इब्रानियो 6 - बारेली पावरी

भटकणेन परिणाम

¹ इनान कोरता आवू मसिहन बारामा पेहेला शिक्षा वातो काजे छुळीन सिद्धता भूनी बोढता जावू, एने मोरला कामोन कामोसी मोन फिरावने एने परमेश्वर पोर भुरसू कोरणे,

² एने बाप्तिस्मा, एने हात मेकने, एने मोरला काजे जीव उठने, एने ओमोरकाईन नियावोन शिक्षा तोसु पायु एने पोछो मा नाखू.

³ अगर परमेश्वर चाहे ती आपु ओसोत कोरसू.

⁴ काहाकि जे माणसे एक कावा विजावो ली लेदला एने सोरगोन वोरदानोक चाख लेदा एने पवित्र आत्मान भागीदार बोनाव लेदला छे.

⁵ एने परमेश्वरोन वारला वचनोन एने आवने वावा संसारोन ताकत चोव चाख लेदला छे.

⁶ अगर चे भोटकी जाय ती तीनु काजे मोन फिरावनेन कोरता एने पोछा नोवला बोनने काठो छे, काहाकि चे परमेश्वरोन पुऱ्या काजे आपनेन कोरता एने पोछा ख्रूसपोर चोळवतला एने प्रगटमा तेरे पोर डाग लागतला छे.

⁷ जी धोरती हमेशा पोळने वावा पाणी काजे पीतली एने जुपने वेरने वावान कोरता फायदान फोव पाकाळतली चो परमेश्वरोनचा गोथो आशिष जोळतली.

⁸ बाकीन अगर ची काटा कुसवा उगाळे ती ची रिकामी एने शापित होयने पोर एने तेरो आखरी धोपाळनो छे.

⁹ बाकीन मोंगावा हिमी तोक आमु इना रितीसी कोयजे तीबी आमुक तुमरे बारामा इनासी वारली एने छुटकारान बारामा वातोन भुरसू छे.

¹⁰ काहाकि परमेश्वर अधोरमी नी होय कि तुमरा कामो एने तिना मोंग काजे विसरी जाय जे तुमु तिनान नावोन रुपमा इना रितीसी देखाळ्या कि चुखला माणसोन सेवा कोऱ्या एने हिमी बी कोर रोया.

¹¹ आखरी मोर्जी छे कि तुमरेमा गोथू आखा आपनी आसोन पुरो निश्चय काजे नी लेये कि आखरी तोक कोशिशमा रोये.

¹² जीनासी कि तुमु उजगायला मा बोनु बाकीन तेरो अनुकरण कोरुजू भुरसू एने धीरजोन लारे बासोन वायदान पुऱ्या होये.

भुरसाम कोसोम

¹³ अब्राहाम साते वायदू आपनेन टेमे जेतार परमेश्वर जो कोसोम खाणेन कोरता कुदा काजे तेरेसी मोटू कुदू नी जोळ्यू ती चू यो कोयतू जायीन आपनी कोसोम खादु.

¹⁴ “छाचलीन, मे तुसे काजे आशिष आपीस, एने छाचलीन मे तुसे काजे बोढावीस.”

¹⁵ एने इना रितीसी धीर धोरीन वाट जुवीन चू वायदू ली लेदू,

¹⁶ काहाकि माणूस ते आपने गोथा मोटलान कोसोम खातला एने तिनी होर झोगळान फेसलू कोसोमसी पाको होये.

¹⁷ इना रितीसी जेतार परमेश्वर वायदान वारीस पोर एने बी साफ रितीसी प्रकट कोरणे चाह्यु कि तेरा उद्देश नि बोदले, ती कोसोम काजे इचमा लाव्या.

¹⁸ कि आपनु दुय पाका वातोन लारे जीना बारामा परमेश्वरोन झूट ठरण नि होयने वावो छे, आपनो हिंमतसी वातळो बांदाय जा शरण लेनेन कोरीन एरेन कोरता दोवळे कि तिनी आस काजे ली लेये.

¹⁹ जी आस माणू आपना जीवन कोरीन ओसू लंगर छे ओसली आस जी पाकी एने मजबूत छे, एने जी पोडदान माहाय तोक.

²⁰ जा येसु आमरेन कोरीन ओगोवान्यो बोनीन एने मल्कीसदियकन रिती पोर हमेशान कोरता महायाजक बोनीन भोरायलु छे.