योहान 1 - बारेली पावरी

आखान पेहेल वचन होतो

¹ आखान पेहेल वचन होतो, एने वचन परमेश्वर साते होतो, एने वचन परमेश्वर होतु.

² एने योत आखान पेहेले परमेश्वर साते होतो.

³ आखो काहीन तेरेत लारे बोनलो छे, एने जो काय बोनलो छे तीनामा गोथो कानलोबी चीज तेरे बिगुर नि बोन्यो.

⁴ तेरेमा जीवन होतो एने चो जीवन माणसोन विजावो होतो.

⁵ विजावो आंदारलामा चोमोकोतलो छे, एने आंदारलो तीनाक स्वीकार नि कोऱ्या

⁶ एक माणूस परमेश्वरोनचा गोथू आवीन उपजी गोयू जेरो नाव योहान होतो.

⁷ चू गोवायी आपने आव्यु कि विजावान गोवायी आपे, काहाकि आखा तेरे लारे भुरसू लावे.

⁸ चू खुद ते विजावो नि होतु, बाकीन तिना विजावान बारामा कोयने कोरीन आवलु होतु.

⁹ खोरलो विजावो जो हर एक माणसोक विजावो आपतेलो छे, जोगोमा आवने वावु होतु.

¹⁰ चू जोगोमा होतु, एने जोग तेरे लारे बोन्यो, एने जोग तीनाक नी उवख्यो.

¹¹ चू तेरे घोर आव्यु एने तेरा आपना माणसे तीनाक स्वीकार नि कोऱ्या.

¹² बाकीन जोत्रा तीनाक स्वीकार कोऱ्या, चू तीनुक परमेश्वरोन पुऱ्या बोननेन होक आप्यू, मतलब तीनुक जे तेरा नावो पोर भुरसू कोरतेला छे.

¹³ चे ते नि लुयसी, नि डीलोन मोर्जीसी, नि माणसोन मोर्जीसी, बाकीन परमेश्वरोनचा गोथो पोयदा होयलो छे.

¹⁴ एने वचन देहधारी होयो; एने दया एने खोरलायसी पुरो होईन आमरे इचमा वस्ती कोऱ्यु, एने आमु तेरी ओसी महिमा काजे देख्या, जोसो बासोन एखला जून महिमा.

¹⁵ योहान तेरा बारामा गोवायी आप्यू, एने आयळीन कोयू, “यु चू छे, जेरो मे वात कोयलु कि जू मारे पोछोव आवने बाज रोयू, चू मार गोथू बोढीन छे काहाकि चू मारे गोथू पेहेले होतु.”

¹⁶ काहाकि तेरी पूर्णता मा गोथू आमु आखा ली लेदला छे मतलब आशिष पोर आशिष.

¹⁷ इनान कोरता कि नियम शास्त्र ते मुसान लारे आपायलो छे, बाकीन मोंग एने खोरलो येसु मसिहन लारे पूगी.

¹⁸ परमेश्वर काजे कुदुबी कबी नि देख्यो, एखलुत पुऱ्यु जू बासोन खुवामा छे चू तीनाक सामने लाव्यू.

बाप्तिस्मा आपनेवावान गोवायी

¹⁹ योहानोन गोवायी जी छे, कि जेतार यहुदि अगवा यरुशलेम गोथा पुजारू एने लेवीणूक यो पुछनेन कोरता मूकल्यु, “तू कून छे?”

²⁰ ती चू यो मान लेदू एने इनकार नि कोऱ्यु, बाकीन मान लेदू, “मे मसिह नि होय,”

²¹ तेत्यार चे तीना काजे पुछ्या “ती कून छे? काय तू एलिया छे?” चू कोयू, “मे नि होय” “ती काय तू चू भविष्य कोरता छे?” ती चू जवाब आप्यू, “नि.”

²² तेत्यार चे तीनाक पुछ्या, “ती एने तू छे कून? काहाकि आमु आमरा मुकलने वावा काजे जवाब आपजे तू आपना बारामा काय कोयतेलु छे?”

²³ चू कोयू, “जोसो यशयाह भविष्य कोरता कोयला छे, ‘मे बोयळाम एक आयळने वावान बुल छे कि तुमु प्रभून वाट सुधा कोरु.’”

²⁴ चे फरुशी जूव गोथा मुकलाय गोयला होता.

²⁵ चे तीना काजे यो सोवाल पुछा, “अगर तू नि मसिह छे, एने नि एलिया, एने नि चू भविष्य कोरता छे, ती तू बाप्तिस्मा काहा आपतलु?”

²⁶ योहान तीनुक जोवाब आप्यू, “मे ते पाणीसी बाप्तिस्मा आपतलु, बाकीन तुमरे इचमा एक जोणु उभू छे तीनाक तुमु नि उवखतला.

²⁷ मतलब मारे बाद आवने वावू छे, जिनान खासळान बोंद बी छिमनेन लायक नि होय.”

²⁸ जे वाते यरदन नोंदीन पार बैतनिय्याह गावमा होयी, जा योहान बाप्तिस्मा आपतू होतु.

