इब्रानियो 7 - बारेली पावरी

मल्कीसदियक पुढारी

¹ यु मल्कीसदियक शालेम राजा, एने जुर भोऱ्या परमेश्वरोन पुजारू होतु, हमेशान कोरता पुजारू बोनलू रोयतलु. जेतार अब्राहाम राजा काजे मारीन पोछु जात रोयतू होतु ती युत तीना काजे भेटीन आशिष आप्यू.

² इना काजे अब्राहाम तेरी आखा चीजोन दाहवू हिस्सू बी आप्यू. यो पेहेले खुदोन नावोन मतलबोन अनसारे, धोरमोन राजा एने शालेम राजा मतलब शांतीन राजा छे.

³ जेरु नी कुदु बास, नी आश, एने नी कुदु वंशावली छे, इना दाहळान नी कुदू पेहेले होतु एने नी जीवनोन आखरी, बाकीन परमेश्वरोन पुऱ्यु सारकू देखाइन ठेऱ्यु चू हमेशान कोरता पुजारू बोनीन रोयतलु.

⁴ हिमी ध्यान लागाळू कि चू माणूस कोसू मोटू होतु एने नी जीना काजे जूनला वाराण माणूस अब्राहाम आपना लुटीन लावला मा गोथू आखान वारला चीजोन दोसव हीसु आप्यू.

⁵ लेवीन पुऱ्यामा जू पुजारान पोद लेतलु तीनु काजे आग्या जोळी कि माणसोसी, मतलब आपना भाशोसी हिमी तोक चे अब्राहामन पिढीन छे, शास्त्रनियमोन अनसारे दोसवू हिस्सू लिया कोरे.

⁶ बाकीन जे तिंदरी वंशावली मा गोथो बी नी होतु, अब्राहाम जु दोसवू हिस्सू लेदू, एने तिना काजे आशिष आप्यू जीना काजे वायदू आपलु होतु.

⁷ इनामा शंका नी होय कि नानलु मोटलासी आशिष लेतलु,

⁸ ती एक धोळे ते नाशवंत माणूस दोसवू हिस्सू ली लेतलु बाकीन दिसरामा चू लेतलु जिनान कोरता गोवायी आपायली कि चू जीवतलु छे.

⁹ ती आमु कोय सोकतला कि लेवी बी जू दोसवू भाग लेतलू एने अब्राहामन लारे दोसवू हिस्सू आप्या.

¹⁰ काहाकि तिने टेमे चू आपनु बास अब्राहामन डीलोमात होतु जेतार मल्कीसदियक तिना काजे भेट आप्यू हीना टेम पोर चू आपना बासोन डीलोमा होतु.

नोवला पुढारीन गरज

¹¹ अगर लेवी पुजारू पदोन लारे (सिद्धता) जोळ सोकती होती काहाकि इनान आधारपोर तिनी प्रजा काजे शास्त्रनियम जोळ्यो, ती ओवतेन ओसला पुजारान उबा रोयनेन काय गोरोज होती जे मल्कीसदियकन रितीन अनसारे ते छे बाकीन हारुनोन रितीन अनसारे नि कोवाय?

¹² जेतार पुजारू पोद बोदलतलो ती शास्त्रनियमोमा बी बोदल होयनो जोरुरी छे.

¹³ काहाकि जिना माणसोन बारामा जी वाते कोयली गोयली छे चू दिसरी जातीन छे जीनामा गोथू कुदू बी वेदीन सेवा नि कोऱ्यु.

¹⁴ आखरी यो सामने छे कि आमरू प्रभू यहुदान पिढीमा गोथू पोयदा होयलू होतु, असलो पिढी जिनान बारामा मुसा पुजारान बारामा काहीन वात नी कोऱ्यु.

¹⁵ आपनु दावू एने बी साफ होय जातली जेतार मल्कीसदियक सारखु कुदू दिसरू पुजारू उबरोय जातु.

¹⁶ जू डीलोन नियमोन आग्यान अनसारे नी बाकीन नाश नि होयने वावान जीवनोन ताकत अनसारे नेवळाय गोयलु छे.

¹⁷ काहाकि तेरा बारामा जी गोवायी आपाय गोयी, “ती तू मल्कीसदियकन रितीन अनसारे कायमोन पुजारू छे.”

¹⁸ एक एने पेहेली आग्या आपनी कोमजुरी एने बिना कामोन वजेसी निकवी गोयी.

¹⁹ काहाकि शास्त्रनियमोन लारे (सिद्धता) पाको नी होयतलो ती दिसरी एने वारली ओसी आस मेकायली छे, जिनान लारे आपु परमेश्वर साते आवतेला.

नोवला पुढारीन महानता

²⁰ एने जेतार कि मसिहन नेवाळनो विगुर वायदू नि होई.

²¹ काहाकि चे माणसे बीना वायदान पुजारू ठेराय गोया, बाकीन मसिह कोसोम साते तिनान लारे नेवळाय गोयलु जू तिना काजे कोयू “प्रभू कोसोम खादु एने चू तीनासी नि फोसतायू कि तू पिढ्यान पिढी पुजारू छे.”

²² इनान कोरता येसु वारली वायदान गोवा ठेहेऱ्यु.

²³ पेहेलेत जुदा सोवटामा पुजारू बोन्या कोरता होता काहाकि मोरोन तीनु काजे बोनीन नि रोयने देती होती.

²⁴ बाकीन हिमी इनान कोरता कि चू हमेशान कोरता बोनीन रोयतलु तोसु पुजारू पोद भी कायम छे,

²⁵ आखरी, जू तेरे लारे परमेश्वर साते आवतेला चू तिंदरो पुरो-पुरो छुटकारू कोरनेन ताकत छे काहाकि चू तिंदरेन कोरता निवेदन कोरणे हमेशा जीवतलु होये,

²⁶ यो वारलो होतो कि आमरेनचा ओसलु महायाजक छे जू चुखलो, निरदोष, साफ, पापी गोथू ओलोग एने सोरगसी बी उचो कोराय गोयू छे.

²⁷ जीनुक दिसरा महायाजक सारखो यो गोरोज नी होय कि दाहळीन पेहेले आपना पापो एने ओवी माणसोन पापोन कोरता बलिदान चोळावे, काहाकि चू खुद काजे बलिदान चोळावीन हमेशान कोरता पुरो कोर देदु.

²⁸ काहाकि शास्त्रनियमोन ते कोमजुर माणसो काजे महायाजक कोरीन नेवाळ देतलो छे, बाकीन वायदान चो वचन, जो शास्त्रनियमोन बादमा खावाय गोय तिना पुऱ्या काजे नेवाळे जू कायमोन कोरता पाक्कू बोन होयू.