इब्रानियो 3 - बारेली पावरी

मुसा भुरसान लायक येसु मसिही भुरसान लायक पुऱ्यु

¹ इनान कोरता हे चुखला भाशो, तुमु जे सोरगोन बुलावनेन सहभागी छे, तिना प्रेषित एने महायाजक येसु पोर जीनाक आमु मानतला मोन लागाळू.

² जिना रितीसी परमेश्वरोन आखा घोरानामा गोथू मुसा भुरसान लायोक बोनीन रोयू तिना रितीसी चुबी आपनुक बोनावने वावान सारखु भुरसान लायोक बोनीन रोयू,

³ काहाकि येसु मुसा गोथू ओतरू बोढीन महिमान योग्य सोमजी गोयलो छे जोतरो कि खोर काजे बोनावने वावन घोरोसी बोढीन आदोर राखे.

⁴ काहाकि होर एक घोरोक बोनावने वावू कुदने कुदून कुदु रोयतलु छे, बाकीन जू आखो काहीन बोनावलू छे चू परमेश्वर छे.

⁵ मुसा ते परमेश्वरोन आखा घोरमा सेवक सारकु विस्वासयोग्य रोयू कि जिना वातोन वर्णन होयने वावु होतु, तिंदरी गोवायी आपे.

⁶ बाकीन मसिह ते पुऱ्यान रुपमा परमेश्वरोन घोरोमा अधिकारी छे, एने तेरो घोर आमु छे ओगर आमु आपना धीरोन एने आसोन मोटाय काजे आखरी तोक पाका रोये.

⁷ आखरी, जोसू पवित्र आत्मा कोये, “अगर आज तुमु तेरी आवाज सोमवू.

⁸ ती तुमरा मोन काजे वातळा घोन कोरता, जोसो रीस लागाळनेन टेमे एने पारखोन दाहळे बोयळामा कोरला होता.”

⁹ चा तुमरा डाह डाहा मेसेक पारख्या, एने चावीस साल तोक मारा कामो काजे देख्या.

¹⁰ इनान वोजहसी मे तिनी टेमे रीसवाय गोयू, एने कोयू, “इंदरा मोने हमेशा भोटकी रोयतला, एने चे मारी वाट काजे नी उवख्या.”

¹¹ तेत्यार मे रीसोमा कोसोम खादु “चे मारा आराममा नि जाय सोके.”

¹² हे भाशो हुशारीमा रोयू कि तुमरेमा असलो भुंडलो एने अविस्वासीन मोन नि जुवे जो तुमु काजे जीवतला परमेश्वर सी नांबे लीन जात रोये.

¹³ बाकीन जीन दाहळे तोक आजून दाहळू कोवायतलु तुमु दाहळीन एक दिसरा काजे प्रोत्साहित कोरु, कोदि ओसो नी होये कि तुमरेमा गोथू काहनुस माणूस पापोन बेहकावामा आवीन वातळा होय जाय.

¹⁴ अगर आमु आपना पेहेला भुरसा पोर आखरी तोक मजबुतीमा पाका रोये ती आमु मसिहन भागीदार बोन गोयला छे.

¹⁵ जेतार कि कोयलो छे, “अगर तुमु तेरी आवाज सोमवे ती आपना मोनो काजे ओसो कोठोर मा कोरु जोसो कि चे रीस लागाळनेन कोरला होता.”

¹⁶ काहाकि काहना माणसे सोमवीन रीस लागाळया? काय छाचलीन मे तीनु आखा काजे नी जे मुसान अगवाईमा मिसरमा गोथा निकोवला होता.

¹⁷ चू काहना माणसो साते चावीस साल तोक रीसवाय रोयू? काय तीनुसी नी जे पाप कोरता होता? एने तिंदरा धोळे बोयळामा पोळ रोया होता?

¹⁸ चू कुणी साते कोसोम खादु कि तुमु मारा रोयनेन जागे नी भोराय सोके? काय तीनु काजे नी जे आग्या नी मान्या.

¹⁹ आखरी आपनु देखतला कि बिना भुरसान कोरता चे भोराय नी सोक्या.