याकुब 4 - बारेली पावरी

संसारसी दोस्ती

¹ तुमरेमा लोळाय एने झोगळू का गोथा आव लाग्या? काय तीना सुख एने विलासो मा नि जो तुमरे डीलोमा लोळायतला एने कुटायतला छे?

² तुमु लालच राखतला छे, एने तुमु काजे जोळतलो नि; तेरेन कोरता तुमु खुन कोरतेला छे तुमु छोमचू कोरतेला छे, एने कुदाक जोळतो नि ती तुमु झोगळतेला एने लोळायतला छे तुमु काजे एरेन कोरीन नि जोळतलो कि तुमु मांगतला नि.

³ तुमु मांगतला छे पुन तुमुक जोळतेलो नि, तेरेन कोरता कि भुंडी मोर्जी से मांगतला छे, काहाकि आपने भोग विलास मा उळाव देजे.

⁴ हे भुंडला विचारोन काय तुमु नी जानतला कि संसारमा दोस्ती कोरणे परमेश्वर सी नांबे कोरनो छे? आखरी जुव कुदू जोगोन दुस्ती होयने जुवे, चू आपने आप काजे परमेश्वरोन वैरी बोनावतलो छे.

⁵ काय तुमु जो सोमजोतलो कि पवित्र शास्त्र वायबार कोयतेलो छे “जिना आत्मा काजे चु आमरे इचमा बोसाळला छे, काय जू ओसी मोर्जी कोरतेला छे जेरो फोव रीस होये?”

⁶ होयु ते एने भी दया आपतलु छे एरे वोजेसी यो लिखलो छे, परमेश्वर मोटाय वावान खिलाप राखतेलु छे, पुन गोरीब पोर दया कोरतेलु छे.

⁷ तेरेन कोरता परमेश्वरोन अधीन होय जावू; एने भुतडान साते लोळायने छे, ती चू तुमरे साथो सी दोवळी पोळसे.

⁸ परमेश्वरोनचा आवू ती चुबी तुमरे साते आवसे, हे पापी माणसो, आपना हाते चुखा कोरु; एने हे दुयो मोनोन माणसे आपना मोन काजे चुखा कोरु.

⁹ नाराज होयू, एने दुख कोरु, एने रोडू तुमरी खुशी दुखोमा एने तुमरू आनंद निराशामा बोदल जाये.

¹⁰ प्रभू ओगोव नम्र बोनु ती चू तीनुक शिरोमणि बोनावसे.

¹¹ हे भाशो, एक दिसरान बोदनामी मा कोरु, जू आपना भाशोन बोदनामी कोरतेलू छे, चू नियम शास्त्रान बोदनामी कोरतेलू छे एने नियम शास्त्र पोर गुणू लागाळतलु छे; एने ओगर तू नियमशात्रापोर दोष लागाळतलु छे, ती तू नियम शास्त्र पोर चालने वावू नि बाकीन तेरे पोर हाकिम ठेरावसे.

¹² नियम शास्त्र आपनेवावू हाकिम एकुत छे, जू वाचाडने एने नाश कोरणेमा ताकत वावु छे, बाकीन तू कुन छे, जू आपना साते वावा पोर गुणू लागाळतलु छे?

भविष्यन चिंता

¹³ तुमु जो कोयतेला छे, “आज नीती वाहने आमु कुदान ओवी नोगोरमा जाईन चा एक साल रोयसु, एने काम कोरीन वारू कोमायसु.”

¹⁴ एने यो नि जानतेला कि वाहने काय होयसे. सोमवी ते लेयु तुमरो जीवन छेत काय? तुमु ते धुवाळा सारखा से, जो थुलिक वार देखायतली ओवतेन गायब होय जातली छे.

¹⁵ एरे जागे तुमु काजे यो कोयनो जुवे, ओगर प्रभू चाहे ती आपनु जीवतला रोयसु, एने यो नि ती पोलो काम भी कोरसु.

¹⁶ बाकीन हिमी तुमु आपना मोटाय मारणे पोर घोमंड कोरतेला छे.

¹⁷ तेरेन कोरता जू कुदु वारलो कोरनो जाणे एने नि कोरतेला, तेरेन कोरता पाप छे.