याकुब 1 - बारेली पावरी

सुभेच्छा

¹ परमेश्वरोन एने प्रभू येसु मसिहन चेलू याकुबोनचा गोथा चे बारा पिढी काजे गया तीतर बीतर होईन रोयला तीनुक नमस्कार मुकलो.

परीक्षा का महत्व

² हे मारा भाशो, जेतार तुमु भातीन प्रकारोन परीक्षामा पोळतेला, तेतार तीनाक आखा खुशीन वात सोमजू.

³ यो सोमजीन कि तुमरु भुरसू पारखाय जासे तेत्यार धीर आव जासे.

⁴ पुन धीर काजे आपनो काम कोरणे देयू कि तुमु पुरा एने तीयार होय जाये, एने तुमरेमा कहानला वातोमा कोमी नि रोये.

⁵ कोदि तुमरे माहीन कुदा काजे बुद्धीन कोमी होसे ती परमेश्वर जू मांगु, जू बिना हीच-किचाये आप देसे.

⁶ पुन भुरसू राखीन मांगु, एने कानली शंकामा कोरु, काहाकि शंका कोरनेवावु दोरीयान झेलकोन सारखु छे जू वाहवासी वोयतली एने उछेवतेली छे.

⁷ ओसलु माणूस यो नि सोमजे कि मेसे काजे प्रभू जुव सी कानली जोळसे.

⁸ चू माणूस दुय धोळ्यु छे एने आपनी आखी वातोमा चंचल छे.

मालदार एने गरीब

⁹ सोयावू भाश आपना मोटला पोद पोर मोटाय कोरे,

¹⁰ एने मातभोर आपना नेचली दशा पोर; काहाकि चू खोडान फुलोन तोसो जातु रोयसे.

¹¹ काहाकि दाहळू उगतात जुदु तोप पोळतेलु छे एने खोडाक सुखाड देतलु छे. एने तेरो फुल गोव जातलो छे एने हेरी शोभा जात रोयतली छे तेरेन तोसो मातभोर भी आपने वाटपोर चालता-चालता धुवामा मेवाय जासे.

परमेश्वर परीक्षा नि लेतलू

¹² सोयावू छे जू माणूस जू पारखमा वातळू रोयतलु छे, काहाकि चू छाचलीन निकवीन जीवनोन होयू मुकुट जोळ जासे जेरी वायदू परमेश्वर एने आपना मोंग कोरने वावा साते कोरलु छे.

¹³ जेतार कुदान पारख होये, तेत्यार चू यो नि कोये कि मारी पारख परमेश्वरोनचा गोथी होयतेली छे; काहाकि नि ते भुंडी वातो से परमेश्वरोन पारख होय सोकतली छे, एने नि ची कुदान पारख खुद कोरतेलु छे.

¹⁴ काहाकि हर एक माणूस आपनी लालचमा हापकीन एने फोसीन पारखमा पोळतेलु छे,

¹⁵ तेत्यार लालच भारपाये होईन पापो काजे जन्म आपे, एने पाप जेतार जाफा होय जातलो छे तेत्यार मोत काजे पोयदा कोरतेला छे.

¹⁶ हे मारा मोंगावू भाशो, धोकू मा खावू.

¹⁷ काहाकि होर एक वारलो वरदान एने होर एक वारलो दान उपोर गोथो छे, एने विजावान बासोनचा गोथो जूळतलो छे, जीनामा नि ओदोल बोदोल होयनेन वोजेह हीनापोर सहावू पोळतेलु छे.

¹⁸ हेरी मोर्जीसी आमुक खोरो वचनोन लारे पोयदा कोऱ्यु काहाकि आमु तेरी बोनावला चीजो पोर से एक भातीन पेहलु फोव छे.

सोमवनो एने तेरे अनसारे चालनो

¹⁹ हे मारा मोंगावा भाशो, जी वात तुमु जान लेवू होर एक माणूस सोमवनेन कोरता साटू एने बुलनेमा धीर एने रीसमा धीरूस होये.

²⁰ काहाकि माणसोन रीस परमेश्वरोन धोरमोन निर्वाह नि कोर सोकतला,

²¹ एरेन कोरता आखी भुंडी एने दुष्मोनी भावोन बोढती काजे नांबे कोरीन तिना वचन काजे नम्रतासी ग्रहण कर लेवू जू मोनमा वेराय गोयो एने जू तुमरे जीवन छुटकारू कोर सोकतलु छे.

²² बाकीन वचन पोर चालने वावू बोनु, एने निस्तु सोमवने वावू नि जू आपनो आप काजे धोकू देतलु छे.

²³ काहाकि जू कुदु वचन काजे सोमवने वावू रोये एने तेरो पोर चालने वावू नीन होय ती चू तिना माणसोन तोसु छे जू आपना खुदोन मुय आरसामा देखतलु छे. काममा तेरेन आशिष पावसे कि सोमवीन विसरतलु नि पुन तोसोच काम कोरतेलू छे.

²⁴ इनान कोरता कि चू आपना खुदो काजे देखीन जात रोयतेलु एने तेत्यारुत विसरी जातलु छे कि मे कोसलु होतु.

²⁵ बाकीन माणूस आजादी सिद्ध नियम शास्त्र पोर ध्यान कोरतू रोयतलु छे, चू आपना कामोमा इनान कोरता आशिष जोळसे कि सोमवीन विसरे नी बाकीन तोसोच काम कोरतेलू छे.

भोक्तीन खोरली वात

²⁶ ओगर कुदु खुदो काजे भक्त सोमजे एने आपनी जीब काजे लोगाम नि देये पुन आपनी मोन काजे धोकु देय, ती तेरी आराधना वायबार छे.

²⁷ आमरू परमेश्वर एने बासोन साते चुखली एने वारलु आराधना जी छे कि विखावावू एने रोंडायलीन दुखोमा तेरी खोबर लेय, एने आपनी आप काजे जोगोसी निरदोष राख.