इब्रानियो 9 - बारेली पावरी

संसारोन तंबू

¹ हिमी पेहेली वायदामा बी आराधनान नियम होता एने ओसो चुखलू जागू होतु जू इना जोगोन होता.

² काहाकि एक तंबू बोनावलु होतु, जेरे पेहेला जागामा दिवान बागडो एने खाणो एने भेटोन रुटा होता; यो चुखलु तंबू कोवायतू होतु.

³ दिसरान पोडदान पोछोव तंबून चू जागू होतु चुखाम चुखलो जागू कोवायतू होतु.

⁴ तीनामा धुप धोपाळनेन कोरता सोजान एक वेदी एने वाचान पेटारी होती, ची च्यारु धोळे गोथो मांडावली होती जीनामा मन्नासी भोरलु सोनान बोनावलु कोश एने हारुनोन कोव्या आवली लाकळी एने वाचान पाट्या होता.

⁵ जीना पोर विजावो करूब होता, जो फोसतावान ढाकने पोर साहावू कोरलु होतु, बाकीन आमु इनी आखी वातो काजे कोयनेन टेम नि होय.

संसारिक सेवान हद

⁶ जेतार चे चीजे इना रितीसी तीयार होय गोयी ती पुजारू बारथे वावा तंबूमा हमेशा जायीन सेवान कामे पुरा कोरता होता.

⁷ बाकीन दिसरामा निस्तु महायाजक जातु होतु एने चू बी सालोमा एकुत कावा एने लुय लेये विगुर नी जातु होतु, जीनाक चू आपना माणसोन आग्यान मा कोरायला पापोन कोरता भेट चोळावतू होतु.

⁸ पवित्र आत्मा इनापोरसी योत देखाळे कि जेतार तोक बारथे वावू तंबू उबळू छे, तेत्यार तोक चुखला जागान वाट प्रगट नी होयी.

⁹ युत तंबू ते चालू टेमोन कोरता दाखलु छे, जिनान अनसारे ओसली भेट एने बलिदान चोळावतला छे, जेरेसी आराधना कोरणे वावा मोनो काजे साबित नी कोर सोकतला.

¹⁰ काहाकि यो निसतो खाणो पिणेन चीजे एने भाती भातीन उंगवनेन विधीन बारामा डीलोन नियम छे यो सुधार कोरनेन टेमे तोक ठेराय गोयलो छे.

सोरगोन तंबू

¹¹ बाकीन जेतार मसिह आवने वावी वारली वातोन महायाजक होयीन सामने आव्यु ती चू एने मोटला एने बोनावला तंबूमा गोथा भोराईन गोयू, चू हातोन बोनावलु मतलब इनी जोगोन नी.

¹² एने बुकळान एने केवळान लुयोन लारे नी बाकीन खुद आपना लुयोन लारे हमेशान कोरता एकुत कावा चुखला जागामा भोराइन ओमोर छुटकारू ली लेदू.

¹³ काहाकि अगर भुंडला माणसो पोर बुकळा एने बुल्योन लुय एने पिलान रुखळू छितळनो डीलोन चुखलान कोरता तीनुक पवित्र कोरलु.

¹⁴ ती मसिहन लुय जू आपना खुदो काजे हमेशान आत्मान लारे परमेश्वरोन सामने निरदोष चोळाव गोयू तुमरा मोनो काजे ओवी बी जादा काहा नी चुखो कोरे तुमु जीवतला परमेश्वरोन सेवा कोरु.

¹⁵ एने इना वोजेसी चू नोवला वायदान अगवू छे जीनासी कि तिना मोरनोन लारे जू पेहेले वायदान टेमे पापोसी छुटकारू लेनेन कोरता कोरायला छे, बुलावला माणसे वायदान अनसारे ओमोरोन उत्तराधीकारोन वायदा काजे ली सोकतला.

¹⁶ काहाकि जा वायदू बांदलू छे चा वायदा बांधणे वावान मोरोन होयनेन गोरोज छे.

¹⁷ माणसोन मोरनेन ओवतेन वसीयत पाको होयतलो; काहाकि जेतार तोक कुदु जीवतलु रोयतलु तेत्यार तोक वसीयन नाम्बा कामोमा नी आव सोकतला.

¹⁸ आखरी, पेहेलू वायदू बी बिना लुयोन बांधायली.

¹⁹ जेतार मुसान माणसो काजे शास्त्रनियमोन आखी आग्या सोमवाळ देदु तेत्यार चू केवळा एने बुकळान लुय काजे पाणी रातलो कोरीन एने एजोब झाडो झुडपे कोरीन तिना किताब एने माणसो पोर छिळकि देदु.

²⁰ एने कोयू “यो तिना वायदान लुय छे जेरी आग्या परमेश्वर तुमरेन कोरता आप देदलु छे.”

²¹ इना रितीसी चू तिना तंबू पोर एने आराधनान आखा ठाहरा पोर लुय छिळकि देदू.

²² खराई ते जी छे शास्त्रनियमोन अनसारे हिमी आखा चीजे लुयोन लारे चुखा कोराय जातला छे, एने लुय वोयाळे विगुर माफी बी नी होय.

येसु मसिहन बलिदानोन लारे पापोन माफी

²³ इनान कोरता गोरोज होती कि सोरगोन चीजोन रुपमा इना बलिदानोन लारे शुद्ध कोराय जातला बाकीन सोरगोन चीज शुद्ध इनू गोथी बी वारु बलिदानोन लारे चुखा कोराय जातलो.

²⁴ काहाकि मसिहन हातोन बोनावला चुखला जागामा, जे खोरला एने चुखला जागान नमुनु ते छे भोरायू नी बाकीन सोरगोन भोरायू कि हिमी आमरेन कोरता परमेश्वर सामने आवे.

²⁵ एने यो नी कि चू आपने खुदो काजे घोळी-घोळी चोळावे जोसो कि महायाजक होर साल लुय लीन चुखला जागामा भोराय ते जातलु, बाकीन आपनो लुय नी.

²⁶ एने जोग बोनलो तिनी टेमे गोथो तिना घोळी-घोळी दुख वेठतू पोळतो बाकीन हिमी संसारोन आखरी चू एक कावा सामने आव्यु कि आपनात बलिदानोन लारे पाप काजे मिटाळ देदु.

²⁷ एने जोसी माणसोन कोरीन एकुत कावा मोरनो एने तेरे ओवतेन नियावोन होयने वावो कोराय गोयलो छे.

²⁸ तोसुत मसिह बी घोणा सोवटा पापो काजे झेलणेन कोरीन एक कावा बोलीदान होयू, एने जे माणसे तेरी वाट जुवे, तिंदरा छुटकारान कोरता दुसरी कावा बिना पापोन देखाय पोळसे.