याकुब 2 - बारेली पावरी

भेदभावोन खिलाप चेतावनी

¹ हे मारा भाशो, आपनी महिमा युक्त प्रभू येसु मसिह पोर तुमरु भुरसू पक्षपात पुठी नि रोये.

² काहाकि अगर एक माणूस सोनान मुंदी एने घाटावा छिंदरा पेहेरीन तुमरा मीटिंग आवे, एने एक भिकारी भी गंदा छिंदरा पेहेरीन आवे,

³ एने तुमु तीना घाटावा छिंदरा वावान मूय देखीन कोयू “तू चा वारली जागा पोर बोठ,” एने तीना भिकारी काजे कोयु, “तू न्या उभू रोय,” नीती “मारे पायोनचा बोठ.”

⁴ ती काय तुमु आपसामा भेद-भाव नि कोऱ्या एने भुंडा विचार से नियाव कोरने वावा नि बोन्या?

⁵ हे मारा मोंगावा भाशो, सोमवू काय परमेश्वर इना जोगोन भिकारी काजे नि नेवाळ्यू कि भुरसामा मातभोर एने तीना राज्योन अधिकारी होयसू, जेरु वायदु चू तिंदरे साते कोरे जेरेसी मोंग राखतला छे.

⁶ पुन तुमु तिना भिकारीण अपमान कोऱ्या काहा मातभोर माणसे तुमरे पोर जुलूम नि कोरतेला एने काय चा तुमुक पंचूमा घीसीन-घीसीन नि लीजातला?

⁷ काय चा तीना वारला नावोन बुराई नि कोरतेला जिनान तुमु कोवायतेला छे?

⁸ तीबी कोदि तुमु पवित्र शास्त्रन तीना वचन अनसारे कि “तू आपना घोर धोळे वावा पुठी आपनेन तोसो मोंग राख” छाचलीन तीना राज व्यावस्था काजे पुरा कोरतेला छे, ती वारलोत कोरतेला छे.

⁹ पुन ओगर तुमु पक्षपात कोरता होय ती पाप कोरतेला छे; एने नियम तुमु काजे गुणावा कोयतेली छे.

¹⁰ काहाकि जो कुदू पुरी नियमोन आग्या मानतेलू छे बाकीन एकुत वातोमा चूक जासे ती चू आखी वातोमा गुणावू कोवाय गोयलु छे.

¹¹ तेरेन कोरता कि तीनुक जो कोयु “तू व्यभिचार मा कोरे” यो जू बी कोयू “तू खुन मा कोरे” तेरेन कोरता तू व्यभिचार ते नि कोऱ्यु पुन खुन कोरलु छे. ते बी तू नियम तुळने वावु ठोरावसे.

¹² तुमु तीना माणसो सारखा वचन बुलू एने काम भी कोरु, जिंदरु नियाव आजादी व्यवस्थान अनसारे होयसे.

¹³ काहाकि जू दया नि कोऱ्यु, तिंदरू नियाव बिगोर मोंगोन होयसे दया नियाव पोर जीतली छे.

भुरसू एने काम

¹⁴ हे मारा भाशो, ओगर कुदु कोयसे कि मेसेक भुरसू छे पुन चू काम नि कोरतू होसे, ती इनासी काय लाभ? काय ओसो भुरसू कोबी तेरु छुटकारू कोर सोकतलु छे?

¹⁵ ओगर कुदु भाश नीती बहोनिश नांगेरला उगाळला होसे एने तीनुक दाहळीन खाणेन कोमी होसे,

¹⁶ ओगर तुमरेमा कुदु तीनुक कोयसे, “शांतीसी जा, तुमु तातला रोयू एने आफरायला रोयू,” पुन जी चीज डीलोन कोरता गोरोजोन छे ची तीनाक नि आपे ती काय फायदु?

¹⁷ तोसोच भुरसू भी, ओगर काम सोहित नि होय ती आपना स्वभावमा मोरलु छे.

¹⁸ नीती कुदु कोय सोकतलु छे, “तुसेक भुरसू छे एने मे काम कोरतेलू छे” तू तारू भुरसू मेसेक काम नि कोरता ते देखाळ; एने मी आपनु भुरसू आपने कामोन लारे तुसेक देखाळीस.

¹⁹ तुसेक भुरसू छे कि एकुत परमेश्वर छे; तू वारलु कोरतेलू छे भुंडली आत्मा भी भुरसू राखतेला एने कापतेला छे.

²⁰ पुन हे रिकामा माणूस, काय तू यो भी नि जानतलु कि काम बिगोर भुरसू बिन कामोन छे?

²¹ जेतार आमरू बास अब्राहाम आपना पुऱ्याक इसाहाक काजे वेदी पोर चोळाव्यू, ती काय चू कामोमा धोरमी नि ठोरलु होतु?

²² आखरी तू देख लेदू कि भुरसू तेरा कामो साते मेवीन प्रभाव नाखलु छे, एने कामो साते भुरसू पुरू होयु,

²³ एने पवित्र शास्त्रोन यो वचन पुरो होयो “अब्राहामन परमेश्वर पोर भुरसू कोऱ्यु, एने यो तेरेन कोरता धारमिकता गीनाय गोयू” एने चू परमेश्वरोन जुळीदार कोवायु.

²⁴ इना रितीसी तुमु देख लेदा कि माणूस निस्तु भुरसू सी नि, बाकीन कामोसी धोरमी ठेरायसे.

²⁵ तोसो राहाब वेश्या बी, जेतार ची दुतो काजे आपने घोरमा उतरी एने दिसरे वाटेसी मुकली देदी, ती काय कामो से धोरमी नि ठोहरी?

²⁶ आखरी जोसो डील आत्मा बिगर मोरली छे, तोसो भुरसू कामो बिगुर मोरलु छे.