परमेश्वरोन गाडरो

²⁹ दिसरे दाहळे चू येसु काजे आपने भूनी आवतेलु देखीन कोयू, “देखू, यु परमेश्वरोन गाडरो छे जू जोगोन पाप उचलीन लीजात रोयतलु छे.

³⁰ यु चू छे जेरे बारामा मे कोयलु होतु, एक माणूस मारे पोछोव आवने बाज रोयू चू मारे गोथु मोटू छे, काहाकि चू मारे गोथू पेहेले होतु.

³¹ मे ते तीनाक उवखतू नि होतु, बाकीन इनान कोरता मे पाणीसी बाप्तिस्मा आपतू आयु कि चू इस्राईल पोर उपजी जाय.”

³² एने योहान जी गोवायी आप्यू, “मे आत्मा काजे पेरवान तोसो सोरगोमा गोथो उतरतेलो देख्यू, एने चो तेरे उपर उभरोय गोयो.

³³ मे ते तीनाक उवोखतू नि होतु, बाकीन जू मेसेक पाणीसी बाप्तिस्मा आपने मूकल्यु, चू मेसेक कोयू, जीना पोर तू आत्मा काजे उतरतेलु एने उभ रोयतलु देख्यू, चू पवित्र आत्मासी बाप्तिस्मा आपनेवावू छे.

³⁴ एने मे देख्यू, एने गोवायी आप्यू कि युत परमेश्वरोन पुऱ्यु छे.”

येसुन पेहेला चेला

³⁵ दिसरे दाहळे ओवी योहान एने तेरा चेलामा गोथा दुय जोना उभा होय रोयला होता,

³⁶ एने चे येसु पोर यु जातु होतु, भावीन कोया, “देखू यु परमेश्वरोन गाडरो छे.”

³⁷ तेत्यार चे दुयू चेला तेरो यो सोमवीन येसु पोछोव जात रोया.

³⁸ येसु फिरीन तीनुक पोछोव आवतेला देख्यू एने तीनुक कोयू, “तुमु कुनीन हेरोमा छे?” चे तीना काजे कोया, “हे रब्बी (मतलब हे गुरु), तू का रोयतलु?”

³⁹ येसु तीनुक कोयू, “चालू, ती देख लेसू” तेत्यार चे जायीन तेरा रोयनेन जागा देख्या, एने तिने दाहळे तेरे साते रोया जो दोसवा घोनटान लगभग होतो.

⁴⁰ तीनु दुय जोनामा गोथा जे योहानोन वात सोमवीन येसु पोछोव गोयला होता, एक शिमोन पतरसोन भाश अन्द्रियास होतु.

⁴¹ चू पेहेले आपनु सोगु भाश शिमोन काजे मेवीन तीनाक कोयू, “आमु काजे मसिह, मतलब मसिहा जोळ गोयू.”

⁴² चू तीनुक येसुनचा लाव्यू येसु तेरे भूनी भावीन कोयू, “तू योहानोन पुऱ्यु शिमोन छे तू कैफा मतलब पतरस कोवायीस.”

फिलीप्पूस एने नातनियल काजे बुलावनो

⁴³ दिसरे दाहळे येसु गलीलमा जाणेन कोऱ्यु चू फिलीप काजे मेव्यू एने कोयू, “मारे पोछोव आव लाग.”

⁴⁴ फिलीप, अन्द्रियास एने पतरसोन सोहोर बेथसदा रोयने वावू होतु.

⁴⁵ फिलीप नथनेल काजे मेव्यू एने तीनु काजे कोयू, “तेरा बारामा मुसा शास्त्रमा एने भविष्य कोरता कोरला छे, चू आमु काजे जोळ गोयू; चू युसूफोन पुऱ्यु येसु नासरी छे.”

⁴⁶ नथनेल तीना काजे कोयू, “काय कुदु वारलो चीज नासरेथमा गोथी निकवी सोकतली?” फिलीप तीनाक कोयू, “आवीन देखले.”

⁴⁷ येसु नथनेल काजे आपने भूनी आवतेलु देखीन तेरा बारामा कोयू, “देखू, यु छाचलीन इस्राईल छे इनाम मोटाय नि होय.”

⁴⁸ नथनेल तीना काजे कोयू, “तू मेसेक कोसू उवखतलु?” येसु तीनाक जोवाब आप्यू, “इना गोथो पेहेली कि फिलीप मेसेक बुलाव्यू, जेतार तू गुलोरोन झाडो तोवे होतो तेत्यार मे तुसेक देखलू होतु.”

⁴⁹ नथनेल तीनाक जोवाब आप्यू, “हे रब्बी, तू परमेश्वरोन पुऱ्यु छे; तू इस्राईलोन महाराजा छे.”

⁵⁰ येसु तीनाक जोवाब आप्यू, “मे जो तुसे काजे कोयलु कि मे तुसेक गुलोरोन झाडो तोवे देख्यू, काय तू इनान कोरता भुरसू कोरतेलू? तू एर गोथो बी मोटला-मोटला काम देखीस.”

⁵¹ एने तीना काजे कोयू, “मे तुसे काजे छाचलीन-छाचलीन कोयो कि तुमु सोरग काजे उगळलो, एने परमेश्वरोन सोरग दूतो काजे माणसोन पुऱ्या पोर उतरतेलो एने उपोर जातलो देखसु.”