.”

³⁴ येसु तीनु काजे जोवाब आप्यू, “काय तुमरा नियम शास्त्रामा नि लिखलो छे, मे कोयू, तू परमेश्वर छे?”

³⁵ ओगर चे तीनाक परमेश्वर कोया जिंदरेनचा परमेश्वरोन वचन पुग्यो (एने पवित्र शास्त्रान वात झुटी नि होय सोकतली),

³⁶ ती जीनाक बास चुखो ठेरावीन जोगमा मुकलु छे, तुमु तीनाक कोयतेला छे, “तू बुराई कोरतेलू छे,” इनान कोरता कि मे कोयू, “मे परमेश्वरोन पुऱ्यु छे?”

³⁷ ओगर मे मारा बासोन काम नि कोरो, ती मार पोर भुरसू मा कोरु.

³⁸ बाकीन ओगर मे कोरो, ती भोले मार पोर भुरसू मा कोरु, बाकीन तीना कामोन ते भुरसू कोरु, काहाकि तुमु जाणे एने सोमजे कि बास मारेमा छे एने मे बासोमा छे.

³⁹ तेत्यार चे ओवी तीनाक धोरणेन कोशिश कोऱ्या बाकीन चू तिंदरे हातोसी निकवी गोयू.

⁴⁰ ओवतेन चू यरदन नोंदीन पोरले धोळे तिना जागा पोर जात रोयू, जा योहान पेहेले बाप्तिस्मा आप्या कोरतू होतु, एने चा रोयू.

⁴¹ घोणा सोवटा माणसे तेरेनचा आवीन कोयता होता, “योहान ते चमत्कार नि देखाळ्यू, बाकीन जो काहीन योहान तेरा बारामा कोयलु होतु, चो आखो खोरलो होतो.”

⁴² एने चा घोना सोवटा माणसे येसु पोर भुरसू कोऱ्या.