याकुब 3 - बारेली पावरी

जीब एक आगठो

¹ हे मारा भाशो, तुमरे माईन जादा प्रचारक नि बोने, काहाकि जानतला छे कि आपु प्रचारक ओवी बी गुणावा ठेरावसे.

² कोरीन कि आमु आखा लेके कावा चूक जातला छे; जू कुदू वचनमा नी चुकतलु चू ते तीयार माणूस छे एने आखा डील पोर भी लगाम लागाळ सोकतलु छे.

³ जेतार आमु आपने चा कोरनेन कोरता घुल्लान मुयोमा लगाम लागाळतला छे, ती आमु आखा डील काजे फिराव सोकतेला छे.

⁴ देखू, जहाज भी, कोदापी ओसो मोटो होयतला छे एने घोनो सोवटो वाहवू मा चालाय जातलु छे, तीबी एक नानली चाटान लारे डरावोरोन मोर्जीन अनसारे फेरवाय जातली छे.

⁵ तोसोच जीब भी एक नानलो डील छे एने ची मोटी-मोटी वाते कोरतेली छे देखू, आमाव आगठासी कोतरो मोटो बोयळामा आगठो लाग जातलो छे.

⁶ जीब भी एक आगठो छे; जीब आमरा डीलोमा अधोरमोन एक संसार छे, एने आखा डीलोपोर डाग लागाळतली छे, एने जीवनोन गतीमा आगठो धोपाळतली छे, एने नोरोगन कुंडान आगठासी धोपती रोयतली छे.

⁷ काहाकि आखा भातीन जंगली जोनावर, चिल्ला एने सोरकने वालु जंतू, एने पाणीमायला ते माणूस जातीन ताबामा होय सकतला छे एने होय भी गोयला छे.

⁸ पुन जीब काजे माणसो मायला कुदु ताबामा नि कोर सोकतला; चू भी एक ओसी बला छे जी कोत्यार थामे नि, ती जीवे मारणे वावू जेहेरसी भोरायली छे.

⁹ इनासी आमु प्रभू एने बासोन स्तुती कोरतेला छे, एने इनासी माणूस काजे जो परमेश्वरोन रूपमा बोनावला छे, शाप देतला छे.

¹⁰ एक मुयोम गोथो धन्यवाद एने शाप एने निकवतलो छे हे मारा भाश, ओसो नि होयनो जुवे.

¹¹ काय झोरोन एकुत मुयोम गोथो गुवो एने खोरलो दुयू पाणी निकवतला काय?

¹² हे मारा भाशो, काय गुलोरोन झाडोमा जयतुनोन आंगुरोन वेलामा गुलोर लाग सोकतला काय? तोसोच खोरला झोरा मा गोथो गुवो पाणी नि निकवी सोकतलो.

खोरली ग्यान

¹³ तुमरेमा ग्यानवान एने समोजदार कून छे? जू ओसो छे चू आपनो कामो काजे वारलो चाल-चलनमा तिना नम्रता साते प्रगट कोरे, जू ग्यानमा उत्पन होयतेली छे.

¹⁴ पुन ओगर तुमु आपने-आपने मोनमा कोळवी रीस एने खिलाप राखतला छे, ती खोरो खिलापमा मोटाय नि कोरनो, एने नि झूट बुलनो.

¹⁵ यो ग्यान चो नि होय जो उपोर गोथो उतरतेलो छे, एने संसारोन, एने शरीरोन, एने भुतडान छे.

¹⁶ काहाकि जा रीस एने हर भातीन भुंडला कामे रोयतला छे.

¹⁷ पुन जो ग्यान उपोर गोथो आवतेलो चो पेहेले चुखला होयतेलो छे ओवतेन मिलनसार, कोमल एने सोमोजनेन एने दया एने वारला फोवो गोथो लागलो एने पक्षपात एने कोपट रोहित होयतलु छे.

¹⁸ मिलाव कोरणे वाला धारमिकतान फोव हिव मेवीन वेरतला छे.